Нова урбана акција на „Зачекори напред!“: Идентитетот и манипулациите со него


Скопје, 26 септември, 2018 - 14:56 (META) 

Во рамките на граѓанската кампања „Зачекори напред! Изборот е твој!“ има нова урбано-уметничка акција во Скопје посветена на идентитетот и манипулациите со него.

Акцијата се состои од oколу 20 постери, со различни пораки, поставени во јавниот простор на улица Македонија и скопскиот плоштад.

„Идентитетот (lat.: identitas – еднаквост, истост) претставува внатрешна слика која поединецот или колективот ја создаваат сами за себе, наспроти промените кои се случуваат во околината и општеството. Идентитетот е образец кој поединецот или колективот го манифестираат во своето комуницирање, однесување, само-претставување, и на тој начин го заокружуваат својот систем на вредности, верувања, убедувања и осознавања. Националниот идентитет е само дел од лепезата идентитети кои не формираат како личност. Врз целосното формирање на идентитетот влијаат мноштво особености: јазик, географски одлики, вера, обичаи, кујна, фолклор, традиција, како и ред други одлики: раса, пол, возраст, политички убедувања, лични афинитети и се што ни овозможува да ја создадеме сликата за себеси. Ниту еден договор или каква било промена од „виша сила“, не може да дефинира или промени нечиј идентитет бидејќи тој претставува лична слика за тоа како се гледаме себеси и каде припаѓаме“, се вели во соопштението на „Зачекори напред! Изборот е твој!“.


Владата објави 10 факти за Договорот со Грција: Заштитени се јазикот и идентитетот, нема веќе ФИРОМ


Скопје, 8 август, 2018 - 12:59 (META) 

На помалку од два месеци пред референдумот кој ќе се одржи на 30 септември, Владата на својата веб-страница објави 10 факти за Конечниот договор за решавање на македонско – грчкиот спор за името и за стратешко партнерство.

Според Владата, Договорот е историски најдобра и фер шанса за граѓаните на Македонија.

„Договорот е влог во македонската иднина, со кој го расчистуваме патот на нашата земја за влез во НАТО и за почеток на преговори за ЕУ. Стануваме член на семејствата на НАТО и ЕУ нациите кои уживаат силен економски развој. Со Договорот носиме подобар живот за сите граѓани и го чуваме богатото историско и културно наследство кое ја има направено нашата македонска нација славна“, се вели во првиот факт.

Понатаму од владата потенцираат дека со Договорот заштитен е македонскиот идентитет и македонскиот јазик, а државјанството е македонско сега и во иднина. Од таму додаваат дека химната, грбот и знамето не се менуваат и дека државните симболи не биле дел од преговарачкиот процес. Kодот на земјата останува да биде МК и МКД, како што е официјално определено од Меѓународната организација на стандардизација (ИСО).

Како придобивки со постигнувањето Договорот, од Владата ги истакнуваат поканата за членство во НАТО и добивањето на датум за почеток на преговори за членство во ЕУ.

„Договорот гарантира македонско-грчко пријателство и соработка. Ја зголемува културната соработка помеѓу Македонија и Грција во делот на уметностите, танцот, киното, музиката, театрите и спортот. Го олеснува патувањето преку модернизирање и изградба на нови гранични премини. Ја зголемува соработката помеѓу двете држави во борбата против организираниот и прекуграничниот криминал, како и тероризмот и економскиот криминал“, потенцираат од владината прес-служба.

Како последен 10. факт, од Владата велат дека ќе престане да важи референцата ФИРОМ (ПЈРМ) и нашата земја ќе биде заведена во Обединетите нации под името Република Северна Македонија, преведено на сите јазици.


Коѕијас: Грција не треба да се плаши од компромис со една мала држава


Атина, 28 март, 2018 - 14:03 (META) 

Името не треба да има иредентистички елементи, треба да биде сложено со географска одредница, со придавка и да разграничува дека не станува збор за грчката Македонија, вели шефот на грчката дипломатија Никос Коѕијас во обраќањето на промоцијата на книгата „Македонското прашање“ на Никос Мерѕос.

