Третиот митинг за иметo ќе биде „цунами“, предупредуваат грчки здруженија


Атина, 15 февруари, 2018 - 12:01 (META) 

За прашањето на името повторно се огласија грчките „светски семакедонски здруженија“, Сегрчката федерација на културните здруженија и организаторите на претходните две митинга во Солун и Атина, кои предупредија дека, ако е неопходно, ќе се организирал и трет митинг, кој немало да биде „мирно море од народ, туку цунами“.

Во соопштението на нивнатата „фејсбук“ страница тие велат дека на митинзите на 21 јануари и на 4 февруари „ грчкиот народ го кажал своето“ и се изјаснил дека никој во негово име не може да му го даде „правото на Скопје да се вика Горна Македонија или Нова Македонија“.

„Двата митинга се одржаа еден по друг, набрзина и ненадејно, а сепак народот дојде во голем број и кажа НЕ на оние кои ја искривуваат историјата“, се вели во соопштението во кое се додава дека „ако е потребно, ќе се организира и трет минтинг, ако владата и политичарите продолжат да инсистираат на сложено име кое ќе го содржи терминот „Македонија“ или негови изведенки, но овој митинг нема да биде мирно море од народ туку – цунами“.


Бутарис: Погрешно бев протолкуван, не предлагам промена на името на солунскиот аеродром


Солун, 13 февруари, 2018 - 15:52 (META) 

Погрешно беа протолкувани моите изјави, никогаш не предложив, ниту предлагам промена на името на аеродромот, вели солунскиот градоначалник Јанис Бутарис, по реакциите што ги предизвика велејќи дека треба да се размисли за промена на името на аеродромот во Солун кој се вика „Македонија“.

Бутарис, изрази жалење што, како што рече, бил изваден и објавен само еден дел од изјавите, а не ставовите во целост од вчерашниот состанок.

– Не предложив, не предлагам и нема да предложам промена на името, едноставно ја изразив мојата загриженост. Она што го кажав и не го одрекувам е дека во ова прашање имаме загубено, 130-150 земји, колку и да се, ја имаат признато земјата под името Македонија. И ние, за жал, со одговорност на грчките влади во последните 25 години, имаме загубено. И ова треба да не загрижува – рече Бутарис.

Во однос на телефонското интервју во утринската емисија на грчката телевизија „Скај“, во која го спомена името на грчкиот кошаркар Галис како можна варијанта за име на солунскиот аеродром, Бутарис вели дека спиел кога го побарале.

– Одеднаш, утрово ми се јавуваат од Скај, јас спиев и ме збунија. Не побарав никогаш промена на името „Македонија“. За Никос Галис, што беше споменато, ме праша една госпоѓа од „Скај“, не и го помнам името, кога би се предложило менување на името, што би предложил и нормално јас реков – Никос Галис – вели Бутарис.


Бутарис: Туристите мислат дека слетуваат во Скопје, а не во Солун


Солун, 13 февруари, 2018 - 9:45 (META) 

Градоначалникот на Солун, Јанис Бутарис изјави дека треба да се размисли за промена на името на солунскиот аеродром „Македонија“ бидејќи туристите кога слетуваат во Солун мислат дека доаѓаат во Скопје.

– Не велам дека треба да се промени, но само јавно прашувам, да размислиме за тоа бидејќи името „Македонија“ го подели светот, не подели нас и од тоа сите губиме – рече Бутарис во изјава за грчката телевизија „Скај“.

Според него, аеродромот би можел да го носи името на прославениот грчки кошаркар Никос Галис, кој, како што вели, е меѓународно призната личност и единствениот од Грција кој влезе во американската Куќа на славните.

Бутарис смета и дека не се реални грчките стравувања од Македонија и дека проблемот на Грција не е Скопје, туку Анкара, и се поголемото турско влијание во регионот.

Тој оценува дека сега има реална можност проблемот со името да се реши, а секое одолговлекување би одело на штета на Грција.

– Подобро да добиеме 50 отсто од нешто, отколку 100 проценти од ништо. Изгубивме во Хаг, не можеме да го задржиме ветото за НАТО – изјави Бутарис.


Села е против „Горна Македонија“ без превод


Скопје, 12 февруари, 2018 - 17:18 (META) 

Претседателот на Алијанса за Албанците, Зијадин Села, побара опозициските партии и партиите на Албанците да бидат вклучени во преговарачкиот процес.

