Влада: Одлуката на Иванов е очекувана, но не влијае на имплементацијата на Договорот


Скопје, 26 јуни, 2018 - 12:55 (META) 

Одлуката на претседателот Ѓорге Иванов и непотпишувањето на Указот за законот за ратификација на договорот за името, од Владата ја оценуваат како очекувана и потенцираат дека не влијае на имплементацијата на договорот.

– Што се однесува до одлуката на Иванов истата беше очекувана, но таа не влијае на чекорите односно имплементацијата на фазите од договорот. Владата на Република Грција веќе ги испрати писмата до ЕУ и НАТО – изјави портпаролот на Владата, Миле Бошњаковски.

Од Владата повторуваат дека волјата на граѓаните изразена на референдум ќе биде обврзувачка за сите политички субјекти без разлика која форма ќе го има изјаснувањето на граѓаните.

Во Собранието на Република Македонија денеска е доставена одлуката на претседателот на државата Ѓорге Иванов со која тој информира дека нема да го потпише Указот за прогласување на Законот за ратификација на Конечната спогодба за решавање на разликите опишани во резолуциите 817 (1993) и 845 (1993) на Советот за безбедност на Обединетите нации, за престанување на важноста на Привремената спогодба од 1995 година и за воспоставување стратешко партнерство меѓу страните.

Претседателот на Собранието Талат Џафери најдоцна другата недела ќе ја закаже седницата за повторно гласање на законот за ратификација на договорот.


Половина од увезениот цемент под стандардите, градежниците бараат контрола


Скопје, 19 март, 2018 - 12:33 (META) 

Производителите на градежни материјали бараат поголема контрола на увезените цемент и арматура и заштита на домашното производство, изјави денеска претседателот на Здружението на градежништво, индустрија на градежни материјали и неметали при Стопанска комора, Андреа Серафимовски.

Тој додаде дека, неколку компании на свој трошок, го тестирале квалитетот на увезените градежни производи на случаен примерок и утврдиле дека, 50 отсто од испитаниот цемент не ги задоволува стандардите.

– Реагиравме до надлежните институции односно до Царинската управа, Пазарниот и Градежниот инспекторат и тој материјал беше тргнат од употреба. Штетата би била огромна,  имајќи го предвид обемот на работа. Најголем дел од овие цемент и арматура биле употребени во јавни институции, како училишта, каде што има голема фрекфенција на луѓе. Но, откако укажавме, мислиме дека контролата е поголема – изјави Серафимовски.

Тој додаде дека арматурата се увезува од Грција, Бугарија и Босна и Херцеговина, а цементот од Албанија и Турција. Според Серафимовски и покрај тоа што Македонија е извозник на цемент, овој материјал со помал квалитет се увезува во земјава поради пониската цена.

Серафимовски се осврна и на новиот Закон за градежни материјали и апелираше до компаниите да почнат да го имплементираат, бидејќи нема никакви финансиски импликации врз нивното работење, туку измените повеќе се однесуваат на постапката на пуштање на производите на пазар.

Доколку не го применуваат новиот Закон, тие од следната година нема да можат да учествуваат на тендери и да се пријавуваат на проекти.

Здружението на градежништво, индустрија на градежни материјали и неметали при Стопанска комора се залага за усвојување и поддржување на сертификатите за производите за извоз во регионот, бидејќи дополнителното испитување на квалитетот на домашните градежни производи на странските пазари, ги поскапува производите и поради тоа тие стануваат неконкурентни.


Биљали: Очекувам брз прием на Македонија во НАТО, а потоа решавање на спорот за името


Скопје, 13 август, 2017 - 12:14 (META) 

Меѓународната заедница ќе инсистира Македонија првин да добие покана за членство во НАТО, без да има промена на името, а потоа да се даде рок за преговори за изнаоѓање решение за спорот со Грција, вели универзитетскиот професор Мерсел Биљали во неделното интервју за македонскиот сервис на „Радио Слободна Европа“.

