ВМРО-ДПМНЕ: Дурловски и Божиновска непотребно ќе се држат во куќен притвор


Скопје, 27 јануари, 2018 - 10:39 (META) 

Игор Дурловски и Елена Доцевска – Божиновска непотребно ќе се држат во куќен притвор, како што непотребно јавното обвинителство два месеци се „изживуваше со нив“, реагираат од опозициската ВМРО-ДПМНЕ на одлуката на Кривичниот суд за продолжување на притворите на осомничените за насилствата во Собранието од 27 април, минатата година.

Од партијата велат дека нема аргументи дека осомничените ќе го повторат делото, дека ќе избегаат или дека би и попречиле на истрагата.

„Со секој изминат ден се потврдува дека нема никаква правна основа да се држат во истражен затвор и останатите патриоти. Причините за нивниот притвор се чисто политички. Селективната правда е неправда. Демократија во Република Македонија нема. Судот и правосудните органи претставуваат продолжена рака на СДСМ. Судот е дел од политичка хајка против лица кои не сториле терористички акт“, стои во соопштението.

Од ВМРО-ДПМНЕ порачуваат дека судот треба „итно и неодложно“ да ги пушти од притвор Митко Чавков, Борис Дамовски, Богдан Илиевски, Владо Јовановски и останатите чија единствена вина, како што велат, е љубовта кон државата.

„Судот и правосудните органи во Република Македонија ја злоупотребуваат мерката притвор. Тие треба да знаат дека оваа мерка се користи само како крајна цел за обезбедување на осомничените, а не како средство за казнување на сите оние кои не размислуваат како СДСМ и Зоран Заев“, велат од партијата.


ОЈО: Поблаги мерки за Пешевска и Дурловски и продолжување на притворите на сите други


Скопје, 26 јануари, 2018 - 10:10 (META) 

Основното јавно обвинителство за гонење на организиран криминал и корупција побара од Кривичниот суд да им го продолжи притворот на осомничените за насилствата во Собранието од 27 април.

Обвинителството, како што денеска соопштија оттаму, бара продолжување на притворот на поранешниот министер за внатрешни работи Митко Чавков, Богдан Илиевски – Бетмен, актерот Владо Јовановски, режисерот Борис Дамовски, пратениците Крсто Мукоски, Љубен Арнаудов, Сашо Василевски и куќните притвори на Јохан Тарчуловски и Љупчо Димовски и на уште дваесетина осомничени.

Единствено промени има кај пратеничката Жаклина Пешевска, поранешниот директор на Македонска опера и балет, Игор Дуловски и за службеничката од Собрание, Елена Доцевска-Божиновска за кои Обвинителството бара поблаги мерки.

„Надлежниот обвинител побара од судот за лицето Ж.П да биде укината мерката куќен притвор и истата да биде заменета со мерки на претпазливост, а за осомничените лица И.Д. и Е.Д.Б мерката притвор да биде заменета со мерка – куќен притвор. За останатите осомничени лица обвинителството останува на барањето за продолжување на претходно изречените мерки за обезбедување на присуство и за непречено водење на кривичната постапка“, стои во соопштението од Обвинителството за гонење на организиран криминал и корупција.

Ова е второ продолжување на притворите на осомничените за 27 април. Претходно тие беа продолжени од Кривичниот суд на 27 декември, минатата година, а беа потврдени и од Апелацискиот суд Скопје, кој ги одби жалбите на сите осомничени, заклучно со последната на Борис Дамовски, за која Апелација одлучуваше вчера.


Апелација ги одби жалбите на Чавков, Јовановски, Дурловски и Илиевски


Скопје, 12 јануари, 2018 - 15:42 (META) 

Апелацискиот суд ги одби жалбите на единаесетмина осомничени за насилствата во Собранието од 27 април, меѓу кои и поранешниот министер за внатрешни работи, Митко Чавков, актерот Владо Јовановски, поранешниот директор на Македонската опера и балет Игор Дурловски и Богдан Илиевски – Бетмен, кои и понатаму остануваат во притвор што им го одреди и продолжи Кривичниот суд.

Дел од одлуките на Апелација следуваат по јавните седници, кои беа одржани вчера и завчера на кои адвокатите на осомничените, но и самите тие, побараа од судот да им биде укината мерката притвор и таа да биде заменета со куќен притвор или друга поблага мерка.

