!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Анкета: 91 процент од Бугарите сметаат дека македонскиот јазик е ист со бугарскиот


Софија, 20 ноември, 2017 - 11:13 (META) 

Бугарите имаат позитивни ставови кон Македонија, а 51 отсто од нив сметаат дека Македонците се слични или исти со Бугарите, покажа последното истражување на бугарскиот Институт за политика, посветено на односите меѓу Бугарија и Македонија.

Како што пренесува бугарскиот портал „Днес“, на прашањето дали постои македонска нација, различна од бугарската, 72 отсто од испитаниците одговориле дека македонскиот народ бил основан во 20 век и е близок на бугарскиот.

Вкупно 64 отсто од анкетираните ја признаваат вредноста на заедничката историја, а 27 од испитаниците сметаат дека покрај тоа, историјата нема никаква врска со модерното време.

Во однос на јазикот, 91 процент од Бугарите тврдат дека јазикот што го зборуваме е ист или заеднички, а само 8 отсто сметаат дека бугарскиот и македонскиот јазик се различни јазици.

На прашање дали Бугарија треба да го поддржи влезот на Македонија во ЕУ, 87 отсто се изјасниле позитивно, а 80 отсто од испитаниците сметаат дека Бугарија е мост за Македонија на патот кон членството во ЕУ. Во истражувањето се наведува дека 87 отсто од испитаници стекнале нови знаења и го подобриле ставот кон Македонија во август годинава, по потпишувањето на Договорот за добрососедство.

Вкупно 85 отсто од испитаните Бугари сметаат дека минатото создало вештачка дистанца меѓу граѓаните на двете земји и дека двете земји и нивните граѓани имаат заедничка историја или периоди од нив. Анализата покажува дека 43 отсто од Бугарите го признаваат правото на Македонија да го идентификува својот јазик самостојно.


Димитров: Нема „ревидирање на историјата“ со Грција, туку само средба на историчари


Скопје, 9 ноември, 2017 - 10:58 (META) 

Министерот за надворешни работи Никола Димитров денеска негираше дека со неговиот грчки колега Никос Коѕиас договориле „ревидирање на историјата“.

– На средбата во Солун не беше разговарано за ова. На средбата во Њујорк разговаравме за средба на историчари и експерти коишто ќе почнат да разговараат за ова. Тоа е договорено. Можно е министерот Коѕиас да има план ова да го предложи. Јас лично како преговарач од Македонија за разликите за името, под еден поширок контекст на мерките за градење доверба, предложив такви комисии, налик на оваа за која што зборува колегата Коѕиас. Ние, во принцип, немаме ништо против – рече Димитров, додавајќи дека се спремни да разгледаат таков предлог.

Тој истакна дека Балканот е премногу оптоварен со историја и дека две земји што решиле да се зближат и да надминуваат разлики и да градат мостови, корисно е да се учат од искуствата на другите земји, како што се Германија и Франција, се додека тоа е на квалитетна основа и двострано.

– Се  додека историјата е оставена на историчарите и експертите, а политиката на политичарите, тоа е корисно – рече Димитров.


Павлопулос: Македонија била, е и ќе остане грчка


Солун, 27 октомври, 2017 - 13:08 (META) 

Грчкиот претседател, Прокопис Павлопулос, во говор во Офицерскиот клуб во Солун, повторно ја обвини Македонија за фалсификување на историјата, за користење име кое, наводно, не ѝ припаѓа и за изразување иредентистички тензии, и притоа не пропушти да спомене дека Македонија била, е и ќе остане грчка.

– Ѝ велиме на БЈРМ – подаваме рака на пријателство, но нема шанси да толерираме. Тоа е јасно и ние отворено сме го посочиле тоа. Не е во прашање само фалсификувањето на историјата, затоа што Македонија беше, е и ќе остане грчка. Тоа го знаеме сите. Не само што не прифаќаме фалсификување на историјата, не прифаќаме иредентистички тензии кои повторно би го направиле Балканот буре барут во Европа – порача Павлопулос.

Грчкиот претседател рече дека Грција ја поддржува европската перспектива на сите земји од Балканот, но, конкретно за Македонија, порача дека мора да го почитува европското право.

– Кога имаш една држава која не само што ја фалсификува историјата, туку се појавува и со име кое не ѝ припаѓа, таа изразува иредентистички тензии. Во суштина, таа го оспорува статусот кво на границите на Балканот, односно границите со Грција. Запомнете дека европското право исклучува секаков вид на оспорување на границите и смета дека државата која дури и на индиректен начин, преку изразување иредентизам, ги оспорува границите, го прекршува европското законодавство, а со тоа самата си ја поткопува европската перспектива – рече Павлопулос.