– Треба да најдеме сложено име што ќе ја изразува посебноста и географската позиција на оваа држава, а во исто време нема да навредува ниту една од двете страни – смета Коѕијас.

Шефот на грчката дипломатија рече и дека „патриотизам не е да го негираш правото на другата страна да е горда на нејзината историја, доколку е вистинска, а не фалсификувана“.

– Патриотизам за мене значи сложено име. Ова сложено име треба да важи за сите, бидејќи во преговорите во изминатите години имаше една забуна, дали треба да важи само за меѓународни организација, дали треба да важи за меѓудржавни односи, а ова многумина го нарекуваат ерга омнес. Но, вистинското ерга омнес е да важи за сите и за сите односи, односно и за внатрешноста. Да важи и да биде изразено со меѓународниот договор што ќе го потпишеме во ОН и со промените што треба да се направат во нивниот Устав – рече Коѕијас.

Говорејќи за промената на Уставот, рече дека е неопходна не само бидејќи тоа е грчко барање и гаранција за Атина, туку е неопходна и за внатрешни гаранции и за некоја идна влада, затоа што „следниот Груевски 2“ ќе излезе со обвинувања.

Во однос на ерга омнес и зошто е тоа потребно, Коѕијас објасни дека не треба да се остави простор во иднина да се родат нови проблеми и нови секојдневни препукувања меѓу двете страни.

Според шефот на грчката дипломатија, договорот треба да биде стабилен и издржлив и да ја развива довербата меѓу двете страни. Порача дека е потребно да се направи компромис, бидејќи Грција не треба да се плаши.

– Ние не може да се плашиме, силната Грција, Грција со долга историја, Грција на Александар Велики, Грција со големата историја, филозофија на Аристотел итн, да се плаши да направи компромис со една мала држава што се уште не си го има најдено нејзиниот идентитет – додаде Коѕијас и објасни дека „луѓето од соседната земја, прифаќаат дека зборовите Македонија и македонски јазик не се однесуваат на Александар Велики“.

Како што јави дописникот на МИА, Никос Коѕијас во долгото и опширно обраќање во преполниот амфитеатар во една од зградите на грчкото МНР, направил историска ретроспектива на проблемот со името.

– Не е правилно да велиме дека сега ќе го дадеме името „Македонија“. Не одиме на крштевка. Детето постои и се вика Македонија, самите си се нарекуваат така барем еден век. И како Македонија постојат како дел од политички ентитет во разни облици пред 70 години – рече Коѕијас, споменувајќи го фактот дека во 1977 година македонскиот јазик, без Грција да реагира, бил признат од ОН.

Шефот на грчката дипломатија потсети дека Македонија како поширок географски регион припаѓа на четири држави, а не само на Грција.

– Моите пријатели во Скопје, се или се обидуваат да станат најмлада европска држава, најмлада европска нација, ако го тргнеме Косово настрана, се обидуваат да најдат еден историски идентитет на еден, според нас, погрешен начин и наместо да се ограничат на тоа дека се народ составен од различни заедници, од кои мнозинството се Словени, со втора голема заедница Албанците, со Власи итн., се обидоа да го спојат, да го цементираат нивното постоење со националната историја што ја немаа и со споменување на македонизмот во историјата и идентитетот. И тука се роди иредентизмот. И очигледно е дека проблемот со името, го концентрира иредентизмот во историјата, во образованието, во симболите, се концентрира во нивната секојдневна свест – рече Коѕијас, а во истиот контекст како голем чекор ги спомена преименувањата на аеродромот и автопатот.


Заев: Сакаме решение за името, но не по секоја цена – Уставот еднаш го сменивме


Скопје, 7 февруари, 2018 - 14:12 (META) 

Решението на спорот со името мора да го гарантира идентитетот и достоинството на двете страни. Ќе направиме се за да изнајдеме решение на овој горлив 25-годишен проблем, но не по секоја цена, рече денеска премиерот Зоран Заев, одговарајќи на новинарско прашање на прес-конференција во Владата.

