Прогресивниот данок може да предизвика одлив на мозоци и компании


Скопје, 5 ноември, 2018 - 10:58 (META) 

Владата не ги послуша апелите на компаниите кои се занимаваат со информациско-комуникациски технологии и иновации и најави дека од 1 јануари 2019 година ќе има прогресивно оданочување од 18 отсто за примањата на лицата кои имаат месечен личен доход над 90.000 денари. Според менаџерите на компаниите од овој секторот, воведувањето на прогресивното оданочување ќе ја намали продуктивноста, ќе ја зголеми невработеноста и сивата економија и ќе доведе до одлив на мозоци од земјава.

Истото го кажуваат и вработените.

Александар Галовски, вработен како инженер во „Нетсетера“, една од најстарите компании во Македонија од секторот информациско-комуникациски технологии вели дека прогресивниот данок дополнително ќе придонесе за одлив на младите квалификувани програмери и софтверски дизајнери во земји со поповолни даночни услови.

-Поради лошата економска средина, младите луѓе од овој сектор и досега ја напуштаа земјава, а оние што се тука секојдневно бараат начин како да ја напуштат. Иако земаат повисоки плати од вработените во повеќето останати сектори, овие луѓе не спаѓаат во богатиот слој граѓани, како што се тврди при воведувањето на оваа даночна реформа, туку имаат доволно пари за колку-толку нормален живот – вели Галовски.

Тој додава дека новиот данок ќе поттикне и развој на сивата економија.

-Младите што ќе останат во земјава, а работат за компании, односно на „тезги“ од странство, сега ќе бараат начин да си го наплатат трудот преку сервиси за брз трансфер на пари или другу механизми. Тоа значи дека државата повеќе има да изгуби, отколку да добие од воведувањето на прогресивното оданочување – вели Галовски.

Според него, даночната реформа може да придонесе и странските компании од овој сектор што сега имаат свои претставништва во Македонија да се преселат во земји од соседството, каде што се нудат и посебни поволности за оваа дејност.

Уште при првичната најава за воведување на прогресивно оданочување, до Министерството за финансии реагираа Американската стопанска комора во Македонија, Македонија 2025 и Стопанската комора за информатички и комуникациски технологии – МАСИТ, во кои членуваат над 200 компании.

„Доколку се пенализираат оние делови од населението кои напорно работат кон напредување и повисоки приходи, а се наградуваат оние кои не се трудат, ќе се намали продуктивноста. Во Република Македонија се исплаќа бруто-плата и не постои механизам  што ќе ги обврзе компаниите да ја зголемат бруто-платата за нето-платата да остане иста по зголемување на придонесите. Многу е веројатно зголемениот даночен товар да падне врз грбот на вработените, наместо на работодавачите. Тоа ќе доведе до одлив на квалификуваните кадри во земји со поповолна даночна клима. Овие кадри се исто така и најголемите потрошувачи и со нивното заминување ќе се намали економскиот пораст“, укажуваат од трите асоцијации.

Според нив, мерката ќе доведе до дестимулирање на развојот на висококвалификувани кадри, со оглед на тоа што најмногу ќе ги погоди оние кои вложувале во сопствениот професионален развој и ќе испрати порака дека квалификуваноста е неисплатлива, со што ќе се отстрани стимулот за развој на способности и квалификации.

Од спротивната страна, пресметките што ги претстави Министерството за финансии покажуваат дека од воведувањето на таканаречениот праведен данок околу 453.000 лица ќе имаат намалување на ефективната даночна стапка, додека само 38.000 лица ќе имаат зголемување.

„Евидентно е дека за најголем дел од популацијата новата ефективна даночна стапка е пониска од моменталната, додека позначајно зголемување има единствено кај најдоходовните 1 отсто. За најдоходовните 1 отсто од населението, зголемувањето на ефективната даночна стапка изнесува 4 процентни поени, додека за групата под тоа, зголемувањето е 0,6 процентни поени“, објаснуваат од Министерството.

