Богдановски: Ќе ги ловиме дивите откупувачи на суровини, заради нив се палат кабли и отпад


Скопје, 11 февруари, 2019 - 14:50 (META) 

Шест месеци откако директно од Државниот инспекторат за животна средина дојде на чело на Градскиот инспекторат, се чувствува раздвижување посебно кога се работи за инспекции на помалите загадувачи. Со првиот човек на Градскиот инспекторат, Мирослав Богдановски, зборуваме за предизвиците, за алатките во борба против загадувачите, за социјалната димензија на загадувањето.

Инициравте промена на Правилникот за граничните вредности на загадувачите по основ на кој инспекторите имаа проблем да докажат загадување од помалите загадувачи.

– Ни требаше алатка за постапување кон малите загадувачи. Граѓаните со право се прашуваат што работи инспекцијата и зошто се случува да нема епилог на нивната работа, но проблемот не е едноставен. Во моментов не постои Правилник за цврсти горива кој би утврдил што едно домаќинство или едно претпријатие може да користи при затоплување –дрво, пелети и слично, и кои параметри во тој производ се дозволени, што воедно би дефинирало кој енергенс не е дозволен и кој би им овозможил на инспекторите, доколку утврдат дека се користи несоодветно гориво – на пример влажни дрва или пак отпаден материјал, да постапат против тие сторители. Влажните дрва загадуваат трипати повеќе од сувите. Да ја направиме работата на инспекцијата поефикасна за да го симнеме Скопје од врвот на листите на најзагадени градови во светот. Со Градот инициравме промена на Законот за јавна чистота, Закон за јавни патишта, ќе се носи нов Закон за комунална полиција – секаде каде што се соочуваме со проблеми како инспекција. Не може казна за фрлање на отпушок да биде 50 евра, а истата казна да биде и за истурање на цел камион шут на недозволена локација.

Барате носење на комплетно нов закон за комунална полиција…

– Од минатото лето градските комунални инспектори работат во три смени, има 8 инспектори и 16 комунални редари, се пишуваат казни за комунални прекрошоци, без пардон. Еве вчера се пишани 14 казни. Но, сакаме да ги зајакнеме капацитетите на Градот за оние прекршувања на комуналниот ред за кои досега можеше да реагира само полицијата. Досега комуналните инспектори, дури и да виделе, да речеме, камион како излегува од градилиште со калливи гуми, без церада и слично, не можеле да реагираат. Паркирање на зелени површини, пред контејнер, фрлање на отпад на недозволени места -градскиот комунален полицаец ќе има таква надлежност, односно ќе може да пишува и казни за комунални прекршоци на лице место.

Што превзема градскиот инспекторат против загадувачите?

– Градскиот инспекторат за животна средина има четворица инспектори. Нивен фокус се контролите на субјектите кои имаат Б-интегрирани еколошки дозволи кои ги има околу 40-тина и елаборати за животна средина, околу 550 во моментов, кои се одобруваат од Град Скопје.

Како постапувате во случајот на Железарница, да речеме, од каде и летоска имаше густ чад, а знаеме дека Макстил има А дозвола и е во надлежност на државниот инспекторат?

– Како инспекција, штом видиме нешто, веднаш сме таму, а ги следиме и социјалните мрежи. Во такви случаи, иако немаме ингеренции кај А дозволите, некогаш бараме вонредни инспекции, како што го направивме тоа во ноември со Цементарницата „Титан-Усје“. Во кругот на некогашна Железарница има околу 50 помали субјекти, од кои два имаат Б дозволи и тие ни се приоритетни за контрола. Во случај да чади од нив, постапуваме ние, но ако чадот доаѓа од Макстил, го информираме Државниот инспекторат, но ако тие не излезат на терен не сме надлежни да им кажеме – излезете!

Што превземате против оние кои диво палат кабли и загадуваат?