Меѓу осомничените чии жалби Апелација ги разгледувала на затворена за јавноста седница се Богдан Илиевски, Илија Славевски, Митко Пешов и Оливер Радулов.

„Апелациониот суд Скопје, по одржаните јавни и нејавни седници на ден 10.01.2018 година и 11.01.2018 година, донесе одлуки со кои ги одби како неосновани жалбите на обвинетите и ги потврди решенијата на Основниот суд Скопје 1 Скопје донесени во рамки на предметите во врска со настаните во Собранието на Република Македонија на 27 април 2017 година и тоа за обвинетите Оливер Поповски, Горан Ѓошевски, Владо Јовановски, Митко Чавков, Игор Дурловски, Мунир Пепиќ, Душко Лазаров, Митко Пешов, Оливер Раудлов, Богдан Илиевски и Илија Славевски“, стои во соопштението на Апелација.

Според донесените одлуки, Апелацицскиот суд го отфрлил и предлогот на Вишото јавно обвинителство за укинување на притворот на Владо Јовановски и негова замена со друга мерка за обезбедување присуство.

Кривичниот совет денеска на јавна седница ја разгледуваше жалбата за продолжување на притворот на пратеникот Сашо Василевски, исто така сосомничен за насилствата во Собранието.


Адвокатите на Дурловски сметаат дека и куќниот притвор е престрога мерка


Скопје, 11 јануари, 2018 - 15:38 (META) 

На денешното рочиште во Апелацискиот суд, адвокатите на оперскиот пејач Игор Дурловски, побараа укинување на притворот и негова замена со куќен притвор или друга поблага алтернативна мерка за неговото учество во насилството во Собранието на 27 април минатата година.

Неговиот бранител Ставре Џиков наведе дека, „со укинувањето на притворот ќе се постигне правичност“. Тој истакна дека со притворот не само што му се ограничува слободата туку се влијае и на неговиот интегритет и на неговото семејство.

Адвокатот Еленко Миланов рече дека „станува збор за решенија по урнек во кои нема посебни околности зошто на Дурловски да му биде продолжен притворот.“

– Во ниту еден од овие наводни докази кои што ОЈО се уште не ги прибавило, Дурловски не може да има влијание. Степенот на кривична одговорност според европскиот суд не може да биде основ за притвор – рече Миланов пред Судот.

Според него и куќниот притвор во случајот би бил престрог и додаде дека „во секое време се подготвени да го депонираат пасошот на Дурловски во суд.“

Двајцата адвокати посочија дека Дурловски е уметник и дека тој заедно со неговата сопруга ја претставува земјава во светот.

Претставникот на Вишото јавно обвинителство рече дека жалбата на Дурловски треба да биде одбиена како неоснована и да се потврди притворот.

Дурловски само кратко рече дека останува на ставовите на неговите адвокати, без да додаде ништо повеќе. На седницата беше присутна и сопругата на Дурловски, Ана Дурловска која носеше маичка со ликот на Дурловски и натпис „правда за Игор“ на англиски (justice for Igor).


Судот му одреди 30-дневен притвор на Игор Дурловски


Скопје, 28 ноември, 2017 - 22:12 (META) 

Кривичниот суд денеска му одреди 30 дневен притвор на оперскиот пејач Игор Дурловски, кој денеска беше приведен поради насилствата во Собранието на Република Македонија на 27 април годинава.

Дурловски, кој е еден од организаторите на насилните протести на „За заедничка Македонија“, се товари за загрозување на уставниот поредок и на безбедноста.

Судот на пратеничката Жаклина Пешевска ѝ одреди куќен притвор, додека за другите сè уште се чека да биде објавена судската одлука.

Покрај Дурловски, МВР денеска по наредба на Основното јавно обвинителство приведе уште 35 лица, меѓу кои и пратениците Крсто Мукоски, Јохан Тарчуловски, Жаклина Пешевска, Љубен Арнаудов, Сашо Василевски и Љупчо Димовски, поранешниот директор на Бирото за јавна безбедност и поранешен министер за внатрешни работи, Митко Чавков, како и дел од организаторите на иницијативата „За заедничка Македонија“, Владо Јовановски, Борис Дамовски и Богдан Илиевски.