Сепак, ако се земе предвид дека меѓу овие лица доминираат млади луѓе – програмери, инженери и други квалификувани технички кадри, кои во иднина би требало да бидат мотор на македонската економија останува впечатокот дека со нивно заминување во земји со поповолни даночни услови, што и сега се случува, нашата земја на долг рок може повеќе да загуби отколку да добие од новите даноци, од кои според математиката на Министерството за финансии буџетот ќе се дополни за само 25 милиони евра на годишно ниво.


„Meet and Code 2018“ во рамките на Европската недела на програмирање


Скопје, 17 октомври, 2018 - 10:39 (META) 

Учениците во Македонија ќе имаат можност да се стекнат со знаења од областа на технологијата во рамките на Европската недела на програмирање, која се одржува од 6 до 21 октомври, преку настани поддржани од Фондацијата за интернет и општество „Метаморфозис“, во рамките на иницијативата „Meet and Code 2018 “. Од Фондацијата, како спроведувачи на проектот, нагласуваат дека целта на проектот е учениците да се запознаат со светот на технологијата и можностите што ги нуди оваа област.

Во рамките на овој проект, во скопското средно училиште, „Јосип Броз Тито“ се одржа работилницата „Интуитивнo кодирање со Aпп инвентор“, каде освен претставници на „Метаморфозис“ присуствуваше и министерот за информатичко општество и администрација, Дамјан Манчевски.

Валон Абдиу од „Метаморфозис“ нагласи дека целта на проектот е учениците да се здобијат со знаења за светот на технологијата и можностите што ги нуди за создавање на иновативни работи. Тој објасни дека преку иницијативата „Meet and Code 2018“ од Македонија се презентирани повеќе од 130 настани, поддржани се 24 настани со грантови од 300 евра по настан.

– Сето ова е направено со цел младите да се подготват за светот на технологијата, бидејќи тоа е важен дел од нашиот живот – влијае на тоа како работиме, учиме, комуницираме, купуваме и така натаму. Затоа, преку овие настани, сакаме да новите генерации бидат свесни за различните аспекти на технологијата, да ги зголемиме нивните програмски вештини и способности за да бидат што по подготвени за иднината – изјави Абдиу.

Министерот за информатичко општество, Дамјан Манчевски, цени дека овој проект ќе го разбуди интересот на младите за областа на технологијата и придобивките кои ИКТ секторот може да ги донесе во нивниот живот во иднина.

– Покрај редовната настава, ние се обидуваме да ги мотивираме учениците да програмираат и да најдат начини да создадат нешто на иновативен начин. Како министер кој раководи со овој сектор, мислам дека областа на ИКТ во Македонија освен што носи повисоки плати и сигурни работни места, на младите им дава можност за само-вработување – изјави Манчевски за „Порталб.мк“

Проектот „Meet and Code 2018“ има за цел да покаже како светот може да се создаде преку програмирање и колку забавно може да биде програмирањето. Иницијативата особено ги поддржува малите, локални, непрофитни организации во сите земји. Имено, ги зајакнува локалните иницијативи кои овозможуваат дигитално програмирање и образование за сите – што е декларираната цел на Неделата за програмирање на ЕУ.

Настаните од „Meet and Code 2018“ се различни, од курсеви за почетници до вештачка интелигенција. Младите можат да учествуваат во курсеви на кои се објаснуваат основните функции на компјутерите или како да користат „ворд“ (Word). Но, тие можат да се пријават и за работилници за програмирање, роботика или дизајн.

Сите настани oд 2018 година може да се најдат тука: https://www.meet-and-code.org

Проектот „Meet and Code 2018″ во Македонија се спроведува од страна на Фондацијата „Метаморфозис“ во партнерство со ИТ-порталот „Stifter-Helfen“ и партнерите на мрежата „TechSoup Europe“. „Meet and Code 2018“ се овозможува од компанијата САП.


