Заев: Промената на Уставот не е неопходна оти не би значела конечна гаранција


Лондон, 28 февруари, 2018 - 11:21 (META) 

Премиерот Зоран Заев во интервју за „Фајненшл тајмс“ оценува дека Македонија и Грција се приближуваат кон решение за спорот за името и дека ова прашање би можело да биде затворено пред самитот на НАТО во Брисел во јули годинава.

– Јас сум оптимист. Многу е тешко, и свесни сме за тоа. Но, би било добро за двете страни да најдеме решение што е можно побрзо – вели Заев.

Македонскиот премиер го повторува ставот дека не е неопходна промена на Уставот на земјава, на што изминатиов период инсистира Грција, бидејќи, како што додава, неговата промена, не би значела конечна гаранција.

– Сега новото барање од Грција е дека треба да направиме промена на нашиот Устав. Но, Уставот е само книга со домашни правила и нема никакви импликации надвор од земјата. Во секој случај промената на Уставот не би значела конечна гаранција, бидејќи некоја следна влада во иднина би можела повторно да го промени Уставот – вели Заев.

Во врска со имињата што се споменуваат во јавноста како предлози на медијаторот Метју Нимиц – Република Македонија (Скопје), Северна Македонија, Горна Македонија, Вардарска Македонија и Нова Македонија – Заев истакнува дека Нова Македонија е неприфатливо име, бидејќи нема географска одредница, но оти може да се преговара за другите четири имиња.

Премиерот во интервјуто оценува дека Македонија треба да се интегрира во НАТО без разлика на руското противење за ширењето на Алијансата.

– Русија нема ништо против нашата интеграција во ЕУ, но не гледа толку позитивно на нашата интеграција во НАТО. Имаме добри односи со Русија. Тие треба да бидат свесни дека нема друга алтернатива за нашата земја освен интеграција во ЕУ и НАТО – изјави Заев.


(Визуелизација) Кои се, што се и колкумина се помилуваните од Иванов?


Скопје, 13 април, 2016 - 16:20 (META) 

Одлуката на претседателот на државата, Ѓорге Иванов, за аболиција и за амнестија на сите политичари е објавена во „Службен весник“, каде се наведени имињата на 54 лица помилувани од претседателот.

Меѓу нив се и имињата на претседателот на ВМРО-ДПМНЕ и поранешен премиер, Никола Груевски, поранешниот директор на УБК, Сашо Мијалков, поранешните министри за внатрешни работи и за транспорт и врски, Гордана Јанкулоска и Миле Јанакиески, Мартин Протоѓер, лидерот на СДСМ, Зоран Заев, Зоран Верушевски, Бранко Црвенковски, поранешниот шеф на обезбедувањето на Груевски, Дејан Митровски-Урко.

collage - pita i iminja

Визуелизација на помилуваните според бројот на помилувања објавени во „Службен весник“

