!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Изградбата на џамијата на Попова Шапка продолжува, иако нема дозвола за градба


Тетово, 14 јуни, 2017 - 16:33 (META) 

На Попова Шапка деновиве повторно продолжија градежни активности за изградба на џамија која нема дозвола за градба. Инвеститорот не се откажува од изградбата на џамијата дивоградба, иако тетовскиот општински инспекторат во изминативе две недели, двапати бил на местото каде што се гради и му наложил да го запре градење.

Иако и двете забрани беа испочитувани неколку дена, ископите за поставување на темелите продолжиле уште во текот на вчерашнот ден. Денеска, местото каде што треба да се гради џамијата беше израмнето и се носеше градежен материјал.

Од секторот за урбанизам при Општина Тетово велат дека на таа локација нема издадено никакво одобрение за изградба на верски објект ниту, пак, за каков било објект. Од тетовски општински инспекторат имаат отворено предмет во кој е констатирано дека џамијата е дивоградба.

Во случајот е вклучен и државниот градежен инспекторат, кој само врши надзор на работата на тетовскиот инспекторат. Но, денеска ниту од Општина Тетово ниту од државниот градежен инспекторат не ни одговараа на повиците да објаснат што ќе преземат против инвеститорот, кој и понатами го крши законот.

Од тетовското муфтиство при Исламската верска заедница денеска не беа достапни за коментар.

Претходно за дел од медиумите негираа дека вршат градежни активности за изградба на џамија на Попова Шапка, иако на повеќе билборди поставени на патот кон Попова Шапка пишува дека во туристичкиот центар ќе се гради џамија, а како инвеститор се наведува ИВЗ.

Планот е џамијата најверојатно да биде на три ката, со големо минаре, а локација се наоѓа веднаш над главниот пат на туристичкиот цетнар, на само десетина метри од викендички.


Богдановиќ бара од Жерновски запирање на градежните работи на Кејот 13 Ноември


Скопје, 4 мај, 2017 - 18:22 (META) 

Претседателот на општинската организација на СДСМ Центар, Саша Богдановиќ, денеска поднел барање до градоначалникот на Општина Центар, Андреј Жерновски, за запирање на градежните работи на Кејот 13 Ноември.

„Причината за поднесување на барањето е избегнување на сите евентуални штетни последици кои може да настанат, како за животната средина, така и за формално-правниот аспект од веќе почнатото спроведување на одлуките на подрачјето на Општина Центар, а донесени од надлежните органи на Град Скопје, со дискутабилна законска основа“, се наведува во дописот на Богдановиќ до Жерновски.

Во него се потсетува дека на 20 март оваа година, Советот на Општина Центар усвоил програма за утврдување на изгледот на градбите на територијата на Општина Центар од значење за општината, врз основа на која на шеталиштето Кеј 13 Ноември е планирано поставување на нова урбанистичка опрема за заштита на постоечкото зеленило во Центар, но и за подобрување на квалитетот на животната средина.

„За спроведување на оваа програма, покрај нејзината исклучителна важност, досега не е преземена ниту една мерка за почнување на нејзина реализација. Дополнително, настанати се нови околности со поништување на ДУП – Мал Ринг донесен на 24 декември 2012 година од претходниот состав на Советот на Општина Центар, за што неопходно е да биде известен и органот што го издал одобрението на приватниот инвеститор што почна со градба на улица на местото од шеталиштето“, стои во барањето на Богдановиќ.


Нова фабрика за вода во Гари


Дебар, 19 септември, 2016 - 16:38 (META) 

Во близина на дебарското село Гари, денеска беше отворена фабриката за вода „Маја“.

Почетната инвестиција на хрватскиот инвеститор, компанијата „Мали Лошињ“, изнесуваше 300.000 евра, а проценетите 7,7 милиони евра инвестиција, достигнаа 14 милиони евра за овие три и пол години, колку што траеше процесот на реализација.

Моменталниот број на вработени е 25, а според најавите на инвеститорот, тој наскоро ќе се зголеми. Дневното производство на амбалажирана вода може да достигне и до 200.000 литри.

Произведената вода во оваа фабрика е првенствено наменета за извоз во соседните земји, арапските земји, Хрватска и во Русија.


Скината одводна цевка го блокираше центарот на Скопје


Скопје, 8 септември, 2016 - 18:22 (META) 

Полициски возила и денеска ја блокираа улицата кај новата зграда на Факултетот за драмски уметности во центарот за Скопје, спроти Министерството за надворешни работи, поради скината главна цевка од канализациската мрежа, пренесува „24 Вести“.

