Хант: Заев и Владата да работат со Парламентот за создавање на консензус за иднината


Лондон, 2 октомври, 2018 - 11:00 (META) 

На референдумот во Македонија гласачите ја искажаа својата желба за разрешување на долгогодишниот спор со нивниот сосед Грција за името на земјата и преземање позитивен чекор кон евроатлантска интеграција. Доколку се спроведе, Преспанскиот договор ќе ја подобри стабилноста во Македонија и поширокиот регион.

Ова го истакна секретарот за надворешни работи на Обединетото Кралство, Џереми Хант.

„И покрај тоа што излезноста беше под очекувањата, овој референдум беше позитивен чекор за Македонија. Гласачите во Македонија јасно ја искажаа нивната желба да бидат дел од евро-атлантската заедница и го повикувам премиерот Заев и Владата да работат со Парламентот за создавање на консензус за иднината на земјата. Верувам дека спроведувањето на Преспанскиот договор ќе биде добро за Македонија и добро за регионот. Со тоа се нуди можност за поголема безбедност и просперитет, како и подобри можности за младите од Македонија. Исто така и овозможува на Македонија да послужи како пример за регионот за тоа што може да се постигне со храброст, одлучност и визија за иднината. Горди сме што Обединетото Кралство е долгодишен пријател и партнер на Македонија. Ќе работиме на продолжување и зајакнување на нашето партнерство и во иднина. Особено го очекуваме денот кога ќе бидеме сојзуници во НАТО – вратата е се уште отворена“, изјави Хант.


СДСМ: Иванов останува сам, заробен во сопствената идеја за изолација


Скопје, 24 септември, 2018 - 11:28 (META) 

Во клучната недела за иднината на државата и нејзините граѓани, Ѓорге Иванов одлучи да не ја напушта својата идеја за изолација на Македонија, се вели во реакцијата на СДСМ на изјавата на претседателот Ѓорге Иванов.

Во неа се додава дека „очигледно е дека Иванов е навикнат да им предизвикува проблеми на сопствените граѓани, дури и на оние кои го гласаа.“

„Последниот остаток од криминалниот режим на ВМРО-ДПМНЕ, Ѓорге Иванов е противник на демократијата, бидејќи ја спори најважната демократска алатка – гласањето.  А, токму преку гласање и избори, Иванов стана претседател. Ставот на Иванов е срамно бегство од одговорност. За среќа на граѓаните, Иванов не е тој кој одлучува за иднината. Иванов е премал и премалку важен, граѓаните и нивната волја се тие кои се големината на Македонија, тие ќе ја донесат одлуката. Иванов, за жал, останува да биде лице кое сее омраза и кое ги дели граѓаните, претседател кој оди спротивно на волјата на граѓаните, претседател кој избран преку гласање, а денес има проблем со гласањето“, се додава во соопштението на СДСМ.


Хан: Референдумот е избор помеѓу европска иднина и изолација


Брисел, 23 август, 2018 - 10:31 (META) 

Еврокомесарот за добрососедска политика и проширување, Јоханес Хан, вели дека жали поради недостаток на национално единство во Македонија во врска со референдумот за договорот со Грција и ги повикува граѓаните да го искористат своето право со цел да ја обликуваат својата иднина и иднината на својата земја.

Според него, референдумот е можност за граѓаните да направат избор помеѓу европската иднина и изолација.

– Тоа е избор помеѓу европската иднина која ќе донесе конкретна корист за граѓаните како владеење на правото, зголемено привлекување на странски инвеститори, со самото тоа и подобри работни места, поголем животен стандард, и патот кој води во изолација, стагнација и пропуштање на единствените прилики за унапредување и напредок во клучни области – рече Хан.

Тој се надева дека граѓаните кои се уште не одлучиле како ќе гласаат, ќе се информираат за последиците од нивниот глас.

– Мислам дека граѓаните треба да бидат свесни дека со овој референдум им се нуди шанса да се слушнат нивните гласови и ставови и да гласаат за да ја обликуваат својата иднина и иднината на земјата. Правото на глас е важен демократски напредок кој треба да биде поддржан преку активно учество. За навистина да се искористи тоа право граѓаните треба внимателно да ги анализираат мотивите позади кампањите и последиците од глас „за“ или глас „против“ за да бидат способни да направат информирана одлука – вели еврокомесарот.


Мицкоски: Јас сум за иднина во која нема да се „проституираме“ како народ и држава


Скопје, 1 август, 2018 - 9:42 (META) 

Лидерот на ВМРО-ДПМНЕ, Христијан Мицкоски на неговиот фејсбук-профил напиша дека тој е за иднина во која Македонија ќе ја водат принципиелни, чесни и од збор луѓе, а не аболицирани политичари, иднина во која политичарите што бараат мито ќе одат во затвор.

