!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Рама во Трст облече костум, ама и бели патики


Трст, 12 јули, 2017 - 14:06 (META) 

Албанскиот премиер Еди Рама на самитот Западен Балкан – ЕУ во италијанскиот град Трст се појави во „полежерно“ издание.

На самитот на високо ниво, кој се одржува во рамки на Берлинскиот процес, Рама се појави во костум и во спортски бели патики од познатиот бренд „адидас“.

Ова не е првпат Рама да се појави во „лежерна“ варијанта на поголеми дипломатски средби. Тој минатиот месец на неформалната вечера, која шефицата на европската дипломатија Федерика Могерини ја организираше со премиерите од Западен Балкан, се појави во долна тренирка, спортска маица, патики и во сако.


Во Трст почнува самитот Западен Балкан – ЕУ


Трст, 12 јули, 2017 - 10:41 (META) 

Во Трст денеска почнува бизнис-форумот во рамки на самитот на лидерите на државите од Западен Балкан, на кој, покрај еврокомесарот за проширување и за добрососедска политика, Јоханес Хан, учествуваат и министрите за трговија и за економија на земјите од Западен Балкан.

Самитот се одржува во рамки на Берлинскиот процес, иницијатива покрената во 2014 година, а која има цел да ги подобри европските перспективи на државите од ова подрачје, кои се во процес на евроинтеграции, да ги зајакне економски и да ги поврзе.

На самитот ќе присуствуваат претставници на Албанија, Босна и Херцеговина, Косово, Македонија, Црна Гора и Србија, претставници на полноправните членки на ЕУ, односно на Хрватска, Словенија, Австрија, Франција, Германија и на Италија, како и високата претставничка за надворешна политика и за безбедност на ЕУ, Федерика Могерини, и комесарката за транспорт, Виолета Булц.

Потврдено е и доаѓањето на германската канцеларка Ангела Меркел и на францускиот претседател Емануел Макрон, кои ќе се сретнат со италијанскиот премиер Паоло Џентилони.

Премиерот Зоран Заев, кој ја предводи македонската владина делегација на самитот, ќе има средби со највисоките европски државници и претставници на ЕУ и на ЕК, премиерите на Албанија, Еди Рама, на Србија, Ана Брнабиќ, и на Словенија, Миро Церар, како и со шефот на британската дипломатија, Борис Џонсон.

Во пресрет на собирот, Могерини синоќа порача дека во Трст ќе се разговара за „конкретни прокети“ за поттикнување на економскиот развој на регионот и спроведување реформи. Истовремено, официјалниот протокол на собирот предвидува учесниците да потпишат договор за сообраќајна заедница, од кој се очекува да ја поттикне интеграцијата на сообраќајната мрежа на Западен Балкан и на ЕУ.

Се очекува Европската комисија да најави доделување нови средства во рамки на годишниот пакет на поврзување, а истовремено, земјите од Западен Балкан треба да усогласат акционен план за развој на регионално економско подрачје.


Италија бара од европските партнери да ги отворат своите пристаништа за мигрантите


Париз, 2 јули, 2017 - 16:01 (META) 

Италијанското министерство за внатрешни работи денеска побара од европските земји да ги отворат своите пристаништа за прием на бродови со мигранти, со што би се ублажил притисокот што го трпи Италија.

Денеска во Париз се состанаа министрите за внатрешни работи на Италија, Франција и на Германија, Марко Минити, Жерар Коломб и Томас де Мезијер, кои ќе разговараат за приливот на мигранти и за начините за помош на Италија која е соочена со овој бегалски бран.

„Италија е под голем притисок“, изјавил Минити во пресрет на состанокот, додавајќи дека Италија би можела да го блокира влезот на странски бродови со мигранти спасени во Средоземното Море.

Италија повеќепати се жалеше дека сама се соочува со мигрантската криза и ги повика европските земји да покажат поголема солидарност и да ѝ помогнат.

Во Италија, од почетокот на оваа година пристигнале 83.000 мигранти, што е за 19 отсто повеќе во споредба со истиот период од минатата година.

На состанокот во Париз ќе присуствува и еврокомесарот за миграција, Димитрис Аврамопулос.