– Став на Владата е дека е прифатливо име со географска одредница. Тоа го темелам на внатрешната дебата која што ја имаме во Македонија. Достоинството и идентитетот се важни, јас сум убеден дека Македонија може со консензус по ова прашање да најде решение во интерес на иднината – рече Заев.

На прашање дали решението вклучува промена на Уставот на Македонија, премиерот рече дека тоа се ставови на Грците, но дека ние во Македонија имаме други ставови и услови.

– Македонија го промени својот Устав во 1993 година и тоа е голем чекор. Во моментот се што правиме е да докажеме дека Македонија нема никакви аспирации, иредентистички побуди. Многу е важно да успееме, мило ми е што имаме пријателски односи. Секако постојат радикални структури и тука и во Грција, но треба да направиме се да се изнајде решение – изјави Заев.

За средбата во Давос, Заев рече дека била од информативен карактер, дека тој ги слушнал позициите на грчката страна искажани од грчкиот премиер Алексис Ципрас, а тие ги слушнале ставовите од македонската страна. Тој потенцираше дека сепак преговарачкиот процес останува да се води под посредство со медијаторот на ОН, Метју Нимиц.

Заев информираше дека средбите на преговарачките тимови продолжуваат затоа што, како што рече, времето е кратко и треба брзо да се делува. Тој најави дека ќе има неколку средби на преговарачките тимови во февруари и дека најверојатно веќе следната недела ќе има средба помеѓу министрите за надворешни работи на двете земји.


Изјавите на Димитров не помагаат, вели портпаролот на грчката влада


Атина, 2 февруари, 2018 - 13:52 (META) 

Изјавите на Димитров не помагаат, изјавил портпаролот на грчката влада, Димитрис Ѕанакопулос за грчката државна телевизија „ЕРТ“, коментирајќи ги ставовите што вчера ги изнесе шефот на македонската дипломатија по средбата со медијаторот на Обединетите нации во спорот за името, Метју Нимиц, пренесува МИА.

– Изјавите на господинот Димитров, за време на преговорите, не помагаат, бидејќи тој знае многу добро, а за овие теми разговараа и двајцата лидери господинот Заев и господинот Ципрас, дека постојат конкретни барања, политички барања за да можеме да стигнеме до заемно прифатлив договор – изјави Ѕанакопулос.

Портпаролот на грчката влада изјавил дека во преговорите Атина смета дека постојат „три основни столба на грчките позиции“.

– Првото е сложено име. Второто е она што го нарекуваме „ерга омнес“ односно сложено име за севкупна употреба, што го вклучува и соседот, што значи дека е неопходна промена во уставот, за да може ова „ерга омнес“ да се реализира. И третото е она што се однесува на иредентизмот, што исто така се поврзува со промени во уставот. И мислам дека добро ќе биде да не го предвидуваат резултатот и да не поставуваат црвени линии – изјави Ѕанакопулос.

Инаку, Димитров на вчерашната прес-конференција рече дека „не може никој, па ни нашиот сосед Грција, да го сопре нашето право, правото на моите сограѓани да бидат Македонци и да зборуваат македонски јазик кој е од групата на словенските јазици.


Иванов до Нимиц: Сакаме решение за името кое нема да задира во идентитетот


Скопје, 1 февруари, 2018 - 14:36 (META) 

Македонија ќе продолжи и понатаму конструктивно да учествува во процесот за изнаоѓање на решение на наметнатиот спор од страна на Грција, кое нема да задира во идентитетот на македонскиот народ и нема да го наруши достоинството на македонските граѓани, истакнал претседателот Ѓорге Иванов на средбата со медијаторот Метју Нимиц.

На средбата, како што соопштија од кабинетот на Иванов, била разгледана актуелната состојба на процесот кој се води под покровителство на ОН и биле разменети информации и мислења поврзани со идеите и размислувањата на Нимиц, како и за исходот од неговата посета на Атина.