Дурловски поднесе оставка во МОБ и на ФМУ


Скопје, 17 мај, 2017 - 13:21 (META) 

Директорот на Македонската опера и балет и оперски пејач Игор Дурловски денеска на својот фејсбук-профил објави дека поднесува оставка од местото директор на МОБ и од позицијата професор на Факултетот за музичка уметност.

„Жалам што сите овие општествени превирања се случуваат во година кога одбележуваме два значајни јубилеи и со кои требаше да создадеме нова страница со врвни уметнички достигнувања. За жал, а можеби некому за среќа, ниту МОБ не беше поштедена од негативните ефекти од наметнатите општествени услови, кои се одразија врз целокупната работна атмосфера, расположението на нашата публика, безбедносниот скептицизам на дел од нашите гости – уметници и на ред други помалку значајни нешта. Во таа насока, сметам дека лично ќе придонесам со поднесување оставка од позицијата директор за да не се поистоветува МОБ со моите лични дејства надвор од куќата и за да се овозможи надлежните институции бргу да изберат ново раководство кое, се надевам, ќе донесе нова позитивна енергија и нови успеси на оваа куќа. 25 мај ќе биде мој последен работен ден на позицијата директор на МОБ, а воедно ќе поднесам оставка од позицијата професор на Факултетот за музичка уметност по завршувањето на испитната сесија“, напиша Дурловски на својот фејсбук-профил.

Дурловски изминатите два месеци беше еден од организаторите на протестите на иницијативата „За заедничка Македонија“ и беше присутен во Собранието за време на насилниот упад на граѓани на 27 април, при што беа повредени неколку пратеници, новинари и граѓани.


СДСМ: Наместо награда на Дурловски, Иванов да го даде мандатот за нова влада


Скопје, 9 мај, 2017 - 16:24 (META) 

Врв на хипокризијата во општеството е што на Денот на победата над фашизмот, државната награда за Македонската опера и балет (МОБ) Ѓорге Иванов му ја врачи на Игор Дурловски, кој поттикнува и промовира фашизам во Македонија, реагираат од СДСМ.

„СДСМ ја честита 70-годишнината на Македонската опера и балет и најавуваме дека никогаш повеќе институциите нема да бидат заложници на партиски интереси ниту, пак, ќе бидат раководени од лица што се инспиратори на убиства на народни избраници, насилства врз новинари, поделби и на провокации меѓу граѓаните. Ова особено, ако се земе предвид дека станува збор за институција од областа на културата, која треба да биде промотор на заедничките културни и цивилизациски вредности и придобивки“, велат од СДСМ.

Од партијата нагласуваат дека она што мора и може претседателот Иванов да го направи за граѓаните во овој момент е да го додели мандатот за формирање нова влада.


Иванов на Дурловски му го врачи орденот за заслуги на МОБ


Скопје, 9 мај, 2017 - 13:34 (META) 

Претседателот на државата, Ѓорге Иванов, денеска, по повод 9 Мај – Денот на Европа и на победата над фашизмот, со одрен за заслуги ја одликуваше Македонската опера и балет.

Доделувањето на орденот се одржа во резиденцијата на претседателот на Водно, а одликувањето го прими директорот на МОБ, Игор Дурловски.

– Овој орден е признание за улогата што Македонската опера и балет ја има во победата на креативноста над деструктивноста и на музиката над тишината – истакна Иванов во своето обраќање по повод доделувањето на одликувањето.

Правејќи ретроспектива на развојот на Македонската опера и балет, од формирањето на оперскиот ансамбл во 1947 година и премиерата на „Кавалерија Рустикана“ од Пјетро Маскањи, Иванов истакна дека сето тоа зборува за младите, добронамерната помош и за самодовербата како столбови на кои беа изградени Македонската опера и балет, но и македонската државност.

– И денес, кога повторно сме сведоци на разни сомнежи во нашата државотворност, ние не треба да се обесхрабруваме. Сè додека идејата за слободата и за независноста на Македонија е во нашите срца, нема да потклекнеме и да се откажеме. Водени од овие три нешта, нашите уметници самоуверено ги почнаа и „Мајските оперски вечери“, кои годинава се одржуваат по 45. пат. Нашите уметници дебитираа на светските оперски и балетски сцени. Некои од нив станаа наши амбасадори на културата низ сите меридијани. Затоа, на овој свечен ден, 9 Мај, како претседател на Република Македонија имам чест на Македонската опера и балет да ѝ доделам Орден за заслуги за Македонија – рече Иванов, посакувајќи ѝ на МОБ сè повеќе распродадени концерти и во Македонија и во светот.