– Ние како Алијанса за Албанците сме против тенденциите за словенизација на името. Како што рековме дека сме против словенско име Македонија, исто така сме и против предлогот кој кружи во дипломатските кругови, околу идејата да бидат употребени имиња со географска одредница напишани само на македонски јазик, како на пример „Горна Македонија“. Ние сме против ова бидејќи и ова е тенденција за словенизација и присвојување на името – рече Села.

Форумот на албански интелектуалци во Македонија, пак, испрати писмо до меѓународните институции и до преговарачот Метју Нимиц, барајќи предлогот „Горна Македонија“, без превод, да биде отфрлен како неприфатлив „бидејќи ги исклучува Албанците и втората најголема заедница во земјата“.

Инаку, токму предлогот „Горна Македонија“, напишан без превод, е најновиот „фаворит“ на грчките медиуми.


ВМРО-ДПМНЕ: Заев да објасни кое име со географска одредница е подготвен да прифати


Скопје, 6 февруари, 2018 - 22:09 (META) 

Во реакцијата на прес-конференцијата на премиерот Зоран Заев и изјавата  дека тој е подготвен за име со географска одредница, ВМРО-ДПМНЕ пишува дека Заев треба да ја информира јавноста кое е тоа име, дали ќе има англиска транскрипција и дали тоа е само за меѓународна употреба?

„Дали, освен неговата подготвеност за име со географска одредница, постои подготвеност и за отстапки кои се однесуваат на промена на уставот, јазикот, националноста и меѓународните кодови на Република Македонија? Македонските граѓани подолго време очекуваат одговори од Зоран Заев во врска со разговорите кои ги води за решавање на проблемот кој Република Грција го има со нашето име. За жал, Заев реши да излезе со делумна информација дури откако грчкиот министер за надворешни работи јавно му порача да го извести сопствениот народ за договорот прифатен во Давос на средбата со премиерот Алексис Ципрас“, се вели во партиското соопштение.

ВМРО-ДПМНЕ порачува дека јавноста очекува одговор и на прашањето дали преименувањето на аеродромот и автопатот се дел од некаква поширока стратегија за решавање на спорот или претставува еднострана отстапка од страна на Република Македонија.


Теодоракис во 1997 година во Скопје предложи федерација со Грција


Скопје, 6 февруари, 2018 - 11:08 (META) 

Познатиот грчки композитор, Микис Теодоракис (93), чиј говор на неделниот митинг во Атина шокираше многумина во Грција, особено кај т.н. левица, пред 21 година, во 1997 година, при престојот во Скопје, имаше сосема спротивни ставови за македонско-грчките односи и проблемот со името.

Во април 1997 година, пред  Теодоракис да дојде и да одржи концерт во Скопје, весникот „Етнос“ откри дека на гробиштата „Бутел“ е погребан легендарниот јунак Јоргос Зорбас, од романот на Никос Казанѕакис “Гркот Зорба“.

МИкисЗорба

Во изјава за весникот „Ексусија“ во истата година тој заговараше забрзано затоплување на односите меѓу двете земји.

– Зошто, на пример, да не направиме унапредување на односите – царинска унија или федерација? Мислам дека така прашањето на името ќе се надмине и дека односите на двете земји ќе се доведат до ниво на кое името веќе нема да биде важно – рекол тогаш Теодоракис.

Концертот „Гркот Зорба“ беше одржан во Македонската опера и балет (МОБ), а присуствуваше македонската политичка елита, заедно со претседателот Киро Глигоров. На композиторот му беа укажани сите почести.  Посетата беше забележана и во Грција, а изјавите на Теодоракис се најдоа на насловните страници на печатот.

Подолу е видеото од архивата на Јоргос Логотетис, на кое е забележана целата посета на Теодоракис на Скопје.


Коѕиас: Скопје јавно да каже која ќе биде придавката во сложеното име


Атина, 6 февруари, 2018 - 9:50 (META) 

Очекуваме од Скопје, конечно да излезе и јавно да каже која ќе биде придавката во сложеното име и да им го објасни тоа на граѓаните, вели Никос Коѕиас, министерот за надворешни работи на Грција, во интервју за „Eуроњуз“ на грчки јазик.

