ЕБОР одобри 5,9 милиони евра кредит на ЕЛЕМ за изградба на фотоволтаици во Осломеј


Скопје, 4 јануари, 2019 - 15:05 (META) 

ЕБОР одобри кредит од 5,9 милиони на компанијата за производство на електрична енергија во државна сопственост – ЕЛЕМ, која планира да ја изгради првата поголема плантажа со соларни панели за производство на електрична енергија, која ќе биде изградена на поранешен искористен рудник за јаглен. Останатите средства до 7 милиони евра, ќе бидат обезбедени од ЕЛЕМ.

– Фотволтаиците ќе имаат капацитет на производство на блиску 10 мегавати електрична енергија на годишно ниво и на тој начин ќе се покрива потребата на вкупно 2.000 домаќинства. Со овој проект ЕЛЕМ ќе ги рехабилитира 15 хектари површина која се наоѓа над искористениот рудник со јаглен чии резерви се при крај –  рече Драган Миновски, главен оперативен директор на ЕЛЕМ.

Вицепремиерот Кочо Анѓушев рече дека ТЕЦ Осломеј од речиси заборавен објект ќе произведува струја на еколошки начин. За следните години тој најави повеќе инсталирана снага односно изградба на поголем број на фотоволатици кои ќе произведуваат од 30 до 40 мегават часови електрична енергија.

– Во првиот квартал од годинава ќе се распише тендер за изградба на 200 мегаватни фотоволтаици кои ќе може да се градат на државно и на приватно земјиште. До крајот на годината ќе има изградба на ветерен парк кој ќе произведува 50 мегавати електрична енергија, а планирана е и  изградбата на далекувод до Албанија во вредност од 50 милиони евра.Со тоа инвестициите во енергетиката би се движеле од 250 до 300 милиони евра – рече Анѓушев.

Според ЕБОР поради тоа што Скопје е еден од најзагадените градови во Европа, се вложуваат напори произведената електричната енергија до 2020 година да бидат обезбедени од обновливи извори на енергија.

Новиот проект за искористување на соларната енергија, денеска беше потпишан од страна на Хари Бојд Карпентер, Директор за енергија и енергетика во ЕБОР и директорот на ЕЛЕМ, Миновски.

Премиерот Зоран Заев рече дека означувањето на стартот на овој проект е добар за почетокот на најавената економска година. Изградбата на фотоволтаиците треба да биде завршена за една година.


Објавен нов Јавен повик од ИПАРД 2 за земјоделците и сточарите


Скопје, 26 декември, 2018 - 13:57 (META) 

Денеска започна кампањата за информирање и едукација за ИПАРД-фондовите, со првата работилница на тема „Користење на средства од Инструментот за претпристапна помош на Европската унија за рурален развој – ИПАРД 2014 – 2020“.

„Овој повик овозможува земјоделските стопанства широк спектар на инвестции во примарното земјоделско и сточарско производство, вклучително и инфраструктурни зафати. ИПАРД-програмите се од исклучителна важност за развојот на македонското земјоделство и вклучуваат мерки кои директно им помагаат на нашите земјоделци. Затоа, со буџетот за 2019 година го зголемивме националното кофинансирање за ИПАРД од 60 милиони денари за 151 милиони денари“, изјави директорот на Платежната aгенција, Николче Бабовски

Од средствата кои ќе бидат кофинансирани, 75 отсто ќе бидат обезбедени од ИПАРД-програмата, а 25 отсто од средствата од буџетот. Вкупната финансиска поддршка за овој јавен повик е близу 12 милиони евра. Крајниот рок за поднесување на барањата е 09 февруари 2019 година.

„Со оваа мерка ќе може да се градат или реконструираат објекти за добиточна храна, складишта за храна, оранжери капацитети за ладење – калибирање и пакување на земјоделски производи. Исто така може да се набавуваат и машини и опрема за земјоделство, системи капка по капка, но, не и трактори, затоа што буџетот за оваа намена е искористен со претходниот Повик. Вкупната финансиска  поддршка во рамките на овој Јавен повик изнесува 11 милиони 883 илјади евра“, додаде Бабовски.


