Шилегов: Ќе го решавам проблемот со воздухот и ќе ги изградам тунелите под Кале!


Скопје, 27 април, 2018 - 15:47 (META) 

Со проекти во вредност од 300 до 350 милиони евра во текот на неговиот мандат, градоначалникот на Скопје Петре Шилегов очекува дека ќе ги реши во целост или барем во голем дел најголемите проблеми на градот, како што се загадениот воздух, преоптоварениот сообраќај, притоа плаќајќи, како што вели, разумни суми, за разлика од претходното раководство. Фасадата на Сити Галери чинела 2 милиони евра, а  новиот мост што треба да почне да се гради во септември и да ги спои Аеродром и Гази Баба би чинел 3-4 милиони евра, потенцира тој.

Во интервјуто за „Вистиномер“ направено во рамките на проектот „До отчетни општини преку активни граѓани“, спроведуван од Фондацијата „Метаморфозис“, а поддржан од американската непрофитна фондација NED (National Endowment for Democracy), скопскиот градоначалник вели дека ќе се зафати со решавање на проблемот со загадениот воздух во Скопје, колку и да чини тоа.

Една од неговите идеи за тоа е Град Скопје да ја преземе топловодната мрежа и топланите, а потоа напоредно да ја врши и гасификацијата до крајните потрошувачи, притоа работејќи по стратегија за тоа кој дел треба да добива централно греење, а кој дел гас.

Планира и концесии за помали топлани кои би работеле на гас, а би обезбедувале централно греење за помали области.

Делот на градската територија северно од Вардар, според Шилегов, е местото каде што треба да се насочи идниот развој на градот. Затоа во мај ќе биде распишан тендер за тунели по Кале, зацртани во Генералниот урбанистички план на Скопје од 1965 година, за кои вели дека ќе го поттикнат развојот на северната територија, заедно со продолжување на булеварите „Словенија“ и „Христијан Тодоровски – Карпош“, како и претворање на улицата „Босна и Херцеговина“ во булевар кој ќе се надоврзе на „Словенија“.

Јавниот превоз треба да се врши со еколошки автобуси – на струја или на гас, а тие би биле и поисплатливи од сегашните, објаснува скопскиот градоначалник.

Целото интервју на градоначалникот Шилегов може да го прочитате тука.


Јованоски: Во Прилеп работиме на сите полиња и на сите ветени проекти


Прилеп, 27 април, 2018 - 13:14 (META) 

Советот на Општина Прилеп работи непречено. Се донесуваат одлуки, се штитат интересите и потребите на граѓаните. Советниците од ВМРО-ДПМНЕ ги очекува голема работа, се подготвуваат проекти… Дали и како ќе гласаат, сепак, тоа е нивна одлука, секој треба да си ја понесе својата одговорност,  вели градоначалникот на Општина Прилеп, Илија Јованоски во интервјуто за „Вистиномер“ направено во рамките на проектот „До отчетни општини преку активни граѓани“, спроведуван од Фондацијата „Метаморфозис“, а поддржан од американската непрофитна фондација NED (National Endowment for Democracy).

Јованоски посебно се осврнува на наследениот долг од 3,5 милиони евра.

– Тоа е утврдено и со Записникот за примопредавање, кој е изработен од страна на стручните служби, каде што раководителите се сè уште лицата поставени од ексградоначалникот Марјан Ристески. А, овој Записник само да кажам дека до денеска не е потпишан од страна на Ристески, иако му беше доставен на увид. Овде се и обврските кон добавувачите, обврските по кредити, ризиците врз буџетот на Општината. Бидејќи јасно е колкав е основниот ризик, но не се знае колку ќе изнесуваат крајните ризици! – објаснува градоначалникот на Прилеп.

Јованоски обвинува за многу пропусти на неговиот претходник, Марјан Ристески. Вели дека цели три мандати тогашниот градоначалник работел без визија и дека многу работи што се суштински за граѓаните и општината не се реализирани.

