ВМРО-ДПМНЕ: Само Талибанците, ИД и СДСМ уриваат споменици


Скопје, 22 февруари, 2018 - 16:39 (META) 

Истото што го правеа Талибанците и Исламска држава во регионите зафатени од војна, го гледаме денес во Македонија, во срцето на Европа, од страна на СДСМ, изјави денеска пратеникот на ВМРО-ДПМНЕ, Крсто Јовановски, реагирајќи на отстранувањето на споменикот на Андон Лазов Јанев – Ќосето од пред Врховниот суд.

– СДСМ, кукавички во раните утрински часови решија да го задоволуваат својот апетит за деструкција. СДСМ не може да поднесат да гледаат ништо што е изградено, создадено и што претставува паметник за македонската историја. Не им дава мир истовремено многу ги боли бидејќи тие самите се неспособни за ништо креативно. СДСМ денеска манифестираа длабока фрустрација и гнев кон никој друг освен кон Македонија, и кон македонската историја и кон македонската култура. СДСМ работи на рушење на македонскиот национален дух, имаме историја кој се продава, неуставен закон за јазици, преминувани аеродром и автопат за што нашата татковина Македонија не доби ништо, споменици на херои кои се руштат – рече Јовановски.

Тој истакна дека споменикот на Андон Јанев Лазов – Ќосето не е дивоградба и дека Советот на град Скопје, согласно закон, со бандинтерово мнозинство има донесено одлука за негово поставување.

– Општината Центар има доделено и маркица врз основа на деталниот урбанистички план. Тоа се фактите, а тоа што го направи СДСМ е вандалски чин за кој се одговара. За ова се одговара и морално, а се одговара и правно. За ова ќе има и мора да има кривична одговорност – рече Јовановски, порачувајќи дека ВМРО-ДПМНЕ откако ќе се врати на власт „ќе ги исправи сите штети кои ги предизвикува оваа вандалска власт“.


Авганистанската влада ги засилува мерките за безбедност во Кабул


Кабул, 7 февруари, 2018 - 19:33 (META) 

Авганистанската влада одобри нов безбедносен план за Кабул по низата напади на милитантите на главниот град, јавуваат светските агенции.

Портпаролот на министерството за внатрешни работи, Нусрат Рахими изјавил дека планот ќе биде имплементиран во следните две недели.

Тој изјавил дека повеќе од 100 улици кои водат кон центарот на Кабул ќе бидат под строг надзор.

Планот содржи 52 мерки и ќе биде спроведен во три фази.

Прозападната влада на Авганистан е под се поголем притисок од јавноста по низата напади во кои загинаа повеќе од 130 лица. Одговорноста за нападите ја презедоа талибанците и екстремистите на Исламска држава.


Најмалку 11 загинати во напад на воена база во Кабул


Кабул, 29 јануари, 2018 - 15:35 (META) 

Најмалку 11 војници загинаа, а 15 се ранети во напад на воена база во близина на воената академија во главниот град на Авганистан, Кабул, соопшти авганистанското министерство за одбрана, пренесуваат светските медиуми.

Во нападот учествувале петмина милитанти, од кои четворица се убиени за време на нападот, а еден е уапсен, рекле од министерството.

Како што јавува новинската агенција „Амак“, одговорноста за нападот ја презела Исламска држава.

Денешниот напад доаѓа два дена по смртоносниот напад во Кабул, кога во експлозија на амбулантно возило загинаа најмалку 100 луѓе, а повеќе од 15 беа повредени. Одговорноста за овој напад ја презедоа талибанските милитанти.

Пред една недела талибанските милитанти убија 22 лица во напад на луксузен хотел во Кабул.


Уапсен осомничениот за бомбашкиот напад во Санкт Петерсбург


Москва, 30 декември, 2017 - 18:22 (META) 

Руската Федерална служба за безбедност (ФСБ) денека соопшти дека го уапсила осомничениот за терористичкиот напад што се случи во супермаркет во Санкт Петерсбург, јавуваат руските новински агенции.

Рачно изработена експлозивна направа на 27 декември експлодира во супермаркет на трговскиот ланец „Перекресток“ во Санкт Петерсбург, при што беа повредени 18 лица.

Во соопштението на ФСБ не е објавен идентитетот на напаѓачот, мотивите за нападот ниту дали осомничениот дејствувал сам.

Одговорноста за нападот ја презеде екстремистичката организација Исламска држава.

Рускиот претседател, Владимир Путин нападот го окарактеризира како терористички.


Во Турција уапсени 38 осомничени припадници на ИД


Анкара, 28 декември, 2017 - 9:44 (META) 

Турската полиција уапсила 38 лица, меѓу кои има и државјани на Сирија, поради сомнение дека се поврзани со Исламска држава.

Операцијата на североистокот на земјата, бо провинцијата Бурса ја спровела полициската единица за борба против корупцијата, а претресени се куќи на повеќе локации во пробинцијата.

Припадниците на ИД извршија повеќе напади во Турција, а изминатите години многу странци минаа низ Турција да се и се приклучат на терористичката организација во Сирија и Ирак.


Пет загинати во експлозија во Кабул


Кабул, 25 декември, 2017 - 9:37 (META) 

Во експлозија која се случи во седиштето на авганистанската Национална разузнавачка агенција во Кабул загина најмалку пет лица, додека две се сериозно повредени.

Како што соопшти полицијата, до експлозијата дошло откако бомбаш-самоубиец активирал бомба на влезот на агенцијата.

