!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Конференција „Е-општество“ во организација на „Метаморфозис“ се одржува во Скопје


Скопје, 22 ноември, 2017 - 9:29 (META) 

Фондацијата за интернет и општество „Метаморфозис“ денеска 13. пат ја организира меѓународната конференција „Е-општество“, која оваа година ќе биде на тема „Слобода и приватност“, со особен фокус на реформите во областа на медиумите.

Конференцијата ќе се одржи во хотелот „Холидеј ин“, со почеток од 10 часот.

На настанот, во четири одделни сесии ќе дебатираат и ќе дискутираат дваесетина претставници на институциите, медиумските организации и на граѓанскиот сектор, со крајна цел – да придонесат за зајакнување на јавната свест за реформските приоритети и за предизвиците во медиумската сфера. Учествуваат претставници на Комисијата за заштита на правото за слободен пристап до информации од јавен карактер, Агенцијата за аудио и аудиовизуелни медиумски услуги, ЗНМ, ЦРМ, ДЗЛП, Асоцијацијата „Зенит“, „Евротинк“, на кабинетот на министерот задолжен за комуникации, отчетност и за транспарентност, Советот за етика во медиумите, Здружението на обвинители, Здружението на судии и, секако, на Фондацијата „Метаморфозис“.

На отворањето воведен збор ќе дадат министерот за информатичко општество и администрација, Дамјан Манчевски, извршната директорка на Фондацијата „Отворено општество“ – Македонија, Фани Каранфиловска-Пановска, како и претставничката на управниот одбор на „Метаморфозис“, Радмила Живановиќ.

Според извршниот директор на „Метаморфозис“, Бардил Јашари, „Е-општество“ е конференција која е замислена како заеднички простор за вмрежување и за споделување искуства, но и можност за информативна јавна дебата, како основен услов за меѓусебна комуникација помеѓу носителите на одлуки, невладините организации и медиумите.

– На крајот, конференцијата ќе остави можност за креирање коалиција на граѓански организации и на медиуми за надзор и за застапување на исполнувањето на реформите – вели Јашари.


Граѓаните на своите мобилни телефони најмногу користат „вибер“ и „месинџер“


Скопје, 31 октомври, 2017 - 12:27 (META) 

Бројот на корисниците на мобилна телефонија во Македонија годинава, за разлика од лани, бележи мал пораст и изнесува 95,2 проценти, се наведува во резултатите од испитувањето на јавното мислење за пазарот на електронски комуникации во Македонија, спроведено од Агенцијата за електронски комуникации (АЕК) на случаен репрезентативен примерок од 1.100 испитаници во периодот од 19 до 29 мај годинава.

Анкетата покажува дека бројот на припејд-корисници е намален на 28,8 проценти, а бројот на корисници на интернет на мобилен телефон преку мобилен оператор е во константен пораст од минатата година и сега изнесува 58,6 проценти.

Најголемиот дел од корисниците на интернет преку мобилен, 96,3 проценти, користат апликации за комуникации. Најкористена е „вибер“ со 92,2 проценти, по која следат „фејсбук месинџер“ со 84,4 отсто, „скајп“ со 43,5 проценти и „ватсап“ со 25,5 проценти.

Во анкетата, мнозинството од испитаниците кои не користат интернет преку мобилен телефон, односно 51,7 проценти, навеле дека немаат потреба од мобилен интернет, 37,4 проценти немаат соодветен телефонски апарат, а 23,8 проценти не знаат како да го користат.

Минатата година 3,5 проценти од корисниците на мобилна телефонија го промениле операторот.


72,2 отсто од населението во Македонија користи интернет


Скопје, 23 октомври, 2017 - 10:44 (META) 

Вкупно 1.503.000 жители на Македонија, односно 72,2 отсто од населението користи интернет, а милион од нив се приклучени на социјалната мрежа „Фејсбук“, покажуваат податоците на специјализираната статистичка веб-страница „Интернет ворлд стат“.

Според истражувањето, македонските граѓани повеќе користат интернет во споредба со жителите на Црна Гора (69,9 отсто), БИХ (69,3), Грција (69,1), Србија (67,1), Албанија (66,4) и Бугарија (59,8 проценти), но помалку во споредба со Словенците (75,5 отсто) и со Хрватите (74,4 проценти).

Според податоците на „Интернет ворлд стат“, 3,88 милијарди лица или 51,7 отсто од светската популација користи интернет, а 1,7 милијарди луѓе се регистрирани на „Фејсбук“.


