Макрадули: Со „Планот за чист воздух“ за 2 години аерозагадувањето ќе се намали до 50%


Скопје, 15 ноември, 2018 - 14:24 (META) 

Намалување на загадувањето на воздухот за 50 отсто во Скопје и од 30 до 50 отсто во другите градови во следните две години, предвидува „Планот за чист воздух“ на Владата кој денеска го презентираше заменикот-министер за животна средина, Јани Макрадули, а започна да се применува од вчера.

За овој план во буџетот за 2019 година предвидени се 1,5 милиони евра почетни средства дополнителни на оние кои веќе постојат од 20 милиони евра во другите министерства.

– Ова е јасен план како да се намали загадувањето и предвидува справување со изворите за загадување од домашното затоплување, транспорт, индустрија, градежништво и отпад – рече Макрадули.

Планот предвидува во 2019 година да се набават комплетно нови инструменти за веќе постоечките 19 мерни станици. Во мониторингот ќе има предвидување во реално време, односно тридневна проекција на загадувањето.

Макрадули вели дека домашното затоплување е најголемиот загадувач на воздухот.

– После овој двегодишен план, 10.000 домаќинства ќе бидат приклучени на постоечкиот топлински оператор, а ДДВ-то за испорачната топлинска енергија да се намали од 18 на 5 отсто за дополнително стимулирање за приклучување. 20.000 домаќинства ќе ги променат старите нееколошки печки на дрва, 15.000 домаќинства ќе ја подобрат енергетската ефикасност на домовите, 3.000 домаќинства ќе бидат приклучени на гас, 20.000 домаќинства ќе користат инвертор клима уреди, а 2.000 домаќинства од социјално ранливите категории субвенционирано ќе го променат начинот на живеење. После две години ниедно домаќинство нема да се грее на јаглен и нафта. Државата ќе биде пример и првите активности ќе ги започнеме со замена на нееколошките извори на затоплување во јавните институции во градинките, училиштата и здравствените домови– наведе Макрадули.

Во делот на транспортот, ќе се воведе посебен зимски режим на сообраќај во деновите кога загадувањето е повисоко односно контролиран сообраќај во централното градско подрачје со претходно овозможени алтернативни решенија.

Во индустријата ќе се носи закон за индустриски емисии каде што се дефинираат построги правила во одобрувањето на интегрираните еколошки дозволи и ќе има потранспарентен мониторинг, а до тогаш ќе се зајакнат контролите.

-Во декември ќе ги започнеме преговорите за заокружување на оперативниот план за активностите за добивање на А интегрирана дозвола за РЕК Битола – информираше заменик министерот.

Во градежништвото ќе има засилени контроли во градењето и просторот за градење, миење на возила и покривање на товар. Обврска ќе биде да се контролира градежниот шут и другиот отпад на објектот што се гради.

-Апелирам и замолувам, за заедничка акција и за заедничка иднина. Верувам дека се уште не доцна да се делува. Длабоко сум убеден дека ова не е невозможна мисија бидејќи имаме јасен план што треба да се направи – додаде Макрадули.


 За приход од 100.000 денари ќе се плаќа данок од 10.800 денари


Скопје, 6 ноември, 2018 - 12:03 (META) 

Не стивнуваат реакциите од бизнис-секторот, но и од граѓаните кои имаат поголеми месечни приходи по најавата на Владата дека од 1 јануари 2019 стапува на сила нов закон за данок на личен доход со кој се укинува рамниот данок и се воведува прогресивно оданочување. Даночните промени предизвикаа и повеќе дилеми околу износот и начинот на плаќање на даноците за личен доход.

Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 90.000 денари, за делот над 90.000 ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 100.000 денари, исплатувачот ќе треба да плати вкупен данок од 10.800 денари (10 отсто односно 9.000 денари за делот што е до 90.000 денари и 18 отсто односно 1.800 денари за делот што го надминува прагот од 90.000 денари).

