!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Повеќе од 92 отсто од ирачките Курди гласаа за независност


Ербил, 27 септември, 2017 - 18:08 (META) 

Жителите на северниот дел на Ирак со огромно мнозинство гласале за независност на регионот Курдистан на референдумот што се одржа во понеделникот оваа недела, пренесува „Би-би-си“.

Од изборната комисија соопштиле дека повеќе од 92 отсто од вкупно 3,3 милиони Курди и друго не-курдско население гласале за отцепување на регионот Курдистан од Ирак.

Информацијата доаѓа откако ирачкиот премиер Хаидар ал-Абади денеска побара поништување на референдумот за независност на регионот.

„Референдумот мора да биде поништен, а дијалогот мора да продолжи во рамките на уставот. Нема да разговараме за никакви резултати од референдумот“, порача Абади.

Лидерите на ирачките Курди велат дека победата на референдумот ќе им даде зелено светло за почнување преговори за отцепување од централната власт во Багдад и од соседните земји.

Парламентот на Ирак побара од премиерот на земјата да размести воени трупи во областа Киркук, која е богата со нафта, како и во другите области кои се под контрола на Курдите.


Ердоган им се закани на ирачките Курди дека ќе гладуваат поради референдумот


Анкара, 26 септември, 2017 - 15:53 (META) 

Турскиот претседател, Реџеп Таип Ердоган, им се закани на ирачките Курди дека може да соочат со глад како резултат на мерките што ги разгледува Анкара по вчерашниот референдум за независност на ирачки Курдистан, пренесува „Би-би-си“.

Ердоган го обвини лидерот на курдската регионална влада, Масуд Барзани, за предавство, поради инсистирањето референдумот да се одржи и покрај противењето на меѓународната заедница.

„Сега на маса се сите воени и економски опции“, рекол Ердоган.

Тој претходно се закани дека ќе го пресече нафтоводот од Курдистан и ќе забрани курдски камиони да ја поминуваат турската граница.

Турција се плаши дека формирањето на независна курдска држава на нејзината граница би можело да ги поттикне сепаратистичките чувства кај нејзиното курдско малцинство.

Инаку, резултатите од вчерашниот референдум за независност на ирачки Курдистан сè уште не се објавеи, но се очекува тој да е успешен, односно мнозинството да гласало за независност од Ирак.

Курдските лидери претходно истакнаа дека референдумот не е обврзувачки, туку дека неговата цел е да ѝ даде мандат на регионалната влада за почеток на преговори за сецесија со централната влада во Багдади со соседните земји.

Ирачкиот премиер Хаидер ал-Абади отфрли каква било можност за вакви разговори.

„Ние не сме подготвени за разговори или за дијалог околу резултатите на реферндумот бидејќи тој е противуставен“, изјави вчера ирачкиот премиер.


Ирачките Курди не се откажуваат од референдумот за независност


Ербил, 12 август, 2017 - 15:52 (META) 

Ирачките Курди не се откажуваат од референдумот за незавиност од Ирак, кој е закажан за 25 септември, и покрај барањето од Соединетите Американски Држави тој да биде одложен, јавуваат светските агенции.

„Датумот стои, тој е 25 септември и нема никакви промени“, изјавил Хошјар Зебари, советник на регионалниот претседател на Курдистан, Масуд Барзани.

Тој на овој начин го искоментирал барањето на американскиот државен секретар, Рекс Тилерсон, за одложување на референдумот.

САД сметаат дека референдумот ќе го оттргне вниманието од „важните приоритети во Ирак“, како што е борбата против милитантите на Исламска држава.


Ирачките Курди почнаа нова офанзива кон Мосул


Мосул, 23 октомври, 2016 - 14:52 (META) 

Силите на ирачките Курди денеска почнаа нова офанзива во рамките на големата операција која ирачката војска заедно со нив ја спроведува за ослободување на градот Мосул од милитантите на Исламска држава, јавуваат светските агенции.

Курдските сили, познати како „пешмерга“, соопштиле дека денеска почнале офанзива на два фронта во правец на североисточниот дел на Мосул и во близина на малиот град Башика.

Во офанзивата на Мосул учествуваат повеќе од 25.000 припадници на ирачките копнени сили, како и авиони и советници на меѓународната коалиција, предводена од САД.

Проценките се дека ќе бидат потребни недели, па дури и месеци, за милитантите на ИД да бидат истерани од Мосул, кој е втор по големина град во Ирак и последно упориште на групата во земјата.