„Претседателот Иванов потенцираше дека решението за разликата околу името може да се бара само во рамките на Обединетите нации, и го реафирмираше ставот дека е потребно стриктно придржување до рамката во која се водат разговорите – Повелбата на Обединетите нации, резолуциите на Советот за безбедност, Времената спогодба и пресудата од Меѓународниот суд на правдата“, стои во соопштението.

Иванов го поздравил интензивирањето на дијалогот и потензирал дека надминувањето на разликата околу името мора да биде во согласност со меѓународното право и меѓународно преземените обврски.


Димитров: Нимиц донесе „идеи што не се толку лоши, но и идеи што не се толку добри“


Скопје, 1 февруари, 2018 - 14:28 (META) 

Посредникот во преговорите за името помеѓу Македонија и Грција, Метју Нимиц, денеска на прес-конфренција по средбата со министерот, Никола Димитров, порача дека е поголем оптимист од кога било претходно за разрешување на спорот.

– Што се однесува до прашањето за идентитетот на народот што живее тука, настрана од се што се слушнало од грчка страна за негирање на идентитетот јас сум убеден дека решението што е можно, е потполно во согласност со зачувувањето и дури и засилување на идентитетот. Јас сум многу оптимист дека иако има разлики меѓу двете земји е можно решение, а од Атина не слушнав ништо дека го оспорува идентитетот – рече Нимиц.

Министерот Димитров рече дека не можеме вечно да останеме во рововите на историјата и дека е време да се дојде до решение, но иако кај македонската страна има силна волја за тоа, ќе треба да се види што мисли Грција.

– Не може никој, па ни нашиот сосед Грција, да го сопре нашето право, правото на моите сограѓани да бидат Македонци и да зборуваат македонски јазик кој е од групата на словенските јазици. За да има решение многу е важен процесот во кој ни помага посредникот Нимиц, но исто така е многу важно да се однесуваме внимателно во јавноста. Колку повеќе зборуваме за црвени линии во јавноста, толку повеќе се намалува шансата да најдеме решение што ќе биде прифатено од граѓаните од двете страни. Од наша страна има волја и се надевам дека и од другата страна има волја за решение. Истовремено, сакам да им упатам порака на оние граѓани што сакаат решение дека ако има достоинствен начин што ќе ги почитува идентитетот и на двете страни, низ овој процес ние ќе го најдеме на овој начин. Може и да нема таков начин но наше е да направиме се што можеме – рече Димитров.

Во однос на пакетот предлози што Нимиц го донесе и во Атина и во Скопје, Димитров не сакаше подетално да зборува и порача дека „таму има и решенија што не се толку добри“.

– Денеска разговаравме детално и многу сериозно и му кажав на медијаторот Нимиц, дека таму (во пакетот предлози) има идеи што не се толку лоши, но и идеи што не се толку добри. Се надевам дека медијаторот ќе каже кои се следните чекори врз основа на тоа што го добил во Грција и тоа што ќе го добие тука ќе го дефинира процесот – додаде Димитров.

Посредникот Нимиц одговарајќи на новинарско прашање нагласи дека е поголем оптимист од кога било претходно во текот на преговарачкиот процес, но нагласи дека тој е само посредник, а одлуките сепак ќе останат на двете страни.


Бутарис: Терминот „Македонија“ не е закана за идентитетот на Грција


Солун, 21 јануари, 2018 - 20:31 (META) 

Градоначалникот на Солун, Јанис Бутарис, изјави дека Грците се слабо информирани и не разбираат дека Скопје нема да им го украде идентитетот ако името на земјата го содржи зборот Македонија.

-Многу сум разочаран што по 25 години спор за името ние сме во истата позиција. Психологијата и размислувањето на голем број грчки граѓани не е променето. Проблемот е во тоа што луѓето сметаат дека Скопје ќе ни го одзеде идентитетот, никој нема да го направи тоа. Тие не се закана за нас. Луѓето се слабо информирани и си замислуваат разни нешта што не се реални. Веруваат дека ќе ни биде украдена историјата – рече Бутарис за бугарската БГНЕС.

