!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ирак објави победа во војната против Исламска држава


Багдар, 9 декември, 2017 - 20:02 (META) 

Ирак денеска објави дека војната против Исламска држава (ИД) е завршена, по повеќе од три години воени операции со кои припадниците на терористичката ораганизација се изгонети од териториите во Ирак што ги беа окупирале.

Ирачкиот премиер Хајдер ал Абади прогласи дека ирачките вооружени сили целосно ја контролираат границата со Сирија, а владиниот портпарол појасни дека овој развој на настаните значи и крај на воените операции против ИД.

Тоа го потврди и високиот заповедник на ирачката армија, генерал потполковник Рашид Јар Алах.

– Сите ирачки територии се ослободени од терористичките банди на Даеш (арапската кратенка за ИД) и нашите сили во целост ја контролираат меѓудржавната граница на Ирак и Сирија – рече генералот.

Терористите од ИД во летото 2014 година освоија речиси една третина од територијата на Ирак, вклучувајќи го тука и Мосул, вториот по големина град во земјата.


Свилановиќ: За пет години 1.000 борци од Западен Балкан заминале во Сирија и во Ирак


Крањ, 30 ноември, 2017 - 14:24 (META) 

Околу 1.000 лица од земјите од Западен Балкан заминале да се борат во Сирија и во Ирак од 2012 до 2017 година, од кои 300 се вратени, околу 200 се убиени, а околу 400 сè уште се на боиштата, изјави денеска генералниот секретар на Регионалниот совет за соработка (РСС), Горан Свилановиќ.

Тој, како што соопшти РСС, изјави дека темпото на заминување на граѓаните од регионот се намалило во 2015 година, а речиси во целост е запрено во средината на 2016 година.

Study Infographics

Инфографик за движењето на странските борци од Западен Балкан кои заминале на боиштата во Сирија и во Ирак во периодот од 2012 до 2017 година

– Истовремено, од цела Европска Унија околу 5.000 граѓани заминале да се борат во Сирија и во Ирак – рече Свилановиќ во обраќањето на Втората меѓународна конференција за борба против тероризмот и насилниот екстремизам во Југоисточна Европа, што се одржува денеска во Брдо кај Крањ во Словенија.

Свилановиќ додаде дека овие податоци, кои поттекнуваат од студија што наменски ја порача РСС, „нè доведуваат чекор поблиску да осмислиме што треба да се направи од училиштата до затворите за да се победат насилните идеологии кои доведуваат до ужасите на тероризмот“.

Учесниците на Конференцијата, на која има претставници на влади од Западен Балкан и на повеќе меѓународни и регионални организации и инцијативи што се занимаваат со овој проблем, ќе разговараат за моменталните трендови и предизвици во активностите на европско, регионално и на национално ниво, како и за начините на спроведување на порано договорениот принцип – „цела влада, цело општество“, во сузбивање на насилниот екстремизам.

Конференцијата ја организира Регионалниот совет за соработка заедно со Министерството за внатрешни работи на Словенија, како и со Иницијативата на Западен Балкан за борба против тероризмот и Конвенцијата за полициска соработка во Југоисточна Европа.

Првата конференција за овој проблем е одржана во ноември во Тирана. Република Македонија, како основач и активен член на Процесот за соработка во Југоисточна Европа, активно партиципира на овие собири.


Расте бројот на жртви од земјотресот во Ирак и Иран


Багдад, 13 ноември, 2017 - 20:56 (META) 

Бројот на жртви во силниот земјотрес кој ја погоди областа на иранско-ирачката граница во иранската провинција Керманшах порасна на 407.

Бројот на повредените во земјотресот со магнитуда од 7,3 степени според Рихтер се искачи на 6.700, соопшти иранската Канцеларија за кризни ситуации.

Според американската геолошка служба, епицентарот на земјотресот е регистриран југозапоадно од градот Халабаџ. Неколку ирански и ирачки градови се без електрична енергија, а од страв од дополнителни потреси над 1.000 луѓе се на улица.

Иранскиот сеизмолошки центар регистрирал повеќе од 50 дополнителни потреси, а се очекуваат уште.


Силен земјотрес ги погоди Иран и Ирак – 214 загинати и 2.800 повредени


Скопје, 13 ноември, 2017 - 9:41 (META) 

Најмалку 214 лица загинаа, а повеќе од 2.800 се повредени во силниот земјотрес кој ја погоди иранско-ирачката погранична провинција Креманшах.

Според податоците на иранската Национална организација за управување со несреќи, во Иран загинале најмалку 207 лица, а повеќе од 2.500 се повредени. Иранските власти наведуваат дека бројот на загинати ќе се зголеми бидејќи спасувачките екипи сè уште не пристигнале до оддалечените места.

Земјотресот се почувствувал во неколку ирански провинции, а најтешко е погодена провинцијата Керманшах, каде е прогласена тридневна жалост. Во оваа провинција загинаа 142 лица, а најголемата болница е многу оштетена, така што повредените не можат да добијат лекарска помош.

Земјотресот го погодил и Ирак, каде најмалку седум лица загинаа во регионот Курдистан, соопшти курдскиот министер за здравство Хаме Рашеда. Ирачките здравствени и локални претставници наведуваат дека 321 лица се повредени во областа Курдистан, а најмногу погоден е градот Дарбандикан. Тој истакна дека ситуацијата во градот е критична бидејќи најголемата болница е оштетена и нема електрична енергија, поради што повредените се носат во соседните градови.