– Колку што јас имам информации, меѓународната заедница или главните креатори на НАТО ќе инсистираат на некакво соломонско решение, Македонија да добие покана за членство во НАТО без да има промена на името, па потоа да се даде некој рок,  да се даде можност да се преговара. Од прилика така ќе оди и интеграцијата во ЕУ и не мислам дека толку брзо ќе ѝ се даде толку големо значење на неминовна промена на името кое може да има негативни ефекти кај нас – вели Биљали.

Во врска со имплементацијата на Охридскиот рамковен договор, од чие потпишување денеска се одбележуваат 16 години, тој вели дека недостасува срповедување на практичниот дел од договорот, за што дел од вината ја лоцира кај албанскиот субјект.

– Од нормативен аспект многу е имплементирано, меѓутоа во практичниот дел многу работи останаа неимплементирани. За жал тука вината е и кај самиот албански субјект. Наша рак рана е партизацијата на институциите и на општеството како целина. Наместо Рамковниот договор да стане инструмент на една граѓанска рамноправност на луѓе со еднакви можности, стана инструмент на партизирани односи и партиски интереси – вели Биљали.


Жбогар: Не сум загрижен за конкретната имплементација на планот „3-6-9“


Струга, 25 јули, 2017 - 18:43 (META) 

Евроамбасадорот Самуел Жбогар при денешната посета на Струга изрази оптимизам во однос на имплементацијата на реформскиот владин план „3-6-9“.

– Од сите страни слушаме заложби и посветеност, од страна на државните институции на Владата и од Собранието, дека тие се посветени да ги направат сите промени поврзани со законските решенија. Јас во моментот не сум загрижен за конкретната имплементација на планот „3-6-9“, особено затоа што проблемот никогаш не бил во врска со усвојување на новата легислативата, туку секогаш бил во имплементација на легислативата – изјави Жбогар, одговарајќи на новинарско прашање за владиниот реформски план.

Во врска со работата на Собранието, тој кратко одговори дека засега законодавниот дом добро си ја врши својата работа.

Жбогар, во однос на законот за јазиците, рече дека очекува сите политички партии да го поддржат, но исто така додаде дека очекува и албанската заедница да покаже разбирање за ставовите на другата страна.

– Што се однесува до употребата на јазиците и на албанскиот јазик, тоа е прашање кое е од огромна важност за албанската заедница во вашата земја бидејќи албанската заедница чувствува дека со усвојување на овој закон, имплементацијата на Охридскиот рамковен договор ќе биде целосна. Ако етничките заедници се обидат да се сослушаат меѓу себе, зошто некој има потреба или бара некои права да му се реализираат, истото важи и за албанската заедница да ја сослуша другата страна и нејзините стравови. Мислам дека ако се има ист приод од сите страни, на крај решението ќе биде поддржано од сите – рече Жбогар.


ЕК воведува нова алатка за укажувачите полесно да пријавуваат злоупотреби


Брисел, 18 март, 2017 - 10:59 (META) 

Европската комисија воведува нова алатка која треба да ги охрабри укажувачите (whistleblowers) и да им олесни пријавување на случаи на прекршување на антимонополската регулатива и за тајни картели. Новата алатка, во која има електронска-адреса, телефонски број и енкриптиран (шифриран) интернет-формулар ќе им овозможи на луѓето анонимно да ги пријавуваат манипулациите со цените на бизнис-картелите и анти-конкурентните практики.

– Доколку луѓето се загрижени од бизнис-практиките за кои мислат дека не се во ред, можат да помогнат работите да се исправат. Инсајдерските информации може да бидат моќна алатка кои ќе ѝ помогнат на Европската комисија во откривањето на картели и други практики со кои се нарушува конкурентноста. Со нашата нова алатка е возможно да се даде информација и да се задржи анонимноста – вели Маргрет Вестагер, комесар за политика на конкурентност.

