Само 2.855 од 87.000 иселеници се пријавиле за гласање на референдумот


Скопје, 24 август, 2018 - 13:01 (META) 

Државната изборна комисија (ДИК) на денешната седница го усвои Предлог-кодексот за набљудување на референдумот. Според Кодексот акредитираните набљудувачи треба да го познаваат законот, да се придржуваат кон неговите одредби, да се непристрасни и секогаш со себе да го носат беџот за идентификација.

„За фер и коректно набљудување ДИК е должна да донесе рамка за правилно однесување при набљудувањето на референдумот. Согласно Кодексот, само акредитирани набљудувачи можат да информираат за текот на гласачкиот процес“, велат од ДИК.

Кодексот предвидува и ограничување за акредитираните набљудувачи – тие не смеат да влијаат при гласањето и пребројувањето на гласовите, ниту да носат какви било партиски симболи.

Како што информира претседателот на ДИК, Оливер Дерковски. се уште трае рокот за издавање акредитации за набљудувачи на референдумот.

ДИК на седницата го усвои и предлогот на Борис Кондарко, да се донесе комплетно нов правилник за приговори што ќе важи само за референдумот. Правилникот за изборниот процес нема да се менува.
Членовите на Државната изборна комисија ја поддржаа и одлуката да се ангажираат дополнителен број лица од Државниот завод за статистика со цел побрза обработка на податоците за излезноста на референдумот.

Последниот извештај доставен до ДИК покажува дека заклучно со денеска за референдумот во дипломатско-конзуларните претставништва на Македонија се пријавени вкупно 2.855 гласачи, од кои прифатени се 2.755.

Одбиени се 100 пријави со образложение дека дел од лицата кои ги поднеле имале истечени патни исправи, а дел немаат живеалиште во Македонија. Поради тоа, појаснија од ДИК, немаат право да гласаат. На избирачкиот список како иселени се запишани 87 илјади лица.

Пред почетокот на седницата, додека се утврдуваше дневниот ред, Кондарко информираше дека МВР ќе им издаде лични карти на вкупно 260 лица кои издржуваат казна затвор за да можат да го остварат своето право на глас.

На седницата на ДИК беше наведено дека гласањето за дијаспората ќе чини околу една третина од гласањето минатиот пат кога било 35 милиони денари.


До ДИК доставени 990 пријави од иселеници за референдумот


Скопје, 16 август, 2018 - 16:58 (META) 

Денеска до 13 часот, преку веб-апликацијата www.dijaspora.sec.mk до Државната изборна комисија доставени биле вкупно 990 пријави од граѓани за гласање во дипломатско-конзуларните претставништва на Република Македонија во странство.

ДИК информира дека од нив, 965 пријави биле прифатени, 23 се одбиени, а останатите се во обработка.

Најголем број пријави се доставени за гласање во Берн – 83, во Лондон – 77, во Торонто – 60, Љубљана – 62 и Канбера – 42.

„Во однос на податоците од јавниот увид во избирачкиот список, ве информираме дека заклучно со вчерашниот ден вкупно 2.179 граѓани извршиле јавен увид во подрачните одделенија и канцеларии на ДИК. Од нив, најголем број граѓани увид извршиле во Битола – 337, Струмица – 200, во Радовиш – 140 и во Прилеп – 129“, соопштуваат од ДИК.


До ДИК доставени 862 пријави од иселеници за референдумот


Скопје, 15 август, 2018 - 14:20 (META) 

Дденеска до 13 часот, преку веб-апликацијата www.dijaspora.sec.mk до Државната изборна комисија доставени биле вкупно 862 пријави од граѓани за гласање во дипломатско-конзуларните претставништва на Република Македонија во странство.

ДИК информира дека од нив, 836 пријави биле прифатени, 19 се одбиени, а останатите се во обработка.

Најголем број пријави се доставени за гласање во Берн – 72, во Лондон – 69, во Торонто – 57, Љубљана – 48 и Канбера – 36.

„Во однос на податоците од јавниот увид во избирачкиот список, ве информираме дека заклучно со вчерашниот ден вкупно 1.967 граѓани извршиле јавен увид во подрачните одделенија и канцеларии на ДИК. Од нив, најголем број граѓани увид извршиле во Битола – 295, Струмица – 148, во Радовиш – 128 и во Прилеп – 104“, соопштуваат од ДИК.