Тој тврди дека Атина веќе го подготвува теренот за Грците да го прифатат сложеното име и коментира дека од другата страна не постои иста таква подготовка.

– Грчката влада презеде одговорност да каже јавно дека сака промена на името и дека ова име ќе биде сложено за сите употреби со конкретна одредница и излеговме јавно и кажавме дека во ова име ќе биде вклучен и терминот „Македонија“. Ние си ја завршивме нашата работа. Уште чекаме од Скопје, конечно да излезе, јавно да каже во ова сложено име која ќе биде придавката пред именката и да го опишат тоа пред нивниот народ. Ние го подготвуваме јавното мислење и секако, како што гледате, тоа си има и потешкотии. Не гледам дека и другата страна прави иста подготовка и ова, денес додека го правиме ова интервју, ме загрижува – вели Коѕиас.

Во однос на одредницата и сложеното име, Коѕијас објаснува дека грчката влада ги преферира придавките што имаат „словенска нијанса во нивната фонетика“.


Павлопулос: Името на соседната земја зрачи иредентизам


Атина, 5 февруари, 2018 - 15:03 (META) 

Предуслов за влез во НАТО и ЕУ е името да се реши на начин кој ќе исклучи секаков вид на иредентизам, порача грчкиот претседател Прокопис Павлопулос од Лариса, говорејќи пред припадници на грчкото воздухопловство.

Павлопулос смета дека „денешното име признато и од други земји, јасно зрачи иредентизам“.

– Истите барања на меѓународната заедница, на НАТО и на Европската Унија покажуваат дека името зрачи иредентизам. И тоа е реалност. Оваа земја, која ние ја сакаме за сојузник, за пријател и во НАТО и Европската Унија, треба да избере. Сака перспектива? Ако сака ќе треба да ги направи неопходните промени во целиот правен поредок, почнувајќи од нејзиниот устав, каде ќе постои промена на нејзиното име и секако оваа промена ќе биде проследена и со гаранции што го исклучуваат иредентизмот и во однос на границите и во однос на националноста и во однос на јазикот – рече грчкиот претседател.


Мицкоски: ВМРО-ДПМНЕ нема да прифати промена на Уставот со цел промена на името


Скопје, 4 февруари, 2018 - 17:43 (META) 

Лидерот на ВМРО-ДПМНЕ, Христијан Мицкоски рече дека партијата нема да прифати промена на Уставот со цел промена на името.

„Што се однесува до промена на Уставот, а со цел промена на уставното име на Република Македонија, таа позиција на партијата останува непроменета“, рече Мицкоски во гостувањето на телевизија „Сител“.

Во однос на Законот за употреба на јазиците, тој го повтори ставот на партијата дека содржината и начинот на кој е донесен, е неуставен и нереален.

„Се обидуваме да го нијансираме, а се со цел да го подобриме неговиот квалитет. Не може да се дискутира нешто што ги интересира сите граѓани на Македонија, на седница на која што не е присутна опозицијата и притоа, покрај тоа да поминете како ништо да не се случило“, додаде Мицкоски.

Според него, за Законот за јазици да биде уставен, мора да се формира работна група која ќе ги вклучи сите политички партии и претставници во македонскиот парламент, научната јавност, претставници од МАНУ и од кабинетот на претседателот на државата.


Само 22,5 отсто од Грците подготвени да прифатат сложенo име за Македонија


Атина, 4 февруари, 2018 - 13:12 (META) 

Само 22,5 отсто од Грците биле подготвени да прифатат сложено име за Македонија, а 71,5 отсто се против употреба на терминот Македонија, покажало истражувањето на солунскиот универзитет „Македонија“, пишува грчкиот весник „Катимерини“, a пренесува Македонската информативна агенција (МИА).

Според овој медиум, резултати покажуваат промена на јавното мислење во Грција, бидејќи на истата анкета во 2016 година, 57 отсто од граѓаните не го прифаќале терминот Македонија, а 38 отсто биле за сложено име.

Прашањето за името е важно за 65 отсто од Грците, а мнозинството од граѓаните сметаат дека грчките политичари водат погрешна политика во однос на него. 56 отсто од Грците сметаат дека активностите на грчкиот премиер Алексис Ципрас се движат во погрешна, а 26,5 отсто во правилна насока.