Бизнисмени од Западен Балкан во посета на Јапонија за развивање на деловнa соработка


Токио, 7 декември, 2018 - 16:46 (META) 

Претседателот на Клубот на извозници при Стопанската комора на Македонија, Глигор Цветанов, како дел од делегацијата на Коморскиот инвестициски форум, учествува на повеќедневна посета на Јапонија, во насока на развивање на деловните односи помеѓу Јапонија и земјите од Западен Балкан, информираат од Стопанска комора.

„Во рамките на посетата, Глигор Цветанов учествуваше на првиот бизнис-семинар за земјите од Западен Балкан, кој денеска се одржа во Токио. Настанот, на кој што присуствуваа повеќе од 140 јапонски стопанственици, е организиран од страна на Министерството за надворешни работи на Јапонија, Јапонската организација за надворешна трговија (ЏЕТРО) и Коморскиот инвестициски форум на земјите од Западен Балкан“, се вели во соопштението.

Од Комората информираат дека јапонските стопанственици на регионот на Западен Балкан гледаат како на единствена целина, со важна геостратешка локација, што ги поврзува Европа, Африка и Азија.

„Следејќи ја иницијативата на јапонскиот премиер Шинзо Абе за унапредување на економската соработка на Јапонија со земјите од Западен Балкан, се очекува зголемување на интересот за инвестициски активности од страна на јапонски компании. При тоа, беше посочено дека за јапонските стопанственици, реформските процеси кои државите од Западен Балкан ги спроведуваат како дел од нивните активности за пристапување кон Европската унија, претставуваат гаранција за стабилноста и предвидливоста на деловното опкружување во овие земји, кои се клучни параметри за компаниите кои ќе се одлучат да инвестираат во регионот“, се додава во соопштението.

Делегацијата на Коморскиот инвестициски форум во текот на следната недела ќе оствари работни средби во Министерството за надворешни работи на Јапонија, во Јапонската организација за надворешна трговија (ЏЕТРО), Институтот за бизнис-менаџмент и технологија, а ќе реализира посети на повеќе јапонски компании, вклучувајќи ги „Гликопиа“ и „Панасоник“.


ММФ: Исправни се мерките за оддржливоста на пензиите и социјалната еднаквост


Вашингтон, 19 ноември, 2018 - 11:14 (META) 

Во Министерството за финансии се одржа завршниот состанок со тимот на Меѓународниот монетарен фонд (ММФ), кој престојуваше во земјата со цел спроведување на редовниот годишен преглед на македонската економија. На состанокот присуствуваше тим на Министерството за финансии, предводен од министерот Драган Тевдовски, како и гувернерката на НБРМ, Анита Ангеловска-Бежоска.

Во соопштението на ММФ се наведува дека исправно е што предлог-буџетот за 2019 година е фокусиран на оддржливоста на пензискиот систем, промовирањето на социјалната еднаквост и поддршката на вработеноста.

За промените во данокот на личен доход се вели дека го зголемуваат данокот на доход од капитал и ја подобруваат рамнотежата на даночниот товар меѓу лицата со висок и низок доход. ММФ исто така нотира дека, со цел подобрување на покриеноста и таргетирањето на социјалната помош, буџетот предвидува консолидација и замена на постоечките видови помош, вклучувајќи го и додатокот за трето дете, со гарантиран минимален доход базиран на потребите и со социјална пензија.

Понатаму, според мисијата, предложените пензиски реформи ќе го намалат пензискиот дефицит на среден рок. Според прелиминарните оценки на ММФ, овие мерки, заедно со поддршката за вработеноста и инвестициите, ќе резултираат со привремено зголемување на фискалниот дефицит на 3 проценти од БДП во 2019 година, и потоа негово намалување на 2,4 проценти од БДП на среден рок. Според основната проекција, јавниот долг ќе го достигне максимумот од 54,7 проценти од БДП во 2021 година.

ММФ препорачува постигнување на нула примарен дефицит на среден рок со цел постигнување на јасна надолна тракеторија на јавниот долг. Со цел долгорочна оддржливост на пензискиот систем, потребно е да се разгледаат дополнителни мерки како порестриктивни услови за предвремено пензионирање и покачување на возраста за пензионирање.