Османи – Ромео: Време е да се затворат меѓуетничките, како и сите други отворени прашања


Скопје, 15 јуни, 2017 - 13:56 (META) 

Време е да се затворат меѓуетничките, како и сите други отворени прашања кои се клучен елемент за евроатлантските аспирации на Македонија, истакнал вицепремиерот за европски прашања, Бујар Османи, на денешната средба со амбасадорот на Италија во земјава, Карло Ромео.

„Имаме голем предизвик пред нас да надоместиме за изгубеното време и се надевам дека тоа ќе го направиме во тесна соработка со сите заинтересирани страни во земјата, како и со меѓународните партнери“, рекол Османи, се наведува во соопштението од неговиот кабинет за средбата.

Во врска со аспирациите на Македонија за членство во Европската Унија, Османи нагласил дека фокусот останува на исполнувањето на обврските кои произлегуваат од итните реформски приоритети и Договорот од Пржино и дека очекува да се постигнат резултати, за да се отстрани условеноста на препораката за членство.

Тој го посочил Берлинскиот процес како добар механизам за понатамошно зајакнување на регионалната соработка на земјите од Западен Балкан и додал дека земјава очекува конкретни резултати од претстојниот самит во Трст, кој се одржува во рамките на Берлинскиот процес.

Вицепремиерот Османи и амбасадорот Ромео, воедно, изразиле задоволство од билатералната соработка меѓу двете земји, како и од меѓусебните пријателски односи, посочувајќи дека има простор за нивно унапредување со нови конкретни проекти.


Италијанскиот премиер Џентилони го покани Заев на самитот во Трст


Скопје, 2 јуни, 2017 - 17:13 (META) 

Премиерот на Италија, Паоло Џентилони, испрати честитка до новиот премиер, Зоран Заев, за формирањето нова влада, соопшти денеска италијанската амбасада во Скопје.

Џентилони, исто така, го поканил Заев да учествува на самитот во Трст, кој се одржува во рамки на Процесот Западен Балкан.

И шефот на италијанската дипломатија, Анџелино Алфано, испрати честитка до неговиот нов колега, министерот за надворешни работи на Македонија, Никола Димитров. Во честитката се наведува дека Италија ќе продолжи да ги поддржува евроатлантските аспирации на Македонија.


По 23 години МВР ја заврши најдолгата потрага по бегалец од затвор


Скопје, 25 мај, 2017 - 17:12 (META) 

Македонската полиција извести дека со екстрадицијата на македонскиот државјанин Д.М. од Италија во Македонија на крајот од минатиот месец, Секторот за меѓународна полициска соработка на МВР ја завршил најдолгата потрага по бегалец во историјата на македонската полиција, која траела цели 23 години еден месец и 14 дена.

Според соопштението на полицијата, на 12 јануари 1989 година Д.М. со соучесник извршиле брутално убиство на маж со секира, кого потоа го искасапиле. На 19 јуни 1989 година тогашниот Окружен Суд во Битола ги осудил Д.М. на 15 годишна а соучесникот на 12 годишна затворска казна за убиство.

На 14 март 1994 година Д.М., избегал додека бил на викенд отсуство од затворот „Идризово“. Следниот ден е распишана меѓународна потерница, како и меѓународната потрага, која траеше цели 21 година, 8 месеци и 12 денови, до неговото апсење во Италија на 27 ноември 2015 година.

По двегодишната екстрадициона постапка тој е спроведен во КПУ Идризово каде што треба да ја одлежи затворската казна изречена во 1989 година.


Алфано: Новата влада да ги спроведе клучните реформи


Рим, 18 мај, 2017 - 19:47 (META) 

Италијанскиот министер за надворешни работи и меѓународна соработка, Анџелино Алфано, денеска го поздрави доделувањето на мандатот за формирање влада на Зоран Заев и изрази надеж дека новата влада ќе ги спроведе клучните внатрешни реформи, неопходни за продолжување на евроатлантските интеграции.

