Милошоски: Бараме од МНР увид во списите за предлогот за името


Скопје, 21 мај, 2018 - 12:30 (META) 

Собраниската комисија за надворешни работи денеска од МНР побарала списи за предлогот за решение на спорот за името што во саботата официјално го соопшти премиерот Зоран Заев, Република Илинденска Македонија, соопшти претседателот на Комисијата, Антонијо Милошоски.

-Многу е тешко да се изгради став кога немаме предлог и затоа сакаме како Комисија за надворешна политика да побараме од министерот за надворешни работи да ги достави списите на кои се базира овој можен предлог за да можеме да заземе став како пратеници и како Комисија за надворешна политика – рече Милошоски.

Тој додаде дека се надева дека министерот Никола Димитров ќе ги испочитува пратениците.

-Сите имаат сертификат за државна тајна, сите имаат одговорност кон државата како и тој -рече Милошоски, додавајќи дека пратениците се подготвени документите да ги разгледаат на затворена седница доколку министерот за надворешни работи Димитров одговори позитивно на нивното барање.

Самиот тој смета дека има контроверзии за овој предлог затоа што за него има различни ставови.

-Ставот на премиерот Заев беше дека идентитетските прашања остануваат непроменети, како што се сега во ОН, додека вчера во едно интервју министерот за надворешни работи Димитров за јазикот кажа дека ќе биде македонски без превод, и гледаме дека или нема усогласеност или дека некој знае повеќе или дека нешто се крие од јавноста и затоа ценам дека е добро да имаме писмен предлог – додаде Милошоски.


Мицотакис: Илинденска Македонија е олицетворение на иредентизмот


Атина, 21 мај, 2018 - 10:17 (META) 

Илинден и илинденското востание се идентификуваат со македонскиот иредентизам, смета лидерот на грчката опозициска Нова демократија Киријакос Мицотакис при посетата на грчкиот остров Крф и додаде дека неговата партија никогаш нема да го прифати ова име.

– Во изминатите денови слушнавме и јас лично бев избрифиран, дека се разговара за име на Скопје, за името „Илинденска Македонија“. Значи, да разјасниме одредени прашања за оние кои се чини дека не ја познаваат добро нашата историја. Илинденското востание и името на Илинден се идентификуваат со македонскиот иредентизам. Тоа е име што беше идентификувано со националистичко востание, кое тогаш, како централен слоган, го имаше Македонија на Македонците и формирање на една голема Македонија, со главен град Солун. Со други зборови, истото име за кое разговараше и веројатно уште разговара Ципрас, е олицетворение на иредентизмот – рече Мицотакис и додаде дека му се чини дека „секогаш кога Ципрас преговара ноќе и сам, е опасен за националните интереси.

Претседателот на грчката конзервативна партија одново ги спомена позициите на Нова демократија за ерга омнес име и уставна ревизија како предуслов за било кое решение и го повтори ставот дека тие нема да го прифатат конкретното име.

– Навистина се надевам, иако господинот Ципрас уште не не известил, дека ова име веќе го отфрли како неприфатливо, бидејќи ја навредува историјата на нашата земја и кое под никакви околности не може да биде прифатено 0 додаде лидерот на Нова демократија.


Заев побара поддршка од сите за името Република Илинденска Македонија


Скопје, 19 мај, 2018 - 20:59 (META) 

Со целосна одговорност, внимателност и посветеност на државните интереси, ги информирав претседателот на државата, претседателот на Собранието и претседателите на ВМРО-ДПМНЕ и ДУИ за сите детали од преговорите и известив дека владите на Република Македонија и Република Грција разговараа за опција и решение кое може да биде прифатливо за двете страни, рече во обраќањето по лидерската средба премиерот Зоран Заев.

Тој нагласи дека Република Илинденска Македонија е името за кое е можен компромис со Грција – на англиски “Republic of Ilinden Macedonia”,а на албански “Republika Ilinditase e Maqedonisë”.

Заев ги повика сите политички сили во општеството, сите групи и заедници да се приклучат за да ја искористиме оваа историска шанса за дефинитивен заеднички успех за Македонија.