Изјавата следуваше по антимакедонските протести во Солун кон кои се приклучија илјадници Грци. Организатори на собирот беа грчки здруженија и организации од дијаспората, кои имаат поддршка и од политички партии, спортски и христијански здруженија, градоначалници и митрополити од различни општини. Преку протестот, бараа да не се користи терминот „Македонија“ во решението на спорот на нашата земја.


Нимиц: Со новиот пакет предлози за името идентитетот ви е безбеден


Њујорк, 19 јануари, 2018 - 21:33 (META) 

Посредникот на Обединетите нации, Метју Нимиц, во интервју за „Сител“ вели дека, според него во новиот пакет предлози на решавање на спорот за името меѓу Македонија и Грција, идентитетот на државата и народот е безбеден и верува дека со неговите идеи тој е повеќе зајакнат отколку оштетен.

– Сметам дека договорот е сеопфатен, се обидов да ги опфатам најголемите прашања, не сите, но најголемите. Се обидов да најдам начин да се справам со прашањето за името на начин кој ќе биде прифатлив за двете страни. Мојот личен став е дека не навлегува во индентитетот, туку напротив го зацврстува и зајакнува идентитетот на државата и на народот. Од мојата комуникација со луѓето во вашата земја, сметам дека имаат многу силен идентитет, кој го поседувате многу години. Независни сте 25 години, но имавте идентитет и кога бевте дел од Југославија, имавте идентитет кога бевте дел од Кралството Србија и од Отоманската империја – вели Нимиц.

Според него, за разлика од порано, сега целата ситуација за решавање на спорот е променета и во Скопје и во Атина.

– Атина излегува од економска криза, поуверени се и пробуваат да играат поголема улога во регионот. Во Скопје имаме нова влада која се чини дека е посветена на решавање на проблемот. Сега имам две влади со сериозни луѓе, двајца серизони премиери и двајца министри за надворешни работи, тука е опозицијата и медиумите и еднаш ќе мора да донесете одлука. Сега е моментот бидејќи нема избори. Да не се чека уште 25 години – вели Нимиц.

Тој изјави дека за предлозите, кои се на четири страници, е потребно време да се проучат од двете страни во спорот бидејќи не се работи за мислење на само еден човек во Скопје и во Атина.

– Треба време за да размислат, потребни се три-четири дена, потоа разговор. Мојата идеја е да го посетам регионот доколку сакаат министрите за надворешни работи на двете земји и доколку се слободни во следните десетина дена. Да седнеме во двете земји и да имаме сериозни разговори за тоа што тие сметаат дека е корисно и да најдеме заеднички компромис – вели посредникот.

Во врска со изјавата на македонскиот преговарач, амбасадоротт Васко Наумовски дека предлозите се далеку од достоинствено решение, Нимиц вели дека не би сакал да критикува, но додава дека брзо излегување со имресии не е добро.


OJO идентификувало еден од убиените напаѓачи во менувачницата во Кисела Вода


Скопје, 27 ноември, 2017 - 22:47 (META) 

Основното јавно обвинителство Скопје извршило увид во менувачницата во Кисела Вода каде попладнево при обид за разбојништво две лица беа убиени. Од ОЈО информираат дека познат е идентитетот на едно од починатите лица.

Надлежен јавен обвинител издал наредба за обдукција на починатите и за вештачење на прибраниот доказен материјал.

„Обезбедени се траги од местото на настанот, како и видеонадзорот од менувачницата. Идентитетот на едно од починатите лица е утврден. Во моментов се преземат дејства за идентификација на второто починато лице“, велат од ОЈО.

Двојното убиство се случи попладнево кога две вооружени лица се обиделе да ограбат менувачница на улицата Борис Трајковски во скопската населба Кисела Вода. Сопственикот на менувачницата по физичка пресметка со напаѓачите, пукал во нив и ги убил. Од ОЈО информираат дека му е укажана медицинска помош, поради добиени телесни повреди.