Владата го усвои дополнетиот ребаланс на буџетот, донесе одлука за струшката депонија


Скопје, 28 јули, 2017 - 19:33 (META) 

Владата на Република Македонија на денешната седница го усвоила предлогот за изменување и за дополнување на буџетот на Република Македонија за 2017 година, по завршената амандманска расправа во собраниските комисии. Со оваа верзија на ребалансот, дополнета со амандмани од пратениците, се определуваат дополнителни 25 милиони денари по одредени ставки и се пренаменуваат пари во согласност со потребите на буџетските корисници, се вели во владиното соопштение.

На седницата што почна попладнево, донесена е и одлука за итно решавање на проблемот со депонијата во Струга. Министерството за финансии и Генералниот секретаријат на Владата добиле задолжение да обезбедат пари за безбедно и економично да се транспортира сметот од струшката депонија до други безбедни депонии во земјава. Исто така, се ангажираат чувари кои ќе ја надгледуваат целата локација, за да превенираат можни идни проблеми.

Истовремено, владиниот кабинет ја усвоил информацијата за проектот за поедноставување на процедурите за известување и за плаќање на персонален данок на доход, кој е финансиран од ИПА-фондовите.

На денешната владина седница, е разгледан и усвоен меморандумот за соработка во полето на природниот гас помеѓу Министерството за економија на Македонија и Министерството за енергетика на Бугарија и министерот за економија бил овластен да го потпише документот. Според Владата, соработка ќе овозможи можност за нова директна врска помеѓу двата системи за природен гас на двете земји.

На седумнаесеттата владина седница биле донесени и заклучоци повразни со организацијата на институционалната прослава на националниот и државен празник 2 Август – Ден на Републиката. Владата определила и членови на организациониот одбор за прослава на државниот празник.


Овчи сипаници ги испразнија училиштата и градинките, регистрирани 3.025 случаи


Скопје, 4 мај, 2017 - 16:28 (META) 

Во училиштата и во градинките е забележан зголемен број на деца со овчи сипаници, па така во некои одделенија речиси половина од учениците отсуствуваат од настава поради појавата на овој вирус.

Информацијата дека во овој период е регистрирано релативно зголемување на бројот на лица заболени со овчи сипаници, за „Мета“ ја потврдија и од Институтот за јавно здравје.

„Во 2017 година регистрирани се 3.025 случаи на мали сипаници или за 15 проценти повеќе споредено со истиот период од 2016 година. Зголемувањето на бројот на случаи е очекувано, бидејќи овчите сипаници се појавуваат сезонски, односно највисок број на случаи се јавува во периодот од април до јуни“, вели лекарот Владимир Микиќ од Институтот за јавно здравје.

Тој информираше дека ова заболување трае кратко, се карактеризира со осип по кожата, проследен со треска и со слабост и дека вирусот е многу заразен. Периодот на инкубација е помеѓу две и три недели.

Болеста може да биде сериозна кај повозрасните и кај лицата со намален имунитет.


Вангеловски го обвини СЈО дека одбива да соработува, но не кажува за што


Скопје, 10 април, 2017 - 13:10 (META) 

Претседателот на Врховниот суд на Република Македонија, Јово Вангеловски, денеска го обвини Специјалното јавно обвинителство дека одбива да сораборува со Врховниот суд и одбива да одговара на неговите барања.

Вангеловски денеска преку соопштение информираше дека во четвртокот минатата недела до СЈО доставил барање за информација, но до денеска од кабинетот на специјалната јавна обвинителка, Катица Јанева, не му било одговорено.

Од судот не кажуваат за што конкретно и за кој случај е инфомацијата што ја бараат од СЈО и единствено наведуваат дека поради итниот карактер на барањето, имало неколку телефонски разговори меѓу шефот на кабинет на Вангеловски и шефот на кабинетот на специјалната јавна обвинителка, Катица Јанева.

„Врховниот суд на Република Македонија ја известува јавноста дека обвинителството очигледно одбива да постапува по барањето на Врховниот суд на Република Македонија, со што влијае на пролонгирање на итна постапка која се води пред Врховниот суд на Република Македонија“, стои во соопштението на Врховниот суд.

Од СЈО за „Мета“ велат дека во текот на денот ќе излезат со информација за што конкретно станува збор.


ЕУЛЕКС нуди награда од 82.000 евра за информација за убиецот на нивни вработен


Приштина, 19 септември, 2016 - 17:26 (META) 

За информација која би довела до убиецот на нивниот цариник Аудриус Шеневичиус, ЕУЛЕКС денеска понуди награда од 82.000 евра. Шеневичиус беше убиен од заседа на денешен ден пред три години, во северниот дел на Косово.

Шеневичиус е убиен на 19 септември 2013 година по вооружениот напад врз две возила на ЕУЛЕКС кои се движеле кон преминот Јариње.


Протестите на „Шарена револуција“ не ја загрозиле безбедноста во Битола


Битола, 14 септември, 2016 - 18:34 (META) 

Протестите на „Шарена револуција“ не предизвикале безбедносни импликации во Битола, ова е заклучокот на СВР – Битола по анализата на безбедносната состојба во градот во првите шест месеци од годината.

