СДСМ, ДУИ и БЕСА ја потпишаа иницијативата за распишување референдум


Скопје, 30 јули, 2018 - 11:29 (META) 

Пратениците од владејачкото мнозинство најавија дека претпладнево ќе ја достават иницијативата за распишување на референдумот за името до претседателот на Собранието, Талат Џафери.

Според информациите од пратеничката група на СДСМ, нивните пратеници веќе ги собрале потписите за иницијативата за распишување референдум, а на неа се потпишани и пратеници од ДУИ и од БЕСА.

Се чека да заврши координацијата на пратеничката група на ВМРО-ДПМНЕ, по што и ним ќе им биде понудена иницијативата. После оваа средба се очекува и официјално да биде соопштен ставот на опозициската партија во врска со референдумот и референдумското прашање.

Во Предлог-одлуката што ќе биде доставена до претседателот на Собранието е содржан датумот – 30 септември за одржување на референдумот и е содржано референдумското прашање кое, според информациите од СДСМ, е исто онакво какво што го предложи премиерот Заев и: Дали сте за членство во ЕУ и НАТО преку поддршка на Договорот помеѓу Република Македонија и Република Грција?

Во Собранието во 10 часот започна средбата на претсетадателот на Собранието со координаторите на пратеничките групи со исклучок на ВМРО-ДПМНЕ.

Од оваа средба се очекува да произлезе информацијата во колку часот би можела да биде закажана седницата за распишување на референдумот. А за нешто подоцна, претпладнево е најавена и координација на пратеничката група на СДСМ, на која, како што посочија одредени пратеници, би можело да се очекува и присисуство на премиерот Зоран Заев.


Анѓушев: Гасоводот мора да поминува низ Водно, но ќе има нова траса


Скопје, 10 јули, 2018 - 12:49 (META) 

Вицепремиерот за економски прашања Кочо Анѓушев и директорот на Македонски енергетски ресурси (МЕР), Бајрам Реџепи, заедно со претставници од иницијативата „Го сакам Водно“ денеска ја поминаа трасата по која треба да поминува гасоводот, за лично да се уверат каква шума и зеленило ќе бидат уништени.

Анѓушев вели дека слушал различни спротивставени ставови за тоа колку шума треба да се исече и низ кои предели поминува проектот за гасоводот, и затоа сакал да ја види ситуацијата на терен.

– Jа поздравувам иницијативата на невладините организации, тие се коректор на политиките на секоја влада и како такви и денеска се уверивме дека делумно или во најголем дел биле во право во своите барања. Службите во МЕР напорно работеа заедно со невладините организации и мислам дека во најголем дел таа траса се искорегира. Можете да го видите проектот каде што таа претходно била замислена и како сега сите делници каде што може да биде уништена шума се избегнати. Но, и покрај тоа што е направено максимално избегнување каде што може, во еден дел мора да се помине низ шума. Таму ќе се користат шумските патеки кои се веќе постојни, за да се направат минимални оштетувања кои може да настанат. Се надевам дека ќе дојдеме до заеднички јазик како оваа делница да се изгради – рече Анѓушев.

Тој уште еднаш повтори дека, ако се пролонгира градењето на гасоводот тоа ќе значи дека многу домаќинства ќе продолжат да се греат на дрва и во наредните пет години.

– Во тој случај несразмерно многу шума ќе се исече за греење од тоа што тука би се оштетила, а тоа сега ќе биде минимално. Ги охрабрив во МЕР и како Влада им наложивме да направат максимални напори, секое дрво кое може да се избегне за да биде исечено, тоа да биде така направено. Мислам дека веќе се постигна оптимална траса низ која што ќе има минимални оштетувања. Се работи за 70 отсто помалку оштетувања од тоа што беше првобитно замислено. Доколку и понатаму имаме желба да направиме еколошки потфат, како што е градењето на гасоводот, треба да бидеме согласни да продолжиме – додаде Анѓушев.

Тој вели дека ќе инсистира невладините организации и еколошките здруженија до крај да бидат вклучени во проектот, односно да бидат надзор.

– Покрај градежниот надзор, кој ќе постои согласно закон, и ќе биде ангажиран од страна на МЕР, ќе барам здруженијата да бидат дополнителен надзор на градењето на оваа траса. Се што може да се измени и прилагоди, за да има што е можно помал импакт на животната средина – додаде тој.

Андреа Јанков од иницијативата „Го сакам Водно“ вели дека ова се некои начелни, прелиминарни проекти кои се прават од изведувачите на основниот проект.

