!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Над Сплит облак од чад, во Бока Которска гаси пожарникарски авион


Сплит, 19 јули, 2017 - 11:44 (META) 

Голем облак од чад се надвива над хрватскиот град Сплит, кој од понеделникот се бори со пожарите, а изгореа и некои куќи на периферијата. Утрово уште беше активен пожарот на планината Мосор, поради што треба да се интервенира со „канадери“.

Пожарникарите се и понатаму на терен, а во целиот град се до Солин се чувствува непријатен мирис. Поради тоа пожарникарите им препорачуваат на граѓаните да ги затворат прозорците и да ги користат климатизерите. На отворено, тешко се дише иако надлежните смируваат дека воздухот не е толку опасен.

Вчера гореше и кај Љубиње, во Босна и Херцеговина, но утрово сите пожари се изгаснати. Шумските пожари таму беснееја пет дена, а од завчера ги гаснеше хеликоптер на вооружените сили на БИХ. Досега се изгорени илјадници хектари шума и ниска вегетација, но и стока, некои објекти и четириесетина бандери.

На црногорското приморје, пак, од утрово пожарите ги гасне и украински противпожарен авион, кој има капацитет од осум тони вода. Тој првпат полета на задача во 7.20 утрово, од аеродромот во Тиват.

Пожарите се предизвикани од високата температура што предизвика сушење на вегетацијата, а се ширеа бргу поради силниот ветер долж јадранскиот брег во изминатите денови.


Иванов ќе учествува на самитот на ПСЈИЕ во Дубровник


Дубровник, 30 јуни, 2017 - 10:38 (META) 

Претседателот Ѓорге Иванов денеска и утре ќе престојува во работна посета на Република Хрватска, каде ќе учествува на самитот на шефови на држави и на влади на земјите учеснички во Процесот за соработка во Југоисточна Европа (ПСЈИЕ), што се одржува во Дубровник.

Иванов денеска ќе има обраќање на пленарна сесија на самитот и ќе оствари средба со претседателката на Хрватска, Колинда Грабар-Китаровиќ.

Утре Иванов ќе учествува и ќе се обрати на „Дубровник форум 2017“, што се одржува на тема „Јадранско-медитеранска соработка и безбедноста на Југоисточна Европа“.

На самитот на шефови на држави и на влади на ПСЈИЕ, чиј домаќин е Република Хрватска, најавено е учеството на претседателот на Словенија, Борут Пахор, претседателот на Србија, Александар Вучиќ, претседателот на Црна Гора, Филип Вујановиќ, претседателот на Косово, Хашим Тачи, како и на премиерот на Бугарија, Бојко Борисов.


Словенија и Хрватска ќе работат земјите од Западен Балкан да станат дел од ЕУ


Крањ, 3 јуни, 2017 - 18:28 (META) 

Словенија и Хрватска ќе продолжат да работат на зачленување на земјите од Западен Балкан во ЕУ, што ќе придонесе за зајакнување на довербата и на стабилноста во регионот. Ова го истакнаа министрите за надворешни работи на двете земји, Карл Ерјавец и Давор Иво Штир, на прес-конференција во Брдо кај Крањ, каде денеска се одржува состанокот на лидерите на Процесот Брдо – Бриони, пренесуваат медиумите.

Ерјавец и Штир оценија дека клучно за државите од Западен Балкан е да ги спроведат потребните реформи, а проширувањето да остане главна цел на Унијата.

– Словенија го поддржува процесот на проширување и јасно е дека регионот веќе ѝ припаѓа на ЕУ. Сепак, потребно е државите од Западен Балкан да ги спроведат реформите, да изградат институции, да го зајакнат владеењето на правото и да се справат со корупцијата и со организираниот криминал. Уверени сме дека стабилен Западен Балкан придонесува за стабилноста на ЕУ – изјави словенечкиот министер за надворешни работи, Карл Ерјавец.