– Република Илинденска Македонија е име со кое го зајакнуваме темелот на нашата Република, a Илинден значи историски континуитет на нашите стремежи, нашата државност и нашата гордост. Илинден е нашето славно минато, Илинден е и нашата светла иднина – рече Заев.

Според премиерот, со ова можно решение го чуваме достоинството, го потврдуваме и го зајакнуваме нашиот идентитет македонски.

– Со ова име, правиме целосно разграничување со регионот Македонија во Грција. Разграничување од секој аспект. Илинденското востание е заедничка борба на нашиот мултиетнички народ за социјални права и слободи. И нема никакви територијални аспирации према ниту една соседна земја, вклучително и Грција. Тоа е истата борба, и во 1903 и во 1944 година. Уште еднаш потврдувам, и јас и мојот народ, дека немаме никакви територијални претензии и ги потврдуваме неменливоста на границите и почитувањето на наследството на грчкиот народ и Грција. Македонија е подготвена да го потврди ова на сите потребни начини – рече Заев.

Со евентуален договор, како што нагласи, неповратно го отвораме патот кон членство во ЕУ и НАТО. Во јули добиваме покана за членство во НАТО и нема повеќе пречки за членство во ЕУ.

– Со можниот договор добиваме финална потврда – јазик македонски, language Macedonian. Идентитетот гарантиран. И меѓународните кодови МК и МКД ќе бидат обезбедени – истакна премиерот и додаде дека заради овие историски придобивки, заради ваквата гаранција за развој на Македонија, заради гаранцијата за влез во НАТО и ЕУ, заради гаранцијата за идентитетот македонски – ќе прифатиме севкупна употреба на името Република Илинденска Македонија како и заради зајакнување на меѓуетничката кохезија.

Премиерот рече и дека сроведувањето на употребата на новото име за внатрешна употреба би се реализирало во фази, етапно, онака како што ќе напредуваме низ преговорите за членство во ЕУ, а ќе се обезбеди преку референдум и преку уставни амандмани.

– Јас донесов одлука и стојам стопроцентно позади стремежот да успееме како народ, како држава, како идеја! Верувам во ова решение, подготвен сум да водам и ќе водам напред – рече Заев.

Лидерот на опозициската ВМРО-ДПМНЕ, по завршувањето на лидерската средба во Клубот на пратениците во Скопје рече дека предлогот – Република Илинденска Македонија за севкупна употреба за него е неприфатливо и повтори дека тие нема да поддржат промена на Уставот за промена на името.

Шефот на државата Ѓорѓе Иванов побара на писмено да го добие она што досега е разговарано во преговорите со Грција, а потоа ќе се изнесе во однос на предлогот.

– Првпат сме информирани за некои работи. Првпат ги слушнавме, усно се пренесни и очекувам за сите предлози да добиеме писмен документ. На овој состанок не изградивме став, само ги добивме информациите. Очекуваме во иднина да не бидеме селективно информирани, туку целосно да имаме увид за да знаеме за кои прашања се разговара. Досега сум бил принципиелен и останувам доследно да се придржувам на изградените ставови од претходните претседатели на Република Македонија, а тоа е дека процесот мора да се води во рамка утврдена од ОН – рече Иванов.


Ѕанакопулос: Многу имиња се најдоа на маса, немаме стигнато до конкретно решение


Атина, 18 мај, 2018 - 16:56 (META) 

Министерот без ресор на Грција и портпарол на Владата, Димитрис Ѕанакопулос во интервју за грчкото радио „Алфа 989“ одби да ги коментира натписите во медиумите дека Илинденска Македонија е предлогот од македонска страна.

Ѕанакопулос, вели дека многу имиња се нашле на маса, но дека двете страни се уште не стигнале до конкретно име.

– Многу имиња се најдоа на преговарачката маса. Во овој момент, не можам да кажам нешто повеќе. Сѐ ова се однесува на суштинската содржина на преговорите, кои треба сите да ги почитуваме дека не може да бидат предмет на јавна дискусија. Повторно ви велам, многу имиња се најдоа на маса. Во овој момент, немаме стигнато до нешто – вели Ѕанакопулос во интервјуто.