– Останува да продискутираме за овие дадени предлози со кои навистина се намалува импактот врз Водно. Од претходните четири километри шумски појас уништување, сега се намалува на два, се јавува теснење односно користење на постоечки патеки. Но, останува да продолжиме со разговорите, за да добиеме адекватно решение со кое сите би биле задоволни – вели Јанков и додава дека нивната работа допрва започнува со будење на граѓанската свест, за да ги натераат граѓаните да учествуваат во овие случувања, за да ги освестат, за тоа што значи Водно за нив.

Во однос на користење на друга траса за изградба на гасоводот и комплетно избегнување на Водно, директорот на МЕР, Реџепи вели дека „ги разгледале опциите и направиле длабока анализа, но биле врзани со рокови.“

– Имаме договори спрема банки и други субјекти, поднесовме анализа до Влада, но ќе имаше одложување на проектот три до четири години минимум. Заради другите обврски што ги имаме Владата одлучи да одиме по постоечката траса – додаде Реџепи.

Тој потсети дека идејниот проект за овој гасовод бил изготвен во 2010 година и дека во 2016 година било дадено одобрението за градба.


ЕК со платформа за запирање на изумирањето на инсектите-опрашувачи


Брисел, 1 јуни, 2018 - 13:41 (META) 

Дури еден од десет инсекти-опрашувачи е на работ на изумирање, а една третина од видовите пчели и пеперутки се во опаѓање. За справување со тој проблем, Европската комисија (ЕК) денеска ја предложи првата генерална иницијатива на ЕУ за справување со проблемите што ги погодуваат опрашувачите.

Иницијативата содржи мерки за подобрување на набљудувањето и пребројувањето на инсектите и причинителите на проблемот, како и подобра координираност на политиките и секторите во ЕУ за справување со последиците од намалувањето на бројот на инсектите-опрашувачи во периодот до 2030 година. Ќе се работи на подобро запознавање со процесот на опаѓање на бројноста на овие инсекти, со причинителите, како и на зголемување на познавањата на населението во ЕУ за проблемот.

Опрашувањето преку инсекти е еден од клучните процеси на овозможување на репродукцијата на растенијата и билките. Четири од пет земјоделски култури или диви растителни видови во Европа зависат од инсекти за да остварат репродукција. Дури 15 милијарди евра од годишниот земјоделски производ на ЕУ се должи на опрашувањето од инсекти.

Инсекти што ги опрашуваат цветовите се пчелите, пеперутките, молците, потоа одредени видови мушички и некои видови бумбари.


Данев: Власта ја одби иницијативата на ВМРО-ДПМНЕ за намалување на акцизата на горивата


Скопје, 2 мај, 2018 - 16:16 (META) 

Граѓаните на Република Македонија денеска по којзнае кој пат беа сведоци дека пратениците на владејачкото мнозинство на чело со СДСМ уште еднаш ги ставија во преден план партиските и личните интереси наспроти интересите на граѓаните на Република Македонија, рече координаторот на пратеничката група на ВМРО-ДПМНЕ, Драган Данев, на прес-конференција во Собранието на Република Македонија.

– Иницијативата на пратеничката група на ВМРО-ДПМНЕ и Коалицијата за намалување на акцизата за 3 денари, односно враќање на акцизата за дизел горивото во првобитна состојба како пред први јануари 2018 година, со што треба да се растеретат трошоците за индустријата, стопанството и за сите граѓани, беше одбиена од собраниското мнозинство. Кога власта беше опозиција ветуваше живот, а само една година откако се на власт дојде живот, но како што велат граѓаните, дојде доста поскап живот – рече Данев.

Според координаторот на ВМРО-ДПМНЕ, зголемувањето на акцизата индустријата ја чини близу 5,5 милиони евра, а транспортот го чини 32 милиони евра.


Ѓорчев: ВМРО-ДПМНЕ ќе работи Македонија да се приклучи на иницијативата „Трите мориња“


Скопје, 12 февруари, 2018 - 16:35 (META) 

ВМРО-ДПМНЕ ќе покрене широка меѓународна акција за пристапување на Република Македонија кон иницијативата на „Трите мориња“ – од Балтичкото море до Црно море и од Црно Море до Јадранското море – во која што членуваат 12 европски земји, изјави денеска на прес-конференција пратеникот од ВМРО-ДПМНЕ, Влатко Ѓорчев.