– Почнуваме со справувањето со тој проблем. Штом некој ги пали тие кабли, значи некој им го откупува тој бакар. Големите отпади, кои имаат А дозволи, знаат дека не смеат да откупуваат пален бакар бидејќи е незаконски, но имаме проблем со дивите откупувачи, нив сакаме да ги откриеме и затвориме. Имаме оперативни сознанија дека постојат луѓе, без фирми, без седиште, кои откупуваат бакар, старо железо и друг отпаден репроматеријал, сето тоа се прави затскриено, по дворови, по неколку часа во денот.

Но, што правиме со оние кои ги палат тие кабли, веројатно претходно украдени?

– Појдете на Вардариште и ќе ги видите тие што ги палат каблите. Видете ги тие луѓе во тие диви населби и кажете вие што да се прави со нив. Граѓаните велат: казнете ги, апсете ги, фатете ги. Одете самите да видите како е. Таму имаме огромен, пред се, социјален проблем. Таму се работи за преживување. Ниту имаме ингеренции да ги бркаме тие луѓе, ниту имаме каде да ги носиме, дури не можеме да им земеме ниту податоци оти немаат никакви исправи, не постојат за државата. Како инспекција можеме да ги казнуваме ама немаме ингеренции да ги тргнеме од таму. Викаме полиција, но како и да се постапи со нив, тие луѓе пак се враќаат таму.

Сте го алармирале ли Министерството за труд и социјала?

– Да. И таму и во дивата населба под Кале се палат и кабли и друг отпад.

Но, штом пали на јавна површина …

– Кога палат на јавна површина, доаѓаме и интервенираме како инспекција, посебно сега кога работиме во три смени и кога функционира бројот 193, ако е голем огнот доаѓа и противпожарна. Но, како да постапиме кога пали огин и гори отпад во субстандардна куќарка во која неретко има бебиња? Со шмрк ли да им влеземе? Не можеме. Знаете ли дека пред шест-седум години, кога се тргаше дивата населба под Кале, инспекторите што таму постапуваа сега им се суди во судот за човекови права во Стразбур?

Разочарани од неефикасното справување со загадувањето, се појавија и приватни иницијативи за поставување на мерачи на загаденоста…

– Податоците од неакредитираните мерни станици јас ги земам со резерва. Тоа се многу прецизни инструменти кои мораат да се одржуваат, редовно баждарат. Но, ако тие инструменти се стават во систем, ако ги одобри Министерството за животна средина, тогаш се повеќе од добредојдени, не 10, сто такви ни требаат!


Град Скопје: Не пријавувајте отворени огнови на „Фејсбук“, пријавете ги на 193


Скопје, 9 ноември, 2018 - 12:32 (META) 

Од Град Скопје апелираат до граѓаните сите забележани огнови на отворено да ги пријавуваат исклучиво на телефонскиот број 193, наместо на „Фејсбук“ или на другите социјални мрежи.

Од таму потенцираат дека горењето пластика, гуми, кабли, неквалитетни дрва и палењето на дивите депонии влијаат на загадувањето на воздухот и додаваат дека според статистиката греењето на дрва учествува со една третина во загадувањето на воздухот, а најотровните состојки се испуштаат од отворените огнови.

Портпаролот на Град Скопје, Ваљон Салиху вели дека за таа цел мешани тимови и оваа година ќе работат секој ден, 24 часа, за борба против огновите на отворено.

-Со пријавување на бројот 193 екипите ќе може да интервенираат навремено, а со тоа и да се спречи евентуална опасност по здравјето и имотот на нашите сограѓани. Дежурните екипи ќе ги процесираат сите пријави, огновите ќе бидат изгаснати, а доколку постои потреба од згрижување на лицата кои ги палат огновите ќе интервенираме во координација со Центарот за социјална работа на Град Скопје. Одговорноста за решавање на проблемот со огновите на отворено е заедничка за сите нас и затоа е неопходна активна соработка со граѓаните. Градот Скопје интензивно работи на елиминирање на причинителите на загадувањето на амбиентниот воздух во градот – рече Салиху.