Во однос на тоа дали е можно до средината на јуни да се постигне решение, грчкиот министер и владин портпарол вели дека не сака да дава предвидувања за исходот на преговорите.

– Она што е сигурно е дека постои политичка волја. Сепак, како што кажа и премиерот, имаме уште пат да изодиме за да стигнеме до заемено прифатлив договор. Така функционираат преговорите. Не можеш да го предвидиш успешниот исход. Секако, можеш да работиш во оваа насока. И ова, Ве уверувам дека го прави грчката влада, со чувство на одговорност за решавање на едно прашање што ја измачува нашата земја, но и поширокиот регион, над 30 години – додава Ѕанакопулос.


Заев – Меј: Опцијата за името која би можела да биде прифатлива, е комплетно решение


Скопје, 17 мај, 2018 - 22:25 (META) 

Тереза Меј, првата премиерка од Обединетото Кралство што доаѓа во Македонија по скоро 2 децении, рече дека Македонија е интегрален дел од Европа и вети подршка за македонските евроинтеграции.

Меј која со сите почести беше пречекана во Владата, во врска со спорот со името порача дека е значајно тоа што Македонија пружала рака кон својот сосед, но дека за решение ќе треба силна политичка волја за тешки одлуки.

– Знам дека конфликтите од минатото некогаш можат да бидат невозможни за надминување. Многу тешки прашања остануваат нерешени – како внатрешните конфликти во регионот, организираниот криминал и т.н. Мора да се соочиме со предизвиците од минатото, но да останеме амбициозни во обезбедувањето на мирна и просперитетна иднина која вашите граѓани ја заслужуваат – рече премиерката Меј.

Премиерот Зоран Заев посетата ја оцени како круна на долгогодишното партнерство меѓу двете земји, а на следниот самит во Лондон очекува европските лидери да верификуваат напредок на Македонија. Од Софија се враќа со оптимизам.

– Едно е сигурно, пријателството ќе расте меѓу Македонија и Грција и од тоа бегање нема. Довербата е изградена. Граѓаните соработуваат, институциите соработуваат и тоа ќе биде така. Јас искрено верувам дека можеме да најдеме решение, опцијата која би можела да биде прифатлива од двете страни е комплетно решение. Продолжуваат сега консултациите во двете држави – рече Заев.

Попладнево Меј се сретна со претседателот на Собранието, Талат Џафери, му изрази поддршка за реформите, нагласувајќи дека знае дека изминатава година зградата на македонскиот парламент беше сведок на тешки времиња. Меј исто така истакна дека е свесна и за промените кои се случија оттогаш.

– Горда сум што Обединетото Кралство ги поддржува овие реформи преку нашите програми за финансирање. Кога владее демократијата, придобивките ги чувствуваме сите – посилно Собрание значи посилна Македонија – истакна Меј, која имаше средба и со лидерот на опозициската ВМРО-ДПМНЕ, Христијан Мицкоски.


Заев: Една од опциите е прифатливa за двете страни


Софија, 17 мај, 2018 - 14:04 (META) 

Заедно со грчкиот премиер Алексис Ципрас разгледавме можни опции за креативни решенија кои македонската страна ги презентираше од последната фаза од преговорите. Следуваат консултации во двете земји со релевантните политички фактори.

Ова денеска го изјави премиерот Зоран Заев по средбата со Ципрас во Софија која траеше околу час и половина

. На новинарско прашање во однос на предложените креативните решенија, Заев дополни дека „една од опциите е прифатливa за двете страни“.

– Важно беше да ги потврдиме сите успеси кои министрите ги постигнаа, а се големи и значајни. Кога ќе го поминеме до крај целиот процес ќе видиме сите колку се значајни. Ние разговаравме и суштествено разгледувавме неколку опции. Една од опциите е прифатливa за двете страни. Продолжуваме дома со констултаци со институциите, и ако е возможно тоа, веројатно ќе имаме решение. После сето тоа што беше постигнато, потврдивме дека стоиме како премиери.  За тоа што беше останато разгледавме неколку опции и утврдивме една опција. Но мора да внимаваме како тоа ќе биде спроведено. Ќе разговараме со претседателите на државите и другите лидери, и со опозицијата – изјави Заев.