Оценката за јавниот ред и мир во градот, која се најде пред советниците  на последната седница на Совет, предизвика бура од реакции кај битолската опозиција, која ја оцени како селективна бидејќи полицијата ги нотирала само протестите на „Шарена револуција“, а не и тие на ГДОМ.

Полицијата евидентирала дека во Битола се одржале 61 протест во кој учесниците го изразиле својот револт со фрлање боја и јајца по фасадите од неколку институции, како Општината, судовите, обвинителството и киното „Манаки“. Полицијата го забележела и протестот на битолчани пред еден од становите на градоначалникот Владимир Талески.

– На 17 и на 18 април групата што учествуваше на протестите се упати на улицата Бонде Скерлевски во зградата во која живее градоначалникот на Општина Битола, каде што на мирен начин го изразија својот протест –  стои во извештајот на полицијата, во кој уште се наведува дека на протестите пред Општината еден полицаец бил нападнат, а тројца други повредени додека се обидувале да ги спречат граѓаните да влезат во објектот на Општината.

За советникот на СДСМ, Благојче Котевски, оваа информација на полицијата е крајно селективна и партиски обоена во боите на „МВРО“.

– Во информацијата се нотирани само протестите на „Шарената револуција“, а не се нотирани протестите што ги имаше здружението ГДОМ. Не е забележан собирот пред партиското седиште на СДСМ, ниту оштетувањата направени на фасадата, скршениот прозорец и реклама. Поведена е и кривична постапка против Душко Илиевски за напад на полицаец, а нема никаква одговорност за лицата од ГДОМ кои повредија полицаец за време на еден од нивните протести – рече Котевски.


Манчевски: Да се зголеми бројот на надземни пешачки премини


Скопје, 22 септември, 2015 - 18:26 (META) 

Да се ограничи брзината на движење на возилата на 50 километри на час, да се зголеми бројот на надземни пешачки премини, да се унапреди велосипедската инфраструктура, но и генерално да се подобрат вертикалната и хоризонталната сообраќајна сигнализација, се некои од предлозите што советничката група на СДСМ ќе ги поднесе до Град Скопје.

– Овие идеи се за да не гинат луѓе по улиците – вели Дамјан Манчевски, координатор на советничката група на СДСМ.

Советничката група на опозицијата побара и Градот да достави информација за она што треба да се гради на местото на бараките каде сега се наоѓа администрацијата на градот.

– СДСМ и опозицијата целосно ќе се спротистават на градење на кејот 13 Ноември. Се работи за улица која ќе биде изградена пред Градскиот трговски центар и која целосно ќе го наруши движењето на пешаците во овој дел од градот. Длабинската анализа покажува дека најголемите кратења се однесуваат на изградба и на реконструкција на улици. Ова е сосема спротивно на интересите на граѓаните на Скопје и апсолутно е неприфатливо во време кога се градат панорамски тркала, барокни фасади и друг раскош и луксуз, да нема пари за основните потреби на граѓаните на Скопје. Скопје одамна заслужи многу повеќе и многу подобро – вели Манчевски.


Груевски за Јуратовиќ: Човекот, веројатно, не е целосно информиран


Скопје, 5 март, 2015 - 17:11 (META) 

На денешната промоција на нови дела од едицијата „Македонски искушенија“, премиерот Никола Груевски, одговарајќи на новинарско прашање за изјавата на известувачот за Западен Балкан, пратеникот Јосип Јуратовиќ, кој во германскиот Бундестаг оцени дека повикувањето на странските служби како одговорни за прислушувањето во Македонија се евтини изговори, рече дека пратеникот не бил целосно информиран, објави „Нова ТВ“.

– Човекот, веројатно, не е целосно информиран и дава политички став без да ги има сите информации. Се разбира дека прислушувањата се нелегални, овие што ги презентира господинот Заев – рече Груевски на денешната промоција на нови дела од едицијата „Македонски искушенија“.

Груевски вели дека не игнорира ништо што се случува во земјава, но, според него, не секој целосно информиран дава изјави за политичката ситуација.

– Македонија има влада и таа е подготвена да работи до завршување на нејзиниот мандат – посочи Груевски.

Ставот на пратеникот Јуратовиќ доаѓа од вчерашната расправа на Комисијата за надворешни работи на германскиот Бундестаг за актуелните случувања во Македонија.

Јуратовиќ, меѓу другото, ѝ препорача на македонската влада да изнајде други изговори за скандалот со прислушување што се обелодени во земјава.

– Ние распознаваме што е изговор, а што е факт. Им препорачувам, ако веќе бараат изговори, да користат некои други, бидејќи овие потсетуваат на тие од комунистичките времиња, кога се бараа странските непријатели. Македонија нема непријатели, има пријатели. Таа политика на посочување некакви странски агенти, некакви постојани заговори против државата, едноставно е неисплатлива – изјавил Јуратовиќ.