„Иднина во која нема да се проституираме како народ и држава, затоа што уценети и неспособни политичари се во владата, иднина во која нема министрите да си делат грантови и тендери на шибицарски начин, а премиерот ќе им прости со стерилно образложение дека немало да ги смени затоа што немал со кого да работи. Иднина во која моите студенти наместо да се збогуваат со мене после одбраната на дипломската работа ќе ме консултираат во која фабрика и кое работно место ќе го прифатат овде во нивната татковина, иднина во која нема мојата татковина да биде рекордер по бројот на мртви новороденчиња во Европа“, напиша меѓудругото Мицкоски на неговиот фејсбук-профил.

Од СДСМ рeагираат и му порачаа „Мицкоски, ако си за иднината, поддржи го референдумот за ЕУ и НАТО, во спротивно остануваш заглавен во минатото, на браникот на криминалот“.

„Христијан Мицкоски декларативно вели дека е за иднина, време е да го докаже тоа на дело и да ги повика членовите на ВМРО-ДПМНЕ да излезат на референдум и да изберат иднина. Во спротивно, Мицкоски ќе покаже дека лаже и дека всушност е за изолација, назадување и неизвесност. Мицкоски, ЕУ и НАТО се нашата иднина. Ајде, ако си за просперитетна иднина поддржи го референдумот на кој граѓаните ќе го имаат последниот збор и ќе одлучат за македонска иднина во ЕУ и НАТО“, се вели во реакцијата на СДСМ.


Владата организира прослава во 15 градови за поканата за членство во НАТО


Скопје, 12 јули, 2018 - 10:50 (META) 

Владата организира „голема граѓанска прослава“ за поканата за членство во НАТО, во 15 градови ширум земјата заедно со преку 40 домашни артисти и музичари в сабота, 14 јули.

„Македонија започнува нова приказна – добивме покана за членство во НАТО и датум за преговори со ЕУ.  Застануваме рамо до рамо со најсилните земји од Европа и светот. Македонија зачекорува во ново време. Време на надеж, на победи, на гордост. Време на сигурност и безбедност. Доаѓа време на подобар живот за сите граѓани тука во нашата земја. Се изборивме за сигурна иднина“, се вели во поканата до граѓаните на фејсбук-настанот на Влада.


Шекеринска: Имаме пари од ЕУ за решавање на проблемите на општините


Гостивар, 28 септември, 2017 - 20:55 (META) 

Заменик-престедателката на СДСМ, Радмила Шекеринска на митингот на СДСМ и Коалицијата во Гостивар кажа дека целта на централната власт е да се приближи на локалната и да биде сервис на општините, за граѓаните да имаат подобри услови за живот.

– Парите ќе ги насочиме за решавање на проблемите во градовите, нема да дозволиме да се трошат стотици евра на сто метри простор во Скопје, додека општините се мачат со нерешени основни услови за живот. Имаме пари од ЕУ за поддршка на општините и решавање на проблемите – рече Шекеринска.

Таа додаде дека централната власт нема да ја малтретира локалната власт туку ќе даде шанса на добар проект и идеја со поддршка и пари. Бизнис-заедницата ќе биде вклучена во дефинирање на приоритетите на општината.

– На 15 октомври нема да бидат обични локални избори, Македонија одлучува за иднината дали ќе се развиваме или ќе се враќаме назад како сиромашна и изолирана земја, во која, само за една група на луѓе ќе има живот – додаде Шекеринска.

За политичките противници таа рече дека „11 години сееле страв и создавале корупција, но правдата доаѓа по своето“.

– Луѓето зад кои стоеше Груевски бегаат од државата или со наведнати глави влегуваат во судовите, бидејќи знаат дека многу зулум и криминал направија – додаде Шекеринска.


СДСМ: Неколкумина криминалци нема да ја одредуваат иднината на нашите деца


Скопје, 9 април, 2017 - 10:09 (META) 

ВМРО-ДПМНЕ мора да најде здрав разум и да прифати дека е опозиција. Криминалното раководство на ВМРО-ДПМНЕ не може да ги држи во заложништво граѓаните и Република Македонија. Во ВМРО-ДПМНЕ има луѓе кои знаат дека криминалците во нивната партија ја загрозуваат иднината и на нивните деца и тие имаат обврска да постапат разумно, порача СДСМ денеска во своето редовно утринско соопштение.

Партијата ги повика Никола Груевски и раководството на ВМРО-ДПМНЕ да не поттикнуваат на насилство „поради заштита од одговорност за своите криминали“.

„Мора да има трансфер на власта, тоа е мнозинската волја и ВМРО-ДПМНЕ И Ѓорге Иванов се должни да овозможат мирен трансфер на власта! Волјата на мнозинството граѓани е јасна и исто така 700.000 граѓани, преку 67 пратенички мандати имаат право и обврска да го изберат новиот претседател на Собранието, а потоа и новата реформска Влада.И тоа ќе се случи согласно Уставот, Деловникот и законите“, се вели во соопштението.


Нема членство во ЕУ за Македонија сè додека се однесува иредентистички, порача Павлопулос


Атина, 25 март, 2017 - 12:17 (META) 

Грчкиот претседател, Прокопис Павлопулос, им порача на македонските политичари дека сè додека се покажуваат иредентистички тенденции, Македонија нема да има европска иднина. Павлопулос ова го нагласи во неговата порака до народот на денешното одбележување на денот на независноста на Грција, без директно да го спомене името на Македонија.

