Заев во Софија на работен состанок со Јункер, Борисов, Могерини и Хан


Софија, 1 март, 2018 - 10:36 (META) 

Премиерот Зоран Заев денеска во Софија ќе учествува на работниот состанок на претседателот на Европската комисија, Жан Клод Јункер и бугарскиот премиер, Бојко Борисов, чија земја е актуелен претседавач со ЕУ. На состанокот ќе присуствуваат и високата претставничка на ЕУ за надворешна и безбедносна политика Федерика Могерини и еврокомесарот за проширување и соседска полтика Јоханес Хан.

Тема на состанокот се можностите за забрзување на процесот на интеграција на Западен Балкан во ЕУ и подобрување на меѓусебната поврзаност.

На состанокот ќе учествуват и премиерите на Албанија, Еди Рама на Црна Гора, Светозар Марковиќ, како и претседателите на Србија, Александар Вучиќ, на Косово, Хашим Тачи како и членот на претседателството на БиХ, Драган Човиќ.


Европската десница ја поздрави Стратегијата на ЕК за Западен Балкан


Брисел, 6 февруари, 2018 - 16:27 (META) 

Претседателот на европската десница Жозеф Дол денеска ја поздрави „долгоочекуваната“ Стратегија за Западен Балкан и порача дека Европската народна партија (ЕПП) останува посветена на интеграцијата на земјите од Западен Балкан во Европската Унија, но истовремено очекува од нејзините партнери да ги исполнат реформите што ги презеле за доброто на својот народ и регионот во целина.

Сепак, тој во изјавата додава, дека „за жал многу од актуелните лидери во регионот заземаат сосема поинаква насока од онаа што ја бара ЕУ”.

„Земјите од Западен Балкан се наши најблиски партнери и географски се веќе внатре во границите на ЕУ. ЕПП останува подготвена и посветена да ја поддржи нивната интеграција во ЕУ и да им помогне во нивниот реформски пат. Но, останува уште многу работа“, вели Дол.

Дол нагласува дека имплементацијата на неопходните реформи и решавањето на отворените билатерални спорови останува јасен предуслов за членство во ЕУ.

„Змејите од Западен Балкан мора, исто така, да продолжат со борбата против корупцијата, почитувањето на владеењето на правото и воспоставување на независен правосуден систем. Само тогаш нивните економии ќе се стаблизираат, привлекувајќи нови инвестиции, создавајќи нови работни места и просперитет за нивните граѓани, особено младите“, вели претседателот на ЕПП.


Борисов го охрабри Заев да продолжи со преговорите за решавање на спорот за името


Давос, 25 јануари, 2018 - 19:05 (META) 

Премиерот на Бугарија, Бојко Борисов денеска во Давос ја поздрави волјата на македонскиот премиер Зоран Заев со која работи за евроатлантските интеграции и го охрабри да продолжи со преговорите со Грција за изнаоѓање на конечно решение за спорот за името, пренесува „БГНЕС“.

Борисов и Заев денеска имаа средба на маргините на Светскиот економски форум.

„Дискутираме за иднината на Европа и за забрзување на развојот на Западен Балкан“, напиша Заев на својот официјален твитер-профил по повод средбата.

Заев денеска имаше средба и со српскиот претседател Александар Вучиќ.

„Пријателството и соработката се клучни за интеграцијата на Западен Балкан во ЕУ. Заеднички се движиме напред“, напиша Заев на „Твитер“ за средбата со Вучиќ.

Инаку, пораката на Борисов доаѓа еден ден по средбата меѓу Заев и неговиот грчки колега, Алексис Ципрас.

Борисов во рамките на годинешната средба на Светскиот економски форум рече дека „има една неправда, која Европа мора да ја поправи – Западен Балкан“.

– Овие земји прават се што е неопходно, и колку што имаат сили, за да одговорат на поставените барања, а ние, нивните соседи, партнери, државите од ЕУ, исто така треба да направиме се што е неопходно за да го придвижиме процесот на нивната интеграција – истакнал Борисов, стои во соопштението на бугарската влада.


Брнабиќ: Интеграцијата на земјите од Западен Балкан во ЕУ е важнa за иднината на регионот


Давос, 25 јануари, 2018 - 10:35 (META) 

Европската интеграција на земјите од Западен Балкан е важен фактор за иднината на регионот, изјави претседателката на Владата на Србија, Ана Брнабиќ на состанокот на групата „Нови лидери за Европа“, на Светскиот економски форум во Давос.

Таа истакнала дека Србија длабоко и искрено е посветена на европските интеграции затоа што како што рече „ги делат европските вредности и идеи за долгорочен мир, просперитет и стабилност“.

Брнабиќ додадал дека, минатогодишните избори во Германија, Франција и Холандија покажале дека најголем дел од граѓаните се посветени на европските вредности како и на економски и внатрешен развој на Унијата.

Српската премиерка се надева дека и покрај сите предизвици за оваа година, Европската Унија ќе биде посилна и поконкурентна.


Шекеринска – Данкан: Продолжува поддршката од Велика Британија за eвроинтеграцијата


Лондон, 13 декември, 2017 - 19:00 (META) 

Министерката за одбрана, Радмила Шекеринска денеска се сретна со британскиот министер за Европа и Америка, Алан Данкан, во Министерството за надворешни работи и Комонвелт.

„Работиме на суштински внатрешни реформи како и на подобрување на односите со соседите. Тоа се сложени процеси, кои бараат политичка волја, време, но и постојана поддршка од нашите сојузници“, изјавила Шекеринска.

Данкан истакнал дека, Велика Британија продолжува да ја поддржува Македонија во нејзината интеграција во НАТО и Европската Унија, истакнувајќи дека, Самитот за Западен Балкан што ќе се одржи во 2018 во Обединетото Кралство, претставува одлична можност да се покаже напредокот на Македонија во повеќе области.