Жените претприемачи во земјава треба да се насочат кон ИКТ и СТЕМ секторот


Охрид, 3 октомври, 2018 - 15:56 (META) 

Пазарот е заситен од нано професиите како малите салони за убавина и малите фризерски салони. Марта Пејоска веќе четири години е сопственичка на единствената галерија и атеље за изработка и дизајн на современ накит и филигран во Охрид. Вели дека единствен начин да ја оствари својата визија е преку претприемништвото.

Пејоска е само една од храбрите млади девојки и жени, потенцијални и постојни претприемачи, како и заинтересирани страни од државните институции и граѓанското општество, која преку проектот WE MAKE ќе бидат поттикнати да се насочат кон женското претприемништвото, извозот и иновациите, вклучувајќи го ИКТ и СТЕМ секторот, зелената економија, како и социјалното претприемништво.

-Сакаме да направиме продор на младите девојки, на младите жени, да влезат во една сфера којашто е попрофитабилна и која што е нормално носи еден бенефит како и за нив како прептриемачи исто така и за фамилијата и исто така и за опшптеството – потенцира Валентина Дисоска – претседател на Здружение на бизнис жени.

Податоци за тоа колку од жените претприемачи се дел од ИКТ и СТЕМ секторот, се уште нема, па така иако во едукациските процеси односот е 50-50%, сепак со нив во земјава се уште суверено владее посилниот пол. Пазарот е доволно заситен со професиите кои на еден начин го одбележаа женското претприемништво во ова измината деценија, како козметичари, фризерки итн. Другите професии нудат можности за посериозен бизнис кој пак нуди поголема заработувачка, но и поголема одговорност.

-Токму кон тоа сме насочени да ги поттикнеме младите жени да сфатат дека одговорноста не е нешто од кое што треба да се плашат, тоа е пат кој треба да се изоди, а бенефициите се многу поголеми. Од оние микропертпријатија или нано претпријатија од типот, правиме нокти, шминкаме итн, дури и тие компании можат да пораснат во големи бизнис центри како велнес центри итн – објаснува Дисоска.

WE MAKE проектот ќе биде имплементиран во избрани општини од осумте плански региони: Битола, Струга, Велес, Тетово, Куманово, Штип, Струмица и Скопје. За време на овој проект активно ќе бидат споделени најдобрите практики од Хрватска и ЕУ. Една од специфичните цели на овој проект е формирање на Националната асоцијација за женско претприемништво (ЖП) и Платформите за зајакнување на екосистемот за претприемништво во Македонија и имплементација на Нацрт Националната Стратегија за развој на ЖП 2017-2020.


Прифаќањето на дигиталните сертификати во регионот ќе биде во фокусот на Самитот


Софија, 27 март, 2018 - 13:23 (META) 

Министерот за информатичко општество и администрација, Дамјан Манчевски во рамки на меѓународната конференција на тема „ИТ Хаб Конект 2018 – иновации, регулатива, инвестиции“, што се одржува во Софија, се сретна со еврокомесарката за дигитална економија и општество, Мариа Габриел и министерот за иновации и технолошки развој на Србија, Ненад Поповиќ.

Манчевски на Габриел и ги претставил активностите кои МИОА ги превзема во делот на мапирање на територијата за широкопојасен интернет, подготовката на стратегија за сајбер-безбедност, како и заложбите за вклучување на трет мобилен оператор во Македонија.

„Што се однесува до поддршката во делот на драстично намалување на цените за роаминг, ова останува да биде високо на агендата на еврокомесакрата, и ќе биде една од главните теми за кои ќе се разговара на престојниот Дигитален самит, што ќе се одржи на 18 и 19 април во Скопје“, информираат од МИОА.

Состанокот со српскиот министер, Поповиќ бил посветен на соработката и размената на искуства помеѓу двете држави во делот на технолошкиот парк и иновациите.

Двајцата министри се согласиле дека Дигиталниот самит е одлична можност каде ќе можат да се разговара за поврзаност во иновациските системи, како и организирање на заедничка конференција во регионот, посветена на предизвиците во ИТ-сферата.

