!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Српски бизнисмени се во посета на Македонија за подобра соработка помеѓу компаниите


Скопје, 16 февруари, 2017 - 9:37 (META) 

Стопанската комора на Македонија денеска во Скопје организира деловни средби помеѓу македонски и српски компании за да се унапреди и интензивира економската соработка помеѓу двете земји.

– Целта на посетата на српската бизнис-делегација и организирањето на билатералните деловни средби е понатамошно интензивирање на економските релации помеѓу двете земји, како и воспоставување на нови, повисоки облици на соработка помеѓу компаниите од повеќе различни сектори согласно пројавениот интерес – велат од Комората.

На бизнис-средбата официјално ќе биде конституиран Македонско-српскиот/Српско-македонскиот деловен совет, што ќе функционира во рамките на двете комори и ќе служи како мост за интензивирање и зајакнување на досегашната соработка и поврзување на стопанските субјекти од двете земји.


Навремено одговоривме на сите барањата на СЈО, тврдат од „Македонски телеком“


Скопје, 21 ноември, 2016 - 16:55 (META) 

Телекомуникацискиот оператор „Македонски телеком“ денеска соопшти дека навремено одговорил на сите барања на Специјалното јавно обвинителство и дека од операторот остануваат отворени за понатамошна соработка со надлежните органи.

„Најодговорно тврдиме дека навремено сме обезбедиле одговори на сите барања од Специјалното јавно обвинителство и остануваме отворени за понатамошна соработка со надлежните органи. „Македонски телеком“ е компанија која работи според законите, во интерес на граѓаните и на своите корисници“, велат од компанијата.

Реакцијата на операторот следува по објавите на социјалните мрежи дека токму „Македонски телеком“ е компанијата што не ги доставила бараните податоци за телефонските броеви кои биле прислушувани, а за кои Специјалното јавно обвинителство отвори нова истрага „Таргет“.

Обвинителката на СЈО, Ленче Ристоска, во петокот минатата недела истакна дека побарале од судот да издаде судски наредби за да можат да прибават докази од уште еден телекомуникациски оператор во земјава, од кој досега не успеале да добијат податоци за телефонските броеви што биле „таргет“ на незаконско следење на комуникациите, но не наведе за која компанија станува збор.

Од „Македонски телеком“ велат дека во согласност со Законот за електронски комуникации и со Законот за следење на комуникации, имаат законска обврска да набават опрема за следење на комуникациите и да ја стават на располагање на Министерството за внатрешни работи, но оти немаат контрола, ниту можност за користење на истата.


Попоски: Владата ќе постапи по дел од барањата на Турција


Скопје, 17 септември, 2016 - 14:00 (META) 

Владата на затворена седница донела одлука да постапи по дел од барањата од Турција што беа испорачани по неуспешниот обид за пуч, изјави Никола Попоски, министер за надворешни работи за радио „Слободна Европа“.

Попоски рече дека не може да коментира одлуки донесени на затворена владина седница и затоа не може да каже што конкретно побарала Турција ниту, пак, какви мерки ќе бидат преземени.

„Имавме конкретни барања по воениот пуч во Турција и во однос на тие барања нашиот став е јасен и недвосмислен. Нема никакви дилеми дека ги поддржуваме демократски избраните институции во Турција. Во однос на нивните конкретни барања, владата на затворена седница донесе одлуки и ќе постапуваме по нив. Не би можел да кажам што конкретно е побарано ниту, пак, што ќе биде преземено, затоа што тоа се одлуки донесени на затворена седница на влада. Во однос на барањата од Турција, ние мораме да се водиме од нашите национални интереси и од нашето законодавство, што значи дека која било мерка што би била преземена би била во склад со нашите интереси и законодавство“, рече Попоски.

Тој додаде и дека во однос на Турција има работи кои можат да се спроведат и има работи кои не можат да се спроведат, а границата ќе биде македонските интереси и македонското законодавство.


ВМРО-ДПМНЕ: СДСМ не се грижи за интересот на Македонија


Скопје, 13 јули, 2016 - 21:14 (META) 

СДСМ гласаше против модернизацијата на одбраната на Република Македонија, реагираат од ВМРО-ДПМНЕ на прес-конференцијата на Максим Димитриевски.

Од владејачката партија велат дека на седницата на парламентот, на која биле нужни гласовите на опозицијата за да се изгласа ослободување од ДДВ и од цариина за набавка на опрема за Армијата, СДСМ одлучил интересот на Република Македонија да го стави на последно место.