Одговорноста за овој напад ја презеде Исламска држава, која се огласи преку својата новинска агенција Амак.


ИД не е скршена, планира напади во Европа, тврди уапсен џихадист


Лондон, 13 декември, 2017 - 12:09 (META) 

Борец на Исламска држава, уапсен на границата со Турција, изјавил дека ИД не е се распаднала туку дека нејзините борци се префрлени во Европа за да извршат напади.

Британскиот весник „Дејли мејл“ наведува дека турските безбедносни служби минатиот месеци го уапсиле дваесет и шестгодишниот Садам ал-Хамади на турско-сириската граница. Тој тврди дека ИД не се распаднала, туку дека нејзините борци го искористиле хаосот кој настанал при ослободувањето на Рака и побегнале кон европските држави во кои планираат напади.

Ал Хамади соопштил дека терористите преку Турција ќе влезат во Европа и ќе изведат терористички напади. Весникот наведува дека уапсениот признал дека помогнал при шверцување терористи во Рака, која се сметаше за главно упориште на ИД.

Уапсениот 18 месеци бил во редовите на ИД, а тврди дека регрутирал и многу борци од повеќе држави, вклучувајќи ја и Британија.


Уапсени 23 странци во Истанбул кои планирале голем напад


Истанбул, 9 декември, 2017 - 20:48 (META) 

Во голема операција на антитерористичките единици денеска во најголемиот турски град Истанбул се уапсени 23 странски државјани, под сомнение дека се припадници на терористичката Исламска држава и дека подготвувале голем напад.

При претресите биле запленети голем број на документи на ИД и дигитални материјали.


Ирак објави победа во војната против Исламска држава


Багдар, 9 декември, 2017 - 20:02 (META) 

Ирак денеска објави дека војната против Исламска држава (ИД) е завршена, по повеќе од три години воени операции со кои припадниците на терористичката ораганизација се изгонети од териториите во Ирак што ги беа окупирале.

Ирачкиот премиер Хајдер ал Абади прогласи дека ирачките вооружени сили целосно ја контролираат границата со Сирија, а владиниот портпарол појасни дека овој развој на настаните значи и крај на воените операции против ИД.

Тоа го потврди и високиот заповедник на ирачката армија, генерал потполковник Рашид Јар Алах.

– Сите ирачки територии се ослободени од терористичките банди на Даеш (арапската кратенка за ИД) и нашите сили во целост ја контролираат меѓудржавната граница на Ирак и Сирија – рече генералот.

Терористите од ИД во летото 2014 година освоија речиси една третина од територијата на Ирак, вклучувајќи го тука и Мосул, вториот по големина град во земјата.


Во лабораторијата во Тетово се произведувала и омилената дрога на Исламска држава


Белград, 1 декември, 2017 - 16:17 (META) 

Организатор на групата што стоела зад најголемата лабораторија за нелегално производство на синтетички дроги во Тетово, е Милан Зарубица, кој се смета за еден од најголемите креатори на ваков вид дроги, соопшти денеска министерот за внатрешни работи на Србија, Небојша Стефановиќ, во Белград, по повод заедничката акција на македонските и на српските обвинителства и полиции за разбивање на криминалната група.

– Особено е добро тоа што е уапсен Милан Зарубица, бидејќи тој се смета за еден од најголемите креатори на синтетички дроги, а на овие простори беше познат по овие активности и порано – изјави Стефановиќ, пренесува РТС.

Како што пренесува српската државна телевизија, во лабораторијата во Тетово запленети се околу 300 килограми таблети амфетамин, а на територија на Македонија и на Србија покрај 49-годишниот Зарубица уапсени се уште седум државјани на Србија и на Македонија, Б.З. (36), С. К. (55), А.Х. (53), С.Ш. (40), И.Ш. (52), А.М. (30) и З.Д. (55).

Стефановиќ соопшти дека акцијата траела цела година, период во кој полицијата внимателно ги следела сите активности на Зарубица, транспортот на опремата од Србија во Македонија и обратно и правењето на лабораторијата за правење на синтетичката дрога.

– Во оваа операција внимателно се следени сите соработници на Милан Зарубица, а идентификувани се и потенцијалните купувачи, поради што и акцијата траеше толку долго, бидејќи сакавме да обезбедиме квалитетни и цврсти докази за апсење на припадниците на оваа криминална група – изјави Стефановиќ.

Српскиот министер за внатрешни работи нагласи дека оваа заплена на 300 килограми синтетичка дрога е многу важна и поради тоа што станува збор за новата синтетичка дрога „каптагон“, која е многу популарна меѓу борците на Исламска држава.

– Ова е една од операциите поради кои сум навистина горд на работата на луѓето од криминалистичката полиција, кои ја водеа оваа операција. Ова е заедничка акција која ја работевме заедно со македонската полиција, која на својата територија заплени една поголема лабораторија, а една лабораторија е откриена и на територијата на Србија – рече Стефановиќ.

Тој додаде дека оваа акција најваројатно ќе продолжи и на територијата на Турција, каде во соработка со полицијата на таа држава, дошле до идентитетот на потенцијалните купувачи.

Денеска на прес-конференција во Скопје, за акцијата информираше и македонскиот министер за внатрешни работи, Оливер Спасовски, кој, за разлика од својот српски колега, не сакаше да соопшти детали за идентитет на уапсените лица и не откри дека во лабораторијата се прозиведувала „омилената“ дрога на ИД.