За гласање на референдумот до сега се пријавиле 742 иселеници


Скопје, 14 август, 2018 - 15:44 (META) 

Од Државната изборна комисија информираат дека денеска до 14 часот преку веб-апликацијата dijaspora.sec.mk до ДИК доставени се вкупно 742 пријави од граѓани за гласање во дипломатско-конзуларните претставништва на Република Македонија во странство.

Од нив, 702 пријави се прифатени, 11 се одбиени, а останатите се во обработка.

Во однос на податоците од јавниот увид во избирачкиот список, од ДИК соопштуваат дека заклучно со вчерашниот ден вкупно 1.216 граѓани извршиле јавен увид во подрачните одделенија и канцеларии на ДИК. Од нив, најголем број граѓани увид извршиле во Битола – 188, во Радовиш – 104 и Струмица – 101.


Министерот за дијаспора ги повика иселениците да гласаат на референдумот


Скопје, 10 август, 2018 - 15:38 (META) 

Министерот задолжен за дијаспора, Едмонд Адеми, упати јавен повик до иселениците да го искористат своето право и да гласаат на претстојниот референдум.

„Имаме граѓанска одговорност да донесеме правилна одлука, да излеземе и со нашиот глас да придонесеме кон заедничка, подобра иднина. Сплотени, со здружени сили, заедно можеме да ја обезбедиме иднината на нашите деца. Одлуката зависи исклучиво од нас самите, наша е одговорноста. Вие одлучувате, дали Република Македонија ќе биде членка на Европската Унија (ЕУ) и НАТО, со прифаќање на договорот со Република Грција. Имаме граѓанска одговорност. Сега е време за одлука“, се вели во повикот на Адеми.

Пријавувањето на иселениците започна вчера и ќе трае до 23 август, на веб-страната на Државната изборна комисија. Референдумот ќе се одржи на 30 септември. Прашањето ќе гласи: „Дали сте за членство во ЕУ и НАТО со прифаќање на Договорот помеѓу Република Македонија и Република Грција?“.


Таравари побара од командирот на полицијата во Гостивар да не ги казнува иселениците


Гостивар, 26 декември, 2017 - 13:48 (META) 

Градоначалникот на општина Гостивар, Арбен Таравари, со службен допис се обратил до командирот на полициска станица Гостивар, Гази Абдурахмани, барајќи тој и полицајците да бидат потолерантни и покоректни кон иселениците што се вратени во родниот крај за време на новогодишните празници.

„Од позиција на градоначалник на Гостивар и како граѓанин на овој град, барам вашите полицајци да бидат што покоректни во нивните задачи, особено за кон иселениците кои се дојдени во Гостивар. Тие се враќаат само неколку дена во својата татковина и даваат толку многу пари, што ги држат градот и државата со своите приходи! Не е ниту законско, ниту хумано а ниту морално да ги казнувате со парични казни, само затоа што се претпоставува дека тие имаат пари! Прво, тие се заморуваат многу за да ги заработат тие пари, и второ, треба да бидат еднакви пред законот!“, се вели во писмото од Таравари.


Иселеничкиот Форум за демократска Македонија ја објави програмата


Скопје, 19 јуни, 2017 - 10:53 (META) 

Форумот за демократска Македонија на група на иселеници од Република Македонија и нивните потомци од целиот свет ја објави програмата, на својата фејсбук-страница.

„Форумот сака да ја види земјата како прогресивна, демократска, граѓанска, европска, просперитетна држава, која ќе создава подобар живот за сите свои граѓани. Држава што ќе биде пример за мултиетничко општество, засновано на заемна почит, толеранција и на разбирање, каде владата ќе работи за доброто на сите граѓани, а не за лични интереси“, се вели во описот.


Форум за демократска Македонија ќе ја поврзува дијаспората и ќе помага на земјата


Сиднеј, 7 јуни, 2017 - 14:34 (META) 

Иселеници пред околку еден месец го формирале Форумот за демократска Македонија, „како демократско и непартиско тело“ кое треба да ги поврзе сите демократски ориентирани иселеници, но и луѓе кои по каква било основа се чувствуваат поврзани со Република Македонија, објаснува Емилија Тодорова од Сиднеј за програмата на македонски јазик на австралиското радио „Си-би-ес“.

