Блок: Политиката на Холандија кон Македонија е строга, но фер


Скопје, 12 септември, 2018 - 16:50 (META) 

Референдумот е дел од демократскиот процес и останува на вашите граѓани да го донесат единственото решението за земјата, изјави шефот на холандската дипломатија, Штеф Блок, по средбата со неговиот македонски колега Никола Димитров.

Тој истакна дека е охрабрен од исклучителниот напредок што Македонија го постигна во кус период, и оти сега претстои да се види напредокот во спроведувањето на законодавните пакети, реформите во правосудството, разузнавачките служби и јавната администрација.

– Преку една длабока и тешка политичка криза ѝ честитаме на Македонија за напредокот што го постигна во еден таков кус период и што ја врати земјата на реформскиот пат – рече Блок.

Според него, Договорот со Грција за прашањето со името е огромен историски чекор, со кој политичките лидери на Македонија и Грција покажале храброст и лидерство да го затворат долгогодишниот спор.

Тоа, посочи тој, доведе до покана за членство во НАТО, што покажува дека добра волја и храброст можат да решат долгорочни прашања, да го зајакнат мирот и стабилноста и да го започнат реформскиот процес заснован на вредности.

– Холандија ја поддржува и перспективата за членство во ЕУ на Македонија. Нашата политика е строга, но фер, кога земјата ќе ги исполни предусловите ќе го поддржиме пристапниот процес за ЕУ во јуни 2019 година – рече Блок.

Димитров се заблагодари за постојаната поддршка што Холандија ја пружа на Македонија, посочувајќи дека оваа година се одбележуваат 25 години од дипломатските односи со Холандија, со која земјава има традиционално пријателство.

– Холандија има политика на стриктно и фер во однос на процесот на пристапување во ЕУ, ние ја поддржуваме оваа политика, бидејќи наша цел е не само да станеме членка, туку и да ја направиме нашата држава европска – рече Димитров.

Тоа, рече тој, ќе го постигнеме преку реформите во правосудството, борбата против корупцијата и начинот на кој ќе го направиме тоа е поважно од тоа кога ќе станеме членка на ЕУ.


Пломп најави експертска помош од Холандија за Македонија


Скопје, 16 август, 2018 - 14:37 (META) 

Премиерот Зоран Заев денеска имаше средба со амбасадорот на Кралството Холандија Ваутер Пломп на која била изразена поддршка на политиките што водат кон евро-атлантски интеграции на Република Македонија.

– Очекувам мнозинството граѓани да гласаат за евро-атлантска иднина на Република Македонија на претстојниот референдум – рекол премиерот Заев, соопшти владината прес-служба.

На средбата, како што се наведува во соопштението, е констатирано дека е од голема важност секој граѓанин и политички субјект да ја има предвид и личната одговорност за историскиот момент што отвора економски и безбедносни перспективи за нашата држава и за граѓаните на Република Македонија.

„Во разговорот е изразено очекување дека Македонија ќе продолжи со реформските процеси, посебно во делот на правосудството, што ќе придонесе во евроинтеграцискиот процес. Холандскиот амбасадор во оваа насока најави експертска помош од Холандија за Македонија. Исто така изразено е и очекување дека Македонија во скоро време ќе стане 30-та земја членка на НАТО“, се посочува во соопштението.

Заев, како што стои во соопштението, на средбата му се заблагодарил на амбасадорот Пломп „за принципиелната поддршка од Кралството Холандија на демократските процеси во Република Македонија, вклучувајќи ја и поддршката на принципиелно ниво на актуелниот политички процес значаен за членство на Македонија во ЕУ и НАТО“.


Германија ги охрабрува Холандија и Франција да дадат зелено светло за Македонија во ЕУ


Луксембург, 26 јуни, 2018 - 12:16 (META) 

Државниот министер за Европа во германското Министерство за надворешни работи, Михаел Рот, е оптимист и смета дека министрите за надворешни работи на Европската Унија во Луксембург можат да постигнат договор околу преговорите на Македонија и Албанија со Унијата. Пред средбата на шефовите на дипломатиите, Рот изјави дека двете земји направиле „забележителен напредок во сферата на владеење на правото и независноста на судството“ и дека поради тоа Германија дава поддршка за почеток на преговори.

-Германската Влада е подготвена да ги поддржи Македонија и Албанија на нивниот пат кон ЕУ. Подготвени сме да дадеме зелено светло и би сакал да ги охрабрам и нашите пријатели во Холандија и Франција да ни се придружат и да не му стојат на патот на неопходниот консензус – изјави Рот пред денешната средба во Луксембург.

На новинарско прашање дали очекува тоа да се случи денеска, Рот вели дека не е сосема сигурен, но оти се надева дека ќе се случи и оти е воздржан оптимист и додаде дека стабилноста, мирот и демократијата на Западен Балкан е клучна за сите во ЕУ.

