Анѓушев: Законот ќе обезбеди транспарентност во поддршката на компаниите


Скопје, 4 април, 2018 - 16:44 (META) 

Вицепремиерот за економски прашања, Кочо Анѓушев се обрати на седницата на Комисијата за економски прашања во Собранието, на која одговараше на прашања од пратениците за потребата од донесување на Законот за финансиска поддршка на инвестициите.

„Законот претставува замена на нетранспарентната шема на државна помош со која во претходните години беа поддржани само 23 компании, а притоа се потрошени над 225 милиони евра, од буџетот на државата. Креиран е транспарентен механизам со кој се овозможува поддршка на многу поголем број на компании и пораст на економијата“, рече Анѓушев.

Тој додаде дека со овој Закон се дава правна сигурност на инвеститорите, која покрај стабилната политичка состојба, се основи за реализација на секоја инвестиција.

Анѓушев потенцираше дека со Законот за финансиска поддршка на инвестиции се планира да се поддржат успешни компании, кои покажале просечен раст на приходот и не намалување на просечниот број на вработени во истиот период, во споредба со годината за која побаруваат државна помош. Сето ова, компаниите може да го прикажат со доставување на завршните сметки за наведените години.


Богов: Банките можат да ја поддржат економијата, потребни се добри проекти


Скопје, 5 март, 2018 - 14:21 (META) 

Банкарскиот и финансискиот сектор се стабилни, така што банките се подготвени да испорачаат кредити, оцени гувернерот на Народната банка на Македонија, Димитар Богов, по завршувањето средбата на Комитетот за финансиска стабилност.

– Системските ризици се минимални и сето тоа упатува дека особено банкарскиот сектор е добро капитализиран, високо ликвиден и подготвен да ја поддржи македонската економија. Неопходно е да се врати довербата кај инвеститорите и да се зголеми побарувачката за кредити. Банките се подготвени и можат да ги испорачаат кредитите, но потребни се квалитетни проекти и посилна инвестициска активност – рече Богов.

Тој додаде дека монетарната поставеност во иднина ќе зависи од повеќе фактори.

– Еден е каква ќе биде мометарната политика во еврозоната кон која сме ориентирани, какви ќе бидат фискалната и политичката стабилност и каков е платниот биланс, односно ситуацијата во девизниот пазар. Во моментов, на сите овие клучни пунктови имаме поволни движење  – додаде Богов.

Министерот за финансии, Драган Тевдовски кој исто така присуствуваше на средбата потврди дека финансискиот сектор е стабилен и ќе може да обезбеди поддршка за пораст на македонската економија.

– За прв пат по осум години, има пад на државниот и на јавниот долг во релативен износ. Обезбедивме еврообврзница во најоптимално време и во најдобри можни услови. Последните податоци покажуваат дека повратот на данокот на додадена вредност (ДДВ) спрема фирмите се врши неселективно и брзо. Повратот на ДДВ во првите два месеци од годината е поголем за 1,4 милијарди денари или за 56 проценти и тоа значи дека брзо се враќа ликвидноста во фирмите за тие да работат, да имаат активности и да инвестираат – рече Тевдовски.


Заев во Лондон учествува на инвестициски самит за Западен Балкан


Лондон, 26 февруари, 2018 - 15:02 (META) 

Владина делегација предводена од премиерот Зоран Заев денеска учествува на промоцијата на „Регионалната инвестициска платформа“ на инвестицискиот самит за Западен Балкан во организација на Европската банка за обнова и развој (ЕБОР), што денеска се одржува во Лондон.

„Регионалната инвестициска платформа“, која ќе ја раководи секретаријатот на ЕБОР, има за цел да го интензивира интересот и приливот на странски инвестиции во земјите од Западен Балкан.

Идејата зад оваа иницијатива е да ги понуди потенцијалите на регионот, но и на секоја земја одделно, во рамките на нивните обединети капацитети, како пазар со повеќе од 20 милиони жители.

Новата „Регионална инвестициска платформа“ ќе ги застапува предностите на регионот пред странските инвеститори и ќе ги обедини сите олеснувања и можности за нови странски инвестиции од регионален карактер.

Првите луѓе на владите на земјите од Западен Балкан по тој повод одржаа и заедничка прес конференција. Заев истакна дека борбата против корупцијата е приоритет во политиките на владата и дека политиките со справување со оваа појава ќе продолжат да се имплементираат со поголем интензитет.

Во однос на енергетското поврзување, премиерот Заев нагласи дека Македонија ќе соработува со сите земји во регионот на ова поле и оваа област е една од најпредизвикувачките од повеќегодишниот акционен план на регионалната економска соработка.


Анѓушев: Секој инвеститор ќе може да добие помош во висина до 50 отсто од инвестицијата


Ерусалим, 4 септември, 2017 - 16:38 (META) 

Владата подготвува нов концепт за привлекување инвеститори, кој се очекува да биде презентиран во средината на септември, истакнал вицепремиерот за економски прашања, Кочо Анѓушев, на бизнис-форумот во Ерусалим.