На крајот на годината, со годишната даночна пријава ќе се врши пребивање помеѓу вкупниот доход што го остварило едно лице и вкупниот данок што бил платен, и доколку постои разлика помеѓу платениот данок и данокот што треба да се плати за остварениот доход, на лицето ќе му се врати повеќе платениот данок, или пак лицето ќе треба да доплати.

На пример, доколку на лицето од горниот пример тие 100.000 денари му се единствениот доход во годината, на него ќе му бидат вратени 800 денари, затоа што 100.000 денари на годишно ниво е под годишниот праг од 1.080.000 денари за повисоката стапка од 18 отсто.

„За да можат граѓаните навремено и прецизно да следат колку доход имаат остварено во текот на годината, колку данок имаат платено, колку данок треба да доплатат или да им се врати, а со тоа и соодветно да си планираат, ќе се изработи онлајн сервис преку кој граѓаните во кое било време ќе можат да ги добијат сите овие информации, и преку кој ќе можат предвреме да доплатат даночен долг“, информираа од Министерството за финансии.

Најавата на Владата ги фати неподготвени работодавачите и работниците со оглед на тоа што промената се најавува само два месеци пред да стапи на сила и на крајот на годината кога компаниите веќе ги имаат подготвено финансиските планови за 2019 година. Речиси сите стопански комори реагираа, а некои од нив побараа одложување на примената на прогресивниот данок за пет години. Реагираа и вработените во компаниите од софтвреската индустрија со образложение дека тие не се најбогатиот слој граѓани за кои власта тврди дека е наменета новата даночна реформа.

Од друга страна, од Министерството за финансии тврдат дека директно зголемување на даноците ќе има само за 38.000 лица, а кај 453.000 лица ќе има намалување на ефектвната даночна стапка.

„За најголем дел од популацијата новата ефективна даночна стапка е пониска од моменталната, додека позначајно зголемување има единствено кај најдоходовните 1 отсто. За најдоходовните 1 отсто од населението, зголемувањето на ефективната даночна стапка изнесува 4 процентни поени, додека за групата под тоа, зголемувањето е 0,6 процентни поени“, соопшти Министерството за финансии.


Месната индустрија побара продолжување на царинските олеснувања


Свети Николе, 10 октомври, 2018 - 16:39 (META) 

Во услови на економски пад, месната индустрија забележала пораст на извозот за 60 отсто, а производството се зголемило за 30 отсто. Ова се резултите на привремена мерка на Владата за ослободување од царина на дел од суровините, што се употребуваат во производството на месните преработки.

Постигнатиот резултат беше повод компаниите од месната индустрија денеска во Свети Николе, да му предадат ново барање на вицепремиерот Кочо Анѓушев. Гоце Трајчев од фабриката „МИК“, рече дека не барале субвенции како земјоделците, ниту протекционизам.

– Бараме само изедначување на условите за работење како за странските конкуренти кои се со слични или вакви производи на нашиот пазар – рече Трајчев.


Намалени цените на индустриските производи на домашниот пазар


Скопје, 27 јули, 2018 - 13:37 (META) 

Продажните цени на производителите на индустриски производи на домашниот пазар, во јуни се пониски за 0,3 проценти на месечно ниво, а за 0,8 проценти на годишно ниво, соопшти Државниот завод за статистика.

Во јуни 2018, во споредба со мај годинава, продажните цени на производителите на индустриски производи на домашниот пазар се пониски во групите eнергија за 0,6 проценти, капитални производи за 0,3 проценти, интермедијарни производи, освен енергија за 0,2 проценти и нетрајни производи за широка потрошувачка за 0,1 проценти.

Во споредба, пак, со јуни 2017 година, продажните цени на производителите на индустриски производи на домашниот пазар се пониски во групите енергија 7,3 проценти и капитални производи 0,6 проценти.


Индустрискиот промет на странските пазари во пораст, на домашниот со пад


Скопје, 16 јули, 2018 - 11:12 (META) 

Индексот на прометот во индустријата на странските пазари во првите пет месеци е зголемен за 12,4 проценти во однос на истиот период лани, објави Државниот завод за статистика.

