!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

За четири дена над 250.000 нарачки на новиот „тесла модел 3“


Пало Алто, 3 април, 2016 - 17:10 (META) 

Елон Маск, основачот и шеф на американската компанија „Тесла моторос“, со седиште во Калифорнија, соопшти дека пред-нарачките на долгоочекуваниот електричен автомобил со ознака „модел 3“ ја надминале бројката од 250.000 возила, јавуваат светските медиуми.

Станува збор за целосно електрично возило со пет врати, кое својата светска промоција ја имаше во четвртокот оваа недела. „Модел 3“ на „Тесла“, за разлика од „модел с“ и „модел икс“, е со поприфатлива цена. Основниот модел чини 35.000 долари и со едно полнење на батериите може да помине околу 350 километри.

Автомобилот може да се нарача однапред во повеќе земји во светот, меѓу кои и во Велика Британија, Ирска, Бразил, Индија, Кина и Нов Зеланд.

Потенцијалните сопственици на автомобилот треба да платат депозит од 1.000 долари за резервација на возилото, чии први испораки ќе стартуваат кон крајот на 2017 година.

Пред-нарачките на „Модел 3“ не значат нужно дека толкав ќе биде и бројот на продадени возила.

Алудирајќи на големата заинтересираност за возилото, Маск на својот твитер-профил напиша дека „дефинитивно мора повторно да размисли околу планирањето на производството“.

Моменталниот план на Маск е да произведува 500.000 возила годишно, кога капацитетите на „Тесла“ ќе бидат подготвени за тоа.


Под лупа договорите на „Газпром“ со европските клиенти за испорака на гас


Брисел, 3 февруари, 2016 - 12:55 (META) 

Европската унија сака да ги испита сите договри што рускиот „Газпром“ ги потпишал со европските компании, заради сомнеж дека се наметнати неправедни цени кои ги прекршуваат трговските прописи на ЕУ, пишува германскиот весник „Франкфуртер алгемајне цајтунг“, повикувајќи се на интерен документ на Европската унија.

Според пишувањата на германскиот весник, ЕУ сака да ги добие на увид сите информации за договорите кои европската компанија ги склучила со „Газпром“, а кои се потпишани со рок подолг од една година и со кои се предвидува испорака на преку 40 проценти енергетски потреби на една земја-членка.

Официјален Брисел, исто така, сакал од самиот почеток да биде вклучен во преговорите за испорака на гас меѓу членките и земјите што не се членки на ЕУ, пишува весникот, оценувајќи дека Германија може да го оспори тој предлог.

Во април минатата година, Европската унија го обвини „Газпром“ за кршење на прописи на ЕУ за единствен пазар и за загрозување на конкуренцијата на пазарт со гас во земјите од Централна и од Источна Европа, каде што таа компанија е доминантен доставувач на гас.


„Газпром“ бара гаранции од „Нафтогаз“ за испорака на гасот


Москва, 4 декември, 2015 - 17:37 (META) 

Рускиот производител на гас „Газпром“ соопшти дека од украинската компанија „Нафтогаз“ побарале да им се обезбедат гаранции за количеството на гасот што имаат намера да го купат до крајот на март, пренесува „Ројтерс“.

– Имајќи ја предвид тешката финансиска состојба на „Нафтогаз“, не треба да се очекуваат авансни уплати и обновување на договорот за руската испорака на гас пред крајот на годината – се наведува во соопштението, во кое е пренесена изјавата на извршниот директор на „Газпром“, Алексеј Милер.

Во соопштението се наведува и дека рускиот „Газпром“ и украинскиот „Нафтогаз“ сакаат пред крајот на овој месец да ги одредат условите за купување гас за првиот квартал на 2016 година, а според зборовите на Милер, „Нафтогаз“ планира да побара попуст од „Газпром“.


Давутоглу: Русија нема да ја сопре испораката на гас за Турција


Анкара, 2 декември, 2015 - 10:40 (META) 

Премиерот на Турција, Ахмет Давутоглу, денеска изјави дека не очекува Русија дека ќе ја прекине испораката на гас за Турција, но дека Анкара, сепак, се подготвува за такво сценарио.

– Не мислам дека Русија ќе ја сопре испораката на гас. Имаме заемни обврски кои се регулираат според меѓународното право – изјавил Давутоглу.

На министерството за енергетика на Турција му било наложено да разработи различни алтернативи во случај да биде прекината испораката на гас од Русија.

Русија испорачува гас на Турција низ црноморскиот гасовод  „Син тек“, како и низ Трансбалканскиот гасовод низ Украина.

 


Русија, Украина и ЕУ го договорија зимскиот пакет за испорака на гас


Виена, 11 септември, 2015 - 19:51 (META) 

Русија, Украина и Европската комисија постигнаа договор за зимскиот пакет за испорака на гас на Европската унија преку Украина.

Договорот ќе почне да важи од 1 октомври, изјави денеска рускиот министер за енергетика, Александар Новак, по разговорот со официјалните лица на Европската комисија, известува „Ројтерс“.

Официјална Москва ѝ го одобрила на Украина попустот на цената на гасот за последниот квартал на оваа и за првиот квартал на следната година.

Европската унија била подготвена да ѝ исплати на Украина 500 милиони долари за гасот, пренесува руската агенција ТАСС.


Украина: Следна рунда преговори за гасот, на крајот на август


Киев, 10 август, 2015 - 18:04 (META) 

Следната рунда преговори во врска со прашањето за испорака на рускиот гас на Украина ќе се одржи во Виена, на 27 и на 28 август, рече денеска министерот за енергетика и рударство на Украина, Владимир Демчишин.

Тој на конференција за новинари, прецизираше дека преговорите на 27 и на 28 август ќе бидат двострани, односно дека ќе бидат вклучени тие и Европејците, а изрази надеж дека ќе се приклучи и Русија.

Министерот изјави дека Киев цврсто одлучил да постигне договор за новата грејна сезона и да потпишат соодветен протокол. Тој нагласи дека треба да се разгледаат две политички прашања.

Според неговите зборови, се работи за договор кој ќе биде тростран, со учество на Европска унија и треба да биде склучен најмалку на период до крајот на наредната грејна сезона.

Што се однесува на цената на увознотно гориво за Украина, министерот прогнозирал дека ќе биде околу 250 долари за илјада кубни метри гас во текот на наредните два квартали.


„Газпром“ ја стопира испораката на гас за Украина


Москва, 1 јули, 2015 - 15:21 (META) 

Рускиот гингант „Газпром“ денеска потврди дека ја стопира испораката на гас за Украина, по неуспехот на разговорите за цената, јавуваат светските медиуми.

Ова доаѓа еден ден по објавата на украинската државна енергетска фирма „Нафтогаз“ дека го суспендира купувањето гас од Русија откако разговорите со посредство на Европската унија за продолжување на испораката за наредните три до шест месеци, завршија без договор.

Од „Газпром“ изјавиле дека го стопираат снабдувањето со гас бидејќи Украина не „платила однапред“ за испораката за јули.

Генералниот директор на „Газпром“, Алексеј Милер, изјавил дека испораката е запрена денеска, во 10 часот, по локално време.

„Газпром нема да испорачува гас за Украина по ниедна цена, без тој да биде платен однапред“, изјавил Милер за руските медиуми, пренесува „Би-Би-Си“.

Од „Нафтогаз“, пак, изјавиле дека ќе продолжат со транспортот на руски гас за другите европски земји.