Комисијата, како што информираат оттаму, претходно се потпираше на програмата за дојави која им овозможува на фирмите да пријават картели во кои тие се вклучени, а за возврат да добијат намалување на казната.

Досега во 2017 година ЕК казни со по 200 милиони евра фирми инволвирани во два каретли кои работејќи заеднички зголемувале цени на производи, вклучувајќи системи за климатизација на автомобили.

Законот за заштита на укажувачите во Македонија беше донесен во ноември, 2015 година, како еден од пакетот закони што произлегоа од Договорот од Пржино.

„Транспаренси интернешнл“ во извештајот од проектот, насловен „Законот за заштита на сведоци – искуства и предизвици“, поддржан од Кралството Холандија, кој беше презентиран на средината на ноември минатата година, наведува дека законот многу малку или речиси воопшто не се спроведува во институциите, а нема ниту интерес и политичка волја кај надлежните за негова имплементација и по една година од неговото донесување.


Адеми во Братислава: ЕУ не треба да ја заборави политиката на проширување


Братислава, 25 јули, 2016 - 13:34 (META) 

Вицепримерот задолжен за европски прашања, Арбер Адеми, на покана на Словачкото претседателство со Европската Унија, учествувал на неформалниот состанок на министри за европски прашања, организиран во рамките на Советот за општи работи на Европската Унија, кој се одржал во Братислава на 24 и на 25 јули.

На состанокот, како што информираат од кабинетот на вицепермиерот Адеми, учествувал и евокомесарот за проширување Јоханес Хан и сите министри за европски прашања и нивни претставници од земјите кандидати од Западниот Балкан и Турција.

Претседавачот на состанокот, Иван Корчак, во име на Словачкото претседателство со ЕУ, истакнал дека проширувањето останува во фокусот на Европската Унија, додека комесарот Хан посочил дека во „последните неколку недели има сериозен напредок во процесот речиси во сите земји од регионот“.

За Македонија, Хан нагласил дека добрите вести за постигнатиот политички договор сега „треба да се материјализираат преку целосна имплементација на договореното, без одложување“.

Вицепремиерот Адеми, во своето обраќање на состанокот, се задржал на сериозните предизвици со кои се соочува Европската Унија во моментов, како Брексит, настаните во Турција, терористичките и безбедносните закани и можноста за ескалација на мигрантската криза.

„Вицепремиерот Адеми нагласи дека не треба да се заборави на политиката на проширување, која може и треба да биде дел од решението за овие предизвици. Во поглед на актуелната политичка ситуација во државата, вицепремиерот Адеми подвлече дека несомнено позитивен чекор во насока на смирување на политичката криза во земјата е постигнувањето на договорот меѓу политичките партии, но дека во овој момент е круцијална целосната имплементација на договореното. При тоа вицепремиерот Адеми информираше подетално за планираните и преземни чекори во последните неколку денови“, стои во соопштението од кабинетот на Адеми.

Тој, исто така, меѓудругото посочил дека унапредувањето и зајакнувањето на односите и соработката со соседните земји остануваат приоритет на Македонија и оти се очекува регионалната соработка, особено низ Берлинскиот процес, да даде и конкретни резултати како поттик за економскиот развој и за просперитетот на регионот.

Вицепремиерот за европски прашања остварил средби и со шефовите на делегациите на Германија, Рајнхард Силберберг, и на Австрија, Михаел Линхард, на кои се дискутирало за евроинтегративните перспективи на Македонија.


Бејли предупреди да се задржи фокусот на имплементирање на договореното


Скопје, 21 јули, 2016 - 15:04 (META) 

Амбасадорот на САД во Македонија, Џес Бејли, пред малку на својот твитер-профил го сподели договорот што вчера го постигнаа политичките партии и напиша:

„Договор од 20 јули – партии, медиуми, институции – само 42 дена за да успее – задржете го фокусот“, напиша Бејли.