  1. Ирена Мишева – претседателка на Советот на Град Скопје
  2. Миле Јанакиески – поранешен министер за транспорт и врски
  3. Живко Пејковски – директор на затворот „Идризово“
  4. Гордана Јанкулоска – поранешен министер за внатрешни работи
  5. Љупчо Димовски – поранешен министер за земјоделство
  6. Мартин Протоѓер – шеф на кабинет на поранешниот премиер Никола Груевски
  7. Љупчо Тодоровски-Радникот – поранешен директор на Бирото за јавна безбедност
  8. Мендух Тачи – претседател на ДПА
  9. Бедредин Ибраими – член на ДИК од ДПА
  10. Кирил Божиновски – поранешен генерален секретар на Влада
  11. Сашо Мијалков – поранешен директор на УБК
  12. Никола Груевски – претседател на ВМРО-ДПМНЕ и поранешен премиер
  13. Трајко Трпевски – генерален директор на градежната компанија „Бетон“
  14. Мирослав Јовановиќ – главен директор за техника и ИТ на Македонски Телеком
  15. Горан Грујовски – поранешен началник на Петата управа при УБК
  16. Тони Трајковски – градоначалник на Гази баба
  17. Жарко Луковски – главен извршен директор на „Телеком“
  18. Зоран Заев – претседател на СДСМ
  19. Трајко Вељаноски – претседател на Собранието на Република Македонија
  20. Зоран Верушевски – поранешен директор на УБК
  21. Ивица Анчевски-Пуки – поранешен раководител на полициската единица „Алфи“
  22. Горанчо Тодев
  23. Метуш Шабани
  24. Новица Станковски
  25. Коце Трајановски – градоначалник на Град Скопје
  26. Владимир Тодоровиќ – поранешен градоначалник на општина Центар
  27. Ристо Новачевски – формално директор на „Сирах инженеринг“, кум на Груевски од првиот брак
  28. Тодор Мирчевски – директор на офшор-фирмата „Ексико“
  29. Киро Тодоровски
  30. Надица Велевска – вработена во МВР
  31. Мунир Пепиќ – полициски службеник
  32. Едмонд Темелко – градоначалник на Пустец, Република Албанија
  33. Коста Митровски – претседател на изборна комисија на Општина Центар
  34. Тони Јакимовски – национален координатор за борба против тероризмот и поранешен директор на „Идризово“
  35. Никола Бошкоски
  36. Валентина Симоновска – архиварка во МВР
  37. Владимир Талески – градоначалник на Битола
  38. Ѓорѓи Лазаревски – поранешен вработен во УБК
  39. Соња Верушевска – сопруга на Зоран Верушевски, вработена во Комерцијална банка
  40. Бранко Палифров – вработен во Општина Струмица
  41. Анета Станчевска – шеф на одделот за внатрешна контрола во МВР
  42. Исмет Гури – поранешен член на општинска изборна комисија на Чаир
  43. Дејан Митровски-Урко – поранешен шеф на обезбедувањето на Никола Груевски
  44. Бранко Црвенковски – поранешен претседател на СДСМ и поранешен претседател на Македонија
  45. Коста Крпач – директор на скопската компанија „Финзи“, која сега е сопственик на веб-порталот „Нетпрес“
  46. Владислав Стајковиќ – прв управител на фирмата „Финзи“ и директор на „Мобико ДООЕЛ Скопје“, фирма која е овластен сервисер за мобилни телефони на „Т-мобиле Македонија“
  47. Христијан Панев – директор на НВСП, сопственик на „Радио Слободна Македонија“
  48. Божидар Јанковски – директор на „Дајнерс Македонија“
  49. Светлана Костова – судијка на Вишиот управен суд
  50. Хаим Хакини – државјанин на Израел
  51. Лиле Стефанова – обвинителка во СЈО
  52. Фатиме Фетаи – обвинителка во СЈО
  53. Гаврил Бубевски – обвинител во СЈО
  54. Звонко Костовски – вработен во МВ

Табела по бројот на помилувања:


СДСМ: Хаотичниот избирачки список потврдува изборна измама


Скопје, 6 март, 2016 - 11:44 (META) 

„Се потврди дека Никола Груевски и ВМРО-ДПМНЕ спроведувале криминални избори, преку фантомски гласачи и злоупотреби на државните институции. Jавноста секојдневно се запознава со хаотичниот избирачки список“, се вели во соопштението на СДСМ.

Од опозициската партија додаваат дека само неколку примери покажуваат дека на една адреса фигурираат и по стотина, па дури и повеќе лица.

– На една адреса во Скопје се запишани 112 лица, а на друга 66, на трета 33 лица. На една адреса во Ресен се запишани 34, на друга, 24, на трета осум лица. Големиот број лица впишани на иста адреса, но и бројките на станари кај пратеници и министри од ВМРО-ДПМНЕ, покажа дека планот за изборна измама бил направен во врвот на ВМРО-ДПМНЕ. Се виде за каква злосторничка банда се работи, какви изборни измами правела – се вели во соопштението на опозициската партија.

Оттаму ја повикуваат Државната изборна комисија што побргу да даде инструкции, а граѓаните да го искористат своето законско право да пријават неправилности, но да доставуваат информации и до МВР, за да се покренат соодветни постапки.


Салата „Борис Трајковски“ и стадионот „Филип Втори“ добија нови имиња


Скопје, 22 февруари, 2016 - 12:15 (META) 

Најголемиот македонски стадион, Националната арена „Филип Втори“, и Спортскиот центар „Борис Трајковски“ ќе добијат нови брендирани имиња и тоа „Телеком арена“ и „Вип арена“.