-Затоа високо ги цениме напорите што ги преземаат и Македонија и Албанија за зајакнување на владеењето на правото, независно судство, борбата против корупцијата – рече Рот.


Холандија се согласи Македонија да добие датум за почеток на преговорите со ЕУ


Амстердам, 22 јуни, 2018 - 12:47 (META) 

Холандскиот парламент даде зелено светло за отворање на преговорите за пристапување на Македонија кон ЕУ, јави албанската телевизија „Топ Ченел“.

Според истиот извор, холандските пратеници не се согласиле и Албанија да добие датум за почеток на преговорите со ЕУ.

Според нив, Албанија нема доволно направено во борбата против корупцијата и криминалот.

„Албанија не ги исполни петте приоритети утврдени во извештајот за напредок, бидејќи нема напредок во правните реформи, борбата против корупцијата или борбата против криминалот. Врз основа на овој напредок, не можеме да ги отвориме преговорите за пристап кон ЕУ. Холандската влада не треба да гласа за Европската комисија за отворање на пристапните преговори“, се вели во предлогот од холандскиот парламент.

Холандија и Франција беа двете земји кои одбиваа да дадат зелено светло за отворање на пристапните преговори со Македонија и Албанија пред претстојниот Самит на ЕУ, кој ќе се одржи на 25 јуни во Брисел.


Еден загинат и тројца повредени откако автомобил влета на фестивал во Холандија


Хаг, 18 јуни, 2018 - 11:23 (META) 

Едно лице го загуби животот, а тројца се повредени откако утрово „фиат добло“ удри во публиката на музичкиот фестивал „Пинкпоп“, кој се одржува на југот на Холандија. Во моментот на нападот настапувал музичарот Бруно Марс.

Возачот потоа избегал со автомобилот и полицијата трага по него во Ландграф, град на југот од Холандија, кој се наоѓа на неколку километри од границата со Германија.


Членки на ЕУ се против почеток на преговори и бараат суштински напредок во реформите


Скопје, 26 мај, 2018 - 20:47 (META) 

И покрај вистинските промени во општата атмосфера во земјата, извештајот не покажува јасен суштински напредок во спроведувањето на итните реформски приоритети, се вели во „нон-пејперот“ што го објави „Макфакс“.

Според извори на „Макфакс“, зад документот не стојат сите земји членки на ЕУ, и документот циркулира меѓу оние кои се против почетокот на преговорите во јуни. Наводно, станува збор за Франција и Холандија кои се противат на старт на преговорите за членство со Македонија и Албанија на јунскиот самит на ЕУ.

„За ПЈРМ, и покрај вистинските промени во општата атмосфера во земјата, извештајот не покажува јасен суштински напредок во спроведувањето на Итните реформски приоритети. Имплементацијата на новите судски реформи е штотуку започната и треба долгорочен напредок и континуирана промена во однесувањето. Неопходни се повеќе напори за да се обезбеди регрутација врз основа на заслуги и деполитицизација на јавната администрација (заробена држава). Борбата против корупцијата и организираниот криминал се уште не дале задоволувачки резултати: и покрај поставената правна и институционалната рамка, корупцијата преовладува во многу области и продолжува да биде сериозен проблем, додека пак капацитетот на институциите за ефективно да се справат со корупцијата има покажано структурни и оперативни недостатоци, меѓу кои е и политичкото мешање“ се вели во документот и се повикува тоа да се земе предвид, пред да се донесат какви било одлуки во врска со проширувањето.

Македонската влада смета дека земјата, сепак, е на вистинскиот пат.

“Мнозинството земји членки на ЕУ поддржуваат почеток на преговорите со Македонија, после решавање на спорот со Грција. Од друга страна факт е дека постои дебата во ЕУ околу подготвеноста за ново проширување. Суштинските и коренити промени во земјата градат силни и услужни институции, праведна држава и силна економија за подобар живот на сите граѓани. Македонија е на вистинскиот пат, а темелните реформи се признаени и препознаени од цела Европа и од сите земји членки на ЕУ. Сите земји членки на ЕУ сметаат дека Македонија треба да продолжи по овој пат и да го интензивира прогресот. За тоа говори и најновата оценка на Европската Комисија со која Македонија е оценета за најдобра во регионот на Западниот Балкан и Турција за спроведување на препораките во економската програма за реформи. Македонија после решавање на спорот околу името веднаш ќе стане членка на НАТО и со тоа уште позабрзано и поодлучно ќе ги отвори портите на ЕУ“, велат од Владата.

Најголемата опозициска партија ВМРО-ДПМНЕ, реагираше дека, за жал, се потврдија повеќемесечните стравувања дека земјата ризикува да не добие датум почеток на преговори. Не само заради спорот со името туку и заради катастрофалното ниско ниво на реформи, вели Александар Николоски, потпретседател на ВМРО-ДПМНЕ.