Заев рече дека денес пријателството помеѓу Македонија ни Грција е посилно.

– На денешниот состанок со премиерот на Грција, пријателот на Македонија, Алексис Ципрас, заеднички го констатиравме досегашниот напредок кој е постигнат во процесот на изнаоѓање на решение за спшорот околу името на нашата држава. Решаваме спор за да го засилиме достоинството и идентитето на граѓаните во двете земји. На овие теми разговарав и со претседателот на Франција, Емануел Макрон и со канцеларката Ангела Меркел – додаде тој.

Тој рече дека после сето она што било постигнато помеѓу двете држави, го констатирале и потврдиле и како премиери.

– Тоа што беше останато, го отворивме како прашање преку неколку опции и утвдивме една опција која може да биде прифатлива за двете страни. Мора да внимаваме како тоа институционално ќе биде спроведено. Мора да разговараме со претседателите на двете држави со другите лидери, со шефовите на опозициите. Остануваме во делот на идните детали околу оваа работа – дополни Заев.

На новинарско прашање за можно одложување на решението, тој рече дека ако нема решение ќе биде одложено.

– Јас реков дека ние изградивме пријателство кое е неповратно и тоа пријателство ќе расте. Би било убаво тоа решение, кое би сакале од двете страни да биде прифатливо, да биде уште сега. Затоа што знаете дека крајот на јуни имаме Европски совет и решението би било дополнително охрабрување за советот. Во јули има НАТО самит,  и убаво е тоа и таму да се констатира.  Ако не е возможно, ќе продолжиме во барањето на решение се додека не се договориме. Вредно е да продолжиме затоа што многу е решено и на крајот имаме и опција која би можела да биде прифатена од двете страни, имајќи ги предвид аспирациите на двете страни. Ако тоа во земјите внатрешно биде соодветно потврдено и прифатено, би било и официјализирано – додаде Заев.


Нимиц: Имавме сериозна средба со позитивни, но и тензични моменти


Атина, 12 мај, 2018 - 21:18 (META) 

По средбата на министрите за надворешни работи на Македонија и на Грција, Никола Димитров и Никос Коѕијас, денеска во Сунио близу до Атина, посредникот во преговорите Метју Нимиц рече дека разговорите биле сериозни, со позитивни, но со тензични моменти.

– Имавме сериозна средба на која се обидовме да најдеме решение за спорот за името. Во разговорите имаше позитивни моменти, но и тензични моменти, а за она што се разговараше денеска министрите за надворешни работи треба да ги информираат своите премиери пред самитот во Софија каде што двајцата премиери ќе имаат средба на 17 мај – рече Нимиц.

Ниту тој, ниту Димитров и Коѕиас не одговараа на нивинарски прашања.

Димитров вчера на министерскиот состанок на проширената Вишеградска група и земјите од Западен Балкан, изјави дека средбата со посредникот Нимиц е многу важна во преговарачкиот процес.

– Факт е дека сме во најделикатната и последната фаза. Факт е дека има многу прашања за кои има разбирање, тоа разбирање е врзано со крај. Значи, тоа што е договорено, не е договорено, ако не е договорено сè, и факт е дека утрешниот ден е многу важен, неколку дена е пред Самитот во Софија, и наша должност е да најдеме едно решение кое што е можно повеќе ќе ги покрива потребите на двете страни, за да им овозможиме на премиерите прво да се сретнат, и после тоа да си подадат рака, ама мора да понудиме некакви опции, таа ни е задачата утре – рече Димитров.


Грчката дијаспора бара Коѕиас да ги прекине преговорите за името


Атина, 8 мај, 2018 - 10:12 (META) 

Неколку организации од грчката дијаспора му испратија писмо на шефот на дипломатијата, Никос Коѕиас, во кое го обвинуваат дека ги понижува Грците ширум светот и со кое бараат прекин на преговорите за името.

Во писмото се вели дека „е очигледно оти преговорите се во ќорсокак и дека нема ниту една причина за нивно продолжување“. Тие го обвинуваат Коѕиас дека веќе направил „неисториски отстапки“ со тоа што се согласил во името да стои и терминот Македонија.

