!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Откриени 50 илегални мигранти во Хрватска


Загреб, 18 декември, 2016 - 17:13 (META) 

Околу 50 лица, за кои се претпоставува дека се мигранти, се откриени при редовна контрола на товарно возило со странски регистарски таблици во околина на градот Новска, во близина на границата со БИХ, соопшти хрватската полиција.

Полицијата соопшти дека некои од луѓето биле во многу тешка здравствена состојба, поради што веднаш била повикана итна медицинска помош и сите кои имале потреба се хоспитализирани.

Мигрантите најверојатно се државјани на арапските земји, а полицијата веќе почнала да ги сослушува возачот и патниците, за кои се претпоставува дека нелегално ја преминале границата.


Попоски во Загреб ќе го преземе претседавањето со Јадранската повелба


Загреб, 16 декември, 2016 - 10:22 (META) 

Вицепремиерот и шеф на македонската дипломатија, Никола Попоски, денеска ќе учествува на состанокот на министрите за надворешни работи на земјите членки на Јадранската повелба: Македонија, Албанија, Хрватска, Црна Гора, Босна и Херцеговина и САД, што се одржува во Загреб во рамки на хрватското претседавање со повелбата.

Како што соопштуваат од МНР, на состанокот се очекува министрите да разменат мислења за актуелната политичка состојба и за безбедносните предизвици во ЈИЕ, со посебен акцент на евроатлантските процеси во регионот.

На министерскиот состанок, Македонија и формално ќе го преземе претседавањето со Јадранската повелба.


Вучиќ: Србија го продолжува европскиот пат, но не дозволува понижување


Белград, 13 декември, 2016 - 21:28 (META) 

Премиерот на Србија, Александар Вучиќ, рече дека по повод хрватската блокада за отворање на поглавјето 26 во преговорите на Србија со Европската Унија, Србија не сака конфликти, дека прави компромиси, но дека нема да дозволи никој да ја понижува.

– Србија никогаш нема да може да ја газите, ниту да ја понижувате. Тоа е основата на нашите вредности, со тоа влеговме во преговорите, со тоа ќе излеземе, се надевам како членови на ЕУ, а ако не, тогаш како модерна држава – изјави Вучиќ на прес-конференција за новинари по повод отворањето на поглавјата 5 и 25.

Тој рече дека го напуштил Брисел затоа што не добил логично и оправдано објаснување зошто покрај поглавјата 5 и 25, кои се денеска отворени, не е отворено и поглавјето 26 кое се однесува на образование и култура.

Вучиќ нагласи дека Хрватска е единствена земја што за тоа не дала согласност. Како една од основните причини за хрватската блокада, медиумите ги наведуваат наставата и учебниците на хрватски јазик во Србија.

Вучиќ рече дека Србија ќе продолжи по својот европски пат и ќе води сметка пред сè за своите национални и државни интереси.

– Со поглавјата може да прават што сакаат, каде сакаат и кога сакаат. Ние ќе продолжиме со нашата соработка со ЕУ, но и нема да се криеме туку ќе развиваме најдобри односи и со Кина, Русија и со сите други надворешни фактори – додаде Вучиќ.


Хрватска ја блокира Србија во отворање на поглавјето 26


Скопје, 12 декември, 2016 - 19:39 (META) 

Српскиот премиер Александар Вучиќ денеска во Брисел соопшти дека Хрватска го блокира отворањето на поглавјето 26 од пристапните преговори на Србија со ЕУ, пренесе српската ТВ „Прва телевизија“.

Вучиќ денеска се закани дека e подготвен уште вечерва да го напушти Брисел доколку не се постигне договор за отстранување на блокадата од Хрватска.

Како што јавува српската телевизија, Вучиќ, кој денеска допатува во Брисел, изјавил дека во случај да не се постигне договор со високата претставничка за надворешна политика на ЕУ, Федерика Могерини, за деблокада на преговорите, тој нема да присуствува на утрешната меѓувладина конференција, на која треба да се разговара за отворање поглавја.