– Реално не очекував дека ситуацијата ќе биде толку лоша, да не речам катастрофална. Но, не само од финансиски, туку од секој аспект. Во Општината нема проекти, не се работени ДУП-ови. Не сфаќам што се правело 12 години. Цел тој период се немало визија, ни дефинирани цели каде треба да се движи општината, условно кажано. Многу неодговорно се работело на приходите на Општината. Набрзо според насоките од Државниот завод за ревизија, Општина Прилеп ќе треба да отпише околу 100 милиони денари побарувања, по разни основи за комунални такси и надоместоци, закупнини и сл. парични средства, што се едни од сопствените приходи на финансирање на Општината. Дел од побарувањата можеби оправдано се отпишани. Но, најголем дел се последица на неодговорно и недомаќинско работење на Ристески и претходната локална власт – вели прилепскиот градоначалник.

За горливиот проблем на прилепчани – лошата состојба на улиците и некои патишта, вели дека ќе се реагира на три начини – со санација на дупки, онаму каде што останатиот дел од улиците е во добра состојба, за што се издвоени 10 милиони денари, потоа со  реконструкција и рехабилитација на делови или цели улици од помал обем, како и со изградба на нови улици.

Во поглед на состојбата во населбата Тризла, каде живеат Роми, вели дека се реализирани некои работи, но ќе се работи уште.

– Што се однесува до инфраструктурното уредување на „Тризла“, односно населбата „Три багреми“, состојбата е следна: ЕВН изгради трафостаница, тампониран е патот, отстранети се дефектите на водоводната мрежа, обезбеден е бесплатен превоз за учениците, се бараат решенија за да се обезбеди доволно вода, се ставаат контејнери за собирање отпад, во тек се мапирањето на граѓани без документи за лична идентификација како и активности за легализација на дивоградбите, што е основа да се изработи ДУП за населбата – вели Јованоски.

Посебно се гордее со остварувањето на едно од неговите ветувања.

– Бесплатниот превоз за пензионерите е реалност, тој функционира секој работен ден од 8-12 часот. Моето изборно ветување е остварено. Зборот е збор!

Повеќе од интервјуто, како и изјавите на Јованоски за транспаретноста, може да прочитате тука.


Заев: Важно е да не бидеме обезличени дома


Скопје, 26 април, 2018 - 11:26 (META) 

Многу е важно дома да не бидеме обезличени, да не бидеме обесчестени, вели македонскиот премиер Зоран Заев во интервју за бугарската телевизија БТВ, коментирајќи ги разговорите за прашањето за името во Грција.

Притоа, на прашањето кое име е најприфатливо, не даде директен одговор, но нагласи дека мора да се гледа реално и да се каже дека Македонија е многу поголема од денешна Република Македонија, односно денешната македонска држава го зазема само горниот, северен, вардарски дел од Македонија, а Пиринскиот дел е дел на Бугарија, а еден дел е во Грција.

– Делот од историска Македонија што е во Бугарија, ние го признаваме како бугарски и тука нема никакви дилеми. Ние го нарекуваме Пирински дел, бидејќи Пирин е најголемата планина, но таму живеат граѓани на Бугарија од кои некои се чувствуваат како Македонци и тоа е нивно право. Ние со тоа немаме никаков проблем – вели Заев.

Тој вели дека сегашната влада нема намера да се откаже од барање решение на проблемот со името со Грција и вели дека ако сега не се најде решение, ќе има повторно обиди тоа да се случи за три, шест месеци…


Јаневски: Во периодот што доаѓа во Струмица ќе станат повидливи ветените проекти


Стримица, 25 април, 2018 - 14:14 (META) 

Коста Јаневски, градоначалник на Струмица и поранешен пратеник и член на Советот на Општината изразува умерено задоволство од досега сработеното, пред се затоа што, вели, за да се реализираат проектите мора да се исполнат законските предуслови, а за тоа е потребно време.

Запрашан како е задоволен од ветеното и текот на реализацијата, во интервјуто, спроведено во рамките на проектот „До отчетни општини преку активни граѓани“, спроведуван од Фондацијата „Метаморфозис“, а поддржан од американската непрофитна фондација NED ( National Endowment for Democracy), Јаневски најбројува повеќе активности.

Овој период е попасивен, се подготвуваат проектите и тендерските документации. Еден дел од нашите предизборни ветувања се во тек и се движат, а некои и се реализирани, како што е оној за згрижување на кучињата бездомници. Тој проект е доведен до фаза за одобрување за градење.

Ги исчистивме и каналите за наводнување, што наиде на одобрување… Имавме бетонирање во Турското маало со потпорен ѕид, исто така потпорен ѕид и на ул. Првомајска, таа активност ја завршивме.