„Прифаќањето на дигиталните сертификати во регионот ќе биде во фокусот на Дигиталниот самит. На состанокот, министерот Манчевски и министерот Поповиќ се согласија дека Македонија и Србија можат да бидат државите каде ќе се развие пилот-проект, што понатаму ќе биде превземен како успешна приказна и во другите земји во регионот“, се додава во соопштението.


Манчевски: Дигитализацијата во ИКТ-сферата е еден од приоритетите на ЕK


Скопје, 16 март, 2018 - 15:53 (META) 

Министерот за информатичко општество и администрација, Дамјан Манчевски, на настанот „Самит на малите земји – нови трендови во бизнисот“, ја отвори панел сесијата „Што ќе донесе дигиталната трансформација во секојдневието на бизнисот“.

Манчевски се осврна на дигиталната трансформација, на која што работи МИОА, со поддршка од бизнис-заедницата, регионот и Европската комисија.

– Дигитализацијата и реформите во ИКТ-сферата во Западен Балкан во моментот е еден од приоритетите на Европската комисија. Со воспоставување на единствен дигитален пазар од сите шест земји на Западен Балкан, се очекува да придонесе во развој на дигиталнотот општество, но и економски раст во регионот, зголемување на иновациите, системски реформи во администрацијата и институциите. Тоа ќе придонесе и до зголемување и подобрување на квалитет на животот на граѓаните во сите сфери – истакна Манчевски.

Тој додаде дека со цел да се постигне целосна дигиталната трансформација во моментов се работи на повеќе проекти од оваа област како што се  е-услуги за граѓаните, креирање на национален портал, портал за отворени податоци, отворање на технолошки парк, стратегија за широкопојасен интернет.

– Во креирање на тековни активности, но и идни планови на МИОА, активно се вклучени  ИКТ-компаниите. За целосна дигитална трансформација, и доближување на Македонија до Европската унија, потребни се не само јаки институции, туку и јак приватен сектор, силни компании кои заедно со нас ќе работат на ова поле – додаде Манчевски.


Владата формираше Национален совет за информатичка и компјутерска технологија


Скопје, 9 февруари, 2018 - 21:02 (META) 

Владата формираше Национален совет за информатичка и компјутерска технологија кој ќе изготви и ќе ја имплементира Националната стратегија за ИКТ, информираат од владината прес-служба.

Советот денеска одржал прв состанок на кој било одлучено со него да претседава Владимир Цветковиќ, советник за ИКТ на премиерот Заев, а заменик претседател е министерот за информатичко општество и администрација, Дамјан Манчевски.

Членови на советот се министерот за внатрешни работи, Оливер Спасовски, министерот за земјоделство, Љупчо Николовски, министерот за здравство Венко Филипче, министер за финансии, Драган Тевдовски, министерот за правда, Билен Саљији, министерката за образование, Рената Дескоска – Тренеска, претседателот на ЗЕЛС, Петре Шилегов и Сашо Димитријоски, директорот на Агенцијата за електронски комуникации.

Членовите на Националниот совет за ИКТ треба да направат детална анализа на постојната состојба во однос на информатичко – компјутерската технологија во ресорите со кои раководат, но и анализа за нивните потреби.

Врз основа на податоците кои ќе ги даде анализата, Советот ќе изготви, а потоа и ќе ја следи имплементацијата на Националната ИКТ стратегија.

-Постои голема хаотичност, како во министерствата, така и во сите други институции. Оваа стратегија ќе дава јасни патокази каде грешиме и во од ќе можеме да ги решаваме проблемите – вели Манчевски.


Заев се сретна со претставници од „Хуавеи“, компанијата сака да инвестира во ИКТ-секторот


Скопје, 4 октомври, 2017 - 15:32 (META) 

Премиерот Зоран Заев, денеска примил во посета претставници на информатичката и на телекомуникациска компанија „Хуавеи“ од Кина.