За ММФ охрабрувачки се и треба да продолжат неодамнешните реформи за зајакнување на управувањето со јавните финансии и подобрување на фискалната транспарентност. Исто така, се наведува дека мерките за зајакнување на рамката за мониторирање на неплатените обврски во јавниот сектор и предложените измени кои ги поврзуваат општинските буџети со реализацијата на приходите се чекори во правилна насока.


Во предлог-буџетот за 2019 најмногу средства за мерките за вработување и стопанството


Скопје, 13 ноември, 2018 - 9:48 (META) 

Во предлог-буџетот за 2019 година најмногу средства досега се предвидени за активни мерки за вработување, издвоени се 1,1 милијарди денари, што е за 10 проценти повеќе во однос на годинава. Ако се направи пак споредба со 2017 година, оваа сума e двапати повисока, или трипати повисока во споредба со 2014 година.

Согласно проекциите за идната година, се очекува намалување на невработеноста на околу 20 проценти, како и покачување на номиналната нето-плата за 4,5 проценти.

Во буџетот за 2019 година, предвидени се повеќе средства за поддршка за стопанството. Станува збор за речиси 3 милијарди денари, или 40 проценти повеќе средства во однос на годинава.

Со овие средства, како што информираат од Министерство за финансии, ќе се поддржат нови инвестиции, извоз и освојување нови пазари, нови вработувања, поддршка за мали и средни претпријатија, иновативност, технолошки развој и странски инвестиции во технолошко индустриските развојни зони.

„Повратот на ДДВ кон фирмите ќе се одвива навремено и неселективно, како и досега“, рече министерот за финансии, Драган Тевдовски.

Приоритетни мерки во рамки на Програмата за земјоделството за 2019 година ќе бидат насочени кон поддршка на земјоделските стопанства од 30 проценти при набавка на гориво за земјоделска механизација или зелена нафта. Ваква мерка за прв пат се воведува во Македонија, со што се намалуваат трошоците за земјоделците.

Износот на субвенции планиран за 2019 година изнесува вкупно 8,5 милијарди денари, и е за 60 милиони денари повисок од буџетираниот во 2018 година, но дури за 820 милиони денари или 11 проценти повисок од остварениот во 2017 година.


Македонија на 10 место во светот во извештајот „Дуинг бизнис“ за 2019


Скопје, 31 октомври, 2018 - 16:41 (META) 

Светска банка, во извештајот „Дуинг бизнис“ за 2019 година, ја рангира Македонија на високото 10 место во светот, односно на петто место во Европа според условите за водење бизнис во конкуренција од 190 земји, информираат од Министерството за финансии. Во однос на претходната година, позицијата на Македонија е подобрена за едно место.

Министерот за финансии Драган Тевдовски рече дека за бизнисот е важно подобрувањето на регулативата која го забележува овој извештај, но уште поважни се политиките кои ги спроведува Владата за фер третман на фирмите.

– За разлика од порано, не постојат политички притисоци врз бизнис-секторот. Повратот на ДДВ се врши технички без селективност и брзо. Имаме поддршка за домашните бизниси. Ова покажува дека за нас е битно приватниот сектор да има еднакви и фер можности за да оди напред. Работиме и на регулативата за поповолна клима за инвеститорите. Она што е многу важно за инвеститорите се преспективите за приклучување кон ЕУ и НАТО. Интеграција на земјата во НАТО заедно со добро рангирање на „Дуинг бизнис“ ќе биде најголема поддршка и придонес за пододбрување на привлекувањето на инвестиции во Македонија – рече Тевдовски.

Во извештајот „Дуинг бизнис“ за 2019 година Македонија е посочена како една од земјите кои во континуитет работат на подобрување на деловното окружување. Притоа, особено се истакнати преземените мерки околу издавањето на дозволи за градба, односно намалувањето на таксите за дозволи за градба.

Македонија е најдобро рангирана во индикаторот „заштита на малцински инвеститори“, каде е позиционирана на седмо место во светот, а висок ранг има и кај индикаторите „пристап до кредити“ (12 место), како и „условите за дозволи за градба„ (13 место).