Според работници на Јавното претпријатие „Водовод и канализација“, како што пренесува телевизијата, проблемот настанал поради тоа што инвеститорот, кој гради во близина, копајќи вчеравечер ја скинал цевката од главната фекална канализација, по што ископот за новиот објект се полни со фекалии.

На дел од телевизиските екипи денеска грубо им беше забрането да снимаат на местото, бидејќи станувало збор за приватен имот, иако околу објектот што се гради нема поставено табла за инвеститорот и за изведувачот.

Градежен инспектор на Општина Ценатр ја запрел градбата на објектот, а ќе се бара и ќе се испитува дали инвеститорот има елаборат за заштита на градежната јама. Според Општината, како што пренесува „24 Вести“, инвеститор на објектот е „Волис Проперт“, изведувач е фирмата „Рапид билд“, а надзор на објектот има „Поинт дизајн“.

Во ископот, поради големото количество вода, има потопен багер, а се забележува и големо свлечиште кое може да предизвика уривање на зградата на Факулетот за драмски уметности, која нема потпорен ѕид. Поради тоа на улицата не е дозволен пристап на возила и единствено можат да се забележат камиони на ЈП „Водовод и канализација“ кои ја испумпуваат водата, но и цевки кои го празнат ископот и фекалиите ги исфрлаат на кејот на реката Вардар, пренесува телевизијата.


Исечени дрвјата во спортскиот центар во Тетово


Тетово, 24 август, 2016 - 16:09 (META) 

Откорнати се сите дрвја во спортскиот центар во Тетово, кој беше единствената слободна зелена површина во градот. Сечата ја извршил новиот закупец на овој простор, кој месецов почна да го реконструира центарот. Од Општина Тетово велат дека сечата на дрвата е направена нелегално.

„Оваа површина преставува градежно изградено и уредено земјиште со намена за спорт и за рекреација. Општина Тетово за просторот на спортскиот центар во Тетово има издадено само одобрение за поставување урбана опрема. Што се однесува до сечењето на дрвјата на оваа површина, инвеститорот што ги врши градежните работи не ја добил потребната согласност од страна на Јавното комунално претпријатие Тетово. Инспекторатот на Општина Тетово има отворено соодветна постапка и пријава против субјектот што го извршил ова дело“, велат од Општина Тетово.

Од новиот закупец на спортскиот центар, фирмата „Сат бус Тетово“, велат дека дрвјата, кои биле стари и болни, би преставувале опасност за идните посетители на спортскиот центар, кој за шест месеци треба целосно да биде реконструиран.

– Дрвјата беа трули, при поголем ветер се кршеа и паѓаа на земја и затоа одлучивме да ги исечеме, а заради безбедноста на идните посетители на спортскиот центар – изјави Агрон Илјази, преставник од фирмата закупец.

Тој додаде дека во спортскиот центар, каде ќе се донесе и нова урбана опрема за спорт и за рекреација, ќе бидат засадени повеќе од 200 дрвја, а 40 отсто од целата парцела ќе биде слободна зелена површина.


„Нисан“ презема 34 отсто од „Митсубиши“


Јокохама, 12 мај, 2016 - 12:27 (META) 

Јапонскиот производител на автомобили „Нисан“ купува 34 отсто од јапонската компанија „Митсубиши моторс“ за 1,9 милијарда евра. „Митсубиши“ ќе му продаде на „Нисан“ 506,6 милиони акции.

Директорот на „Нисан“, Карлос Гон, одржал итна прес-конфренција со претседателот на управниот одбор на „Митсубиши моторс“, Осам Масик, во Јокохама, каде што е седиштето на „Нисан“.

Тој истакнал дека „Нисан“ ќе инвестира 1,9 милијарда евра во „Митсубиши моторс“, со што ќе стане најголем инвеститор во таа компанија.

Договорот меѓу двете компании за купопродажба треба да биде потпишан на 25 мај, а да се спроведе во октомври.

„Нисан мотор“ така ќе стане најголем акционер во „Мицубиши моторс корпорејшн“ (ММЦ).

Овие две компании веќе се партнери, бидејќи „Нисан“ произведува лимузини за ММЦ кој, пак, прави мини-возила за „Нисан“.


„Делфина турс“ во Охрид ќе гради модерна автобуска станица


Охрид, 6 мај, 2015 - 14:32 (META) 

Општина Охрид и транспортната компанија „Делфина турс“ од Скопје денеска го потпишаа договорот за изградба на современа автобуска станица во Охрид.

– Инвеститорот досега ги испочитува сите предвидени временски рамки и законски обврски во согласност со огласот. Очекуваме во законски предвидените рокови кои ќе следат од постапката, да ги реализира своите ветувања. Во минатиот период, за жал, имавме една импровизирана автобуска станица, која не беше угледно место за гостите што тука го остваруваат својот прв контакт со градот. Со изградбата, овој дел од градот ќе биде втор центар, каде во иднина ќе се изградат и други објекти, што ќе значи заживување на овој дел – изјави градоначалникот Никола Бакрачески.