Заев – Бејкер: Владата ќе продолжи да го поддржува концептот едно општество за сите


Скопје, 26 октомври, 2017 - 18:29 (META) 

Премиерот Зоран Заев денеска се сретнал со рабинот Ендру Бејкер, директор за меѓународни еврејски работи во Американскиот еврејски комитет (AJC).

Заев и Бејкер најавиле поддршка за одржување на комеморација по повод 75-годишнината од депортацијата на Евреите, што ќе се одржи следната година.

Премиерот истакнал дека еврејската заедница е значаен дел од традицијата и од историјата на државата и дека Владата ќе продолжи да го поддржува концептот едно општество за сите.


Димитров и Коѕиас не се договарале за заедничка комисија за учебници


Скопје, 29 септември, 2017 - 16:05 (META) 

Министерот за надворешни работи, Никола Димитров, и неговиот грчки колега, Никос Коѕиас, на состанокот во Њујорк не разговарале за формирање заедничка комисија туку за средба на експерти од областа на историјата, велат од МНР за „Мета“.

„Она за што е разговарано на состанокот во Њујорк помеѓу Димитров и Коѕиас е во насока на иницијативата на Република Македонија од 2007 година за средба на историчарите од двете земји. На состанокот во Њујорк, соговорниците се согласија дека треба да се работи на надминување на историските предрасуди на Балканот во интерес на соработката и на заедничката европска иднина. Двајцата министри во оваа фаза разговарале за средба на експерти од областа на историјата, а не за формирање заедничка комисија, при што е разбирливо процесот да се однесува на двете страни“, велат од МНР.

Коѕиас во интервју за грчката национална телевизија ЕРТ изјави дека со Никола Димитров се договориле да формираат заедничка комисија од експерти, кои ќе ги отстранат иредентистичките поими во учебниците и во географските карти.

Коѕиас изрази надеж дека до крајот на ноември ќе има првични резултати од работата на оваа комисија и, како што кажа, „ќе се изврши удар врз иредентизмот и врз картите со територијални претензии“.


Влатко Стефановски и Амет Шериф ќе ја добијат државната награда „11 Октомври“


Скопје, 26 септември, 2017 - 13:21 (META) 

Познатиот музичар Влатко Стефановски и историчарот Амет Шериф се добитниците на годинешната награда  „11 Октомври“, соопшти Министерство за култура.

Влатко Стефановски, еден од основачите на „Леб и сол“ и поранешен државен уметник, е добитник на наградата „11 Октомври“ за животно дело во областа на науката, уметноста, стопанството и на другите дејности од јавен интерес на Република Македонија. Вториот добитник на оваа награда, во категоријата за животно дело во областа на науката и на образованието се доделува на историчарот проф. д-р Амет Шериф.

Наградата на добитниците ќе им биде врачена на 11 октомври 2017 година, во 12 часот, во Собранието на Република Македонија.


ВМРО-ДПМНЕ: На еден месец од потпишувањето, Заев молчи за тоа што договори со Бугарија


Скопје, 3 јули, 2017 - 10:08 (META) 

Опозициската ВМРО-ДПМНЕ денеска нагласи дека почнува одбројувањето за најавеното потпишување на договорот помеѓу Бугарија и Македонија. Како што велат од партијата, договорот го склучил премиерот Заев во Софија „во процес целосно нетранспарентен, далеку од очите на македонската јавност“.

„Помина еден месец од договорот кој Заев не ѝ го обелоденува на јавноста, а кој се однесува на македонската држава. Многу е јасно дека Заев не сака да се знае за штетниот договор. Токму ваквото однесување и штетниот договор што го преговара Заев отвори тендеција со која се задира во постоењето на македонската држава. Затоа слушнавме изјави како таа на коалицискиот партнер на СДС дека Илинденското востание било бугарско, навивачи од Бугарија напишаа дека Македонија е бугарска, а имаше и изјави дека имаме заедничка историја, дека македонски јазик не постои, дека македонскиот јазик е бугарски дијалект… Сите тие се изјави кои Заев не ги осуди, ниту демантираше, што како премиер е должен да го направи“, соопшти опозициската партија.


Захариева: Никој не ја негира историјата на Македонија, ниту на Бугарија


Софија, 25 јуни, 2017 - 12:09 (META) 

Бугарија со признавањето на македонската држава, го признава и македонскиот јазик во согласност со Уставот на Република Македонија, изјави шефицата на бугарската дипломатија и вицепремиерка, Екатерина Захариева, додавајќи дека не гледа ништо спорно со признавањето на македонскиот јазик.

Таа во интервјуто за бугарската национална телевизија БТВ вели дека посетата на високо ниво на премиерот Зоран Заев и на македонските министри претставува затоплување на односите со Бугарија, притоа потсетувајќи дека последната посета на македонски премиер на Софија била во 2013 година и дека таа траела само 50 минути.

Захариева, исто така, истакна дека Бугарија е тука да ѝ помогне на Македонија, секогаш кога ќе се побара помош.