Ја поздравувам одлуката на претседателот на поранешна југословенска Република Македонија, Иванов, да му го додели мандатот за формирање на новата влада на Зоран Заев. Ова е важен чекор што води кон разврска на актуелната тешка политичка криза. Се надеваме дека набргу во Скопје ќе се формира нова влада поддржана од парламентарното мнозинство и дека ќе ги спроведе клучните внатрешни реформи заради продолжување на евроатлантските интеграциски напори. Во тој поглед, поранешната југословенска Република Македонија може и понатаму да смета на поддршката од Италија, особено како актуелен претседател на Процесот за Западен Балкан – вели Алфано во изјавата што ја пренесе министерството за надворешни работи на Италија на својата веб-страница.


Ахмети: ДУИ го почитува унитарниот карактер на Македонија, треба да се избере влада


Тетово, 13 мај, 2017 - 12:44 (META) 

Претседателот на ДУИ, Али Ахмети, на денешната средба со амбасадорот на Италија, Карло Ромео, нагласил дека ДУИ го почитува уставниот поредок, како и унитарниот карактер на земјата, додека новата реформска влада треба што поскоро да се избере и да почне со работа, извести ДУИ.

Во врска со локалните избори, Ахмети рекол дека ДУИ ги поддржува измените на изборниот законик за да се овозможи нормално функционирање до одржување на изборите и изборот на новата администрација.

Лидерот на ДУИ во разговорот со италијанскиот амбасадор исто така рекол  дека нема никакви пречки за одложување и дека приоритет на новата влада се реформите во судството, евро-атланската интеграција, Охридскиот договор, добрите меѓуетнички и меѓусоседски односи, како и економскиот развој и отворањето нови работни места.


Италијанско МНР: Изборот на нова влада е од суштинско значење за Македонија


Рим, 4 мај, 2017 - 19:49 (META) 

Италија со загриженост го следи продолжението и развојот на политичката криза во Македонија и ја осудува која било форма на насилство во институциите, се вели во соопштението на Министерството за надворешни работи на Италија, по повод насилствата во Собранието од 27 април.

Од италијанското МНР повикуваат дијалогот помеѓу политичките сили во земјата да се одвива во Собранието и во форми предвидени со нормалните демократски правила.

„Италија бара максимална посветеност од страна на сите што се носители на политичката одговорност, за да се избегне каква било форма на насилна конфронтација, како и каква било можност за девијација кон сценарија што би можеле да поттикнат опасни меѓуетнички несогласувања“, се вели во соопштението.

Италија, се додава во него, се надева дека изборот на Талат Џафери за претседател на Собранието може да биде почеток на наоѓање на консензуално решение кое ќе ја води земјата кон избор на влада со соодветна парламентарна поддршка и во согласност со Уставот.

Оттаму нагласуваат дека овој развој на настаните е од примарен интерес за граѓаните на земјата и е од суштинстко значење за Македонија да може да продолжи по патот на реформите, со кои единствено може да напредува кон евроатлантските интеграции.

„Италија придава големо значење на напредокот на земјата кон европската интеграција, како и на другите држави од регионот, и е посветена на таа цел како актуелен претседавач со ротирачкото претседателство на процесот за земјите од Западен Балкан. Во тој контекст Италија се надева дека властите во Скопје ќе ги преземат сите неопходни чекори за земјата да може да има максимална корист од учеството во процесот, пред сè на самитот на земјите од Западен Балкан, кој ќе се одржи во Трст на 12 јули 2017 година“, порачуваат од италијанското МНР.


ИОМ: Повеќе од 43.000 мигранти пристигнале во Европа од почетокот на 2017 година


Женева, 25 април, 2017 - 13:12 (META) 

Повеќе од 43.000 мигранти и бегалци пристигнале во европските земји од почетокот на оваа година, откако успаеле да го преминат Средоземно Море, соопшти денеска Меѓународната организација за миграција (ИОМ), пренесуваат агенциите.

Во извештајот се наведува дека во овој период исчезнале околу 1.000 луѓе за време на опасното патување преку Медитеранот во Европа.

Инаку, бројот на мигранти што во изминатите четири месеци пристигнале на грчките острови изнесува 4.843 лица, што е значително помалку во споредба со истиот период минатата година кога пристигнале повеќе од 154.000 луѓе.

Од почетокот на оваа година, преку море во Италија влегле 36.851 мигрант, што е зголемување од 45 отсто во однос на бројот на пристигнувања на мигранти во оваа земја по централната средоземна рута.