Чоколади ги скараа Белград и Загреб


Белград, 9 декември, 2016 - 14:49 (META) 

Премиерот на Србија, Александар Вучиќ, денеска по повод извинувањето на претседателката на Хрватска, Колинда Грабар-Китаровиќ, поради делењето чоколади произведени во Србија на децата во Дубровник, изјави дека е среќен и горд што такво нешто, односно такво извинување, не дошло ниту од него, ниту од претседателот на државата, Томислав Николиќ, ниту од кој било друг во Србија.

Претседателката на Хрватска, Колинда Грабар-Китаровиќ, во средата неделава се извини затоа што на децата во Дубровник им поделила чоколади произведени во Србија, наведувајќи дека и самата била „непријатно изненадена“ и дека „спорните“ чоколади ќе ги „замени со хрватски производи“.

„Кај нас хрватската стока нормално доаѓа и поминува на пазарот, немаме проблеми со тоа. Со нашата стока случајот не е таков…“, рече Вучиќ.

Тој додаде дека изјавите на хрватската претседателка многу зборуваат за проблемите и за атмосферата во таа земја, но тоа не треба да биде пречка да продолжи градењето на добри односи.

Претседателот на Србија, Томислав Николиќ, изјави дека извинувањето на претседателката на Хрватска поради чоколадите од Србија е „јасен знак дека оваа држава не сака добри односи со Србија“.

„Паѓаат во вода сите приказни за пријателство и дури сега можеме да очекуваме непријатности од Хрватска, ако проблем им се чоколадите“, изјави Николиќ.


Вулин: Во Хрватска се буди фашизмот, а ЕУ молчи


Белград, 4 декември, 2016 - 16:55 (META) 

Српскиот министер за труд, боречки и социјални прашања, Александар Вулин, денеска изјави дека во Хрватска веќе со години трае будењето на фашизмот и апелираше до Хрватска, но и до меѓународната заедница да ја осудат ваквата појава.

„Ја предупредуваме и хрватската јавност и целиот свет дека фашизмот во Хрватска повторно се буди“, рече Вулин пред новинарите во Алибунар, коментирајќи го откривањето на спомен-обележјето од страна на хрватските ветерани, во центарот на Јасеновац, недалеку од поранешниот усташки концентрационен логор, на кое е врежан усташкиот поздрав „За дом спремни“.

Вулин изјави дека такво нешто „може да се очекува од земја во која претседателката на државата се фотографира со усташко знаме и во тоа не гледа ништо спорно“. Истакнувајќи дека тоа повеќе не е прашање ниту за Србија, ниту за Хрватска, Вулин оцени дека прашањето „до кога ќе молчат“ се однесува на целиот свет, пред сè на Европската Унија.

„Кога некој би поставил табла со реченицата „Зиг хајл“ (поздрав од времето на нацистичка Германија н.з.), во Маутхаузен (нацистички концентрационен логор во Австрија од Втората светска војна н.з.) дали некој би молчел. Дали некој може да прифати на губилиштето на стотици илјади Евреи и на сите оние кои беа убиени од нацистите, некој да напише „Зиг хајл“. Зошто тогаш молчат кога на губилиштето на стотици илјади Срби, Евреи и Роми се појавува ’За дом спремни’“, изјави Вулин.

Тој додаде дека за секое злосторство кое ќе остане неказнето останува опасноста тоа да се повтори и апелираше до Европа „заради самата себе и заради нејзиниот опстанок да го осуди будењето на фашизмот во една земја членка на ЕУ“.


Анте Готовина назначен за советник на хрватскиот министер за одбрана


Загреб, 17 ноември, 2016 - 17:59 (META) 

Поранешниот генерал на хрватската војска, Анте Готовина, е назначен за советник на министерот за одбрана на Хрватска, Дамир Крстичевиќ, пренесува балканскиот сервис на „Радио Слободна Европа“. Ваквата одлука ја донела Владата на Хрватска на седница одржана во Вуковар, а неа ја потврдил и министерот Крстичевиќ на својот фејсбук-профил.