Медиумите различно информираат за јачината на земјотресот, новинската агенција „Ројтерс“ повикувајќи се на европскиот сеизмолошки центар наведува дека земјотресот бил со јачина од 7 до 7,9 степени. Агенцијата „Тасс“, повикувајќи се на истиот извор наведува дека бил со јачина од 7,4 степени, а некои од медиумите јавуваат дека е од 7,5 степени според Рихтер.

Иранскиот сеизмолошки центар регистрирал повеќе од 50 повратни потреси, а се очекува дека ќе има уште.

Агенцијата „Тасс“ наведува дека епицентарот на земјотресот бил на 10 километри длабочина и дека се почувствувал и во Кувајт.


Воен хеликоптер се урна во Ирак – седум лица загинаа


Багдад, 12 ноември, 2017 - 10:54 (META) 

Седум лица утринава загинаа откако воен хеликоптер се урна за време на обука, соопшти ирачкото Министерство за одбрана.

Како што се наведува во соопштението, хеликоптерот „ми-17“ од руско производство се урнал во провинцијата Вазит. Засега не се знае причината за несреќата.

Провинцијата се наоѓа на околу 160 километри југоисточно од Багдад, далеку од фронтот на војување со таканаречената Исламска држава.

Ирачките сили, кои имаат поддршка од САД, ги протераа екстремистите од речиси сите територии кои беа под нивна контрола, но борби се уште се водат во близина на западната граница со Сирија.


Офанзива на ирачките сили против последниот град под контрола на ИД


Багдад, 11 ноември, 2017 - 13:00 (META) 

Ирачките сили денеска покренале офанзива за заземање на Рава, последниот град под контрола на Исламска држава.

Заземањето на Рава ќе значи крај на периодот на владеење на ИД над териториите во Ирак и Сирија, заземени во 2014 година.

Во офанзивата против милитантите во Рава учествуваат две ирачки пешадиски дивизии и сунитски племенски сили.

Сириската војска прогласи победа над терористите на 9 ноември, кога го зазеде градот Абу Камал, последната населба под контрола на ИД на границата на Сирија со Ирак.

Сириската војска и нивните сојузници и понатаму се борат против милитантите во пустинските области во близина на Абу Камал.


Ирачките сили тргнаа во офанзива против последното упориште на ИД


Багдад, 26 октомври, 2017 - 10:28 (META) 

Ирачките сили денеска почнаа акција за преземање на последното упориште на Исламска држава во земјата.

– Херојските борци напредуваат кон последното упориште на тероризмот во Ирак за да ги ослободат Ал-Каим, Рава и околните села во западната провинцијата Ал Анбар – рече ирачкиот премиер Хајдер ал Абади.

Тој предупреди дека милитантите имаат можност или да се предадат или да умрат.

Милитантите во Ирак имаат контрола над местата Ал-Каим, Рава и околината, во Ал Анбар.

Во текот на 2014 година, милитантите зазедоа третина од Ирак, но владините и паравоените сили успеаја да повратат повеќе од 90 отсто од територијата.


Ирачките сили во офанзива во Киркук


Багдад, 16 октомври, 2017 - 10:13 (META) 

Курдските претставници во Ирак денеска соопштија дека федералните ирачки сили и милицијата, кои имаат поддршка од државата, повеле „голем и повеќекратен напад“ за да го заземат спорниот град Киркук.

Регионалниот совет за безбедност на Курдистан соопшти дека курдските пешмерга-сили уништиле најмалку пет возила од типот „хамви“ кои ги користела милицијата, по „неиспровоциран напад“ јужно од градот.

Во Киркук, мултиетнички град со повеќе од еден милион жители, граѓаните се затвориле во домовите, а на улиците повремено одекнуваат детонации и се слушаат артилериски и ракетни истрели.

Тензиите во оваа област се во пораст откако Курдите минатиот месец одржаа необврзувачки референдум, на кој се изјаснија за осамостојување од Ирак.

Централната Влада во Багдад, Турција и во Иран не ги признаваат резултатите од референдумот.


Ирачките сили го зазедоа центарот на Хавиџе


Багдад, 5 октомври, 2017 - 10:43 (META) 

Ирачките сили за безбедност денеска соопштија дека од милитантите на Исламска држава го презеле центарот на градот Хавиџе на северот на земјата и продолжуваат да ги ослободуваат другите делови на градот.

– Единици на ирачката војска и полиција кои се вклучени во борбата за ослободување на Хавиџе, влегле во центарот на градот и понатаму напредуваат – изјави генерал Амир Јаралах, кој управува со операциите.

Ирачката војска пред три дена тргна во офанзива да го преземе Хавиџе, кој е еден од последните градови на северот на Ирак во рацете на ИД.

Хавиџе има околу 70.000 жители и се наоѓа на околу 230 километри североисточно од Багдад.

 


Турција ги прекинува сите летови кон градовите на северот на Ирак


Анкара, 27 септември, 2017 - 19:46 (META) 

Турција ќе ги прекине сите летови кон градовите на северот на Ирак, во областите со мнозинско курдско население, јавуваат светските агенции.

Станува збор за една од првите мерки на официјална Анкара, откако регионалните власти на северот на Ирак во понеделникот одржаа референдум за независност.

Како што пренесуваат агенциите, ќе бидат прекинати комерцијалните летови кон градот Ербил, кој се смета за главен град на ирачката покраина, и кон Сулејманија. Забраната стапува на сила в петок во 15 часот.

Одлуката ја објавил турскиот конзулат во Ербил, потврдувајќи дека станува збор за одговор на курдскиот референдум.

Таа ќе се однесува на летовите на авиопревозниците „Туркиш ерлајнс“, „Пегасус“ и „Атлас глобал“.