Минатата зима, во рамки на оваа кампања биле регистрирани вкупно 438 јавувања на телефонскиот број 193, било интервенирано на 334 огнови на отворено, а во 114 случаи на терен излегле комунални инспектори.

Раководителот на Инспекторатот на Град Скопје, Мирослав Богдановски, рече дека градските инспектори вршат засилени контроли на терен по однос на загадувањето на животната средина и досега се пронајдени и казнети поголем број прекршители во Вардариште и во Ѓорче Петров.

-Во периодот септември/октомври годинава во споредба со истиот период лани имаме зголемување од околу 120 отсто во однос на изречените казни, а имаме изречено и голем број опомени за несовесните граѓани. Засилено се следи и состојбата во Лисиче, каде што граѓаните пријавуваат извори на загадување. Фатени се неколку малолетници кои гореле кабли и различни отпадни материјали. Ги контролираме и градилиштата по однос на прашината, дали се чисти тркалата на камионите, дали се покриени со церади и слично. Направени се контроли кај повеќе од 50 градилишта на подрачјето на Скопје – рече Богдановски.


Шилегов: На местото на Ќосето ќе насадиме дрво на човековите права


Скопје, 22 февруари, 2018 - 14:57 (META) 

На местото на споменикот на Андон Лазов Јанев – Ќосето, кој ноќеска беше остранет од службите на Град Скопје, ќе се насади дрво на човековите права и ќе биде поставена изгравирана плоча, која Скопје ќе ја добие од збратимениот германски град Нирнберг, на која ќе бидат напишан членот 10 од Универзалната декларација за човекови права на Обединетите нации (ОН).

Ова денеска на прес-конфренција го соопшти градоначалникот на Град Скопје, Петре Шилегов, кој истакна дека повеќе нема да се толерира незаконитот и недозволено постапување и оти почнува процесот на справување со проектот „Скопје 2014“.

– Членот 10 гласи: „Секој има потполно еднакво право на праведно и јавно судење пред независен и непристрасен суд, при одредување на неговите права и обврски и во услови на какво и да е кривично обвинение против него“. Пораката што ќе ја испрати градот до граѓаните е дека во судот правдата е слепа и се дели непристрасно – рече Шилегов.

Тој рече дека дрвото кое ќе биде од видот „Гинко“ ќе биде купено преку јавна набавка. Шилегов додаде дека Град Скопје во соработка со Министерството за животна средина и ЈП „Паркови и зеленило“ ќе набави повеќе дрвја од овој тип, кои ќе бидат насадени низ градот, а вкупната вредност на набавката изнесува 40 милиони денари или околу 650 илјади евра.

Одговарајќи на новинарско прашање зошто екипите на Град Скопје рано изутрина го отстраниле споменикот на Ќосето, градоначалникот на Скопје рече дека тоа било за да не се предизвика застој во одвивањето на сообраќајот на една од најфреквентните крстосници кај Врховниот суд.

Шилегов изјави дека Градот Скопје од надлежниот инспектор на општина Центар примил решение за уривање на дивоградбата за споменикот на Ќосето и во законски предвидениот рок од три дена постатил по него.

Прашан за кои други споменици има сомневања дека се дивоградби, градоначалникот на Скопје рече оти „не би скал да влегува во шпекулации и дека „кога ќе созреат правните состојби јавноста благовремено ќе биде известена“.

Шилегов рече дека споменикот на Ќосето е однесен во просториите на Металски завод Тито (МЗТ), каде градот има закупено простор кога диво биле поставувани дел од спомен обележјата низ градот.