„Мило ми е што мојот голем пријател и наш херој го прифати мојот предлог и споменатиот ангажман и уверен сум дека генералот со своето знаење и способности значајно ќе придонесе за националната безбедност и за развојот на вооружените сили. Добро ни дојдовте генерале“, напишал Крстичевиќ.

Готовина, иако има право на финансиски надомест за вршењето на функцијата, ја одбил платата.

Пред четири години Хашкиот суд за воени злосторства на просторите на поранешна Југославија, донесе пресуда со која од одговорност ги ослободи генералите Анте Готовина и Младен Маркач. Судот на 16 ноември 2012 година ги отфрли заклучоците и во најголем дел ја поништи првостепената пресуда со која Готовина и Маркач беа осудени на 24, односно на 18 години затвор за воени злосторства извршени за време и по акцијата „Бура“ во 1995 година.


Горан Мариќ не му понудил оставка на хрватскиот премиер Андреј Пленковиќ


Загреб, 25 октомври, 2016 - 16:31 (META) 

Хрватскиот министер без ресор, Горан Мариќ, ги демантираше медиумските информации дека понудил оставка ако не добие свој ресор и најави дека хрватското државно биро за државен имот ќе се трансформира во министерство со кое, најверојатно, ќе раководи тој.

Во изјава за новинарите, по состанокот на премиерот Андреј Пленковиќ со министрите, Мариќ негираше дека поднел оставка на местото министер во владата со услов да добие ресор за министерството што го раководи.

– Не. Па, не ми треба министерство. Ако на Владата ѝ треба министерство, мене не ми треба министерство – рече Мариќ, одговарајќи на новинарско прашање дали синоќа на премиерот му рекол дека ќе даде оставка ако не добие ресор.

Мариќ соопшти дека на денешната седница на владиниот кабинет било одлучено следната недела бирото за управување со државен имот да се трансформира во министерство и оти со него веројатно ќе раководи тој.

– Владата не е „желботека“ да исполнува нечии желби, така што јас немам некои посебни, ексклузивни желби – рече Мариќ.


Прва оставка во новата хрватска влада


Загреб, 25 октомври, 2016 - 15:23 (META) 

Министерот без ресор во хрватската влада, Горан Мариќ од Хрватска демократска заедница (ХДЗ), денеска поднесе оставка, јавува „Јутарни лист“.

Причина за оставката, како што навел Мариќ, е што без јасен ресор не сака да биде во владата и побара неговото министерство да се вика Министерство за државен имот, наведува весникот.

По вчерашниот состанок со премиерот Андреј Пленковиќ, кој траел цели два часа, Мариќ одлучил да се врати во Собранието.

Засега нема официјална потврда од хрватската влада за оставката на Мариќ.


Словенија поставува ограда на граничните премини со Хрватска


Љубљана, 22 октомври, 2016 - 10:16 (META) 

Словенија изминатите два дена почнала со поставување метална ограда на двата најголеми гранични премини со Хрватска, Брегана – Обрежје и Грушковје – Мацељ, јавуваат словенечките медиуми, повикувајќи се на информации од официјални претставници на министерството за внатрешни работи на земјата.

Оградата, според информациите, се поставува како превентивна мерка во случај на нов бран мигранти.

„Ако дојде до нов миграциски бран, граничните премини ќе бидат затворени“, изјавил државниот секретар на словенечкото МВР, Андреј Шпенга, додавајќи дека Словенија ќе стори сè миграцијата да не ја загрози безбедноста на нејзините граѓаните.

Словенија, како што пренесува балканскиот сервис на „Радио Слободна Европа“, досега има поставено технички бариери за насочување на мигрантите на границата со Хрватска во должина од 183 километри.

Металните огради кои почнале да се поставуваат деновиве ќе се протегаат во должина од 27 километри, а остатокот ќе биде бодликава жица.