Договорот помеѓу Спортскиот центар „Борис Трајковски“ и „Оне Вип“ е веќе потпишан, а деновиве се очекува параф да стават и првите луѓе на скопскиот стадион и на „Телеком“.

Спортскиот центар кој го носеше името на поранешниот претседател на Република Македонија, Борис Трајковски, е изграден во 2008 година од Владата на Република Македонија. Во состав на спортскиот центар се наоѓа мултифункционална спортска сала која е еден од најголемите репрезентативни спортски објекти на Република Македонија.

Договорот за соработка помеѓу „Оне Вип“ и Спортскиот центар „Борис Трајковски“ се потпиша во времетраење од две години, со можност за продолжување на уште две години, а почнува да важи од 15 февруари 2016 година.

„Условите и сумата на договорот остануваат во рамки на деловни информации“, стои во соопштението на страницата на овој центар.

Преименувањето на стадионот, пак, е во тренд со европската и со светската практика. Во Германија има „Алијанц арена“, потоа „Сигнал Идуна парк“, „Фрапорт стадион“…

Договорот со „Телеком“ треба да биде потпишан деновиве, а пред подготвката за најголемиот настан досега, домаќинството на Европскиот супер-куп во 2017 година.


ДИК денеска ќе го тестира системот, а од утре ќе го чисти избирачкиот список


Скопје, 17 февруари, 2016 - 10:14 (META) 

Државната изборна комисија денеска ќе врши тестирање на системот за вкрстување на податоци, а од утре ќе ја почне постапката за прочистување на избирачкиот список. Како што нè информираше Субхи Јакупи, член на ДИК, обезбедени се податоци од 10 релевантни институции, а првичната процена е дека процедурата ќе трае неколку дена, по што треба да следува теренска проверка.

– Од утре треба да почнеме со вкрстување на податоците и потоа да видиме колкав ќе биде бројот на спорни имиња. Правиме сè да ја завршиме нашата работа, бидејќи имаме одреден датум до кој треба да се подготвиме – вели Јакупи.

Вкрстувањето на податоците ќе ги вршат три ИТ-компании, од кои две од Македонија и една од САД.

Во моментот во избирачкиот список се запишани 1.804.000 гласачи, но точната бројка ќе се знае по прочистувањето на списокот.


„Јашар-бег“ и „Хасан Приштина“ се новите имиња на училиштата „Јане Сандански“ и „Цветан Димов“


„Јашар-бег“ и „Хасан Приштина“ се новите имиња на училиштата „Јане Сандански“ и „Цветан Димов“, кои се наоѓаат во скопската општина Чаир.

Градоначалникот Изет Меџити на својот фејсбук-профил попладнево ги објави решенијата за преименување на овие училишта.

„Со Министерството за образование и наука (МОН) неодамна официјално е постигнат консензус за промена на статутот, со што се менуваат и имињата на училишта („Јане Сандански“ станува „Јашар-бег“ и „Цветан Димов“ станува „Хасан Приштина“)“, стои на ФБ-профилот на градоначалникот Меџити.


„Ел Џи“ подготвува „G Chocolate“, „G Black“ и „G Plus“?


Сеул, 8 ноември, 2014 - 14:53 (META) 

„Ел Џи“ неодамна поднесе барање за патентирање нови имиња, кои би можеле да се искористат за претстојните смартфони на компанијата. Меѓу имињата кои се откриени, се вклучени LG G Chocolate, LG G Black, LG G Black Slim, LG G Black Sound и LG G Plus. Сите заштитни имиња покриваат широк спектар на производи, од мобилни телефони до таблети и со носечки уреди.

Пред неколку години, „Ел Џи“ имаше серија на телефони Black, која ги вклучуваше моделите LG Chocolate, LG Shine, LG Secret и LG New Chocolate BL40.

Па, може да се претпостави дека G Chocolate и G Black би можеле да бидат искористени како имиња за новите телефони.

Секако, не се искористуваат сите имиња кои ќе се заштитат со патент на вистинските производи. Меѓутоа, матрицата со новите имиња се совпаѓа со неодамна лансираните смартфони „ел џи“, како што се LG G Vista или LG G Pro.

Во минатото тримесечје, „Ел Џи“ продаде 16,8 милиони смартфони, така што сега е одлично време за нови телефони кои дополнително ќе ја подобрат продажбата.