Сопственикот на „Делфина турс“, Аднан Исмаил, соопшти дека новата автобуска станица што ќе се гради во Охрид ќе биде најмодерна, не само во Македонија, туку и пошироко во регионот.

– Моментално работиме на потребната проектна документација и добивање дозволи за почеток на градба, со надеж дека тоа ќе го реализираме во најкус можен рок за да почнеме со самата градба. Иако проектот е во изработка, можам да ветам дека охриѓани ќе имаат најубава автобуска станица во Македонија, но и пошироко во регионот – изјави Исмаил.

По неодамна завршената јавна лицитација за продажба на градежно земјиште, реномираната транспортна компанија и туристичка агенција „Делфина турс“ од Скопје стана сопственик на градежната парцела со вкупна површина од околу 12.000 квадратни метри, каде ќе се гради новата современа автобуска станица.

Почетната цена изнесуваше 3.170 денари, а на јавната аукција беше достигната цена од 3.487 денари, односно вкупно 41.833.540 денари, од кои 80 проценти одат на сметка на Општината, а 20 отсто на сметка на Министерството за транспорт и врски, односно Владата на Република Македонија.

Според огласот, инвеститорот има обврска да обезбеди одобрение за градба во рок што нема да биде подолг од една година, а во период од две до четири години ќе треба комплетно да го реализира проектот, односно да ја изгради автробуската станица и да ја стави во функција. Објектот е предвидено да има приземје, четири ката и потпокрив.


Ноќеска на Водно се појавило лизгање на земјиштето


Скопје, 9 април, 2015 - 14:19 (META) 

Општината веднаш ќе побара од Градежниот факултет во Скопје да ја испита состојбата на земјиштето, над хотелот „Тасино чешмиче“, а потоа ќе се подготви елаборат и ќе се пристапи кон градење потпорен ѕид, соопштија од Општина Центар.

Ова е последица на синоќешното лизгање на земјиштето на таа локација.

Денеска Анреј Жерновски, градоначалникот на Општина Центар, се сретна со жителите на населбата Водно.

Ископот ја загрозува сигурноста на околните градби и стабилноста на земјиштето. Иако во 2009 година се издадени неколку решенија со напомена дека ќе се пристапи кон присилно административно извршување, досега, велат сопствениците на загрозените куќи, инвеститорот на хотелот „Тасино чешмиче“ не само што не постапил по тоа, туку и продолжил со градење.

„Токму поради ова, дел од советниците на советничката група од СДСМ во Советот на Општина Центар и градоначалникот Жерновски се спротиставуваа на промената на деталниот урбанистички план Тасино чешмиче 2, кој имаше цел да дозволи изградба на десеткатница на Водно. Случајот беше пратен и до Уставниот суд на РМ, но уставните судии, со исклучок на судијата Наташа Габер-Дамјановска, се прогласија за ненадлежни за овој случај“, пишува во соопштението од Општина Центар.


Се бара нов Субрата да инвестира во Џумајлија


Скопје, 11 март, 2015 - 17:52 (META) 

Се бара нов инвеститор за плодните ниви на Џумајлија. Министерството за земјоделство ќе објави повик за закуп на земјоделско земјиште на површина поголема од 4.400 хектари.

Компаниите заинтересирани да го шират својот земјоделски бизнис во Џумајлија треба да достават бизнис-план со износ на вкупните инвестиции, опис на применетите технологии, спецификација на механизацијата и планираниот број вработени по години.

Министерството за земјоделство пред некое време ја активираше банкарската гаранција од три милиони евра и го раскинa договорот со Субрата Рој за Џумајлија, кој требаше да донесе првични инвестиции од 211 милиони евра.

Рој во март беше уапсен затоа што на инвеститори не им вратил повеќе од две милијарди фунти затоа што незаконски им биле продадени обврзници.

Според договорот, компанијата на бизнисменот Рој беше должна за три години да набави 20.000 крави. На земјиштето од околу 6.000 хектари беше предвидено да се произведува добиточна храна, да се одгледува стока и да се направи регионална млекарница во која дневно требаше да се произведуваат 80.000 литри млеко.

Вкупната инвестиција во млечниот бизнис во земјава на Рој требаше да достигне 1,6 милијарда евра.

Компанијата на Рој  доби дел од земјиштето на пропаднатиот агрокомбинат „Џумајлија“ во Светиниколоско, под концесија за период од 15 годинии. Тој требаше да ѝ плаќа на државата 121.000 евра годишно.