Според главните индустриски групи, прометот во индустријата на странските пазари во мај 2018 година, во однос на истиот месец лани бележи пораст кај интермедијарни производи, освен енергија за 9,3 проценти, капитални производи за 13,4  проценти и нетрајни производи за широка потрошувачка за 9,1 проценти, додека опаѓање бележи кај трајни производи за
широка потрошувачка за 4,5 проценти.

Според главните индустриски групи, прометот во индустријата на домашниот пазар во мај, во однос на истиот месец лани, бележи опаѓање кај интермедијарни производи, освен енергија за 8,9 проценти и трајни производи за широка потрошувачка за 0,1 процент, додека пораст бележи кај каапитални производи за 8 проценти и нетрајни производи за широка потрошувачка за 3,9 проценти.


Пораст од 8,9 отсто на бројот на вработени во индустријата за една година


Скопје, 29 јуни, 2018 - 15:29 (META) 

Во мај годинава во индустријата биле вработени 8,9 отсто повеќе луѓе отколку во истиот месец во 2017 година.

Според податоците на Државниот завод за статистика, бројот на работниците во секторот Рударство и вадење на камен во мај 2018 година, во однос на мај 2017 година, бележи пораст од 1,7%. Во секторот Преработувачка индустрија порастот во истиот период изнесувал 9,9%, а во секторот Снабдување со електрична енергија, гас, пареа и климатизација, опаднал за 0,2 отсто.

Во периодот јануари – мај годинава, пак, имало 7,5 отсто повеќе вработени во индустријата во однос на истиот период минатата година.


Азески: Потребно е итно зајакнување на индустријата за одржлив економски раст


Сарево, 18 мај, 2018 - 9:42 (META) 

Македонија треба итно да ја зајакне основата на својата индустрија со цел да се овозможи одржлив раст на вкупната економија, рече претседателот на Стопанска комора на Македонија, Бранко Азески на 13. Меѓународен симпозиум за корпоративно управување на тема: „Дигитална економија – двигател на економскиот раст“, во Босна и Херцеговина.

Тој додаде дека иднината треба да се гради врз ефикасноста на технолошката опременост, за што, главен предуслов се инвестициите.

„Во Македонија постојат повеќе иницијативи кои во моментов се реализираат и кои имаат за цел да ги поддржат бизнисите во остварувањето на забрзан технолошки развој и воведување иновации, каде целта на ваквата поддршка е создавање нови работни места, економски раст и развој, како и подобрување на бизнис-климата преку развој на конкурентските способности на компаниите“, изјави Азески.


Традиционалниот Меѓународен металуршки конгрес ќе се одржи во Охрид, од 30 мај


Скопје, 14 мај, 2018 - 12:55 (META) 

Традиционалниот Меѓународен металуршки конгрес „Металургијата, материјалите и заштитата на животната средина“ ќе се одржи од 30 мај до 3 јуни во Охрид.

Претседателот на Здружението на металурзите при Стопанската комора на Македонија, Свето Цветковски истакна дека целта на овој конгрес е најновите научни достигнувања да се доближат до индустријата.

– Добро е да се види кои се новите научни достигнувања, а ќе биде организирана и тркалезна маса за продлабочување на соработка помеѓу начуните институции и компаниите. Соработката треба да се негува и да биде на повисоко ниво. Технолошко-металуршкиот факултет треба да биде сервис на индустриите кои ќе ги користат придобивките од научните истражувања. Индустријата без наука на оди – рече Цветковски.

На конгресот ќе бидат презентирани 30 научни труда, но ќе има и презентација на фирми. Ќе учествуваат гости од Турција, Србија, Бугарија, Романија, Шведска, Австрија и Украина.


Кочовски: Индустријата ќе претрпи огромни штети од мерките на ЕУ за увоз на челик


Скопје, 10 април, 2018 - 13:12 (META) 

Македонските производители на челик и челични производи се под сериозна закана од мерките на Европската Унија за ограничување на увозот на челични производи на европскиот пазар, информираше денеска претседателот на Здружението на металурзи при Стопанската комора, Митко Кочовски.