Дескоска: Новата влада е посветена на создавање отворени образовни ресурси


Љубљана, 20 септември, 2017 - 17:31 (META) 

Македонија треба да вложи големи напори за создавање отворени образовни ресурси (ООР), а тоа е една од заложбите на новата влада, вели за „Мета“ министерката за образование и наука, Рената Дескоска, која учествува на Вториот светски конгрес на отворени образовни ресурси што овие два дена се одржува во Љубљана во организација на УНЕСКО и на Владата на Република Словенија.

Идејата на ООР, вели Дескоска, е да се зголеми трансферот на знаењата, односно да се овозможи проширување на пристапот до учебници и до други форми на едукативни содржини за да се катализира иновативата употреба на содржината и да се поттикне креативноста и создавањето на нови образовни содржини.

– На годинешниот конгрес се истражуваа можностите и решенијата на предизвиците кои се поврзани со популаризирањето на ООР, односно овозможување на што поголема достапност на едукативните содржини. Во таа насока, беа опфатени повеќе теми, како можноста на корисниците да пристапат, да ги употребат и да ги споделат отворените образовни ресурси, прашања поврзани со јазичните и со културните бариери, овозможување пристап до квалитетна содржина, комерцијалните интереси, како и појаснувањето на тоа што сè може да се смета за отворени образовни ресурси – вели Дескоска.

Во Македонија, посочува Дескоска, дел од учебниците чии авторски права ги поседува Министерството за образование и наука се објавени на интернет-страницата на е-учебници и тие се достапни за слободно користење, додека оние учебници чии издавачки права ги поседуваат издавачите, сè уште не се достапни за пошироката публика.

– Од страна на Бирото за развој на образованието се подготвени и јавно достапни недоволен број на материјали кои можат да бидат применувани во наставата – вели Дескоска.


Анкета на ИРИ: Вести најмногу се гледаат на „Сител“, „Алсат-М“, ТВ 24, „Телма“ и на „Канал 5“


Скопје, 19 септември, 2017 - 16:46 (META) 

Големо мнозинство од македонските граѓани за политичките случувања во земјава се информираат преку телевизија, а најмалку преку радиото како медиуми, покажува последната анкета на Меѓународниот републикански институт (ИРИ), спроведена од 4 до 21 август оваа година.

Телевизијата како главен извор за политички вести ја посочиле 85 отсто од граѓаните, 39 проценти рекле дека за политичките случувања се информираат преку интернет и порталите, 27 отсто од пријателите, 6 0тсто преку печатените медиуми и по 4 отсто вестите ги добиваат преку радијата и политичките партии.

Според анкетата, најголем дел од граѓаните, односно 20 отсто од нив рекле дека политички вести гледаат на „Сител“, 16 отсто се изјасниле за „Алсат М“, трета е „Телевизија 24“ за која се одлучиле 13 отсто од испитаниците, 12 отсто гледаат политички вести на „Телма“, 11 отсто на „Канал 5“, 9 отсто на МТВ (на македонски јазик), 3 отсто на МТВ (на албански јазик) и по 1 отсто се изјасниле за „ТВ 21“, „Шења“и за „Алфа“. Девет отсто од испитаниците рекле дека не гледаат телевизија.

Инаку, забележлив е падот во процентот граѓани кои политичките случувања ги следат преку печатените медиуми, кој е двојно помал во споредба со резултатот од анкетата на ИРИ од ноември минатата година. Овој пад соодветствува со згаснувањето на дневните весници во издание на „Медиа принт Македонија“.

Истовремено, за 7 отсто е зголемен бројот на граѓани кои за политиката се информираат преку интернет, споредно со анкетата од ноември лани.


„Македонска пошта“ воведе следење на пратките преку интернет


По големиот број забелешки во изминативе неколку години за загубени пратки со производи нарачани преку интернет од странство, „Македонска пошта“ воведе систем за следење на пратките преку веб-сајтот на компанијата.

„Сите граѓани што купуваат од странски продавачи пристигнувањето на својата пратка во „Македонска пошта“ и реализирањето на доставата веќе може да ги следат преку системот за следење пратки на „Македонска пошта“, поставен на веб-сајтот, информира денеска „Македонска пошта“.

Со тоа, како што тврдат од компанијата, ќе се зголеми сигурноста на овие поштенски пратки во обид да се елиминираат сите сомневања за намерно или ненамерно губење на пратките од интернет-нарачка во „Македонска пошта“.