– Повикувам веднаш Владата да преземе одговорност и клучните луѓе во овие области Министрите за надворешни Димитров, евроинтеграции Османи, внатрешни работи Спасовски, финансии Тевдовски, економија Бектеши, здравство Филипче и труд и социјала Царовска, да поднесат оставки – вели Николовски.

На ова реагираа од СДСМ, од каде велат дека пред да се истрчува во јавноста ВМРО-ДПМНЕ треба да го прочита Извештајот на Европската комисија за напредокот на Република Македониј.

„Со Извештајот, ЕК дава кристално чиста препорака за Македонија, го констатира напредокот во сите области, а најново е дека Комисијата ја оцени Македонија како најдобра во регионот на Западен Балкан и Турција, за спроведување на препораките во економската програма за реформи. Македонија е на вистинскиот пат и тоа е препознаено од Европа и земјите членки на ЕУ. Дека Македонија е на вистинскиот пат не сака да признае единствено ВМРО-ДПМНЕ. ВМРО-ДПМНЕ треба да се погледне во огледало за да го види виновникот за 11 годишното пустошење на државата и оддалечувањето на Македонија од ЕУ и НАТО. Наместо да навива за неуспех на Македонија, ВМРО-ДПМНЕ треба да им се извини на граѓаните за грабежот и ставот, да преземе одговороност и да ги поддржи промените кои ја движат Македонија напред, велат од СДСМ.


Петмина загинати во силното невреме што ги погоди Холандија и Германија


Амстердам, 18 јануари, 2018 - 19:33 (META) 

Пет лица загинаа во силното невреме што ги зафати Холандија и Германија, проследено со ветер кој дувал со брзина од 140 километри на час, соборувајќи стебла и превртувајќи камиони, пренесува „Би-би-си“.

Три лица загинале во Холандија и едно во Германија откако врз нив паднале соборени стебла и гранки. Вториот Германец загинал во сообраќајна несреќа откако поради силниот ветер преминал на спротивната коловозна лента и се судрил со друго возило.

Холандските власти поради силното невреме ги откажаа сите летови од и кон аеродромот „Шипхол“ во Амстердам, а бил прекинат и сообраќајот на повеќето железнички линии.

Во земјата е прогласено „црвено предупредување“ за опасност од невремето.

И германската железница го прекинала железничкиот сообраќај поради силното невреме.


Церемонија за затворање на Хашкиот трибунал во воени злосторства во поранешна Југославија


Хаг, 21 декември, 2017 - 10:31 (META) 

Со церемонија во Хаг, денеска ќе се одбележи згаснувањето на Меѓународниот суд за воени злосторства во поранешна Југославија, познат и како Хашки трибунал, кој ќе престане да работи на крајот на годинава.

На церемонијата ќе присуствуваат официјални претставници од неколку поранешни југословенски републики, чии државјани во текот на изминатите 24 години се процесуирани во Судот.

Судот беше основан на 25 мај 1993 година од страна на Советот за безбедност на Обединетите нации со цел да ги гони сторителите на воени злосторства на територијата на поранешна Југославија.

За време на 24-годишната работа Трибуналот процесуираше 161 обвинети, од кои, повеќе од половината беа дела од воениот и политичкиот врв на Србија и Република Српска.


ЕК отвори истрага против „Икеа“ поради даночните аранжмани во Холандија


Брисел, 19 декември, 2017 - 10:48 (META) 

Европската комисија (ЕК) отвори истрага против шведската компанија „Икеа“, поради нејзините даночни аранжмани во Холандија, јавуваат светските агенции.

Сомневањата на ЕК се дека два даночни аранжмани кои „Икеа“ ги склучила со холандските даночни власти и овозможиле на компанијата неправедна предност над конкурентите.

Еврокомесарката за заштита на конкуренцијата, Маргрет Вестагер, изјави дека на земјите-членки на Европската Унија не им е дозволено на селективни групи на фирми да им овозможат плаќање на помали даноци од другите фирми.

Таа додаде дека ЕК внимателно ќе го истражи случајот со компанијата „Икеа“.

Според извештајот кој во февруари, минатата година го претстави партијата на Зелените во Европскиот парламент, шведската „Икеа“ благодарение на даночните аранжмани наводно избегнала плаќање на милијарди евра данок во периодот од 2009 до 2014 година.


По 208 дена преговори, Холандија ќе добие влада


Хаг, 9 октомври, 2017 - 13:34 (META) 

Лидерите на четири холандски партии денеска постигнаа договор за нацрт-програмата на новата коалиција на десниот центар, по 208 дена преговори.

Лидерите утринава ја напуштиле преговарачката маса за да им го претстават коалициониот план на пратениците од своите партии, кои може да сугерираат промени.

Се очекува премиерот Марк Руте утре официјално да ја претстави програмата на новата влада, заедно со лидерите на демохристијаните, центристичката партија Д66 и Хистијанската унија.

Изборите во Холандија се одржаа на 15 март, а новата коалиција ќе има мнозинство од само еден пратеник во долниот дом на парламентот.