– ВМРО-ДПМНЕ ќе ги насочи своите надворешно политички ресурси, иницијативи и контакти за обезбедување полноправно членство на Република Македонија во оваа важна регионална иницијатива. Се работи за иницијатива која што покрива еден милион и двесте илјади километри квадратни и повеќе од 110 милиони жители. Се работи за иницијатива која што е проевропска но и евроатланска, која што е подржана силно од САД и претседателот Доналд Трамп – рече Ѓорчев.

Тој додаде дека иницијативата ќе ја покренат и во рамките на Европската народна партија каде што членува ВМРО-ДПМНЕ и дека оваа идеја ќе ја промовираат и во Брисел.


Адвокатот Сашо Дукоски поднел иницијатива до Уставниот суд за Законот за амнестија


Скопје, 6 февруари, 2018 - 13:44 (META) 

Адвокатот Сашо Дукоски денеска поднел иницијатива во Уставниот суд за оценка на уставноста на Законот за амнестија. Според Дукоски, Законот е неуставен бидејќи во него е наведено за кои кривични дела се однесува амнестијата, а за кои не, со што, вели адвокатот, се крши уставното начело за еднаквост на граѓаните пред уставот и законите.

„Денеска поднесов иницијатива за оценка на уставноста на членот 3 од Законот за амнестија каде е наведено за кои кривични дела не важи амнестијата, што ги прави граѓаните (осудениците) нееднакви. За едни граѓани важи законот, а за други не, во однос на тоа за кои кривични дела се осудени. Сметам дека ова имплементирано законско решение е спротивно со уставното начело за еднаквост на граѓаните пред Уставот и законите и начелото за вледеење на правото“, напиша Дукоски на својот фејсбук-профил.

Со Законот, амнестија не е предвидена за осудените за убиство, за кривични дела против изборите и гласањето, за силување, педофилија, посредување во вршење проституција, потоа за кривични дела против државата, за злосторничко здружување, како и за кривичните дела против човечноста и меѓународното право.

Според проценките на Владата, со Законот за амнестија околу 670 лица ќе бидат целосно ослободени од издржување на затворска казна, додека на 3.097 ќе им биде намалена казната за 30 отсто.


Димовски ќе бара од Уставниот суд да го поништи Законот за јазиците


Скопје, 16 јануари, 2018 - 12:35 (META) 

Пратеникот Илија Димовски денеска најави дека ќе поднесе иницијатива до Уставниот суд за поништување на Законот за употреба на јазиците.

Тој преку својот фејсбук-профил апелераше до претседателот на државата, Ѓорге Иванов да не го потпишува указот за прогласување на законот, а до неговите колеги во Собранието да не гласаат за овој закон кога тој повторно ќе се врати на седница во законодавниот дом.

„Доколку и покрај укажувањата на целокупната јавност пратениците на СДСМ повторно одлучат да гласаат за овој закон, најавувам дека ќе поведам иницијатива пред Уставниот суд на Република Македонија за поништување на овој закон“, напиша Димовски на „Фејсбук“.

Според него Законот за употреба на јазиците или како што го нарекува „Законот за двојазичност“ е штетен, дезинтегрирачки, дискриминирачки и целосно неуставен документ.

„Овој закон е донесен како плод на партиски пазарења помеѓу партиите, а не како плод на суштинска, длабока и сеопфатна анализа на реалните потреби на нашите сограѓани од помалубројните етнички заедници (Албанците, но и сите други помали заедници). Процедурата за донесување на овој закон во Собранието на Република Македонија беше целосно неделовничка и спротивна на основните демократски стандарди. Овој закон е донесен на сила. Овој закон ја загрозува позицијата на македонскиот јазик во Република Македонија, но и ја загрозува унитарноста и иднината на нашата држава“, пишува Димовски.


СДСМ поднесе иницијатива за намалување на патните трошоци за пратениците


Скопје, 12 јануари, 2018 - 14:04 (META) 

Пратеничката група на СДСМ поднесе инцијатива за намалување на патните трошоци на пратениците, информираше координаторот Томислав Тунтев на денешниот брифинг со новинарите.

Со иницијативата се предлага патните трошоци од 30 отсто од цената на изминат литар бензин, да се намали на 15 отсто. За таа цел, потребно е менување на законот за плати на именувани функционери и законот за пратеници.

– Решението кое го предлагаме ќе биде со цел да се стави крај на манипулациите и шпекулациите во јавноста. Претседателот Талат Џафери го има предлогот, уште на 1 декември, но досега се нема изјаснето ниту една пратеничка група – рече Тунтев.

Тој потенцираше дека за оваа инцијатива очекуваат поддршка од сите пратеници вклучувајќи ја и опозицијата.