Тој концепт, како што истакнал, ќе обезбеди транспарентност и еднаков третман на странските и на домашни инвеститори со што позитивно ќе влијае на економскиот развој на земјата.

„Освен основната поддршка, која подразбира ослободување на инвеститорите од даночни и од царински давачки за определен период, креираме и мерки за директна државна помош на инвеститорите, кои ќе бидат транспарентно објавени и подеднакво ќе важат и за домашните и за странските компании. Секој инвеститор ќе може да добие државна помош во висина до 50 отсто од инвестицијата, а ќе се стимулира отворање на работни места, особено работни места за високообразованиот кадар, кој сакаме да го задржиме во Македонија. Како особено важна ќе се земе предвид и соработката на странските со домашни компании“, изјавил Анѓушев.

Тој нагласил дека паралелно со процесот на привлекување на нови инвеститори, Владата посветено ќе работи и на изградба на современа инфраструктура, со која Македонија подобро ќе се поврзе со соседите, а компаниите ќе го подигнат нивото на конкурентност.


Мицкоски: Инвеститорите ќе нè заобиколат поради објавување на висината на субвенциите


Скопје, 30 август, 2017 - 17:41 (META) 

Владата на вчерашната седница донесе одлука за декласифицирање и за објавување на субвенциите што им се даваат на странските инвеститори во Македонија, потег кој ќе влијае на потенцијалните инвеститори и на нивните намери да дојдат во земјава да инвестираат, изјави денеска на прес-конференција генералниот секретар на ВМРО-ДПМНЕ, Христијан Мицкоски.

Тој додаде дека не е никаква тајна, ниту е незаконски тоа што Македонија, како и повеќето земји низ светот што се борат за странски инвестиции, дава субвенции по некаква основа.

– Давањето субвенции било во согласност со закон и даде огромни резултати во намалување на невработеноста, отворањето нови работни места, зголемување на извозот, пренос на технологии и знаење, обезбедување работа за домашните компании, како и за доставувачи или партнери од различен вид. На крај, резултираше со зголемување на индустриското производство, раздвижување на економијата, зголемување на конкурентноста и со пораст на севкупниот домашен бруто-производ – изјави Мицкоски.

Според него, постои огромна конкуренција при привлекувањето на инвеститорите, вклучително и во сегментот на субвенциите.

– Компаниите кои доаѓаат, не посакуваат јавно објавување на нивните договори и приходи врз основа на субвенции, а тоа не ѝ одговара ни на државата. Понекогаш кога конкуренцијата на земји за еден инвеститор е голема и силна, а неговата важност огромна, субвенциите се поголеми, а некогаш може да се успее и со помали субвенции, тоа е предмет на преговори, а во поретки случаи се успева и без субвенции – додаде Мицкоски и нагласи дека наместо во Македонија, земји на инвестирање ќе бидат Бугарија, Србија, Албанија, Романија, Турција, Унгарија и Чешка.


Субвенциите за инвеститорите ќе зависат од висината на нето-платата, најави Анѓушев


Скопје, 26 јули, 2017 - 14:13 (META) 

Субвенциите што странските инвеститори ќе ги добиваат од државата ќе зависат од висината на нето-платата што им ја исплаќаат на вработените, најави денеска вицепремиерот за економски прашања, Кочо Анѓушев.

Тој изјави дека сите инвеститори досега имале два договора, од кои едниот бил за инфраструктура, односно за добивање земјиште и за градење хала, додека вториот договор бил за доделување директна финансиска помош од државата.

– Вториот тип договори вклучуваат стандардни мерки за помош, а тоа се ослободување 10 години од плаќање данок на добивка и од плаќање персонален данок на приход за вработените, ослободување од плаќање царина и данок на додадена вредност (ДДВ) при увоз и од издавање банкарска гаранција спрема Царинската управа во бесцаринските зони. Овие мерки биле присутни во сите договори и со нив нема проблем. Но, тоа што како Влада го гледаме како проблематично е што за секој странски инвеститор имало дополнителна финансиска помош, при што дискреционо било правото на преговарачите да одлучат каква помош ќе им биде дадена – појасни Анѓушев.

Тој додаде дека дополнителната финансиска помош нема повеќе да биде дискреционо право на кој било преговарач. Со измените што ги планира новата влада, според него, ќе се направи точна детерминација на странските инвеститори кои може да имаат влијание на подобрување на македонската економија.

Анѓушев додаде дека Владата ќе ги испочитува договорите со инвеститорите што веќе работат во Македонија, а новите услови ќе важат за нови инвеститори. Сепак, тој додава дека ќе се реагира таму каде што државата е оштетна.