Од Владата информираат дека претставниците на компанијата биле заинтересирани за интензивна соработка во сферата на развојот на информатичкото општество и новите информатички технологии во Македонија.

Во соопштението се вели дека тие го запознале премиерот со потенцијалите на компанијата, како на глобално така и на локално ниво, и ја нагласиле подготвеноста да ги имплементираат своите планови и во насока на локалниот развој во земјава, преку инвестициските и иновативни стратегии на компанијата.

Премиерот Заев кажал дека Владата има интерес и желба да го модернизира општеството и дека соработката со „Хуавеи“ би била одлична можност да се почне со тој процес.


Во соработка помеѓу МАСИТ и УСАИД, се обучуваат кадри за ИКТ-секторот


Скопје, 19 мај, 2017 - 12:26 (META) 

Вкупно 40 кандидати денеска почнуваат со обуката во рамки на проектот на Стопанската комора за информатички и комуникациски технологии – МАСИТ за „Преквалификација на кадри“, во соработка со УСАИД.

Од МАСИТ информираат дека по спроведеното истражување меѓу компаниите – членки на комората, констатиран е дефицит на кадри во ИКТ-секторот, од профилите за програмирање.

„Како резултат на ова почна проектот за „Преквалификација на кадри“, каде целта е млади луѓе до 35 години, без претходно ИТ-предзнаење да се преквалификуваат и да почнат кариера во ИКТ-светот. Во согласност со потребите на компаниите, се организираат обуки и за други програмери“, информираат од МАСИТ.

Обуката која денеска ја почнуваат 40-те кандидати, планирано е да трае до септември, а потоа ќе следи пракса во некоја од ИТ-компаниите членки на МАСИТ.

Крајната цел на проектот, по посета на програмата, е лицата да се вработат во ИКТ-компании на јуниорски програмерски позиции или други позиции поврзани со ИКТ-сферата. Програмата за преквалификација ќе трае околу пет месеци.


Земјоделците треба да ја подобрат технологијата за да ги намалат трошоците


Скопје, 23 ноември, 2016 - 13:49 (META) 

Земјоделците треба да применуваат современи технолошки решенија доколку сакаат да бидат конкуретни на пазарот, беше истакнато на конференцијата „ИКТ во агробизнисот“, што денеска беше отворена во хотелот „Александар палас“.

Конференцијата треба да понуди можности за поврзување на ИКТ-секторот со агросекторот за да им се помогне на земјоделците да ги намалат трошоците и да ги зголемат приносите.

Министерката за информатичко општество и администрација, Марта Арсовска-Томовска, истакна дела земјоделството како економска гранка зазема 11 проценти од домашниот бруто-производ, но додаде дека доколку земјоделците не го транформираат својот бизнис дигитилно, нивната иднина е сосема неизвесна.

Конференцијата ќе продолжи утре.


Интернационални бизнис-средби за фирмите од ИТ-секторот во Скопје


Скопје, 17 ноември, 2016 - 11:48 (META) 

Вториот интернационален настан за деловни средби помеѓу фирми од секторот на информациони технологии „Гоу интернешнал – опен иновејшн ин ИКТ“ (Go International – open innovation in ICT”) ќе се одржи денеска и утре во Скопје.

На дводневниот настан ќе учествуваат повеќе од 50 фирми од ИКТ-секторот кои доаѓаат од 13 земји. Фирмите преку одржување деловни средби ќе се обидат да формираат нови интернационални партнерства за освојување нови пазари. Деловните средби ќе се реализираат утре на Скопски саем (Дипломатик сала), со почеток во 11 часот.

Денеска на работилницата на тема „Отворени иновации во ИКТ-секторот“ ќе предава експерт и предавач од Универзитетот од Холандија „Аванс“, Том Спанјард.

Настанот е во организација на Фондација за менаџмент и индустриско истражување и е поддржан од Централноевропската иницијатива (CEI) и од Мрежата на бизнис-можности (Enterprise Europe Network.)