Оваа недела Европскиот парламент гласа дали да го зачува или „да го убие“ интернетот


Стразбур, 10 септември, 2018 - 14:19 (META) 

Оваа недела, на 12 септември, Европскиот парламент ќе гласа за нацрт-закон со кој се заканува за да го оштети интернетот како што го знаеме. Под маската на реформата на авторските права, постојат голем број на „реформи” кои ќе ги повредат основните права на интернет, ишува Internet Freedom Blog.

Една од нив е членот 11 од законот, со кој се сакаше да се забрани креирање линкови до статиите, освен ако некој претходно не побара и не добие дозвола за тоа. Во текот на преговорите, тоа беше малку разводнето, па од забрана за поврзување се премина на забрана за прикажување на фрагменти од поврзаната содржина, односно цитати од статијата.

Другата е членот 13 од законот, кој, како што е напишан сега, ќе овласти имплементација на поставување филтри од страна на сите интернет-платформи даватели на услуги. Ова би имало длабоки последици врз основните права, како што се слободата на говорот, слободата на здружување и слободата на печатот .


Дигиталното поврзување на Западен Балкан ќе биде финансирано со 200 милиони евра од ЕУ


Софија, 17 мај, 2018 - 11:44 (META) 

Заклучоците од првиот Дигитален Самит, што пред еден месец се одржа во Скопје, веќе се дел од агендата на Европската Унија, информираат од министерството за информатичко општество и администрација.

„Еврокомесарот за проширување Јоханес Хан, од самитот на ЕУ и Западен Балкан, информираше дека иницијативите за дигитална агенда и поголема поврзаност во регионот ќе бидат финансирани со повеќе од 200 милиони евра. Во фокусот на овие мерки е намалување на трошоците за роаминг, подобрување на широкопојасниот интернет, развој на е-Влада како и дигитализација на индустријата“, се вели во соопштението на МИОА.

Од таму додаваат дека МИОА по повод 17 мај, Меѓународниот ден на телекомуникации и информатичко општество, уште еднаш се обврзува на реализација на сите најавени активности во областа на информатичкото општество.

„Во наредниот период ќе ги објавиме националните стратегии за широкопојасен интернет и за сајбер безбедност, а до крајот на годината ќе ја објавиме и долгорочната стратегија за ИКТ“, се додава во соопштението.

Во август, МИОА ќе ги пушти во употреба националниот портал за е-услуги, и новиот портал за отворени податоци.

„Тоа што е од особена важност за сите граѓани е дека конечно услугите ги носиме до нивните домови. Најчесто бараните докуметни, граѓаните ќе можат да ги добија по електронски пат, брзо, едноставно и ефтино. Преку дигитализација и професионализација на администрацијата, конечно граѓаните ќе добијат институции кои се нивен сервис и одговараат на нивните потреби и барања“, велат од МИОА.


„Слободата и интернетот во Македонија“: Приватноста, лажните вести и говорот на омраза се новите предизвици


Скопје, 11 мај, 2018 - 15:50 (META) 

Во Музејот на современа уметност (МСУ) во Скопје се одржa конференцијата „Слободата и интернетот во Македонија“ во организација на Фондацијата за интернет и општество „Метаморфозис“ како дел од одбележувањето на 25-годишнината од постоењето на Фондацијата Отворено општество Македонија(ФООМ) – #ФООМ25.

На конференцијата се дискутираше за развојот на интернетот во земјава, за предизвиците со кои се соочува онлајн медиумската заедница и за нивните искуства и потреби.

MSU2

На темата „Слободен тек на информации – предуслов за отворено општество“ говорea Бардил Јашари, извршниот директор на „Метаморфозис“ и Санта Аргирова, член на Управниот одбор на ФООМ.

– На почетокот проблемот и „борбата“ беше околу пристапот кон интернет и малиот број на корисниците, сега е борбата е друга, со заштитата на приватноста, со лажните вести и со говорот на омраза – рече Јашари.

Според Аргирова, сè уште е голем јазот меѓу генерациите околу користењето на интернетот чија главна предност е што е отворен, двонасочен.

– Со интернетот секој граѓанин има свој медиум. Преку интернетот се остварува правото на слободно информирање и тој е совршено огледало на едно општество – рече Аргирова.

На првата панел-дискусија за клучните моменти на развојот на интернет во Македонија говореа Софче Јовановска, шеф на кабинет на заменик претседателот на Владата задолжен за економски прашања и координација со економските ресори, Јован Колов од „Нетцетера“, Огнен Фирфов, директор за интерна ревизија во Македонски Телеком и Игор Трајковски, основач и сопственик на Time.mk.

