Во Дебар тројно убиство на сопружници и нивната малолетна ќерка


Дебар, 27 август, 2018 - 9:11 (META) 

Основното јавно обвинителство Гостивар соопшти дека врши увид во приватна куќа во Дебар каде што се пронајдени безживотни тела на три лица.

Според првичните сознанија на обвинителството, станува збор за тројно убиство, а жртвите се семејство – маж, жена и нивната ќерка на возраст од околу 13 години, кои времено живееле во Италија. Сторителот засега е непознат.

Надлежен јавен обвинител е на терен и работи на откривање на сторителот и на утврдување на мотивите. Издадени се серија наредби за прибирање траги од лице место, вештачења и претреси.

Според СВР Охрид, случајот во полиција бил пријавен вчера во 20.45 часот како убиство, а убиените се А.П.(54), неговата сопруга Н.П.(53) и нивната 14-годишна ќерка.


Порој однесе најмалку 10 животи во јужна Италија


Рим, 21 август, 2018 - 12:42 (META) 

Најмалку 10 жртви однесе порој што се појави по обилните дождови во јужниот италијански регион Калабрија. Загинатите биле туристи, главно Италијанци, кои вчера биле на планинарење и се движеле во исушената клисура, кога ненадејно надошла водата од обилните дождови.

Според италијанската цивилна заштита, 18 луѓе се спасени, а шестмина се во болница. По преживеаните и телата загинатите се трагало вчеравечер и во текот на ноќта, со големи рефлектори.

Трагедијата се случила во кањонот на Раганело во  источниот дел на националниот парк Полино. Во времето на инцидентот во кањонот имало најмалку две туристички групи.

Спасувачката операција е во тек, оти уште три лица се водат како исчезнати.

Карло Танси, раководител на Отсекот за цивилна заштита на Калабрија вели дека клисурата бргу се наполнила со вода и луѓето ги катапултирала од карпите.

Според Лука Франчезе од Горската спасителна служба во Италија водата во клисурата достигнала 2,7 метри височина, а ваквиот порој типично се случувал зиме, а никогаш на лето, поради што многу туристи се упатуваат во разгледување токму во летните месеци.

Ова е втора голема трагедија во Италија во две седмици. На 14 август се урна мост на автопат во Џенова, при што загинаа вкупно  43 лица.

 


Се расчистува шутот од мостот кај Џенова, потрагата по преживеани продолжува


Џенова, 17 август, 2018 - 12:23 (META) 

Багери утрово почнаа да ги расчистуваат урнатините на надвозникот во близина на Џенова, кој се урна во вторникот. По три дена од трагичната несреќа, сè уште се трага по преживеани.

Тешката механизација го тргна големиот вертикален дел на мостот, со што се отвора нов простор за потрага. Спасувачите трагаат по 10 до 20 луѓе, кои се водат за исчезнати.

Неофицијално, во трагедијата во која се урна дел од надвозникот висок 45 метри, загинаа најмалку 39 лица. Меѓу загинатите има шестмина Французи, а другите идентификувани се Италијанци.


Се урна мост во Џенова, нема информации за повредени и загинати


Џенова, 14 август, 2018 - 13:52 (META) 

Мост кој е дел од автопатот А10 се урна во близина на италијанскиот град Џенова, соопшти полицијата, и се стравува дека под урнатините има луѓе и автомобили.

Мостот е висок околу 100 метри, а весникот „Кориере дела сера“ објави дека под него има затрупани луѓе. „Ла Република“ објави дека тој дел од градот е густо населен.

Фотографиите од местото на настанот покажуваат дека се урнал средишниот дел од мостот, под кој има огромни количества бетон.

Возила на итната помош се на местото на настанот, но засега нема официјална потврда дали има жртви.

Познат под името Моранди, мостот е изграден во 1960 година, а бил реконструиран во 2016 година.

Македонскиот оперски пејач Благој Нацоски кој живее и работи во Џенова, се огласи на социјалните мрежи и соопшти дека е добро откако се случи несреќата.

– Ви благодарам на сите за пораките. Jас сум добро, дома сум, шокиран. Денеска требаше да поминам на тој мост – напиша Нацоски.

 


Италија протера македонски државјанин осомничен за тероризам


Скопје, 9 август, 2018 - 12:16 (META) 

Италијанските власти протераа четири лица осомничени за тероризам, меѓу кои и еден македонски државјанин.

„Четворицата странци, од нив еден Косовец (37) и еден Македонец (39), протерани се од Италија поради опасност по безбедноста на земјата. Еден од странците е Французин (28) кој го примил радикалниот ислам, додека другиот државјанин на Тунис (45)“, пишуваат албанските медиуми.

