Петмина загинати во силното невреме што ги погоди Холандија и Германија


Амстердам, 18 јануари, 2018 - 19:33 (META) 

Пет лица загинаа во силното невреме што ги зафати Холандија и Германија, проследено со ветер кој дувал со брзина од 140 километри на час, соборувајќи стебла и превртувајќи камиони, пренесува „Би-би-си“.

Три лица загинале во Холандија и едно во Германија откако врз нив паднале соборени стебла и гранки. Вториот Германец загинал во сообраќајна несреќа откако поради силниот ветер преминал на спротивната коловозна лента и се судрил со друго возило.

Холандските власти поради силното невреме ги откажаа сите летови од и кон аеродромот „Шипхол“ во Амстердам, а бил прекинат и сообраќајот на повеќето железнички линии.

Во земјата е прогласено „црвено предупредување“ за опасност од невремето.

И германската железница го прекинала железничкиот сообраќај поради силното невреме.


Церемонија за затворање на Хашкиот трибунал во воени злосторства во поранешна Југославија


Хаг, 21 декември, 2017 - 10:31 (META) 

Со церемонија во Хаг, денеска ќе се одбележи згаснувањето на Меѓународниот суд за воени злосторства во поранешна Југославија, познат и како Хашки трибунал, кој ќе престане да работи на крајот на годинава.

На церемонијата ќе присуствуваат официјални претставници од неколку поранешни југословенски републики, чии државјани во текот на изминатите 24 години се процесуирани во Судот.

Судот беше основан на 25 мај 1993 година од страна на Советот за безбедност на Обединетите нации со цел да ги гони сторителите на воени злосторства на територијата на поранешна Југославија.

За време на 24-годишната работа Трибуналот процесуираше 161 обвинети, од кои, повеќе од половината беа дела од воениот и политичкиот врв на Србија и Република Српска.


ЕК отвори истрага против „Икеа“ поради даночните аранжмани во Холандија


Брисел, 19 декември, 2017 - 10:48 (META) 

Европската комисија (ЕК) отвори истрага против шведската компанија „Икеа“, поради нејзините даночни аранжмани во Холандија, јавуваат светските агенции.

Сомневањата на ЕК се дека два даночни аранжмани кои „Икеа“ ги склучила со холандските даночни власти и овозможиле на компанијата неправедна предност над конкурентите.

Еврокомесарката за заштита на конкуренцијата, Маргрет Вестагер, изјави дека на земјите-членки на Европската Унија не им е дозволено на селективни групи на фирми да им овозможат плаќање на помали даноци од другите фирми.

Таа додаде дека ЕК внимателно ќе го истражи случајот со компанијата „Икеа“.

Според извештајот кој во февруари, минатата година го претстави партијата на Зелените во Европскиот парламент, шведската „Икеа“ благодарение на даночните аранжмани наводно избегнала плаќање на милијарди евра данок во периодот од 2009 до 2014 година.


По 208 дена преговори, Холандија ќе добие влада


Хаг, 9 октомври, 2017 - 13:34 (META) 

Лидерите на четири холандски партии денеска постигнаа договор за нацрт-програмата на новата коалиција на десниот центар, по 208 дена преговори.

Лидерите утринава ја напуштиле преговарачката маса за да им го претстават коалициониот план на пратениците од своите партии, кои може да сугерираат промени.

Се очекува премиерот Марк Руте утре официјално да ја претстави програмата на новата влада, заедно со лидерите на демохристијаните, центристичката партија Д66 и Хистијанската унија.

Изборите во Холандија се одржаа на 15 март, а новата коалиција ќе има мнозинство од само еден пратеник во долниот дом на парламентот.


Димитров и Кундерс потпишаа декларација за соработка меѓу Македонија и Холандија


Хаг, 26 септември, 2017 - 14:33 (META) 

Министерот за надворешни работи, Никола Димитров, и неговиот холандски колега, Берт Кундерс, денеска во Хаг потпишаа Декларација за партнерство и за соработка меѓу Република Македонија и Кралството Холандија.

– За кратко време покажавте големо лидерство во враќањето на Македонија на европскиот пат – изјавил Кундерс по потпишување на декларацијата.

Декларацијата предвидува двете земји да продолжат со унапредувањето на заемната соработка за промовирање на доброто владеење, владеењето на правото, судството, борбата против корупцијата, основните човекови права, независните медиуми и социјалната кохезија.

Македонија и Холандија преку декларацијата ја потврдуваат и заемната заложба за интензивирање на размената на искуства и зајакнување на соработката во одбраната и во безбедноста, заради подигнување на нивото на подготвеност на Република Македонија за стекнување полноправно членство во НАТО, но и за справување со безбедносните предизвици како што се организираниот криминал, верскиот екстремизам и нелегалната миграција.


Заев ќе се обрати пред Генералното собрание на ОН


Њујорк, 22 септември, 2017 - 10:21 (META) 

Премиерот Зоран Заев денеска ќе се обрати пред Генералното собрание на Обединетите нации во Њујорк и ќе се сретне со генералниот секретар на ОН, Антонио Гутереш, соопшти владината прес-служба.

