!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Хористи од Краков допатуваа во Охрид во чест на Свети Климент Охридски


Охрид, 10 декември, 2016 - 17:17 (META) 

Академскиот хор „Доминанта“ од Краковскиот универзитет во Полска денеска одржа концерт на отворено, пред споменикот на светите Кирил и Методиј во Охрид.

Хорот во Охрид престојува на покана од Младинскиот културен центар, а неговиот настап е во рамките на одбележувањето на празникот на градот, Св.Климент Охридски.


Битолскиот хор „Ад Либитум Арт“ се претстави на Фестивалот на мултијазичноста во Солун


Солун, 29 мај, 2016 - 11:03 (META) 

Битолскиот хор „Ад Либитум Арт“ викендов ја претстави македонската култура со учество на четвртиот по ред Фестивал на мултијазичноста во Солун. Звуците на „Дафино вино црвено“, „Битола мој роден град“ го исполнија амфитеатарот на општина Солун, која веќе четврта година го организира овој фестивал кој ја слави етничката разноликост и мултикултурализмот во Солун.

Хорот имаше настап половина час со шест македонски народни песни и една странска нумера. Никола Петровски, вокалист во битолскиот хор во разговор за „Мета“ посочува дека публиката покажала интерес веројатно поради интересниот ритам на македонската народна музика.

– Ние сме доста задоволни од публиката бевме одлично прифатени. Имаа можност да се запознаат со нашата култура преку нашата музика и навистина им се виде интересно можеби поради неправилните ритми кои ги има македонскиот фолклор и мислам дека привлековме доста внимание – вели Петровски.

Покрај македонскиот хор со свои музички настапи учествуваа и Италија, Украина, Турција, Германија, Романија, Србија и Русија. Учеството на голем број странски хорови и учесници како што вели Петровски им овозможило да воспостават и контакти за можни понатамошни соработки.

– Имаше претставници од повеќе земји од светот и по нашиот настап диригентката и дел од членовите имаа можност да поразговараат и со други хорови и со организатори на вакви манифестации со цел да се направи некоја нова соработка, размена не само на искуства, туку да бидеме и домаќини во иднина на некој таков ансамбл од светот, а исто така и да бидеме поканети во нивната држава. Се надеваме дека оваа можност ќе вроди со плод за идни соработки – додава Петровски.

Битолскиот хор учествуваше на фестивалот на покана на македонскиот конзулат во Солун и конзулката Маја Апостолова. Конзулатот во Солун активно учествува на културните настани во втората грчка престолнина.

Изминатиов период овозможи учество на македонски хор на фестивалот за хорска музика од мјузикли, а пред неколку недели и македонско учество и претставување на поетот Влада Урошевиќ на Солунскиот саем на книга.

 


Женскиот хор „Рустико“ освои прво место на фестивал во Италија


Скопје, 26 октомври, 2015 - 11:55 (META) 

Женскиот хор „Рустико“, под уметничко раководство на маестро Запро Запров, го освои првото место во фолклорната категорија за женски хорови на меѓународниот натпреварувачки хорски фестивал „Ин канто сул гарда“, што по 11. пат се одржа во малото живописно гратче Рива дел Гарда на северниот брег од езерото Гарда, во Италија, од 10 до 14 октомври, и тоа во конкуренција на хорови од Норвешка, Шведска, Данска, Италија и од други европски земји.

Во фолклорната категорија беа изведени дела од македонски автори како „Дафино, вино црвено“, „Селска свита“ и „Кољо гидија“.

Деновиве на својата веб-страница реномираниот меѓународен хорски фестивал „Лауреа мунди Будапест“ ја објави веста дека женскиот хор „Рустико“ е номиниран за директно учество во големото финале наредната година, што е привилегија и чест резервирана за најдобрите светски хорови, кои се карактеризираат со високо уметничко ниво и со постигнати исклучителни резултати на меѓународните хорски натпревари и фестивали.


„Хауард госпел-хор“ на „Охридско лето“


Охрид, 5 август, 2015 - 10:34 (META) 

Членовите на атрактивниот американски хор „Хауард госпел“, синоќа, пред полното гледалиште на Антички театар, го одржаа роденденскиот концерт, по повод 55-годишнината од постоењето на фестивалот „Охридско лето“.

Со својот настап, изборот на програмата, со позитивниот однос кон публиката, градот и кон земјата, тие ја оправдаа, како што самите кажаа, „големата чест да се биде дел од 55. јубилејно издание“.

Заедно со неколкуилјадната публика, на фестивалот му ја испеаја „Happy birthday“, а концертот завшри со „O happy day“ на Едвин Хокинс. Сето тоа, за фестивалот, за публиката, но и за американскиот претседател Барак Обама, кој, исто така, вчера го славеше својот роденден.

Дел од публиката беше и амбасадорот на САД во Македонија, Џес Бејли.

Американскиот „Хауард госпел-хор“ е првиот академски хор од ваков вид во светот. Основан е во 1968 година и е составен од сегашни и од поранешни студенти на Харвардскиот универзитет, како и од пасионирани љубители на хорската музика. На нивниот репертоар се наоѓаат композиции од современата и од традиционалната американска госпел-музика, црковни химни, црнечка духовна музика и други.