– Таму е оставен и ќе биде повикан донаторот да си го земе во определен рок од 15 до 30 дена. Постаментот е дивоградбата и тој ќе биде урнат. Предмет на истражување на дејствијата кои се преземаат од страна на надлежните органи не е самата статуа туку постапките, процедурите, начинот на кој е дојдено до нивното поставување и евентуалните злоупотреби при таквите постапки – изјави Шилегов.

Инаку, донатор на споменикот на Андон Лазов Јанев – Ќосето е Здружението за духовно обединување на Сетинци, Попадинци и Крушоради од Лерин. Ова Здружение се јавува како донатор на уште неколку споменици поставени во главниот град во рамките на проектот „Скопје 2014“.


Изградбата на џамијата на Попова Шапка продолжува, иако нема дозвола за градба


Тетово, 14 јуни, 2017 - 16:33 (META) 

На Попова Шапка деновиве повторно продолжија градежни активности за изградба на џамија која нема дозвола за градба. Инвеститорот не се откажува од изградбата на џамијата дивоградба, иако тетовскиот општински инспекторат во изминативе две недели, двапати бил на местото каде што се гради и му наложил да го запре градење.

Иако и двете забрани беа испочитувани неколку дена, ископите за поставување на темелите продолжиле уште во текот на вчерашнот ден. Денеска, местото каде што треба да се гради џамијата беше израмнето и се носеше градежен материјал.

Од секторот за урбанизам при Општина Тетово велат дека на таа локација нема издадено никакво одобрение за изградба на верски објект ниту, пак, за каков било објект. Од тетовски општински инспекторат имаат отворено предмет во кој е констатирано дека џамијата е дивоградба.

Во случајот е вклучен и државниот градежен инспекторат, кој само врши надзор на работата на тетовскиот инспекторат. Но, денеска ниту од Општина Тетово ниту од државниот градежен инспекторат не ни одговараа на повиците да објаснат што ќе преземат против инвеститорот, кој и понатами го крши законот.

Од тетовското муфтиство при Исламската верска заедница денеска не беа достапни за коментар.

Претходно за дел од медиумите негираа дека вршат градежни активности за изградба на џамија на Попова Шапка, иако на повеќе билборди поставени на патот кон Попова Шапка пишува дека во туристичкиот центар ќе се гради џамија, а како инвеститор се наведува ИВЗ.

Планот е џамијата најверојатно да биде на три ката, со големо минаре, а локација се наоѓа веднаш над главниот пат на туристичкиот цетнар, на само десетина метри од викендички.


Кирацовски: Вработените во администрацијата обезбедуваат кворум за митингот во Охрид


Скопје, 21 ноември, 2016 - 16:05 (META) 

Голем број државни институции и општини се ставија во функција на обезбедување кворум за потребите на партискиот митинг на ВМРО-ДПМНЕ што ќе се одржи денеска во Охрид, се вели во соопштението од кабинетот на дополнителниот заменик-министер за информатичко општество и за администрација, Александар Кирацовски.

– Вработените, наместо на работните места каде што треба да ги извршуваат своите работни задачи во служба на граѓаните од кои се и платени, од страна на раководните лица со притисоци и со заплашувања, се ослободени од работните задачи и се упатуваат на митингот на ВМРО-ДПМНЕ во Охрид – се додава во соопштението.

Во таа насока, Кирацовски до Државниот инспекторат за труд, поднел иницијатива за поведување постапка за вонреден инспекциски надзор над работењето на оние институции од каде што има информации за голем број нерегуларности.

– Го повикуваме Државниот инспекторат за труд соодветно да постапи по истата, за еднаш засекогаш да се стави крај на злоупотребите на вработените во јавниот сектор, кој се користи за партиско-политички интереси. Сите прекршувања на законските норми каде што со  партиско и со политичко дејствување се влијае врз вработените, а со тоа се попречува правото на слободно изразување на волјата на граѓаните, ќе бидат соодветно санкционирани – се додава во соопштението.