Советот веќе донесе е одлука поврзана за т.н. зелени кровови, со што се достапни одредени комунални олеснувања. Во тек е последната фаза на подготовка за изградба на станица за полнење на електрични возила, со цел да го поттикнеме еколошкиот аспект преку нашиот буџет. Го помагаме и спортот преку поддршка на спортските клубови, но на одреден поправичен начин и преку рамномерно исплаќање на ратите.

Работиме не само во градот туку и низ населените места

Ветивме и реализираме финансиска подршка за новороденчињата… Сега е време и фаза кога не се многу видливи проектите што се реализираат или треба да се реализираат, но работите се во теки се подготвуваат многу проектни документации и тоа луѓето ќе го видат наскоро и тоа не само во градот.

Има приклучок на канализациониот систем во населено место Добрејци, бараме изведувачи за канализициони системи во Дабиле и Просениково… Јавното осветлување го правиме поефикасно со нови поефикасни светилки и тоа не само во градската средина, сега имаме интервенција во Куклиш, Добрејца…

Мислам дека во наредниот период согледувањата за исполнети ветување ќе бидат уште поубедливи. Знаете имаше ветување со рок за оваа година, некои за наредната година, а некои се прилично опсежни, амбиициозни и комплексни, но јас стојам на тоа дек аќе дадеме се од себе да ги исполниме 100 процентно.

Не гледаме потреба за портпарол

Во врска со отчетноста, на стандардизираните прашања градоначалникот Јаневски одговори:

  • Портпарол, посебно некое означено лице во Општина Струмица нема. Смета, а и досега така било, дека можеби и нема некоја потреба од посебно делегирано лице за тоа. Мисли дека сите вработени, се достапни и ги коментираат одлуките, да даваат изјави….
  • Се јавува на телефон кога го бараат новинарите и претставници на граѓанското општество. Неговиот телефон е десетина години ист, тој број го знаат струмичани и од неговата медицинска пракса, кога активно работел како доктор. Ако некогаш не се јави, пишува пораки и се труди секогаш да одговори што е можно повеќе.
  • Се објавуваат сите одлуки на градоначалникот и на Советот на општината, во службениот весник на општината и на сајтот на Општина Струмица
  • Објавена е и административната структура на Општината – раководители на секотри, на одделенија, ги има на веб страната.Објавен е и буџетот на Општината и во Служебе весник и на веб страницата.
  • Вели дека се објавени и проектите и трошоците за истите. Објавени се и на веб страницата, а преку кварталните извештаи се следат промените, реализацијата на буџетите, процентите и т.н.
  • Објавени се и податоците за трошоците на Општината од типот храна, пијалоци, телефон итн., преку кварталните извештаи…„Имаме и обврска тие трошоци да ги објавууваме и на сајтот на Бирото за јавни набавки“.
  • Записниците од седниците на Советот не се објавуваат. „Меѓутоа седниците се јавни, тие директно се пренесуваат и граѓаните можат да имаат увид. Би можеле да размислиме и записниците да ги закачиме на веб страницата“.
  • Има назначено и лице за информации кои се од јавен карактер и листа на достапни документи.
  • Се објавува и годишната програма за работа и реализацијата, како и трошоците за спроведување на таа програма.

Целото интервју кое го реализира новинарот Ване Трајков може да го проследите подолу:

 

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED – National Endowment for Democracy) и Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States), иницијатива која поддржува демократија, добро владеење и евро-атлантски интеграции во Југо-источна Европа.


Закерберг: Откривме профили од Македонија кои ширеа лажни вести


Скопје, 22 март, 2018 - 15:56 (META) 

Сопственикот на „Фејсбук“, Марк Закерберг, во интервју за „Си-ен-ен“ вели дека минатата година пуштиле нови алатки за вештачка интелигенција, за да откријат лажни профили што се обидуваат да шират лажни вести, и дека пронашле голем број такви профили од Македонија.

Ова е прво појавување на Закерберг во медиумите откако беше откриен скандалот со „Кембриџ Аналитика“, фирма за податоци која имала врски со кампањата на претседателот на САД, Доналд Трамп во 2016 година.  Фирмата наводна имала пристап до информации на повеќе од 50 милиони „Фејсбук“ корисници без нивно знаење.