„Квалитетот на одбраната беше жртва на фрустрациите и на деструкцијата на СДСМ. Наместо да покаже државничко однесување, СДСМ на срамен начин ја стави државата во опасност и демонстрираше незамислива неодговорност. Максим Димитриевски и СДСМ можат бескрајно да се обидуваат со ноторни лаги и со чисти измислици од нивните фабрики за афери да го покријат ваквото срамно и неодговорно однесување на СДСМ, меѓутоа и сто пати да ги кажат нивните лаги, тие е невозможно да станат вистина“, пишува во соопштението на ВМРО-ДПМНЕ.

Од партијата додаваат дека СДСМ воопшто не се грижи за интересот на Македонија и на бранителите, туку за деструктивни сценарија кои ѝ штетат на државата.


НДМ: Иванов не може да распознава што значи интерес на државата


Скопје, 29 мај, 2016 - 16:35 (META) 

При иста реалност во земјата, претседателот не може да распознава што значи интерес на државата и носи две различни одлуки за иста фактичка и правна ситуација, што значи кршење на Уставот, со што, дополнително ја продлабочува тешката политичка криза во која е заглавена земјата – се вели во соопштението на Народното движење за Македонија (НДМ).

НДМ оттука се сомневаат дека „постојат случаи кои влијаат врз душевната состојба и размислувањето на Ивнов да не може да ги сфати дејствијата кои ги презема како татко на нацијата.“

Тие велат дека како партија ќе поднесат иницијатива до Уставниот суд за поведување на постапка за испитување на постоење на околности поради кои претседателот Иванов не може да го сфати значењето на интересот на државата и граѓаните што може да влијае на неговата спреченост да ја врши функцијата.

– Иницијативата се заснова на член 60 став 1 од Деловникот за работа на Уставниот суд, кој, во смисла на став 2 од истиот член е во обврска да ги испита наводите и фактите во Иницијативата на НДМ врз основа на акти, наоди, експертни и стручни мислења на медицински или други установи или органи, а во врска со член 82 став 2 од Уставот на Република Македонија – велат од НДМ.


Медведев: Немаме економски интерес во Сирија


Москва, 3 октомври, 2015 - 14:58 (META) 

Рускиот премиер Димитри Медведев го нарече теорија на заговор и пропаганда тврдењето дека воената мисија на Русија во Сирија е со економски интерес.

– Тоа е голема теорија на заговор. Сите тие приказни се заговор или пропаганда, која во оваа ситуација ја користат повеќе држави – изјави Медведев, во интервју за емисијата „Вести во сабота“, како одговор на тврдењето дека Русија со своите дејства го штити пазарот за оружје.

Медведев нагласил дека Русија нема глобален економски интерес во Сирија.

– Точно е дека ги снабдуваме со оружје, но тоа не е фантастична сума на пари, тоа се, можеби, стотина милиони долари, а нашето целокупно портфолио изнесува 15 милијарди долари. Тоа, со други зборови, значи дека немаме никакви економски интереси таму – наведе Медведев.


Голем интерес кај средношколците за ФЕИТ


Скопје, 11 август, 2015 - 14:05 (META) 

Постои голем интерес за запишување нови студенти на Факултетот за електротехника и информациски технологии (ФЕИТ), во првиот уписен рок во академската 2015/2016 година. Оваа година, за ФЕИТ се предвидени 600 слободни места за упис на нови студенти, од кои 460 редовни студенти во државна квота и 140 редовни студенти со кофинансирање.

– Имаме договори за соработка со стотина компании во Македонија, каде нашите студенти извршуваат практична работа, но и се вработуваат како дипломирани инженери. Постои можност, на нашата веб-страница, компаниите да објавуваат и огласи за практична работа и за кадарот што го бараат. Нашите инженери секогаш наоѓаат работа. Некои менаџери на компании бараат инженери од нас, а вработуваат и студенти од ФЕИТ – изјави продеканот за настава, Христина Спасевска.

Деканот Миле Станковски очекува ФЕИТ да ја потполни државната квота со високо-квалитетни кандидати.

– Бројот на пријавени кандидати, до овој момент, е поголем во однос на минатите години. И квалитетот на пријавени кандидати е висок, затоа што во повеќе од 80 проценти, тие имаат по повеќе од 90 поени – изјави Станковски.


Хан: Лидерите да работат во интерес на државата, а не за лични интереси


Скопје, 13 јули, 2015 - 20:08 (META) 

Еврокомесарот за проширување, Јоханес Хан, откако пристигна во Скопје, во изјава за „Телма“ порача дека доаѓа во Македонија за да го помогне процесот на преговори за да се пронајде решение со кое, како што рече, ќе се зачува евроатлантската перспектива на државата.

Тој апелираше до сите политички лидери да работат во интерес на државата, а не за личните интереси.

– Мислам дека сите треба да помогнат затоа што се работи за државата, треба да се преземе одговорноста и да се работи во интерес на народот, за иднината – изјави Хан.