– Форумот за демократска Македонија се формира пред приближно еден месец, за да ги поврзе и да им даде глас на сите демократски, непартиски ориентирани иселеници од Република Македонија. Идејата на форумот е да придонесе кон развивањето и унапредувањето на демократските процеси во Македонија. Ние тоа го гледаме преку зајакнувањето на човековите права и слободи, преку отчетност на владата и институциите, владеење на правото и јасна одделеност на извршната, судската и на законодавната моќ. Исто така се залагаме да се негува и да се промовира културното наследство на Македонија, но и достигнувањата на нејзината иселеничка заедница. Да се поддржува интегрирањето на земјата во евроатлантските структури, да се поддржуваат односите меѓу Македонија и нејзините соседи да се засилуваат економските социјални и културните врски меѓу иселеничката заедница земјите во кои живеат иселениците – објаснува Тодорова.

Форумот сака да ја види земјата како прогресивна, демократска, граѓанска, европска, просперитетна држава, која ќе создава подобар живот за сите свои граѓани. Држава што ќе биде пример за мултииетничко општество, засновано на заемна почит, толеранција и разбирање, каде владата ќе работи за доброто на сите граѓани, а не за лични интереси, појаснува таа.

– Фокусот е на тоа што како иселеници може да направиме да помогнеме на Македонија. Има инженери, ИТ, научници, новинари, унвиерзитетски професори, музичари, архитекти, вработени во јавна админситрација, волни своето искуство да ги стават во функција на целите на форумот – објаснува Тодорова, напоменувајќи дека наскоро ќе биде објавена и програмата на форумот.


ОМД сугерира во новата влада да има и министерство за дијаспора


Вашингтон, 18 мај, 2017 - 15:14 (META) 

Обединетата македонска дијаспора (ОМД), една од најголемите и најактивните организации на македонската емиграција, му сугерираше на мандатарот за составување на новата влада да формира министерство за дијаспора, како начин да се продлабочат врските меѓу иселениците и Македонија.

Ова не е првпат ОМД да бара министерство за дијаспора, тоа го повторува безмалку секоја година во последниве четири-пет години, но сега тоа барање добива особено значење поради фактот што власта преминува во рацете на СДСМ – партија која на 12 октомври 2015 година вети дека СДСМ веднаш по доаѓањето на власт, ќе формира и министерство за дијаспора.

Во владата на Љубчо Георгиевски во 1998 година имаше министерство за иселеници, кое по извесен период беше згаснато, а неговите ингеренции ги презедоа Агенцијата за иселеништво и Министерството за надворешни работи.

Во соопштението, ОМД порачува оти од Заев очекува „подобрување на имиџот на Македонија во странство и нејзино враќање на вистинскиот пат за целосна евро-атлантска интеграција, без никакви условувања за името и за идентитетот на Македонија“.

ОМД се обрати и до ВМРО-ДПМНЕ, порачувајќи дека треба да биде силна и конструктивна опозиција, „со што би имале директно влијание врз македонската влада, да биде одговорна, транспарентна и прогресивна“.


„Пју“: Од Македонија до 2015 година се иселиле 520.000 жители


Скопје, 11 ноември, 2016 - 14:56 (META) 

Американскиот истражувачкиот центар „Пју“ објави истражување за миграцијата и според нивните резултати, до 2015 година околу 244 милиони луѓе во светот се иселиле од своите матични земји поради различни причини.

Податоците кажуваат дека во девет земји, 20 проценти од луѓето родени таму, па дури и повеќе, сега живеат во друга земја.

Резултатите велат дека од Босна и Херцеговина, Албанија, Јамајка и од Ерменија, се иселиле една четвртина од нивните популации или повеќе, и сега живеат во странство, а од Казахстан, Сирија, Тринидад и Тобаго, Македонија (520.000 граѓани) и од Португалија, околу 20 отсто од населението кое е родено во матичната земја сега живее во друга земја.