Закерберг се извини за скандалот и потенцираше дека „Фејсбук“ вложува напори за да спречи мешање во изборите во 2018 година.

– Во 2017 година, за време на изборите за Сенатот во Алабама, пуштивме нови алатки што ги направивме за да откриеме лажни профили кои се обидуваа да шират лажни вести и пронајдовме многу различни профили од Македонија. Треба напорно да работиме за да им отежнеме на земји како Русија да се мешаат во избори и да направиме тролови и други луѓе да не можат да шират лажни вести – вели Закерберг во интервјуто.


Заев: Неприфатливо е име без превод, не гледам причина да го менуваме Уставот


Берлин, 26 февруари, 2018 - 12:41 (META) 

Македонскиот премиер Зоран Заев во интервју за германски „Шпигел“ вели дека очекува да се најде решение со Грција за прашањето за името, но смета оти не е неопходно менување на Уставот и дека евентуалниот договор може да се гарантира со меѓународен договор. Неприфатливо, како што наведува, е менување на името на државата со име кое нема да биде преведено.

Заев вели дека не може да си замисли неуспех на разговорите околу спорот за името.

– Не сакам ни да помислувам на тоа дека нема да има решение во спорот за името. Ние мораме да го решиме овој спор, затоа што само така можеме натаму да се развиваме, да се интегрираме во ЕУ и да станеме напредна држава со владеење на правото. Тоа е добро за целиот регион. Неуспех е незамислив, за Македонија, за целиот регион на Западниот Балкан и на некој начин и за ЕУ – истакнува Заев во интервјуто.

Во однос на грчките барања за промени во Уставот, Заев смета дека тоа не е неопходно.

– Не гледам никаква причина за барањето името да го менуваме во Уставот, тоа не е достоинствено. На Грција и е потребен доверлив партнер, а не партнер без достоинство. Уставот може да се промени, но тие промени би можеле повторно да се изменат. Најважната гаранција за Грција е решението за спорот за името да биде одржливо. Тоа се прави со меѓународни договори, кои се ратификуваат и важат и во меѓународните организации – наведува Заев.

Предлозите кои деновиве се слушаат од грчки политичари, за менување на името на државата со име кое нема да биде преведено, за Заев се неприфатливи.

– Не можам да препознам разумни аргументи за такво нешто. Како тоа практично би изгледало, да не се преведува нашето име? Дали треба да ги натераме канцеларката Меркел или претседателот на САД, Доналд Трамп да не нарекуваат, на пример, Severna Makedonija? Таков пример нема никаде во светот – вели Заев.

По промената на името на автопатот и аеродромот во Скопје, македонскиот премиер вели дека не се планираат натамошни слични гестови во таа насока, но најавува дека заеднички комисии од двете земји ќе ги преработуваат историските учебници.

Прашан дали германската влада треба поактивно да учествува во разговорите, Заев вели дека и на македонската и грчката им се потребни поддршка и охрабрување.

– Но да се врши притисок врз било која од страните, не е исправниот пат. Никој не може да ни ја одземе самостојната и суверена одлука во спорот за името – додава македонскиот премиер.

Во однос, пак, на можните територијални претензии на кои предупредува Грција, Заев вели дека единствените претензии од Македонија се насочени кон грчките плажи.

– Да, ние сакаме на лето да ги окупираме убавите грчки плажи и острови. Повеќе од еден милион Македонци секоја година патуваат во Грција, таму ги трошиме нашите пари, ја сакаме Грција, има многу контакти меѓу бизнисмени и туристи. Но искрено: немаме никакви други окупациски намери – истакнува Заев за „Шпигел“.


Коѕиас: Доаѓам во Скопје со план 20 страници, првиот дел за името е готов


Атина, 16 февруари, 2018 - 12:28 (META) 

Јас претпочитам име што во меѓународни рамки ќе зборува дека тој дел на Македонија е сега делот на ФИРОМ, Скопје, со Албанци и Словени и дека тој дел нема ништо заедничко со грчка Македонија – не сакам да се случуваат забуни, вели Никос Коѕиас, грчкиот министер за надворешни работи во интервју за грчката телевизија „Алфа“.

Коѕиас објаснувајќи дека месецов ќе дојде во Скопје со план на 20 страници, вели дека првиот дел е готов, а се однесува на името и на изведенките од името.