MSU1

За „Улогата на онлајн-медиумите во борбата за слободата на говорот“,говореа Бранко Героски, раководител на „Плусинфо“, Елида Зулбеари, уредничка на „Порталб“, Зоран Андоновски, уредник на „Мета“ и Никола Гелевски, уредник на „Окно“.

За „Плагијаторството и лажните вести – закана за професионалното новинарство“ зборуваат Емир Зулехиќ, уредник на „Raskrinkavanje.ba“ од Сараево, Томислав Георгиев, фоторепортер, Наталија Миленковска, aдвокат, и Ѕвездан Георгиевски од Самостојниот синдикат на новинари и медиумски работници (ССНМ).


Конференција „Слободата и интернетот во Македонија“ утре во МСУ


Скопје, 10 мај, 2018 - 10:19 (META) 

Во Музејот на современа уметност (МСУ) во Скопје утре ќе се одржи конференцијата „Слободата и интернетот во Македонија“ во организација на Фондацијата за интернет и општество „Метаморфозис“ која е дел од одбележувањето на 25-годишнината од постоењето на Фондацијата Отворено општество Македонија(ФООМ) – #ФООМ25.

На конференцијата ќе се дискутира за лажните вести, развојот на интернетот во земјата, како и за предизвиците со кои се соочува онлајн медиумската заедница, за нивните искуства и потреби.

На темата „Слободен тек на информации – предуслов за отворено општество“ ќе говорат Бардил Јашари, извршен директор на „Метаморфозис“ и Санта Аргирова, член на Управниот одбор на ФООМ.

На првата панел-дискусија „Клучни моменти на развојот на интернет во .мк“ меѓу другите, ќе учествуваат и Игор Трајковски, основач и сопственик на „Time.mk“ и Предраг Чемерикиќ, основач на „On.net“.

За „Улогата на онлајн-медиумите во борбата за слободата на говорот“, ќе говорат Бранко Героски, раководител на „Плусинфо“, Елида Зулбеари, уредничка на „Порталб“, Зоран Андоновски, уредник на „Мета“ и Никола Гелевски, уредник на „Окно“.

На конференцијата на темата „Плагијаторството и лажните вести – закана за професионалното новинарство“ ќе зборуваат Емир Зулехиќ, уредник на „Raskrinkavanje.ba“ од Сараево, Томислав Георгиев, фоторепортер, Наталија Миленковска, aдвокат, и Ѕвездан Георгиевски од Самостојниот синдикат на новинари и медиумски работници (ССНМ).


Елена Трифуновска: Не треба да се меша говорот на омраза со клеветата и навредата


Скопје, 27 април, 2018 - 11:00 (META) 

Станува тренд да се пријавуваат дискриминацијата и говорот на омраза во онлајн сферата за да се спречи да се развиваат, но важна е и техничката неутралност. Поточно, колку брзо се развива информатичката технологија, исто толку брзо треба да се развиваат и да се приспособуваат и тие механизми, но едукацијата на корисниците не ја следи секогаш брзината на технологијата, рече, меѓу другото,  Елена Трифуновска од Фондацијата за интернет и општество „Метаморфозис“, во вчерашното гостување во  „Студио 1“ на ТВ1.

Како што вели Трифуновска, клучна е едукацијата на корисниците на социјалните мрежи. Децата се повеќе и порано почнуваат да ги користат, но и постарите корисници не се научени и потешко ја учат примената на механизмите.

– Состојбата е проблематична со оглед на тоа колкав број од нас секојдневно користиме социјални медиуми и колку време поминуваме на нив и каков тип на информации не интересираат или со какви информации не таргетира оној што ги пласира – смета Трифуновска.

Случаите на говор на омраза на интернет и во медиумите се пријавуваат во Основното јавно обвинителство и во Единицата за борба со компјутерски криминал во МВР. Нивните и извештаите на „Фридом Хаус“ и на „Репортери без граници“ покажуваат дека случаите не се процесуираат на начинот на којшто предвидува законот – појасни гостинката – експерт.

– Ако ја погледнеме статистиката на Советот за етика, на трето место се пријавите од граѓаните за прекршувања на говор на омраза од вкупниот број на пријави што ги имаат добиено и во 30% од решените случаи токму говорот на омраза е причина за пријавата – вели Трифуновска и според неа, не треба да се мешаат говорот на омраза со клевета и навреда.