Заев очекува долгот на државата кон стопанството да остане под 700 милиони евра


Скопје, 19 јули, 2017 - 11:41 (META) 

Премиерот Зоран Заев не очекува долгот на државата кон стопанството да стане поголем од 700 милиони евра.

– Сè уште се прават анализи. Стигнавме до ставка од 400 милиони евра. Сепак, не очекуваме долгот на државата кон бизнис-заедницата да надмине 700 милиони евра – рече Заев, пред бизнис-средбата со стопанските комори, одговарајќи на новинарско прашање.

Тој рече дека инвеститорите кои ќе почнат гринфилд-инвестиција во Македонија ќе добијат поддршка и дека за сите ќе важат истите услови, без разлика дали инвеститорот е странски или домашен.

Прашан за работата на инспекциските служби, Заев рече дека нивната главна функција ќе биде превентивна, односно дека пред сè ќе издаваат предупредувачки мерки, наместо да казнуваат како што досега било практика.


ВМРО-ДПМНЕ: СДСМ немаат легитимитет да зборуваат за цената за еврообврзницата


Скопје, 21 јуни, 2017 - 17:14 (META) 

„СДС немаат легитимитет да зборуваат за цената која ја плаќаат за еврообврзницата. Поради нивната антидржавна политичка кампања што ја водеа минатата година, сега граѓаните плаќаат 20 милиони евра повисока камата“, се вели во реакцијата на ВМРО-ДПМНЕ на соопштението на Министерство за финансии.

Од партијата додаваат дека „пазарот на пари беше и тогаш и сега ликвиден, односно има пари, но СДС секогаш е причината поради кои граѓаните скапо плаќаат.“

„Благодарение на писмата кои тие како партија ги пишуваа до инвеститорите и ги повикуваа да не ја купуваат еврообврзницата тие ги чинеа македонските граѓани 20 милиони евра. Ова беше рамно на финансиски тероризам против својата земја“, се вели во соопштението на ВМРО-ДПМНЕ.


Техничката влада на Димитриев се спрема за издавање на нова еврообврзница оваа есен


Лондон, 26 април, 2017 - 20:05 (META) 

Актуелната власт размислува и презема подготвителни активности за издавање на нова еврообврзница во четвртиот квартал од годинава, за да ги отплати долговите кои достасуваат за наплата идната година, извести деловниот информативен сервис „Интелињус“ (Intellinews), повикувајќи се на извори од австриската банка „Рајфајзен“.

Ако новата еврообврзница биде издадена, се вели понатаму во веста, најкраток можен рок на достасување за отплата би бил 1 декември 2020 година. Кој би бил износот на оваа идна еврообврзница, не е наведено.

Од Министерството за финансии за „Интелињус“ изјавиле дека одлуката дали и кога ќе биде издадена новата еврообврзница ќе зависело само од актуелните услови на пазарите на капитал. Тие додале дека „Македонија е компетитивна на меѓународните пазари на капитал и постојано одржува контакти со инвеститорите.“

Сепак, според „Рајфајзен“, власта веќе правела подготвителни „роуд-шоуа“ на кои ги информирала инвеститорите за економската и за политичката состојба во земјава.

„Продолжената политичка криза се заканува со нови предвремени избори. Исто така, се чувствуваме помалку вознемирени во однос на владините инвестициски планови кои би го зголемиле јавниот долг на Македонија од сегашните 48 проценти од домашниот бруто-производ на 55 проценти на среден рок. Ова нè потсетува на случајот со една друга мала балканска земја, Црна Гора, чија преамбициозна инвестициска програма доведе до значително нарушување на јавните финансии и на надворешната ликвидносна позиција“, велат од австриската банка, за овој можен чекор на македонските власти.


Министерство за финансии: Намалена каматата на хартиите од вредност


Скопје, 10 јануари, 2017 - 16:28 (META) 

И покрај политичката пропаганда на СДСМ, кој настојува да ги прикаже државните хартии од вредност како нешто ненормално во јавноста, иако самите ги воведоа, довербата на инвеститорите во економските политики е огромна, што продонесе за намалување на каматата на државните хартии од вредност, се вели во реакцијата на Министерството за финансии на соопштението на СДСМ за задолжувањето.

Во него се додава дека инвеститорите побарале државни хартии од вредност во износ кој надминувал 5 милијарди денари, а Министерството запишало 1,9 милијарди денари во согласност со понуденото во проспектот.

– Како резултат на големата побарувачка на државните хартии од вредност на пазарот на капитал, каматата, односно цената што ја плаќа Министерството за финансии на инвеститорите е намалена за 0,2 процентни поени, што воедно е и најниската камата последниве години – се вели во соопштението на Министерство за финансии.

Во него се додава дека со буџетот за 2017 година предвидено е буџетскиот дефицит да се покрива и од домашни извори.

– Во моментот на пазарот на капитал има голема побарувачка за државните хартии од вредност, што значи дека тие можат да се издадат со пониска камата, односно со помала цена на капиталот – додаваат од министерството.