Се очекува Коѕиас да биде првиот грчки висок функционер што ќе слета на скопскиот аеродром, како гест на добра волја по неговото преименување од „Александар Велики“ во Меѓународен аеродром Скопје.

Шефот на грчката дипломатија упатува и внатрешна порака, до политичките сили во Грција, посочувајќи дека нерешавањето на спорот ќе остави големи можности за мешање на Турција во регионот.

– Оние што сакаат уставот да се смени сега и тука, знаат дека тоа нема да се случи. И тоа се тие што не сакаат договор. Но, сакам да појаснам дека несогласувањето со северниот сосед ќе значи продолжување на проблемот. Тоа ќе значи дека во регионот ќе имаме постојан извор на нестабилност, поради што Турција ќе се обидува да интервенира. Заев беше во Турција, како што знаете, војската на северниот сосед е обучувана од Турција. Сметам дека е добро да ги развиеме нашите односи, за тие работи да се одвиваат во добра соработка – вели Коѕиас.

Зборувајќи за предлозите што биле изнесени на маса за новото име, тој вели дека ставовите на раководството на ФИРОМ и неговите се разликуваат.

– Или Горна Македонија, или Северна Македонија или Вардарска Македонија или Македонија – Вардар. Има дебата. Името да биде на латиница, да биде на англиски, од каде ќе се преведува на сите јазици. Тоа е она што мислам дека Скопје би го сакало. Мојата желба е малку покомплексна. Би сакал да биде тоа име кое ќе кажува дека тоа е една друга Македонија, географски ентитет, а не историско наследство на грчка Македонија – вели шефот на грчката дипиломатија во интервјуто.

Тој гледа позитивно на македонскиот премиер и објаснува дека планот ќе биде „пакет“.

– Мислам дека господинот Заев изразува оптимизам, што е добро за преговорите. Ние зборувавме точка по точка. И кога така преговарате, не може секаде да се согласите, оти за сè имате свое мислење, а другиот негово. Тогаш се обидувате различните точки да ги ставите во пакет. Она што се обидувате да го ставите во пакет се другите точки. Како што велиме академски, тоа е пакет решенија, што значи дека јас ќе ви попуштам на една точка што за мене не е битна, но за вас е многу битна. А вие ќе ми попуштите за точка што за мене е многу важна, а за вас помалку важна. Оти, во спротивно, нема спогодба. Мислам, ако се сеќаваме, дека господинот Заев рече дека сме согласни за општите принципи. Да решиме некои проблеми, јас размислувам за неговото многу практично решение. Во смисла дека ако за мене некои прашања се решени, за нив не се – вели Коѕиас.

За планот на 20 страници, тој објаснува дека првиот дел е готов, а се однесува на името и на изведенките од името.

– Односно, како ќе се користи името – ние сме и за внатрешни и за надворешна употреба, и во меѓународните односи и во билатералните односи. Значи, има име и тоа се користи, но доаѓаат и изведенките. Идентитетот, единството, јазикот. Потоа, се зборува и за трговските марки – има многу производи со името Македонија на двете страни, и, се разбира, тоа мора да престане. Но за тоа нема да зборуваме во овие преговори – вели грчкиот министер за надворешни работи.

За менувањето на македонскиот Устав, тој вели дека сега другата страна на тоа се противи, но е неопходно за долгорочна стабилност.

– Моите пријатели од Скопје веруваат дека нема потреба од промена на уставот. Тоа не може да го направат сега, немаат мнозинство. Сепак, ние веруваме дека за договорот да донесе долгорочна стабилност и консолидација на оваа земја, потребни се уставни измени, инаку се остава простор за спорови во иднина – вели Коѕиас.

 


Димитров: Со Коѕијас сакаме да го решиме спорот, но разликата е во тоа како да се реши


Софија, 16 февруари, 2018 - 11:36 (META) 

Министерот за надворешни работи Никола Димитров во интервју за бугарската телевизија „Нова“ вели дека тој и неговиот грчки колега Никос Коѕиас сакаат да го решат спорот со името, но дека имаат и разлики околу тоа како треба да се реши проблемот.