Груби – Кукан: Посветени сме на реализација на очекувањата на Брисел, очекуваме поддршка


Брисел, 6 декември, 2017 - 19:32 (META) 

Претседателот на Комисијата за европски прашања и пратеник од ДУИ, Артан Груби, денеска во Брисел се сретнал и со европратеникот Едвард Кукан. Двајцата соговорници зборувале за актуелните случувања во земјата, владината коалиција, реформите и за интеграциските процеси.

„За да се олесни интегративниот процес, ние како парламентарно мнозинство, целосно сме посветени на тоа за да ги реализираме сите очекувања од Брисел и очекуваме иста посветеност од нашите пријатели во Брисел“, изјавил Груби.

Кукан ветил поддршка во напредокот на интегративните процеси во Европската Унија и добивање на датум за почеток на преговорите.

Груби денеска се сретна и со европратеникот Кнут Фленкештајн.


Народниот правобранител апелира за целосна интеграција на лицата со посебни потреби


Скопје, 3 декември, 2017 - 11:47 (META) 

По повод Меѓународниот ден на лицата со посебни потреби, Народниот правобранител апелира сите чинители во општеството, уште позабрзано и попосветено да работат на целосна интеграција на лицата со посебни потреби, со што би се оствариле нивните права.

„Интеграцијата, а не исклученоста е движечката сила на едно општество. Само на тој начин ќе покажеме дека работиме за вистинските човечки вредности. Но, на ова да не бидеме посветени само еден ден, денеска, на 3 декември, туку и другите 364 денови во годината“, се вели во соопштението на Народниот правобранител по повод Меѓународниот ден на лицата со посебни потреби.

Меѓународниот ден на лицата со посебни потреби годинава се одбележува под мотото „Општество за сите“.


Церар му понудил на Заев конкретна помош за евроатланската интеграција на Македонија


Љубљана, 13 ноември, 2017 - 19:35 (META) 

Премиерот Зоран Заев заедно министерот за внатрешни работи, Оливер Спасовски, министерот за економија Крешник Бектеши, министерот за земјоделство, шумарство и водостопанство, Љупчо Николовски, министерот без ресор задолжен за дијаспора, Едмонд Адеми и државниот секретар на Министерството за надворешни работи Виктор Димовски, одржаа билатерални и пленарна средба со своите колеги од Словенија предводени од премиерот Миро Церар.

Заев истакнал дека исклучително е важнa економската соработка помеѓу двете земји како и меѓусебното пријателство и поддршката што Македонија ја има од Словенија во ЕУ и НАТО интеграциите.

Премиерот на Словенија, Миро Церар нагласил дека може да се подобрат економските односи на Македонија и Словенија и дека постои потенцијал за интензивирање на соработката.

Церар истакнал дека Словенија ги поддржува аспирациите на Македонија во ЕУ и НАТО и понудил конкретна помош и асистенција за овие процеси, во оваа фаза или во фазата на пристапните разговори со ЕУ.


Министерска конференција посветена на интеграција на Ромите утре во Тирана


Тирана, 9 ноември, 2017 - 16:35 (META) 

Регионална министерска конференција посветена на проектот „Интеграција на Ромите 2020“ ќе се одржи утре во Тирана, на која ќе учествува и Република Македонија.

Главна цел на Конференцијата е да создаде соодветен форум во рамките на кој земјите од Западен Балкан и донаторите ќе разговараат за потребите и приоритетите поврзани со пополнување на буџетските дупки за спроведување на политиките на интеграцијата на Ромите на Западен Балкан и Турција.

Дискусијата, како што соопшти Регионалниот совет за соработка, особено ќе биде фокусирана на средствата кои се неопходни за подобрување на вработеноста и станбеното згрижување на Ромите.

Инклузијата на Ромите од минатата година е подигнато на ниво на неопходен услов за земјите аспиранти за пристапување кон Европската Унија.

Конференцијата ја организира Регионалниот совет за соработка, оперативно тело на земјите членки на Процесот за соработка во Југоисточна Европа (SEECP), а Република Македонија ќе ја претставува министерката за труд и социјални работи Мила Царовска.


Анѓушев – Маргхем: Иднината на енергетиката е во обновливите извори на енергија


Брисел, 26 октомври, 2017 - 12:56 (META) 

Моменталната позиција и идните планови и перспективи на Макакедонија во енергетскиот сектор биле теми на денешната средба на вицепремиерот за економски прашања, Кочо Анѓушев, со министерка за енергeтика, животна средина и за одржлив развој на Белгија, Мари Кристин Маргхем, во Брисел.

– Македонија подготвува нов закон за енергетика, во кој ќе биде имплементиран третиот енергетски пакет на Европската Унија и мерките препорачани од Енергетската заедница. Иднината во енергетиката ќе се базира на обновливи извори на енергија, преку рационален, одржлив и исплатлив концепт – истакнал Анѓушев на средбата, соопштуваат од неговиот кабинет.

Тој нагласил дека Македонија се стреми кон целосна интеграција во ЕУ и во тој процес, како што додал, клучна е соработката со земјите членки, како што е и Белгија, и користење на нивните искуства, особено во однос на усогласување на националната регулатива со европските прописи.

Министерката Маргхем порачала дека во евроинтегративниот процес, Македонија може да очекува поддршка од Кралството Белгија и оти очекува односите помеѓу двете земји да продолжат да се развиваат и да се интензивираат.

Анѓушев на Маргхем ѝ ги презентира мерките од планот за економски пораст на Владата и ѝ порачал дека странските инвеститори, вклучително и тие од Белгија, се добродојдени да инвестираат во Македонија.