!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Обвинителството будно ги следи медиумите за „Маѓар телеком“ и „презема дејства“


Скопје, 25 април, 2017 - 17:19 (META) 

Основното јавно обвинителство за гонење организиран криминал и корупција будно ги следи сознанијата од медиумите и врз основа на нив почна дополнителни дејства за меѓународна правна помош. Ова е дел од одговорот на Јавното обвинителство на Република Македонија на нашето прашање „Дали исходот од постапката за случајот „Маѓар телеком“ во САД ќе влијае на истрагата за случајот во Македонија?“.

Од Обвинителството велат дека за случајот во земјава се водат два предмети, во ОЈО Скопје и во ОЈО за гонење организиран криминал и корупција.

Предметот што го води ОЈО за организиран криминал, а е поврзан со постапката што се водеше пред правосудните органи во САД, беше отворен откако јавно беше објавено сведочењето на поранешниот директор на Управата за безбедност и контраразузнавање (УБК), Слободан Богоевски, пред Окружниот суд во Њујорк, во кое тој тврди дека поранешните директори на „Маѓар телеком“ дале 2,5 милиони евра поткуп на тогашниот премиер Владо Бучковски и на претставниците на ДУИ, Али Ахмети и Муса Џафери, за да не влезе друг телекомуникациски оператор во Македонија.

Кон крајот на септември 2015 година, Богоевски беше повикан и четири часа даваше исказ во Јавното обвинителство.

– И понатаму се преземаат дејства неопходни за расветлување на настанот. Извршено е испитување и на други лица, а поднесено е и барање за меѓународна правна помош од американските власти, што, како што неколкупати посочивме, е подолготрајна постапка. Основното јавно обвинителство за гонење организиран криминал и корупција будно ги следи сознанијата од медиумите и врз основа на истите почна дополнителни дејства за меѓународна правна помош – велат од Јавното обвинителство.

Американската комисија за хартии од вредност вчера соопшти дека поранешните директори на „Маѓар телеком“, Елег Штрауб и Андрас Балог, кои беа обвинети за „водење тајни договори со премиер и со други лица од Македонија“ за да ја спречат конкуренцијата на телекомуникацискиот пазар, се спогодиле да платат парични казни, од 250.000, односно 150.000 долари.

За првиот случај истрагата почна во 2008 година, а три години подоцна, односно во 2011 година беше поднесено обвинение. Но, судењето за овој случај и по шест години никако да почне, а рочиштата постојано се одложуваат.

Станува збор за случај во кој поранешните директори на „Телеком“, Атила Сендреи, Ролф Плат и Золтан Кишјакус, се товарат дека склучувале фиктивни договори за консултантски услуги со кипарската консултантска куќа „Чаптекс холдингс лимитид“ и на тој начин го оштетиле „Македонски телеком“ за речиси 4 милиони евра, а буџетот на државата за околу 2 милиони евра, бидејќи Владата во „Телеком“ во тој период поседуваше 47 отсто од акциите.


Пакистанскиот суд нареди истрага за премиерот Шариф


Исламабад, 20 април, 2017 - 13:58 (META) 

Пакистанскиот премиер Наваз Шариф не е прогласен за виновен за корупција пред Врховниот суд.

Судиите наредија нова истрага во која ќе биде сослушан премиерот и членовите на неговото семејство во врска со обвиненијата за корупција, јавува „Си-ен-ен“.

Медиумите пренесуваат дека тоа за Шариф значи останување на премиерската позиција. Постоеше стравување дека судот ќе ги прифати обвиненијата и ќе го прогласи за виновен.

Но, наместо тоа, судот наредил нова, опсежна истрага во врска со обвиненијата за корупција.

Шариф веќе со месеци се соочува со тврдења дека членови на неговото семејство работеле со офшор-сметки, што беше откриено со случајот „Панама пејпрс“.


Светски експерти за хемиско оружје бараат докази во Сирија


Анкара, 13 април, 2017 - 12:02 (META) 

Тим од светски експерти специјализирани за хемиско оружје, е испратен во Турција да собере примероци во рамки на истрагата за наводниот хемиски напад во Сирија од минатата недела, во кој загинаа 87 лица.

Мисијата за утврдување факти ја поведе Организацијата за забрана на хемиското оружје, со седиште во Хаг, за да се приберат биометриски примероци и да се интервјуираат преживеаните.

Амбасадорот на Велика Британија при ОН, Метју Рајкрофт, вчера изјави дека анализата на примероците земени од местото на нападот со хемиско оружје во Сирија покажале дека се позитивни на гасот сарин и на слични супстанции.


Полицијата го проверува работењето на фондацијата на сопругата на Томислав Николиќ


Белград, 7 април, 2017 - 12:04 (META) 

Инспектори на Министерството за внатрешни работи за економски криминал од минатата недела го проверуваат работењето на фондацијата на Драгица Николиќ, сопругата на актуелниот претседател на Србија, Томислав Николиќ, поради сомневање дека наместо на градилишта, половина милион евра завршиле во нечии џебови.

Според пишувањата на белградскиот весник „Блиц“, проверката следува по пријавата на еден изведувач дека му е побарано да врати во готовина дел од парите што му биле уплаќани на сметка за адаптација на еден објект.

Полицијата сега ги собира сите податоци за донациите, начинот на трошење пари, како и за склучувањето договори за изградба на објекти и за купување опрема со средствата на фондацијата, која го носи името на сè уште актуелната прва дама на Србија.

Како што наведува весникот, се работи за голема сума пари затоа што само за неколку години се собрале 10 милиони евра, а постои сомневање дека „по принципот поврзани лица, еден дел од парите завршувал во џебовите на блиските луѓе од фондацијата на семејството Николиќ“.