Оценувањето за Извештајот се однесува на периодот средина на 2017 до 1 мај 2018, а се базира на информации добиени од државните институции и приватниот сектор.


Даути: Политичката стабилност е клучнa за зголемување на ивестициите низ ТИР-зоните


Тетово, 17 октомври, 2018 - 13:06 (META) 

Министерот без ресор задолжен за странски инвестиции Бардиљ Даути, денеска оствари средба со дел од раководството на Технолошко индустриската развојна зона (ТИРЗ) во Тетово. Целта на посетата беше запознавање со работата и состојбата во зоната.

Даути потенцираше дека политичката стабилност е клучен показател за зголемување на инвестиции низ ТИР-зоните во Македонија.

-Како Влада, интензивно работиме за надминување на лошата политичка атмосфера што постои во моментот околу решавањето на проблемот со името. Колку побрзо се надмине оваа состојба, толку попозитивно ќе има влијание за нови инвестиции не само за ТИРЗ Тетово, туку и воопшто во Македонија – истакна Даути.

Директорот на ТИРЗ Тетово пак, Арбен Халили информираше дека компанијата „Лас плекс“ е нова инвестиција во зоната која ќе работи со изработка на стакло. Халили рече дека на средбата со Даути го информирал за досегашната работа на ТИР-зоната и отвореноста кон странски и домашни инвестиции. На средбата заклучиле дека потребна е рамномерна распределба на инвеститорите низ зоните во Македонија, за сите региони да имаат можност за развој и вработувања.


Тевдовски: Преку инвестирање во подобри јавни услуги, ќе постигнеме одржлив развој


Џакарта, 12 октомври, 2018 - 12:32 (META) 

Македонија е прва земја во регионот која ќе воведе гарантиран минимален приход, истакна министерот за финансии Драган Тевдовски во своето обраќање на Годишните средби на ММФ и Светска банка.

Министерот обраќајќи се на панел од високо ниво, посочи дека одржлив раст може да се постигне само преку вложување во подобар живот за граѓаните, односно преку подобар систем на социјална заштита, подобро образование, здравство и јавни услуги.

– Со поддршка на Светска банка работиме и на подобрување на системот на социјална заштита. Целта е социјалните трансфери подобро да се таргетираат кон ранливите групи. Исто така, ќе воведеме фер даночен систем. Сите овие мерки се во насока на намалување на нееднаквоста а со тоа постигнување на глобалните цели за одржлив развој – рече Тевдовски.

Тој се осврна и на значењето на образованието во постигнувањето на одржлив развој.

Македонската делегација на Годишните средби е предводена од министерот за финансии Тевдовски и од гувернерката на Народната банка Анита Ангеловска-Бежоска. Предвидени се повеќе средби на делегацијата со високи претставници на Светска банка и ММФ.


МЕПСО вложува 4,6 милиони евра во трафостаницата „Дуброво“


Битола, 24 септември, 2018 - 13:45 (META) 

МЕПСО започна со модернизација на трансформаторската станица „Дуброво“ при што ќе биде заменета со нова опрема што е во функција од 1977 година до сега.

„Овој комплексен проект опфаќа замена на примарна опрема (прекинувачи, разделници, струјни и напонски мерни трансформатори) како и ревитализација на секундарната опрема на 400 киловати и на 110 киловати напонско ниво која вклучува: испорака и инсталација на системи за релејна заштита, далечински надзор и за управување како и системи за AC/DC развод и нов систем за мерење електрична енергија“, се вели во соопштението на МЕПСО.

Ревитализацијата на ТС „Дуброво“ планирано е да трае три години. Реализацијата на овој проект ќе обезбеди зголемена сигурност и доверливост во работењето со високонапонската опрема, мониторинг во реално време, навремено детектирање и превенција на дефекти и оптимализација во управувањето со електропреносниот систем.