„Југохром“ до полноќ ќе ги исклучи сите печки


Тетово, 2 ноември, 2016 - 11:39 (META) 

Раководството на „Југохром“ постапи по одлуката на државниот инспекторат за животна средина, кој вчера донесе решение комбинатот да ги исклучи сите печки поради непочитување на крајниот рок за поставување филтри на оџаците, кој истече пред два дена.

Генералниот директор на „Југохром“, Васко Скендеровски, во телефонска изјава рече дека од синоќа етапно почнале со исклучување на печките и дека до полноќ сите печки ќе бидат исклучени.

– Ние мора да ја почитуваме одлуката на Државниот инспекторат за животна средина. Сепак, оваа одлука требаше да ја потврди и Владата. Бидејќи оттаму немаме никаков допис, ние ќе ја почитуваме одлуката на инспекторатот – изјави Скендеровски.

Тој додаде дека нивни екипи ќе продолжат со изградбата на филтер-станицата, чии темели се веќе поставени.

– Морам да кажам дека досега филтер-станицата ќе беше изградена, но многу чекавме за да добиеме градежна дозвола за нејзина изградба – додаде Скендеровски.

Со затворањето на комбинатот, без работа ќе останат околу 1.000 работници.


Земјоделските производи од поплавените подрачја не се за откуп, ниту за консумација


Скопје, 26 август, 2016 - 13:50 (META) 

Од земјоделските површини во поплавените подрачја има мало количество земјоделски производи што не се откупуваат и тоa нема сериозно да влијае врз понудата на зелените пазари, информираше денеска на прес-конференција директорот на Инспекторатот за земјоделство, Цветан Трифуновски.

Резултатите од анализата на мострите земени од земјоделските површини од поплавените подрачја наскоро ќе бидат објавени.

– Инспекторатот формираше неколку тимови, кои ги поминаа сите населени места зафатени со поплавите. Констатирано е мало количество земјоделски производи што се останати на тие површини. Земени се неколку мостри за испитување и сè уште ги чекаме резултатите. Меѓутоа, на разбирање и на жителите и на сите оние откупувачи кои откупуваат од овој регион, овие производи не се откупуваат за продажба, ниту за консумација. Истакнувам, се работи за многу мало количество што не би можело сериозно да влијае на зелените пазари – изјави Трифуновски.


Дивоградба во центар на Тетово на само два метри од станбени објекти


Тетово, 18 јуни, 2016 - 16:41 (META) 

Станари од зградата 25 на булеварот Маршал Тито во Тетово, реагираа на неажурноста на институциите, кои изминатите пет месеци дозволиле до нивните тераси и прозорци да се изгради дивоградба.

Една од сопствениците на становите, Гордана Младеновска, вели дека тетовскиот инспекторат во февруари годинава е информиран дека почнала градба на нелегален објект. Но, инспекторатот не презел никакви мерки.

Дури во јуни институциите донеле решение дека објектот до нивната зграда е дивоградба и дека во рок од седум дена треба да се урне.

– За овој објект, тетовскиот инспекторат требаше веднаш да донесе решение да престане да се гради уште во февруари, кога го пријавивме. Но, инспекторатот не презеде ништо и го охрабри инвеститорот да го изгради овој нелегален објект, кој е сега на само два метри до нашите прозорци и тераси – изјави Младеновска.

Тетовскиот инспекторат на 9 јуни има донесено решение, со кое на инвеститорите им се наложува да ја отстранат дивоградбата во рок од седум дена, а во спротивно, како што стои во решението, институциите ќе преминат кон отстранување на истата.

Но, од донесеното решение заклучно денешниот ден, има поминато 10 дена, а градбата сè уште стои.

Од тетовскиот инспекторат велат дека ќе се пристапи кон присилно извршување од страна на Општината во извршна управна постапка, со фирма која е овластена за уривање дивоградби, за која во моментот се води постапка за јавна набавка во Општината за избор на најповолен понудувач.