Инаку, директорот на МОБ, Игор Дурловски, беше еден од основачите и водачите на граѓанската иницијатива „За заедничка Македонија“ и на протестите што се одржуваат во Скопје и во други градови во земјата, против платформата на албанските партии и на кои се бара одржување на нови предвремени парламентарни избори. Протестите ескалираа на 27 април годинава, по изборот на Талат Џафери за нов претседател на Собранието, кога толпа демонстранти, меѓу кои и Дурловски, упаднаа во законодавниот дом. Во насилствата беа повредени пратеници и новинари и беше демолиран ентериерот на Собранието.


Игор Дурловски се повлече од организацијата на протестите „За заедничка Македонија“


Скопје, 3 мај, 2017 - 14:13 (META) 

Директорот на МОБ, Игор Дурловски, денеска на својот фејсбук-профил соопшти дека се повлекува од организацијата на протестите на т.н. иницијатива „За заедничка Македонија“, но порача дека и понатаму ќе ја дава својата поддршка.

Во образложението вели дека „го скршило“ тоа што дел од граѓаните брутално го напаѓале поради неговите ставови за иднината на Македонија. Изрази и жалење што „индиректно бил дел од насилството“, за кое вели дека неколкупати јавно го осудил.

„Шеесет дена мирни, достоинствени протести со дел од моите сонародници и многу сум горд поради тоа. Верував дека со моето дејствување ќе можам нешто да променам, дека ќе успееме да ја зачуваме Македонија таква каква што ја знаеме – унитарна! Жал ми е што индиректно бев дел од насилството, кое неколкупати јавно го осудив. Стотиците закани не ме уплашија, но тоа што ме скрши е што дел од моите сограѓани брутално ме напаѓаа поради разликите во ставовите за иднината на Македонија. Тие што ме познаваат, знаат дека моите намери се чесни и од срце. Само времето може да покаже дали биле правилни. На И4 им посакувам истрајност и разумно дејствување, редовно ќе бидам меѓу нив на улица, но, пред сè, својата поддршка за Македонија понатаму ќе ја остварувам како организатор на сопствените морални убедувања и професионално дејствување. Народот добро знае за што се залага и без мене како еден од нивните организатори. Народот не може никој да го контролира. Јас сум нераскинлив дел од мојот народ кому е потребно вистинско лидерство во овој момент. Да живее Македонија!“, напиша Дурловски.

igor durlovski1


„За заедничка Македонија“ бара средба со еврокомесарот Хан


Скопје, 19 март, 2017 - 14:16 (META) 

Претставници од иницијативата „За заедничка Македонија“ бараат средба со еврокомесарот за проширување и за добрососедска политика, Јоханес Хан, кој во вторник доаѓа во Македонија.

Ова денеска го соопшти членот на иницијативата и директор на Македонската опера и балет (МОБ), Игор Дурловски, кој рече дека никој „не смее, не треба и не може да ги игнорира 200.000 граѓани кои секојдневно протестираат“.

– Бараме господинот Хан да се сретне со нас за да може да му ги претставиме нашите цели и барања кои се фиксни и непроменливи. Нивното игнорирање и игнорирањето на нашите барања може да создаде само дополнителни ризици. Ако ЕУ е за почитување на граѓанско општество, тогаш треба да покаже дека декларативните заложби не се само флоскули, туку треба да преземе конкретни дела, а за почеток може да прифатат средба со нас. Игнорирањето од страна на Хан ќе го сметаме за неискрен однос и за приказ на не добри цели и намери на ЕУ кон Република Македонија – рече Дурловски.

Пратеникот на ВМРО-ДПМНЕ, Александар Николоски, во петокот изјави дека неговата партија ќе достави три барања до еврокомесарот, односно дека ќе бара од Хан да ја осуди „тиранската платформа“, да го испочитува правилото за коалицирање „победник со победник“ и да ги земе предвид протестите на иницијативата „За заедничка Македонија“.