Тој додаде дека заштитните мерки кои ги најавува Европската Унија се резултат на ограничувањата кои претходно САД ги воведе за увоз на челични производи.

– Посебно силен одраз би имале мерките на ЕУ за заштита од увоз на одредени челични производи, како и извоз на старо железо, поради фактот што македонската челична индустрија најголемиот дел од извозот го реализира на европскиот пазар. Истото важи и за увозот на старото железо, од каде речиси комплетно се снабдува индустријата – изјави Кочовски.

По објавата на овие мерки од страна на Европската комисија, компаниите од Македонија кои извезуваат на европскиот пазар треба да пополнат прашалник преку кој ќе ја потврдат конкурентноста врз пазарни основи, односно ќе докажат дека со количините кои ги извезуваат и цените по кои продаваат, не го загрозуваат европскиот пазар.

– Извозот од Македонија учествува со 0,87 отсто во увозот во Европа, односно се извезуваат вкупно 256.000 тони производи, што никако не може да влијае на пореметување на европскиот пазар. Бараме нашите економски дипломати да укажат на последиците од воведувањето на оваа царинска заштита од ЕУ по македонската економија. Што се однесува до нас компаниите, ние ќе ги пополниме прашалниците, бидејќи нема никакви сомнежи дека со нашиот извоз ги нарушуваме пазарните цени – додаде Кочовски.

Здружението на металургија бара од надлежните министерства и од амбасадите да делуваат за македонската челична индустрија да биде изземена од мерките на САД и ЕУ за ограничување на увоз на челични производи, бидејќи не е фактор што може да го загрози нивниот пазар.  Кочовски додаде дека веќе има примери за изземање од таквите мерки, на држави кои се многу поголеми извозници на челик на европскиот пазар од Македонија.

Во САД тоа може да се направи преку амбасадата на САД во Македонија или преку нашата амбасада таму, а за во ЕУ, комапниите веќе се обврзани да го пополнат прашалникот, но државата да влијае во Брисел.

– Европа дава поддршка преку различни грантови, но ако навистина сака да и помогне на економијата, треба да има сенс за овој проблем чии последици би се почувствувале за шест месеци – додаде Кочовски.

Тој објасни сè додека стапат на сила овие мерки, Европската Унија може да воведе количински или царински ограничувања, а ниту едното и ниту другото, не им оговара на македонските компании.

Штетите кои компаниите би ги претрпеле од овие мерки би чинеле околу 128 милиони евра. Но засегната би била и македонската економија, бидејќи металската индустрија учествува со 5,7 отсто во домашниот бруто-производ.

Кочовски додаде дека на почетокот на оваа година имало изгледи за заживување на пазарот, цените биле поволни, имале и нарачки со што би ги компензирале загубите во изминатите 10 години.


Компаниите ги кажаа забелешките, законот за инвестиции влегува во владина процедура


Скопје, 5 март, 2018 - 15:57 (META) 

Компаниите, членки на Стопанската комора на Македонија, на средбата денеска со вицепремиерот за економски прашања, Кочо Анѓушев и министерот за економија, Крешник Бектеши ги кажаа забелешките за Законот за поддршка на инвестициите кој наскоро ќе влезе во владина процедура.

Анѓушев рече дека досегашните забелешки добиени преку јавните дебати биле вградувани во законот, но и дека денеска слушнале неколку корисни сугестии.

– Ценам дека конечно добивме текст кој ќе биде применлив и лесно имплементирачки и ќе даде резултат во развојот на економијата – изјави Анѓушев по средбата.

Претседателот на Стопанската комора на Македонија, Бранко Азески посочи дека компаниите се задоволни со мерките од Планот за економски пораст и дека стопанството изразува поддршка за побрзо донесување на Законот за финансиска поддршка на инвестициите.

– Очекуваме брза постапка и поддршка од сите засегнати страни, за донесување на Законот за финансиска поддршка на инвестициите, за да компаниите бидат поттикнати на нови инвестиции и зголемување на бројот на вработени – рече Азески.

Според последните проценки, околу 8.000 компании ќе имаат корист од програмата.