Претходно Бејли го поздрави постигнатиот договор и напиша дека тој е можност за демократија.


Пломп: Треба да се почне со имплементација на реформите


Скопје, 2 јуни, 2016 - 16:46 (META) 

Холандскиот амбасадор Ваутер Пломп денеска на настанот „Кафе-пауза“ организиран во соработка со Секретаријатот за европски прашања, одговарајќи на новинарско прашање, рече дека сè што е ставено на хартија во форма на договор, треба да се исполни.

Како што рече Пломп, мора да се почне со имплементација на тие реформи, но најбитно сега е да се фокусираме на три принципи на процесот – инклузивност, односно вклучување на сите страни, транспарентност и одговорност.

Тој истакна дека соработката меѓу двете земји е интензивирана поради претседателството на Холандија со ЕУ, но и поради грижата за иднината на Македонија.

– Холандија го прави ова бидејќи сме загрижени за Македонија и најмногу бидејќи сакаме да ја видиме Македонија да успее на патот на евроатлантската интеграција и да стане членка на ЕУ и на НАТО – рече Пломп.

Според амбасадорот, во врска до тоа дали Македонија ќе се најде на агендата на ЕУ, ќе се реши во следните недели.

 


Граѓански организации утре пред Делегацијата на ЕУ ќе му упатат заедничко писмо на Хан


Скопје, 13 јануари, 2016 - 19:20 (META) 

Утре напладне, пред Делегацијата на Европската унија во Скопје, претставници на повеќе од 70 граѓански организации, платформи и иницијативи ќе одржат прес-конференција.

Граѓанските здруженија на прес-конференцијата ќе ја презентираат содржината на заедничко писмо упатено до еврокомесарот Јоханес Хан и до други меѓународни фактори што помагаат во решавањето на политичката криза во Македонија.

„Целта на обраќањето e, ние, граѓанските организации, платформи и иницијативи, да го искажеме нашиот став во однос на испoлнувањето на условите од Договорот од Пржино и од итните реформски приоритети за одржување фер, слободни и демократски избори. Во име на граѓанските организации, платформи и иницијативи, ќе се обратат Уранија Пировска од Хелсиншкиот комитет за човекови права на РМ, Фани Каранфилова-Пановска од Фондацијата „Отворено општество“ – Македонија и Бојан Маричиќ од Македонскиот центар за европско образование“, пишува во соопштението на организациите.

За петок е најавена посета на еврокомесарот Хан, кој со лидерите на политичките партии треба да разговара за имплементацијата на Договорот од Пржино.


Иванова: Во игра се и попис и пребројување од врата на врата


Скопје, 28 јули, 2015 - 10:59 (META) 

Активна регистрација на гласачите, попис и пребројување од врата на врата се опциите кои се на маса на работните групи што треба да го имплементираат Договорот од Пржино.

Според Цветанка Иванова од СДСМ, која вчера беше дел од работната група на оваа партија, се разговара за сите опции, но сè уште не се навлезени во детали за тоа кој предлог би се прифатил.

– Ако зборуваме за активна регистрација на гласачите, ние се залагаме таа да биде задолжителна. Сепак, има повеќе опции во игра, а нашиот краен став ќе го изнесеме откако ќе ги разгледаме сите можности – вели Иванова за „Мета“.

Таа информира дека СДСМ се согласува дијаспората да гласа и понатаму, но да има изедначување на гласовте.

Како што вчера информиравме, на средбата на работните групи во Клубот на пратеници се разговарало за активна регистрација со отпечаток на прст на гласачите за следните парламентарни избори, кои треба да се одржат во април идната година.

Според неофицијални информации, тоа значи неколку месеци пред изборите граѓаните да се регистрираат, со што би се создал нов избирачки список.

Изворите тврдат дека копјата се кршат околу тоа дали регистрацијата да биде задолжителна или доброволна.