Според нив, македонскиот државјанин претходно е осудуван од судот во Сиена, регион Тоскана, поради семејно насилство и бил под надзор на полицијата. Припаѓал на парамилитарна организација активна во конфликтите на Балканот.

Подолго време бил следен и Французинот бидејќи бил на списокот на лица опасни за безбедноста на земјата.
Косовецот живеел во Болоња, бил приведуван поради насилство врз сопругата и децата при што и во затворската ќелија проповедал радикален ислам.

Државјанинот на Тунис исто така бил во затвор каде освен проповедањето радикален ислам бил поттикнувач и на конфликти во затворот.


Во Драч запленети половина тон кокаин


Драч, 28 февруари, 2018 - 11:22 (META) 

Албанската полиција во пристанишниот град Драч заплени над 500 килограми кокаин, пристигнат од Колумбија, кој требало да биде транспортиран кон Италија.

Како што јави дописникот на МИА, дрогата, скриена во камион што патувал за Италија, била пронајдена со помош кучиња трагачи по наркотици.

Според албанскиот Сектор за борба против тровијата со дрога, запленувањето на кокаинот следува по подолга истрага, а информации биле добиени од германската полиција.

Ова е досега најголемо количество на кокаин запленето во Албанија.


Огромна дупка во Рим проголта седум автомобили


Рим, 15 февруари, 2018 - 14:34 (META) 

Над 20 семејства се евакуирани вчеравечер во населбата Балдуина на северозападот на Рим, откако нешто пред 18 часот се отворила голема дупка во која пропаднале седум автомобили. За среќа нема повредени.

Земјиштето пропаднало создавајќи дупка длабока околу 10 метри, а некои жители велат дека претходно чувстувале тресење на подовите кога во близина се вршеле градежни работи.  Во текот на вечерта и ноќта се вршела евакуација на жителите, а пожарникарите и безбедносните служби се обидуваат да ги утврдат причините за пропаѓањето. Локацијата е близу до градилиште, каде работите се почнати во октомври минатата година со уривање објекти, а се планира да се градат станбени згради и подземни паркинзи.

На местото каде се создаде понорот, меѓу 25 и 28 јануари поради големи загуби на вода се вршени повеќе зафати, но вода и понатаму истекувала. Јавниот обвинител на Рим почна истрага.


Најмалку тројца мртви во железничка несреќа кај Милано


Милано, 25 јануари, 2018 - 10:07 (META) 

Според сегашните информации, помеѓу три и пет луѓе го загубиле животот во тешката железничка несреќа што се случила утрово кога воз излетал од шините близу италијанскиот град Милано. Десет луѓе се во критична состојба во болница а стотина други се повредени, јавуваат италијанските медиуми.

Државната железница „Феровие дело Стато“ соопшти дека регионален воз излетал од шините на околу 40 километри од Милано, кај станицата Пиолтело Лимито.


Заев до 17 јануари ќе биде на зимски одмор во Италија


Скопје, 10 јануари, 2018 - 11:29 (META) 

Премиерот Зоран Заев од денеска до 17 јанаури ќе го користи зимскиот одмор во Италија, соопшти портпаролот на Владата, Миле Бошњаковски на денешната прес-конференција.

Како што додаде Бошњаковски, Заев со семејството веќе отпатувал за Италија.

За Нова година, македонскиот премиер беше во приватна посета на Солун, каде домаќин му беше солунскиот градоначалник, Јанис Бутарис.


Почина озлогласен шеф на сицилијанската мафија


Рим, 17 ноември, 2017 - 10:47 (META) 

Озлогласениот шеф на сицилијанската мафија, Салваторе Тото Рина, почина во Парма во 87-година од животот, јавуваат италијанските медиуми.

Рина е затворен во 1993 година, откако е осуден на 26 доживотни казни затвор. Се верува дека тој го наредил убиството на повеќе од 150 лица.

Рина боледувал од рак и бил во медицински индуцирана кома. Семејството имало посебна дозвола да го посетува во затворското крило на болницата во Парма, јавува „Би-би-си“.

Неговиот најстар син, Џовани, исто така служи доживотна затворска казна.

Рина е одговорен за низа бомбашки напади на мафијата во Рим, Милано и во Фиренца во 1993 година, кога загинаа десетици лица.

Една година пред тоа, двајца судии, борци против мафијата, Џовани Фалконе и Паоло Борселоно, се убиени во „војната на Рина против државата“.