Pismo

– Во овој момент треба да се прекинат преговорите и да престанете да го понижувате достоинството на Грците ширум светот со вашето инсистирање да им дадете името на Македонија на Словените во Скопје – се вели во писмото.

На 11 и 12 мај ќе има нова средба меѓу министрите за надворешни работи Никола Димитров и Никос Коѕиас во Сунион крај Атина на која ќе присуствува и медијаторот Метју Нимиц.

Како што се најавува од Скопје и од Атина, и ако не се случи ништо непланирано, на 17 мај во Софија ќе се одржи состанок од четири очи помеѓу македонскиот премиер Зоран Заев и грчкиот премиер Алексис Ципрас во рамките на Самитот ЕУ – Западен Балкан.


Анкета: Мнозинството граѓани се против каква и да е промена на името


Скопје, 3 мај, 2018 - 9:39 (META) 

Никаква промена на името е ставот на речиси половина од граѓаните или 47,1 проценти, покажува најновата анкета на МЦМС и Институтот за демократија, која ја објави „Телма“. Само 14,4 отсто од граѓаните би прифатиле „двојна формула“, речиси исто толку 14,1 би прифатиле име за севкупна употреба или ерга омнес. Договорено име за во меѓународните организации е прифатливо за 13,6 проценти од испитаниците, додека 10,1 отсто би поддржале договорено име за севкупна меѓунарона употреба. Овие резултати споредени со последната анкета на МЦМС од 2013-та година покажува пад од 15 процентни поени во противењето на каква било промена на името, но негативниот став за промена на името и натаму доминира.

Анкетата на МЦМС и Институтот за демократија, спроведена теренски од 5 до 20 април на репрезентативен примерок од 1004 испитаници, го опфати и прашањето за промена на Уставот на Македонија, на што инсистира Грција, покажувајќи дека тоа е неприфатливо за 48,3 проценти од граѓаните, наспроти само 16,4 % за кои е прифатлива промена на уставното име. Со став Без промена на уставното име, а со утврдување на меѓународно име за земјава, се 18,3 проценти. Анализирано по однос на етничката припадност 60,7 проценти од Македонците не прифаќаат никаква промена на Уставот, додека за 41,8 процент од Албанците е прифатлива промената на Уставот со уставното име.

Испитувањето на јавното мислење покажа и која придавка или додавка на името би била најприфатлива за граѓаните за постигнување решение. За „Горна“ се изјасниле 17,1 процент, за „Скопје“, 11,9 проценти, „Нова“ – 9,5, за „Северна“ 8,1 процент и за Вардарска 5,9 проценти. Мнозинство од испитаниците 44, проценти не се за ниту една додавка.

За тоа каде да стои евентуалната придавка, во ново договорено име меѓу двете страни, 42,9 проценти одговориле – никаде. Додавка да стои по името Република Македонија би профатиле 24,4 проценти, придавка пред Република Македонија – е прифатливо за 13 проценти, додека за придавка по Република, а пред Македонија позитивно одговориле 17,2 проценти.

За прашањето на државјанството или националноста според дефиниците во Обединетите нации, од понудени четири опции најголем број 47,9 отсто се изјасниле дека државјанството треба да биде запишано како македонско/Macedonian. Евентуалната опција – граѓанин на Република Горна Македонија преведено и на англиски е прифатливо за 14,4 отсто. Најприфатлива дефиниција на јазикот во Обединетите нации за 45,7 проценти е „македонски“ – со превод на англиски, додека за 16,5 прифатливо е и „македонски“ напишано на латиница.


Димтров, Коѕиас и Нимиц в среда ќе се сретнат во Виена


Скопје, 23 април, 2018 - 16:17 (META) 

Министерот за надворешни работи, Никола Димитров ќе се сретне со министерот за надворешни работи на Грција, Никос Коѕиас, заедно со посредникот Метју Нимиц, на 25 април (среда попладне) во Виена, информираат од МНР.

Минатата недела, Коѕиас во интервју за грчкото радио „24/7“, во однос на разговорите и точките за кои се преговара, рече дека идентитетот е прашање на самоопределување, а за националноста ќе се користи новото име, односно во пасошите ќе стои „државјанин на таа и таа земја, државјанин на името за кое што ќе постои договор“.