Слободата на изразување, главна тема на регионалниот Самит за слобода на интернет


Струга, 22 март, 2018 - 15:38 (META) 

Состојбите со слободата на изразување во Источна и Централна Европа и Евроазија се главна тема на првата панел дискусија на вториот регионален Самит за слобода на интернет, организиран од Иницијативата за владеење на правото при Американската адвокатска комора (АБА РОЛИ).

На панел дискусијата учествуваа амбасадорката на ОБСЕ во Скопје – Нина Суомалаинен, Роберт Поповски – министер без ресор во Владата на Република Македонија, задолжен за комуникации, отчетност и транспарентност, Елери Бидл – директорка за застапување на мрежата „Глобал војсис“ и Олга Кирилик од украинската организација „Дигитал дефендерс партнерс“, а дискусијата беше модерирана од директорот на Фондацијата за интернет и општество  „Метаморфозис“, Бардил Јашари.

Суомалаинен, цитирајќи ја претходната претставничка на ОБСЕ за слобода на медиуми – Дуња Мијатовиќ потсети дека сè што важи офлајн важи и онлајн, иако дигиталната сфера како релативно нова носи нови предизвици. Меѓу другото, таа рече дека интернетот и слободното изразување, за жал се и платформа за негативни појави како говор на омраза и за тероризам, но во исто време нагласи дека токму таа слобода е и алатка за борба со тероризмот преку нудењето можности за социјална кохезија.

Предлозите за регистрација на онлајн медиумите што ги даде министерот задолжен за отчетност и транспарентност, Роберт Поповски, беа остро критикувани од романскиот претставник, Богдан Манолеа, од „АпТи“ и од Центарот за развој на медиуми од Киргистан, кои потсетија дека Македонија е членка на Советот на Европа и дека треба да ги почитува неговите декларации и стандарди. Министерот Поповски одговори дека тоа е само предлог за дебата и дека Владата никогаш нема да направи со што не се согласува мнозинството од новинарската фела.

Елери Бидл од „Глобал војсис Адвокс“ зборуваше за „Фејсбук“ и неговите правила, односно за неговото право и обврска да се грижи за слободата на изразување, како и за (не)ефикасноста на неговите системи за модерирање, особено за јазиците од регионот.

Олга Кирилик, пак, од украинската организација „Дигитал дефендерс партнерс“ меѓу другото се осврна на праксата на филтрирање и блокирање на онлајн содржини од страна на некои држави и како со тоа се крши меѓународното право.

Самитот, кој се одржува од 22 до 24 март во Струга и на кој се присутни над 120 експерти за слобода на Интернет и активисти за човекови права од Европа и Евроазија и претставници на меѓународни организации продолжи со пленарни сесии и работилници поделени во три основни сфери: слобода на изразување, приватност и кибер-безбедност.


Граѓаните на Германија ќе добијат законско право на брз интернет


Берлин, 1 март, 2018 - 9:53 (META) 

Граѓаните на Германија ќе добијат законско право на брз интернет, според коалицискиот договор на конзервативците на Ангела Меркел и Социјалдемократската партија на Германија (СПД), вели Хелге Браун, кој е именуван за шеф на кабинетот на германската канцеларка.

Во интервју за весникот „Билд“, Браун објаснува дека новата голема владина коалиција ќе создаде правна рамка со која граѓаните ќе добијат право на брз интернет.

– Брзиот интернет е важен колку и снабдувањето со гас, вода и струја, па затоа тоа прашање е меѓу врвните приоритет на канцеларката – вели тој.

Според именуваниот шеф на кабинет на Меркел, федералната влада и индустријата ќе издвојат најмалку 100 милијарди евра за до 2025 година сите  региони во Германија да имаат брз интернет.

Германија е на 28. место на списокот на 32 земји по пристапот до брз интернет, подготвен од Организацијата за економска соработка и развој (ОЕЦД).

Браун вели и дека се планира забрзување на процесот на разгледување на барањата за азил, а депортирањето во иднина да се врши побргу.

Сепак, дали сето тоа ќе се случи ќе се знаев в недела, кога околу 464.000 членови на СПД ќе гласаат за „големата коалиција“.


Манчевски на Светскиот саем за мобилна технологија во Барселона


Барселона, 26 февруари, 2018 - 13:30 (META) 

Министерот за информатичко општество и администрација, Дамјан Манчевски присуствува на Светскиот саем на мобилна технологија во Барселона, кој почна вчера и се одржува до 1 март.