Сепак, на сајтот на компанијата се уште нема прецизно објаснување што се треба да се направи за да може да се следи пратката.


Македонија има 1,44 милиони корисници на интернет, а еден милион се на „Фејсбук“


Брисел, 17 мај, 2017 - 10:49 (META) 

Вкупно 69,1 од проценетата бројка на 2.083.308 жители на Македонија се поврзани на интернет, односно 1.439.089, а еден милион користат „Фејсбук“, покажуваат пресметките за март годинава на специјализираната статистичка веб-страница „Интернет ворлд стат“.

Од земјите во регионот, по користењето интернет во март годинава пред Македонија биле Косово (со 80,4 отсто) Словенија (72,8 проценти), Хрватска (74,4 проценти), БИХ (69,3 отсто). Зад Македонија се Србија (66,2 проценти), Грција (64,9 проценти), Албанија (62,6 отсто), Црна Гора (61 отсто) и Бугарија (59 отсто).

Во Европа од проценети 822,71 милиони жители, интернет користат 637 милиони луѓе, а „Фејсбук“ – 328 милиони.

Според „Интернет ворлд стат“, во светот во март годинава од 7,52 милијарди луѓе, интернет користеле 3,73 милијарди.


„Википедија“ блокирана во Турција


Анкара, 29 април, 2017 - 18:08 (META) 

Мрежата за надзор на цензура на интернет соопшти дека Турција ја блокирала бесплатната интернет-енциклопедија „Википедија“.

– Губењето достапност е поврзано со интернет-филтрите што се користат за цензура на содржината во земјата – наведе турската мрежа за надзор.

Веб-страницата на „Википедија“ е блокиран со привремена административна наредба, без судски налог.

Турските власти не соопштија зошто веб-страницата ее блокирана, додека турските медиуми наведуваат дека причината е „содржина поврзана со тероризам“.

Весникот „Дејли хуриет“ јавува дека Турција е во контакт со „Википедија“ за отстранување содржини кои промовираат тероризам и ја претставуваат Турција како поддржувач на тероризмот.

Доколку турските барања бидат исполнети и содржината е отстранета, веб-страницата повторно ќе биде достапна, наведуваат турските медиуми.


Роботите ќе ги потиснат и директорите на компаниите, тврди првиот човек на „Алибаба“


Шангај, 25 април, 2017 - 11:24 (META) 

Првиот човек на најголемата кинеска продажна веб-страница „Алибаба“, Џек Ма, вели дека светот треба да се подготви за болни промени во економијата, кои ќе ги предизвика интернетот.

– Светот мора да го промени системот на образование и да се учи како се работи со роботите за да може да се ублажат ударите што ќе бидат зададени од автоматизацијата и од интернет-економијата – изјави Ма на една конференција за претприемништво во Кина.

Тој предупреди дека во следните 30 години светот ќе доживее многу повеќе болка отколку среќа.

– Пред 15 години одржав 200-300 говори за тоа како интернетот ќе промени сè, но не ме слушаа бидејќи бев никој и ништо – додаде Ма.

Според него, вештачката интелигенција најверојатно ќе влијае на тоа луѓето да живеат подолго, но и ќе доведе до намалување на бројот на работни места. Роботите, според него, ќе ги потиснат од работа дури и генералните директори на компаниите.


Во германско-полска рација уапсени 14 лица поради педофилија


Варшава, 6 април, 2017 - 13:38 (META) 

Во заедничка операција на германската и на полската полиција, по претрес во Полска се уапсени 14 лица поради педофилски содржини во компјутери и во мобилни телефони. Вкупно 29 лица се осомничени за ширење порнографија со деца на интернет.

– Вкупно 29 лица имаат статус на осомничени. Обвиненијата ќе зависат од прегледот на содржините на компјутерите, што го вршат вештаците. Некои без да го чекаат вештачењето ја признаа вината – соопшти портпаролот на главната команда на полската полиција, Маријуш Чарка.

Во соработка со германската полиција, полските полициски сили добиле ИП-адреси на полски корисници во поголема педофилска мрежа, која ширела педофилска порнографија со мали девојчиња.

Полската полиција упаднала во 33 куќи, привела 14 лица, од кои две лица се задржани во затвор, запленила 61 компјутер, лаптоп и таблет-уред, 42 хард дискови, повеќе од 2.000 компактни дискови, дигитални видеодискови и мобилни телефони.

Од приведените, 11 лица веднаш ја признале вината и изјавиле дека преку интернет ширеле порнографија со малолетници и педофилска содржина.