Почна координативниот состанок на државниот врв за предлозите на Нимиц


Скопје, 27 јануари, 2018 - 18:52 (META) 

Почна координативниот состанок на државниот врв на кој ќе се разгледува иницијалната рамка за решавање на спорот за името, која ја предложи медијаторот Метју Нимиц.

Во Клубот на пратеници пристигнаа претседателот Ѓорге Иванов, со двајца претставници на неговиот кабинет, премиерот Зоран Заев заедно со министрите за одбрана и за надворешни работи, Радмила Шекеринска и Никола Димитров, лидерот на ВМРО-ДПМНЕ, Христијан Мицкоски на состанокот е придружуван од Владо Мисајловски и Александар Николовски, а лидерот на ДУИ, Али Ахмети дојде со потпретседателите во Владата, Бујар Османи и Хазби Лика.

Од МНР вчера соопштија дека по завршувањето на средбата не е предвидена прес-конференција и изјави за медиумите.


Државниот врв денеска на координативен состанок за предлозите на Нимиц


Скопје, 27 јануари, 2018 - 10:00 (META) 

Државниот врв денеска на координативен состанок ќе ја разгледува иницијалната рамка за решавање на спорот за името, која ја предложи медијаторот Метју Нимиц.

Состанокот, кој вчера и официјално беше најавен од Министерството за надворешни работи, ќе се одржи во 18 часот, во Клубот на пратениците.

На состанокот ќе учествуваат претседателот на државата Ѓорѓе Иванов, премиерот Зоран Заев, министерот за надворешни работи, Никола Димитров, претседателот на ВМРО-ДПМНЕ, Христијан Мицкоски и претседателот на ДУИ, Али Ахмети.

Од МНР соопштија дека по завршувањето на средбата не е предвидена прес-конференција и изјави за медиумите.

Посредникот на ОН во разговорите за името, Нимиц, на 17 јануари по средбата со македонскиот и со грчкиот преговарач, Васко Наумовски и Адамантиос Василакис, во седиштетот на ОН изјави дека има големи надежи дека овој процес се движи во позитивна насока и дека на повидок е решение на спорот за името.

Нимиц на покана на владите на Македонија и на Грција ќе престојува во Атина и во Скопје во периодот од 29 јануари до 1 февруари.

Тој на 31 јануари ќе пристигне во Скопје, а следниот ден ќе има средби со државниот врв.


Димитров и Коѕиас очекуваат „иницијална рамка“ за решавање на спорот за името


Солун, 11 јануари, 2018 - 18:36 (META) 

Министрите за надворешни работи на Македонија и на Грција, Никола Димитров и Никос Коѕиас на денешната средба која се одржала во Солун, изразиле заедничко очекување дека претстојниот состанок на 17 јануари, медијаторот Метју Нимиц „ќе стави на маса инцијална рамка со која суштински ќе се напредне во надминувањето на разликата околу името“, се наведува во соопштението кое е усогласено со двете министерства за надворешни работи.

„Димитров и Коѕиас разговараа за методологијата, за пристапот на двете страни, како и за рамката на процесот за надминување на разликата околу името, и се сложија да имаат подиректна улога во разговорите со цел надминување на разликата околу името“, се вели во соопштението.

Шефовите на дипломатиите на двете земји размениле и мислења поврзани со мерките за градење доверба и други подготовки околу „следните средби на високо политичко ниво меѓу двете земји“.

Средбата, како што се вели, се одржала во рамките на воспоставениот дијалог и консултации меѓу двете земји за зајакнување на транспарентноста и меѓусебната доверба.

Димитров и Коѕиас, имале, како што се наведува, добар разговор, фокусиран на унапредувањето на билатералните односи и соработката во поширок контекст, поврзано со тековните мерки за градење доверба.