– Ние сме многу оптоварени со нашата историја. Ние сме многу горди нации. Сите на Балканот. Важно е да се покаже на остатокот од Европа дека овде на Балканот можеме да се однесуваме европски. Битката е помеѓу силите на иднината и силите од минатото. Сакам мојот народ да биде со исправена глава кога ќе решиме нешто и ќе се ракуваме – истакна Димитров.

Тој потенцира дека во моментот национализмот е слаб во Македонија и дека сегашната влада се обидува да го замени со „визионерски патриотизам“.

– Затоа сме многу благодарни на бугарското претседателство, бидејќи, во тешка ситуација за Европа – заедно со „Брегзит“ и мигрантската криза, бугарското претседателство успеа да го врати Западен Балкан на дневен ред. Многу е важно да го фатиме овој воз. Долго време сме во чекалницата, важно е за нас, исто така е важно за стабилноста во регионот да се качиме на него – вели Димитров.


Пангалос: Реакциите „Македонија не смее да се даде“ доаѓаат од искомплексирани типови


Атина, 22 јануари, 2018 - 11:00 (META) 

Во интервју за грчката телевизија „Скај“, поранешниот министер за надворешни работи на Грција, Теодорос Пангалос, вели дека уште во 1992 година на тогашниот шеф на дипломатијата, Андонис Самарас, му кажал оти северниот сосед има право да се вика како што сака, па дури и Атина или Спарта.

– Чест треба да ни биде да можеме да го копираме Александар Велики – вели Пангалос во интервјуто, истовремено оценувајќи ја како „правилна“ позицијата на шефот на македонската дипломатија Никола Димитров дека терминот Македонија не е ничија ексклузивна сопственост.

– Скопје нека се вика ако сака и Атина или Спарта, нека се викаат како сакаат, му кажав на Самарас во 1992 година, вели поранешниот шеф на грчката дипломатија во интервјуто.

Велејќи дека реакциите како „името Македонија не смее да се даде“ доаѓаат од „искомплексирани и сомнителни типови и кругови“, поранешниот министер зборува и за можниот референдум во Грција. Според него, народот не донесува секогаш најдобри одлуки.

– Дури 600.000 гласаа за (контроверзниот наводен бизнисмен и „пророк“ Артемис Сорас), па немојте да ми зборувате за народ. Секој што тропа глупости се повикува на „народот“. Но глупав народ не може да се изјаснува на референдум каков што сака Каменос – вели Пангалос.

Слични изјави викендов дадоа и солунскиот градоначалник Јанис Бутарис и грчкиот премиер Алексис Ципрас.


Бутарис: Прашањето за името е „надувано“ поради глупавоста на политичарите


Солун, 3 јануари, 2018 - 14:10 (META) 

Мора да имате добри односи со соседите. Прашањето за името е надувано пред се поради глупавоста на политичарите. Луѓето сакаат да си најдат идентитет. Со отстапки од двете страни, но и од опозицијата, подготвени се за компромис. Господинот Заев рече дека ќе го смени името на аеродромот, ќе ги смени таблите на улиците, вели солунскиот градоначалник Јанис Бутарис во интервју за радиото „Практорио ФМ“ на грчката новинска агенција АНА-МПА, одговарајќи на прашање за саботната неформална средба во Солун со македонскиот премиер Зоран Заев.

Истовремено, Бутарис во интервјуто вели дека е најголем Македонец, најверојатно посочувајќи со тоа на неговото раѓање во грчката област Македонија.

– Поголем Македонец од мене не постои, поради потеклото. Моето потекло и моето воспитување кажуваат сѐ, вели градоначалникот на Солун и објаснува дека „во Скопје првпат отишол во 1991 година, со Комората за трговија и индустрија“.

За саботната средба која се одржа по негова покана до Заев, Бутарис вели дека се разговарало за соработка.

– Имавме планирано приватна вечера. Го поканив да ја пречека Новата година во Солун. Неговиот брат и неговите пријатели секоја седмица се во Солун. Она што го финализиравме е да организираме спуштање со кајаци по Вардар, некаде во април. Можеби ќе имаме и мешан екипаж. Второ, се договоривме да правиме културни размени што ќе вклучуваат танц, музика и предавања. Еднаш во Скопје, еднаш во Солун. Разговаравме и за една стипендија што ќе ја даде општина Солун – објаснува солунскиот градоначалник во интервјуто за радиото на новинската агенција АНА-МПА.