„Хауард госпел-хорот“ активно настапува во САД, Канада, Барбадос, Хрватска, Италија, Данска, Шведска, Украина и во други земји.

При гостувањата, хорот одржува и работилници и мајсторски школи, на кои учесниците се информираат за госпел-музиката, но и воопшто за вокалното пеење.


„Охридско лето“ слави 55 години


Охрид, 4 август, 2015 - 16:31 (META) 

Јубилејното, 55. фестивалско издание на „Охридско лето“, почнувајќи од свеченото отворање на 12 јули, досега реализираше 30 настани, за кои целокупниот тим на фестивалот се надева дека вечно ќе се паметат, рече на денешната, роденденска прес-конференција, директорката Елизабета Јанкуловска.

– Со уникатната програма која ја реализиравме досега, можеме да кажеме дека нè посетиле повеќе од 10.000 посетители. На радост на сите нас, успеавме да го реализираме и вториот концерт на Иво Погорелиќ. Полека но сигурно, фестивалот „Охридско лето“ го дава очекуваниот резултат и можеме оваа година да се пофалиме дека фестивалските настани се многу посетени од странската публика, со што спојот на културата, културното наследство и на туризмот, покажаа дека можат да бидат добра основа за заеднички проекти – истакна Јанкуловска.

Селекторот на музичката програма на „Охридско лето“, проф. Гордана Јосифова-Неделковска, изрази благодарност кон основоположниците на фестивалот, но и сите што вложуваат труд да се слуша за ваква културна манифестација надвор од Македонија.

– Педесет и пет години, фестивалот ги достигнува највисоките врвови на светската музичка елита и во исполнителски и во творечки опус – вели Јосифова-Неделковска.

Дел од прес-конференцијата, беа членовите на американскиот хор „Хауард госпел“.

Оваа светска музичка атракција настапува вечерва во Антички театар. Извонредните исполнители, веќе ги покажаа гласовните можности на прес-конференцијата, на терасата од кафето „Аквариус“, а потоа и со пладневен мини-концерт на Плаошник.

Американците ја посетија и црквата „Св. Софија“ каде ја слушнаа и приказната за почетоците на оваа најстара манифестација и за првиот концерт на Ана Липша-Тофовиќ.

– Голема е честа да се биде дел од 55. јубилејно издание, особено зашто роденденот ќе се одбележи токму со нас – велат членовите на „Хауард госпел-хор“.


Битолскиот хор „Ад либитум арт“ учествуваше на фестивал на мјузикли во Солун


Солун, 26 април, 2015 - 13:04 (META) 

Битолскиот хор „Ад либитум арт“ настапи на Петтиот светски фестивал на хорски мјузикли во Солун. Под диригентската палка на Екатерина Јосифовска, на фестивалот посветен на музика од мјузикли, во пријателска разиграна атмосфера, во преполна концертна сала на Универзитетот „Аристотел“, битолскиот хор настапи со изведба на делови од мјузиклите „Њујорк, Њујорк“ (New York, New York) и „Кралот лав“ (The Lion King), ја изведе легендарната „Sweet dreams“ од „Јуритмикс“ и ја занеме публиката со изведбата на старата традиционална македонска песна „Дафино, вино црвено“.

Настапот на хорот беше уште еден доказ дека културата ги руши сите бариери поставени од политичкиот спор. Хорот „Ад либитум арт“, помина одлично, без никакви проблеми и беше поздравен со громогласен аплауз и со овации во преполната концертна сала на солунскиот Универзитет, за време и по завршувањето на настапот. Хорот учествуваше на фестивалот на иницијатива и на покана и со целосно покровителство и поддршка на македонскиот конзул во Солун, Маја Апостолова.

Како што ни изјави Апостолова, хорот бил презадоволен од настапот и од начинот на кој бил примен од солунската публика. Настапот на хорот беше проценет како одлична можност за воспоставување контакти и соработка со хорови од светот и од регионот. Како што дознаваме, битолскиот хор планира наскоро музички фестивал во Дојран, каде ќе има можност да ги покани хоровите со кои се воспоставени нови контакти. Покрај нив, на фестивалот настапија и хорови од Патра, Керацини, домаќинот-хор „Кораис“, хорот „Аве музика“ од Бугарија и естонскиот хор „Вене Корикарели“. Фестивалот продолжува и денеска, со настапи од Романија, Кипар, Грција и од Чешка.

Покрај настапот на „Ад либитум арт“, солунската публика следниот месец ќе има можност да се запознае уште подобро со современата македонска култура. Во текот на мај, исто така, по иницијатива на конзулката Апостолова е предвидено учество и македонски штанд на Солунскиот саем на книгата. За време на саемот, ќе бидат претставени работата и делото на македонските автори Александар Прокопиев и Томислав Османли.

М.П.


Концерт на дубровничкиот хор „Либертас“ во Охрид


Охрид, 28 ноември, 2014 - 10:17 (META) 

Дубровничкиот Мешан хор „Либертас“, вечерва, со почеток во 19 часот, ќе се одржи бесплатен целовечерен концерт во Католичката црква во Охрид. Хорот ќе изведе композиции од духовната и од оперската музика.

Мешаниот хор „Либертас“ е важен дел од богатото културно живеење на градот Дубровник и е основан во 1980 година.

Концертот е дел од богатата македонско-хрватска културна агенда.