Денеска почна министерската агенда на која што учествуваат министри и високи функционери, каде Манчевски ќе има прилика со колеги од другите држави во Европа и светот, да разменат искуства за дигитализацијата.

Манчевски ќе има повеќе средби со компании со кои ќе разговара за можноста за трет мобилен оператор во Македонија. Владата и Министерството за информатичко општество и администрација, во моментов работат на подобрување и создавање на условите за компаниите да имаат интерес да инвестираат во Македонија.

Со законски измени во Законот за енергетика, се овозможува користење на државната мрежна инфраструктура за приватни компании. Во моментов за прв пат државата ги мапира постоечките ресурси, што ќе овозможи да се има јасна слика за моменталната состојба. Целта е граѓаните да добијат поквалитетни и поевтини услуги.

Исто така, МИОА подготвува Национален оперативен план за широкопојасен интернет. Ова е еден од предусловите за зголемување на бројот на е-услуги што се предвидува да се реализира во текот на оваа година. По мапирањето на белите зони, ќе се инвестира во сите региони од државата каде има потреба од тоа.

Конгресот во Барселона, министерот Мачевски ќе го искористи и за најава на Дигиталниот самит за земјите од Западен Балкан, којшто како дел од Берлинскиот процес ќе се одржи на 18 и 19 април во Скопје.


Сигурноста и приватноста – главни теми на Форумот за управување со интернет


Женева, 5 јануари, 2018 - 14:26 (META) 

Приватноста и сигурноста на интернет, но и влијанието на лажните вести и користењето на дигиталните технологии за манипулација на јавното мислење, заедно со проблемот на намалената доверба кон медиумите и државните институции, беа една од главните теми на 12-от состанок на Форумот за управување со интернет – IGF (Internet Governance Forum), кој се одржа во Женева од 18 до 21 декември.

Околу 2.500 учесници од цел свет, на оваа средба на различни чинители од целиот свет, организирана од Обединетите нации, се обидуваа да формулираат решенија за дигиталната иднина на почитувањето на правата на луѓето, како и соодветни одговори за предизвиците што се среќаваат на интернет.

Во тие рамки беше упатена и порака дека владите треба  повеќе да инвестираат во дигиталната писменост.

На Форумот учествуваше и Бардил Јашари, извршниот директор на Фондацијата за интернет и општество „Метаморфозис“.

Bardil Jashari Geneve dek17 - negova– Приватноста и сигурноста на интернет беа, како и досега, поважните теми на форумот, со тоа што оваа година се дискутираше исто така за влијанието на лажните вести и користењето на дигиталните технологии за манипулација на јавното мислење. Дополнително се нагласи и намалената доверба кон медиумите и државните институции. Голем дел од учесниците истакнаа дека владите имаат важна улога и одговорност во процесот на враќање на довербата и наместо да создаваат нови институции, закони и политики, треба да бидат поотворени, повеќе да соработуваат со невладините организациии да инвестираат во образованието и во медиумската писменост – вели Јашари.

Женевскиот форум, на кој учествуваа владини претставници, невладини организации, експерти, фирми и медиуми, упати до глобалната заедница неколку препораки под името „Женевски пораки“.

– Се заклучи дека не треба само да се зборува за ризиците и прекумерно да се фокусира на нив, туку треба акцентот да се стави на афирмацијата и промоцијата на позитивните аспекти на дигитализацијата – истакна Јашари.


Путин бара мониторинг на работата на компаниите на социјалните мрежи


Москва, 26 декември, 2017 - 10:08 (META) 

Рускиот претседател Владимир Путин изјави дека, руските власти треба да ги набљудуваат активностите на некои компании на социјалните мрежи следната година, кога се одржуваат претседателските избори, и да се процени нивната вмешаност во домашната политика.

Путин, говорејќи за новиот закон за странски агенти во парламентот, не спомнал на кои компании мисли, ниту дали станува збор за домашни или странски, но потсети дека Русија била обвинета од страна на САД и другите западни земји поради мешање во нивните избори.

Рускиот претседател минатиот месец потпиша закон со кој овозможи, странските медиуми во таа земја да се квалификуваат како „странски агенти“, како одговор на тоа што за Москва е неприфатлив притисокот врз руските медиуми во САД.

„Треба внимателно да се анализира како тие дејствуваат и како ќе работат за време на претседателските избори“, објасни Путин и додаде дека тоа не значи дека треба да се ограничи просторот на слободата на интернетот.