– Пораката на двата премиери беше многу јасна. Бугарија ќе помага кога ќе биде побарано. За јазикот, не гледам каков проблем има тука. Ние сме ја признале македонската држава и нејзиниот Устав – вели Захариева, додавајќи дека никој не ја негира историјата на Македонија, ниту на Бугарија.


ВМРО-ДПМНЕ: Ние не сме Срби ниту Бугари, престанете со негаторскиот однос


Скопје, 22 јуни, 2017 - 15:46 (META) 

„Престанете со негаторскиот однос кон Македонија. Престанете да нè навредувате. Ние не сме ниту Срби, ниту србомани, а уште помалку антибугари. Ние сме Македонци. Престанете сите кои се чувствуваат како Македонци да ги нарекувате Срби или србомани или да ги обележувате како непријатели на Бугарија“, порача денеска ВМРО-ДПМНЕ, преку две прес-конференции на пратениците Крсто Јовановски и Зоран Илиоски.

„Македонија не навредувала ниту, пак, омаловажувала никого. Јавните настапи на Зоран Заев во Софија ја отворија Пандорината кутија. Зоран Заев кажа дека Македонија го затворала поглавјето на национализам и на омраза. Ваквиот негов настап беше поздравен и пофален и од европратеникот Џамбаски и од директорот Димитров. Џамбаски срамно ја нарече Македонија творба на Kоминтерната и плод на српската пропаганда, а Димитров целата посета ја протолкува како историска бидејќи со реализација на договорот се укинувал македонизмот и се одело во насока на формирање втора бугарска држава“, порача пратеникот Крсто Јовановски.

Тој рече дека Македонија не е плод на српската пропаганда ниту, пак, творба на Коминтерната.

– Децата во Македонија мора да учат македонска историја и не смее да им се наметнува никаква туѓа. Македонската историја е само  македонска. Таа е автономна и автохтона. Исто како и Илинденското востание – рече Јовановски.

Илиоски праша дали Македонија со новата власт ќе ги менува учебниците по историја и на кој јазик ќе се потпишува договорот за добрососедство.

– Овие прашања го вознемируваат македонскиот народ. Овие прашања заслужуваат одговор. На кој јазик ќе се потпише договорот со Бугарија и дали Бугарија ќе го признае македонскиот јазик и македонскиот народ? Дали ќе стои во договорот дека Македонија има своја, автохтона историја? Дали во договорот ќе има реципроцитет во однос на обврските на двете страни? Градењето на добрососедски односи не подразбира уривање на сопствените државни и национални интереси. За жал, Зоран Заев продолжува да манифестира основно непочитување кон сопствениот народ јазик и историја – порача Илиоски.


Вељаноски: Бараме увид во тоа што го договорил Заев за добрососедството


Скопје, 21 јуни, 2017 - 15:40 (META) 

„ВМРО-ДПМНЕ е крајно загрижена од нетранспарентноста и леснотијата со која Заев пристапи на едно исклучително сериозно прашање, како што е склучувањето на договорот со Бугарија. ВМРО-ДПМНЕ бара увид во тоа што Заев договорил при посетата на Софија. Македонскиот народ бара увид во содржината на договорот што Заев се согласил да ја потпише“, порача пратеникот на ВМРО-ДПМНЕ, Трајко Вељаноски, на прес-конференција.

Осврнувајќи се на вчерашната изјава на премиерот Зоран Заев во Софија дека Македонија затвора едно поглавје на историја на национализам и на омраза, Вељаноски порача дека е крајно срамно и недолично да го обвиниште сопствениот народ за ширење национализам и омраза и вели дека прашањата кои задираат во идентитетот на македонскиот народ не може да бидат прашања со кои ќе се занимава само СДСМ.

– Ваквите теми, кои задираат во идентитетот на македонскиот народ, не се и не смее да бидат ексклузивен интерес ниту на Зоран Заев, ниту на СДС. Овие теми се надпартиски. За нас е разбирливо соседна Република Бугарија да има свои интереси и нив да ги брани и да ги застапува. Тоа што не можеме и нема да го прифатиме е Зоран Заев сам да одлучува за темите кои се од интерес, а пред граѓаните ветуваше инклузивност и дебата за многу понесуштински прашања – рече Вељаноски.

Тој рече дека е опасно да се доведува на таков начин во прашање посебноста на македонскиот народ.

– Република Македонија има сопствена историја. Ова е факт што никој не смее да се дрзне да го менува. Етногенезата на македонскиот народ е посебна и затоа е исклучително опасно да се говори за „заедничка историја“. Дали изјавите на Зоран Заев околу заедничката историја значат дека македонскиот народ во минатото немал своја посебна? Дали е Заев свесен колку се опасни овие тези? Прашањето за заедничката историја секогаш било една од најголемите пречки при постигнување на договорот со соседна Бугарија – праша Вељаноски.