„Трансформаторската станица „Дуброво“ од системски аспект е еден од најважните енергетски јазли во македонскиот електропреносен систем затоа што го поврзува најголемиот производствен капацитет РЕК „Битола“ со најголемиот конзумен регион Скопје. Во оваа трансформаторска станица се вмрежуваат и интерконективните 400 киловолтни далекуводи кои нашиот систем го поврзуваат со електропреносните системи на Бугарија и на Грција“, се додава во соопштението на МЕПСО.


Членството во НАТО е тест за македонскиот БДП (инфографик)


Скопје, 24 септември, 2018 - 11:01 (META) 

Какви економски придобивки можат да очекуваат македонските граѓани од евентуално зачленување на нашата земја во НАТО, колку пари потроши Македонија за модернизација на АРМ и воведување на НАТО-стандардите во изминативе години и колку ќе троши во иднина се прашања што заслужуваат внимание со оглед на тоа што на референдумот закажан на 30 септември ќе се одлучува за прифаќање на Договорот со Грција и зачленување во ЕУ и НАТО.

На прашањето какви директни финансиски придобивки би добила Македонија доколку стане рамноправна членка на НАТО, од Министерството за одбрана велат дека според кампаративните анализи, придобивките во други земји по зачленувањето во НАТО биле во правец на забрзување на економскиот пораст и зголемување на странските инвестиции.

– Во 2004 година при влезот на Естонија во НАТО растот на БДП во оваа земја изнесувал 6,2 отсто, а веќе во следната 2005 година пораснал на 9,3 отсто, а во 2010 се зголемил на 10,2 отсто. Во 2004 година при влезот на Латвија во НАТО порастот на БДП во оваа земја изнесувал 8,3 отсто а веќе во следната 2005 пораснал на 10,6 отсто, а во 2006 година се зголемил на 11,8 отсто. Исто така во Естонија странските директни инвестиции тројно се зголемиле благодарение на позитивниот ефект врз економијата што го има членството на земјата во НАТО, од 968,5 милиони евра на 3,1 милијарди евра странски инвестиции по зачленувањето во НАТО. Црна Гора за првите шест месеци оваа година бележи двојно поголем пораст на инвестициите од земјите членки на НАТО, што се должи на зацврстувањето на безбедноста и стабилноста по влезот во НАТО – велат од Министерството.

Оттаму додаваат дека членството во НАТО позитивно влијае и на кредитиниот рејтинг на земјата односно за подобри услови за економски пораст и развој.

Во однос на трошоците, од Министерството за одбрана информираат дека во периодот 2008-2018 година за модернизација на армијата се одвоени вкупно 5,2 милијарди денари или околу 85 милиони евра. Надлежните прогнозираат дека во иднина Македонија ќе настојува да одвојува до 2 отсто од БДП за одбраната.

– На Самитот на НАТО во Велс во 2014 година, дадена е препорака земјите членки до 2024 година да ги зголемат трошоците за одбрана на ниво од 2 отсто од БДП со цел да ги исполнат своите цели за развој на одбранбените способности. Воедно земјите членки се заложија, да ги зголемат своите годишни инвестиции за опремување и модернизација на 20 отсто или повеќе од вкупниот трошоци за одбрана. Во Стратегискиот одбранбен преглед, проекцијата на одбранбениот буџет е во насока на заложбите за издвојување до 2 отсто од БДП за одбраната до 2024 година, што ќе се постигне со постепено годишно зголемување на буџетот од 0,2 процентни поени од БДП. Во рамките на тие средства, 20 отсто од буџетот во одбраната ќе бидат издвоени за модернизација – велат од министерството.

На прашањето во колку мисии на НАТО досега учествувале македонски војници и кој плаќа за нивниот ангажман од Министерството за одбрана велат дека досега македонските војници зеле активно учество во операцијата ISAF во Авганистан (од 2002 до 2014 година) и операцијата „Одлучна поддршка“ во Авганистан од 2015 година наваму.

– Во моментов во операцијата „Одлучна поддршка“ министерството за одбрана ги покрива трошоците за плати и надоместоци, додека останатите трошоци како што се транспорт, исхрана, сместување и останати логистички трошоци се регулираат со билатерални договори со земјите предводници во мисијата – велат од Министерството.