Министерот за надворешни работи на Хрватска, Давор Иво Штир, истакна дека државите што сакаат да станат членки на ЕУ мора да ги спроведат реформите, но кога ќе бидат исполнети критериумите, вратата за членство мора да биде отворена. Тој нагласи дека ќе работи проширувањето да се одржи на дневниот ред на Унијата, додавајќи дека, всушност, станува збор за процес кој повеќе е „консолидација на Европа, отколку проширување“.

На состанокот на лидери во Брдо кај Крањ учествуваат и претседателот на Македонија, Ѓорге Иванов, и шефот на македонската дипломатија, Никола Димитров.


Локални избори во Хрватска


Загреб, 21 мај, 2017 - 11:03 (META) 

Во Хрватска утринава во седум часот се отворени избирачките места на кои граѓаните ќе можат до 19 часа да гласаат на локалните избори.

Право на глас имаат околу 3.72 милиони жители, а за 9.500 различни функции на локално и регионално ниво на власт пријавени се повеќе од 47.000 кандидати.

Изборите ги следат повеќе од 12.000 набљудувачи.


Министерски состанок за „Агрокор“ утре во Белград


Белград, 18 април, 2017 - 15:14 (META) 

Во Белград за утре е закажан состанок на министрите за трговија и за економија на Србија, Словенија, Босна и Херцеговина и на Црна Гора, на кој ќе се разговара за случајот со хрватскиот концерн „Агрокор“.

На состанокот, на кој не се поканети претставници од Хрватска, се очекува да се стане збор за тоа како да се задржат работните места во фирмите што се во состав на „Агрокор“, да се заштитат интересите на набавувачите и како да се спречи одлив на пари од фирмите на „Агрокор“ во регионот во матичната компанија.

Во состав на „Агрокор“, чие седиште е во Загреб, има повеќе од 60 фирми од земјите од регионот, кои вработуваат околу 60.000 луѓе.

„Агрокор“ во Србија е сопственик на фирмите „Меркатор С“, „Дијамант“, „Фриком“, „МГ Мивела“, „Кикиндски млин“ и „Нова слога“, кои вработуваат околу 11.000 работници.

Хрватскиот гигант „Агрокор“, кон крајот на минатиот месец потпиша предстечаен договор со банките и со другите кредитори, на кои им должи околу 10 милијарди евра, за да се направи напор да се задржи ликвидноста на компанијата. Сметките на „Агрокор“ се блокирани поради долг за даноци од околу 10 милиони евра.


АХВ: Во Македонија нема увезено пилешко месо со салмонела од Хрватска


Скопје, 16 април, 2017 - 16:05 (META) 

Во Република Македонија не се увезени преработки од месо од производителот „Перутнина“ од Птуј, со датум на производство и лот за кој хрватското Министерство за земјоделство вчеравечер наредило повлекување од пазарот во Република Хрватска поради утврдено присуство на бактеријата салмонела, соопшти Агенцијата за храна и ветеринарство (АХВ).

Од агенцијата наведуваат контролата што ја извршиле дежурните инспекциски тимови е покажа дека преку Системот за брзо известување за храна и храна за животни на Европската унија (RASSF), не е добиена нотификација дека небезбедна пратка од овој тип е пласирана на македонскиот пазар.

Во соопштението се наведува дека нема нотификација ниту дека на македонскиот пазар се пласирани производите на земјоделското стопанство „Ореховец“ од Хрватска, чии производи поради присуство на салмонела исто така повлечени од хрватскиот пазар.


Санадер осуден на четири и пол години затвор за земање мито


Загреб, 7 април, 2017 - 13:14 (META) 

Поранешниот премиер на Хрватска, Иво Санадер, по четири години судење, денеска е осуден на четири и пол години затвор поради обвинението дека примил „провизија“ од 17 милиони куни, односно 2,3 милиони евра.