Според грчкиот претседател, иредентистичките тенденции и инсистирањето на името Македонија се директно фалсификување на грчката историја и се косат со европските вредности кои се очекуваат од идна членка на ЕУ.

– На соседните држави од Балканот, кои имаат амбиција да бидат примени во Европската Унија, им нагласуваме дека со присвојувањето имиња кои грубо ја фалсификуваат историјата и шират иредентизам, но и со покажување варварство врз бегалците, немаат европска иднина бидејќи со тоа ги прекршуваат директно европските принципи и вредности – вели Павлопулос во обраќањето до народот за грчкиот државен празник.

Павлопулос истакна дека и од соседите на Балканот, но и од Европската Унија, очекуваат да ги замолчат екстремистичките гласови, нехуманото и недемократското однесување и синдроми.

Грчкиот претседател ја спомена и бегалската криза, посочувајќи дека проблемот останува жив и актуелен, барајќи ЕУ да се потсети на своите вредности и да се однесува во согласност со политичките, културните и со хуманите принципи кон ова клучно прашање.

Павлопулос отворено ѝ порача на ЕУ дека Грција е одлучена да остане важен и клучен член на Унијата и во еврозоната, нагласувајќи сепак дека и Европската Унија не би била тоа што е без присуството на Грција.


Димитриев: Нови избори се единственото решение за излез од кризата


Скопје, 8 март, 2017 - 15:12 (META) 

Техничкиот премиер Емил Димитириев, при денешната посета на Делчево, го повтори партискиот став на ВМРО-ДПМНЕ дека предвремени парламентарни избори, кои би биле организирани заедно со локалните, се единствениот излез од политичката криза.

Димитриев забележа дека постизборните дискусии, според него, длабоко задираат во уставното уредување, а не биле дел од предизборната кампања или многу малку се зборувало за тоа.

– Сметам дека ваквите теми не се привилегија на политичките елити, колку и тие да се сметаат за способни да се справуваат со овие процеси. За вакви теми, единствен фактор кој може да каже и да се изјасни е народот на нови парламентарни избори, кои би биле организирани заедно со локалните. Партиите, сето тоа што сметаат да го работат постизборно, ќе мора да го кажат предизборно, бидејќи за тоа треба да добијат легитимитет, за граѓаните да имаат јасна претстава кому го даваат гласот и во кој правец ќе се движат работите во иднина – изјави  Димитриев.

Техничкиот премиер ја коментираше највата за можноста од отворање на бегалски кампови од Македонија, која ја спомена шефот на австриската дипломатија, Себастијан Курц.

– Македонија даде огромен придонес во справувањето со мигрантската криза и тоа беше забележано од сите земји на ЕУ и пошироко. Ние и во иднина ќе се однесуваме така, меѓутоа за евентуално формирање кампови за згрижување бегалци во нашата земја, нашиот став е категорично „не“, бидејќи во државава бегалците доаѓаат од земја членка на ЕУ, земја која е безбедна и не гледаме никаква логика во нашата земја да се формираат бегалски кампови. На тој предлог ние, како држава, се спротивставуваме – рече Димитриев.


Огинар: Време е за одговор на прашањето каква Македонија сакаме


Њујорк, 26 јануари, 2017 - 10:54 (META) 

„Формирањето на Семакедонскиот национален совет – Македониум претставува историски одговор од Македонците насекаде во светот на еден предизвик, на едно одамна поставувано прашање: Каква Македонија сакаме“, вели професорот Нестор Огинар, потпретседател на МНС.

– Тоа е природен и доброволен став на една нација, нашата, македонската, на една неопходна историска потреба од самоорганизирање и од одбрана од повеќе чинители, домашни и туѓи, што го попречуваат националниот и демократски подем на Македонија како заедничка, историска татковина на македонскиот народ – вели Огинар.

Огинар дообјаснува дека МНС – Македониум не е осмислен како паралелна или ривалска организација на која било постоечка македонска организација, вклучително и таа на СМК, туку претставува оправдан историски израз на едно време кое бара дополнување на сè што досега не е остварено, на сè што досега, поради какви било причини, нема дадено плод каков што им е потребен на Македонија и на македонскиот народ.

– Време е, ние Македонците, да се соочиме со вистината дека одговорот на прашањето каква Македонија сакаме, не може и не смее да им биде оставено на тие што досега имале безброј шанси да го одговорат. На тие што, со умисла или без неа, ја претворија Македонија во безличен, непрепознатлив, недефиниран простор на мапата на Европа и едно големо историско име го претворија во нечујно ехо на сите жртви поднесени од стотици генерации Македонци и Македонки. Време е да објавиме јасно и гласно дека не постои партија, организација, претседател или кој било друг чинител што може да зборува од името на бројниот македонски народ, распрскан низ сите меридијани на светот. Да се разбудиме од сонот, зашто само ние Македонците можеме да ја дефинираме, да ја изградиме, да ја дооформиме Македонија и како држава и како нација, чие место заслужено припаѓа на мапата на Европа и на светот – додава Огинар.