На денешната агенда на македонскиот премиер е предвидена средба со вицепремиерот и министер за надворешни работи на Виетнам, Фан Бин Мин, како и кратка средба со премиерот на Непал, Шер Бахадур Деуба, на приемот по повод националниот ден на оваа земја.

Заев денеска ќе има и обраќање на конференцијата „Нов старт на Балканот“, во организација на УНДП.

Претседателот на македонската влада вчера имал средба со премиерот на Кралството Холандија, Марк Руте, кој дал поддршка на реформскиот процес што го почна Владата и ги поздравил чекорите што ги презема државата за градење на добрососедски односи и регионална соработка.

Руте истакнал дека Холандија останува силен поддржувач на Македонија во заложбите на нашата држава за постигнување на стратешките цели, членство во Европската Унија и во НАТО.

Заев на средбата посочил дека очекува есенва да се тргне условеноста на препораката за членство на Македонија во ЕУ, а следен чекор да биде датум за почеток на преговори.


Токсични јајца пронајдени во дури 40 земји


Брисел, 5 септември, 2017 - 15:26 (META) 

Европска Унија денеска соопшти дека дури во 40 земји, меѓу кои 24 се членки на ЕУ, биле пронајдени јајца контаминирани со „фипронил“.

Претставникот на Европската комисија, Вијтенис Андриукаитис, кој е задолжен за здравје и за безбедност на храната, денеска изјави дека само во четири од 28 членки на ЕУ немало јајца заразени со токсичниот инсектицид „фипронил“.
Земјите кои не се погодени се Литванија, Португалија, Кипар и Хрватска.

Ширум Европа се уништени милион јајца и производи од јајца, кај кои се најдени траги од „фипронол“.
Сепак, засега никој не заболел од инсектицидот.

Во Холандија поради скандалот се уапсени две лица, директорите на компанијата „Чикенфренд“, на чија фарма се пронајдени заразените јајца. Тие се осомничени дека знаеле дека супстанцата која ја користеле е забранета.

Економската штета од скандалот со загадените јајца во Холандија се проценува на околу 33 милиони евра.


Нова дипломатска војна – Унгарија го повлекува амбасадорот од Холандија


Будимпешта, 25 август, 2017 - 12:28 (META) 

Унгарија го врача амбасадорот од Хаг „на консултации“ после острите критики кои холандскиот амбасадор во Будимпешта ги упати кон унгарската влада.

– Унгарија го повика на консултации својот амбасадор во Холандија – соопшти шефот на унгарската дипломатија, Петер Сијарто.

Холандскиот амбасадор, Гајус Шелем, кој го завршува својот мандат во Будимпешта, во интервју за еден унгарски неделник ги спореди методите на премиерот Виктор Орбан со оние на „муслиманските терористи“.


Апсења во Холандија поради скандалот со затруените јајца


Хаг, 10 август, 2017 - 16:32 (META) 

Две лица се уапсени во Холандија во рамки на истрагата за затруените јајца под сомневање дека нелегално користеле инсектицид фипронил на живинарските фарми.

Холандското обвинителство соопшти дека двајцата осомничени се директори на компанијата која, наводно, го користела фипронилот на фармите.

Иако нема извештаи дека некој се разболел, обвинителите рекле дека имаат докази дека јавното здравје е загрозено со „примената на биоцидот фипронил кај кокошките кои несат јајца“.

Осомничените се приведени во текот на серијата претреси кои Холандија ги спроведе во рамки на заедничката акција со белгиските власти.

Поради аферата, милиони јајца се повлечени од продавниците во повеќе европски земји, вклучувајќи ги Германија, Белгија и Холандија.

Десетина произведувачи на јајца во Белгија и во Холандија се под истрага, откако во нивните производи е откриено присуството на инсектицидот фипронил, кој може да го загрози човечкото здравје.

Европската комисија неделава предупреди дека е можно јајца затруени со инсектицидот да се продавани во седум земји, со што скандалот доби поголеми размери.


Во пожар во Шевенинген, загина еден затвореник


Хаг, 15 јуни, 2017 - 14:24 (META) 

Еден затвореник загина во пожарот кој изби во притворска единица во Шевенинген, соопшти холандското министерство за правда.

Како што јавуваат холандските медиуми, пожарот избил во психијатрискиот оддел на притворската единица во рамки на комплексот.

Еден маж почина во својата ќелија како последица на пожарот, соопшти министерството за правда, наведувајќи дека станува збор за психијатриски оддел на казнената установа.

Идентитетот на настраданиот не е објавен, пренесува холандскиот портал „Телеграф“.

Од тој дел се евакуирани 12 лица кои привремено се сместени во други делови на центарот. Полицијата ја истражува причината за пожарот.

Притворскиот објект во Шевенинген, покрај споменатиот дел за притвор на затвореници со психички проблеми, се состои од високо обезбедуван комплекс и оддел за осомничени на кои им се суди пред меѓународните трибунали.