Германија: Поведена истрага против 20 лица осомничени дека шпионирале за Турција


Берлин, 6 април, 2017 - 19:14 (META) 

Дваесет лица се под истрага во Германија поради сомнеж дека шпионирале луѓе за кои верувале дека се приврзаници на муслиманскиот свештеник Фетулах Ѓулен, јавуваат светските агенции, повикувајќи се на соопштение на германското министерство за внатрешни работи.

Инаку, властите во Анкара сметаат дека Ѓулен и неговите приврзаници стојат зад неуспешниот обид за воен удар во земјата, во јули минатата година. Ѓулен, кој живее во егзил во САД, ги отфрла ваквите обвинувања.

Германските власти, како што пренесуваат агенциите, во февруари оваа година извршиле претреси во куќи на четворица имами, поврзани со турско-исламските културни организации во Германија, осомничени дека ги шпионирале противниците на турската влада.

Германското министерство за внатрешни работи навело дека Турција континуирано испраќала сè поголем број имами во овие центри.


СЈО денеска со прес-конференција во 11 часот


Скопје, 23 март, 2017 - 9:40 (META) 

Специјалното јавно обвинителство најави прес-конференција за денеска во 11 часот.
„Транспортер носи тотал триста табли кај Тифани“, се вели во најавата на СЈО на „Твитер“, во која, во согласност со досегашната практика, сите зборови се на буквата „т“.

Специјалното јавно обвинителство на 28 февруари ја отвори истражната постапка „Труст“, за тендерот што во 2011 година го распишала државната фирма „Електрани на Македонија“ (ЕЛЕМ) за ископување јаловина и јаглен од рудникот Суводол во Битола.

Во врска со овој случај, распишана е меѓународна потерница за бизнисменот Сеад Кочан, кому му е одреден притвор.


СЈО најави прес-конференција за утре во 11 часот


Скопје, 22 март, 2017 - 18:35 (META) 

Специјалното јавно обвинителство најави прес-конференција за утре, (23 март), во 11 часот.

„Транспортер носи тотал триста табли кај Тифани“, се вели во најавата на СЈО на „Твитер“, во која, во согласност со досегашната практика, сите зборови се на буквата „т“.

 

Специјалното јавно обвинителство на 28 февруари ја отвори истражната постапка „Труст“, за тендерот што во 2011 година го распишала државната фирма „Електрани на Македонија“ (ЕЛЕМ) за ископување јаловина и јаглен од рудникот Суводол во Битола.

Во врска со овој случај, распишана е меѓународна потерница за бизнисменот Сеад Кочан, кому му е одреден притвор.


Францускиот министер за внатрешни работи си поднесе оставка


Париз, 21 март, 2017 - 19:46 (META) 

Францускиот министер за внатрешни работи, Бруно ле Ру, си поднесе оставка поради скандалот со привремените вработувања на неговите ќерки во собранието на земјата, за што се води и истрага, јавуваат светските агенции.

Бруно ле Ру својата одлука ја соопшти денеска. Тој изјавил дека не сторил ништо погрешно со вработувањето на своите ќерки, но навел дека поднесува оставка од почитување кон владата и за да му овозможи на министерството за внатрешни работи на Франција да се бори против тероризмот и другите безбедносни закани.

Ле Ру тврди дека договорите за вработување биле „во склад со правилата на Народното собрание“ и „дека сите работи биле извршени ефективно“.

Оставката на Бруно ле Ру следува еден ден по телевизискиот извештај за 24 привремени ангажирања на неговите ќерки во парламентот. Пред два месеци, слична истрага, заради вработувања, сериозно ѝ наштети на предизборната кампања на кандидатот за претседател на конзервативците, Франсоа Филон.


Заев денеска на распит кај Зврлевски за изборни нерегуларности


Скопје, 17 март, 2017 - 10:03 (META) 

Лидерот на СДСМ, Зоран Заев, денеска во 12 часот е повикан на распит во Основното јавно обвинителство, во врска со истрагата за злоупотреба на пари во изборна кампања, пренесуваат медиумите.

Покрај Заев, според информациите во медиумите, на распит се повикани уште неколку раководни лица во партијата.

Од СДСМ потврдија дека поканата од Јавното обвинителство пристигнала вчера. Како што пренесува порталот „Нова“, од партијата потврдиле дека Заев ќе одговори на поканата и ќе дојде на распит во обвинителството.

Инаку, Основното јавно обвинителство за гонење организиран криминал и корупција вчера соопшти дека отворило две истражни постапки поврзани со изборни нерегуларности за време на парламентарните и на изборите за претседател на државата, одржани во април 2014 година и за предвремените парламентарни избори во декември минатата година. Осомничените, поранешни високи функционери на МВР, на локалната самоуправа и „носители на високи функции во одредена политичка партија“, се товарат дека преку нудење поткуп сакале да придобијат гласачи во две изборни единици.


Откриени шест мигранти по сообраќајка во Струмица, обвинителството отвори истрага


Струмица, 21 февруари, 2017 - 13:04 (META) 

Основното јавно обвинителство за гонење организиран криминал и корупција истражува случај на шверц на мигранти, што бил откриен вчера, по сообраќајна несреќа што се случила во Струмица.

Како што информираат од обвинителството, македонски државјанин, управувајќи патничко возило, изгубил контрола и удрил во столб од уличното осветлување во Струмица. При вршење на увидот од страна на надлежните, во возилото биле затекнати шест мигранти.

„Утврдено е сторено кривично дело криумчарење мигранти, за кое Основното јавно обвинителство за гонење организиран криминал и корупција поведе постапка. Во тек е преземање на активности за утврдување на фактите во предметот, меѓу кои и распит на мигрантите – учесници во сообраќајна незгода“, стои во соопштението од обвинителството.