Како што наведуваат хрватските медиуми, Санадер добил мито откако Министерството за регионален развој, со кое раководел Петар Чобанковиќ, во 2009 година купило зграда од поранешен пратеник на ХДЗ и сопственик на месарница, Стјепан Фиолиќ.

Бидејќи е осуден на казна помала од пет години, Санадер нема да оди в затвор сè додека пресудата не стане правосилна.


Албанија и Хрватска му пишаа на НАТО дека Србија му се заканува на Косово


Приштина, 16 февруари, 2017 - 14:13 (META) 

Министрите за одбрана на Албанија и на Хрватска, Мими Кодели и Дамир Крстичевиќ, му пишале на генералниот секретар на НАТО Јенс Столтенберг за најновите случувања на Косово, пишуваат приштинските медиуми.

Во писмото, Кодели и Крстичевиќ ја осудуваат националистичката реторика на српските власти, кои како што се наведува, има за дел да го поткопа суверенитетот на Косово и да ја дестабилизира безбедносната ситуација во регионот на Западен Балкан.

Кодели и Крстичевиќ го повикале Столтенберг да ги преиспита оперативни план мировната мисија на Косово и да ја поддржи трансформацијата на Косовските безбедносни сили во Вооружени сили на Косово.


Хрватски спортисти повредени во сообраќајка во Италија


Рим, 1 февруари, 2017 - 11:30 (META) 

Комби со кое се превезувале осум хрватски спортисти, се судрило со камион во Италија, а во судирот има и тешко повредени.

Како што наведува „Јутарњи лист“, репрезентативците во мечување на Хрватска се враќале од турнир во Франција, а повредените се префрлени во болница во Бреши.

По несреќата, кон местото на судирот се упатиле пожарникари и итна помош, а интервенирал и хеликоптер.

Меѓу повредените се наоѓа и најдобриот мечувалец во светот во јуниорска конкуренција, Петар Филеш, како и хрватскиот репрезентациски селектор Дарко Ломов. Медиумите известуваат дека повредена е натпреварувачката Леа Лија и дека таа ќе треба да се оперира.


Евреите во Хрватска ги бојкотираа церемониите за Денот на Холокаустот


Загреб, 27 јануари, 2017 - 18:57 (META) 

Додека низ светот со бројни церемонии се одбележуваше Денот на сеќавање на жртвите на Холокаустот, во Хрватска одбележувањето беше поматено од бојкотот на Еврејската заедница на државната церемонија. Нејзиниот став е дека конзервативната влада не прави доволно за спречување на пронацистичките пројави во Хрватска.

Лидерот на Хрватската еврејска заедница, Огнен Краус, изјави дека одлуката за бојкот била донесена бидејќи властите не ја отстраниле спомен-плочата во концентрациониот логор во Јасеновац, на која е поздравот на усташите „За дом спремни“ (Подготвени за домот).  Слична плоча е поставена и во Кутина.

Државна делегација денеска положи венец на еврејските гробишта во Загреб. Премиерот Андреј Пленковиќ од Ерусалим вчера порача дека прашањето е деликатно, оти спомен-плочата всушност не била за усташите, туку за хрватските бранители кои загинале во, како што ја нарече, татковинската војна во првата половина на 90-тите години на минатиот век.

Инаку, главниот настан беше во поранешниот нацистички логор Аушвиц, изграден од нацистите на територијата на окупирана Полска, кога преживеаните жртви на Холокаустот положија цвеќе на Ѕидот на смртта во логорот. Тие се присетија на морничавите денови.

Денот кога концентрациониот логор Аушвиц беше ослободен од страна на советските војници во 1945 година, 27 јануари, се одбележува како Ден на сеќавање на жртвите на холокаустот.

Комесарот за човекови права на ОН при одбележувањето на овој ден, ја истакна опасноста од антисемитизмот, од сите форми на расна и на верска омраза, како и од дискриминацијата.