Наплатата според овој предлог закон би се вршела само со фискална сметка која е платена од личната картичка на пратеникот, за да се отстранат, како што објасни Тунтев, сите сомнежи дека пратеникот би можел да носи и фискални сметки кои од други лица.


Г.г. Стефан: Мора да сфатиме дека работите треба да се решаваат низ дијалог


Скопје, 7 декември, 2017 - 22:04 (META) 

„За нашиот верен народ и за нашата независна држава, сè уште останува еден од проблемите – тоа што Македонската православна црква (МПЦ) е неприфатена во сеправославното семејство, за жал, од политички причини. Па, Охрид и Црквата во Македонија ниту ги измисливме, ниту се создадени за штета на другите, туку за слава на Бога и за спасение на нашиот богољубив народ. Само така и единствено на тој начин треба да се сфатат последните, актуелни напори на Светиот архиерејски синод во решавањето на овој нелогичен и нецрковен проблем, поврзан со статусот на нашата Црква“.

Ова го истакна поглаварот на Македонската православна црква г.г. Стефан во своето обраќање на свечената академија во пресрет на утрешниот државен празник Свети Климент Охридски, што вечерва се одржа во Македонскиот народен театар (МНТ), под покровителство на премиерот Зоран Заев.

Иако не го спомена директно, станува збор за прва јавна изјава на поглаварот на МПЦ во врска со прифатеното барање Бугарската православна црква да ѝ биде мајка црква на МПЦ.

Според г.г. Стефан, покажаната иницијатива е во духот на љубовта кон својот народ и сето православие.

– Кој се обидува да ги решава проблемите на својот народ, тој покажува и преданост, и почит и дело на родољубивост. Ние мора да сфатиме дека работите треба да се решаваат низ дијалог, во кој ќе ги штитиме своите интереси и потреби, наоѓајќи ги најприфатливите за нас решенија – рече поглаварот на МПЦ.

Премиерот Зоран Заев во своето обраќање го честиташе 50-годишниот јубилеј од возобновувањето на автокефалноста на Охридската архиепископија во лицето на Македонската православна црква и истакна оти е убеден дека овој јубилеј ќе отвори и „надминување на повеќегодишните предизвици исправени пред МПЦ, која е реалност во православниот свет“.

– Како што успеал свети Климент во мисијата на неговото време, повикани сме да се обидеме и да успееме и ние, надминувајќи ги предизвиците трпеливо и мудро, како што ни доликува, заштитувајќи ги идентитетските вредности како граѓани, како народ и како држава – рече Заев.

На свечената академија присуствуваа високи претставници на МПЦ, пратеници, претставници на Владата, на амбасадите, професори, академици, претставници на верските заедници, на бизнис-заедницата и други гости.


Дипломатскиот клуб Скопје предлага скопскиот аеродром да се вика „Киро Глигоров“


Скопје, 10 ноември, 2017 - 10:54 (META) 

Дипломатскиот клуб Скопје ја поддржува иницијативата скопскиот аеродром да го носи името на поранешниот македонски претседател Киро Глигоров.

Од Дипломатскиот клуб велат дека со именувањето на аеродромот со името на претседателот Глигоров „на најдостоен начин ќе се материјализира оценката за неговата голема улога во процесот на создавањето на Македонија како современа држава“.

„Нагласуваме дека од скопскиот аеродром отпочнуваа и на него завршуваа бројните ‘походи’ на претседателот Глигоров во светот, неговите патувања посветени на мирот и пријателството, а за меѓународно етаблирање на македонската држава. Во негово присуство овде, прв пат, во практика се воведени протоколарните манифестации како што се веење на државното знаме, интонирање на химната, постројување на почесната гарда, со кои пред светот Република Македонија се претстави како самостојна и независна држава. Од овој аеродром полетаа и првите авиони со македонски државни ознаки“, се наведува во соопштението на Извршниот одбор на Дипломатскиот клуб.

Инаку, преименувањето на скопскиот аеродром, кој сега го носи името „Александар Велики“ и на автопатот со истото име во јавноста се почесто се поврзуваат со новата клима во македонско-грчките односи и интензивирањето на преговорите меѓу двете држави за решавање на спорот за името.

Дипломатскиот клуб Скопје, како што стои на нивната интернет страница, е „невладина, доброволна, професионална и непрофитна организација на граѓани во Република Македонија со цел, како активни или поранешни дипломати, да се здружуваат за да работат за општото добро и интересите на Република Македонија и на држави чии дипломатии се залагаат за демократски и современи меѓународни односи“.