Хојт Ји: Прашањето за името бара напорна работа, но дефинитивно е возможно


Вашингтон, 20 јануари, 2018 - 10:24 (META) 

Македонија и Грција имаат вистинска можност да постигнат договор за прашањето за името. Верувам дека постои политичка волја, како во Атина, така и во Скопје, да се постигне договор и да се реши ова прашање еднаш засекогаш, вели заменик-помошникот државен секретар на САД за Европа и Евроазија Хојт Брајан Ји во емисијата „Светот е бизнис” на телевизијата Блумберг на бугарски јазик.

– Ќе се бара напорна работа, бидејќи прашањето не е едноставно да се реши. Ќе беше добро проблемот да се решеше пред 25 години, но ако двете држави продолжат да работат како сега, под раководство на Метју Нимиц, специјалниот претставник на ОН, како посредник, ние веруваме дека тоа е дефинитивно возможно – вели Ји.

Според него, САД силно го поддржуваат договорот меѓу Бугарија и Македонија и ова е многу добар почеток или дури увертира на бугарското претседателство на ЕУ.

– Веруваме дека ова се многу позитивни чекори, не само за двете земји кои имаат разлики во текот на годините, туку и за целиот регион. Тоа е пример за две држави, чии лидери се навистина ангажирани кон помирување и кон изнаоѓање решенија, кои може да вклучуваат компромис, кои може да вклучуваат и отстапки. Кога две држави имаат желба и политичка волја, тогаш речиси се е можно – додаде Ји.


Хојт Ји: Скопје и Атина имаат одлична можност за решавање на спорот со името во 2018


Вашингтон, 23 декември, 2017 - 15:42 (META) 

Скопје и Атина имаат одлична можност за решавање на спорот со името во 2018, вели американскиот заменик помошник државен секретар Хојт Брајан Ји за грчката новинска агенција „АМНА“.

Тој смета дека по локалните избори премиерот Зоран Заев има чист мандат од народот да продолжи со основните реформи.

-Верувам дека Атина и Скопје имаат одлична можност да го решат прашањето со името во 2018. Лидерството и добрата волја што ги покажаа двете влади во ова прашање се охрабрувачки. Преговорите ќе бидат тешки и двете страни ќе треба да направат компромиси, но почетните консултации, под медијаторство на специјалниот претставник на ОН, Метју Нимиц, се чини дека беа конструктивни. Продолжуваме да го поддржуваме процесот во Обединетите Нации и ги охрабруваме двете земји да преговараат со добра верба, со посредство на Нимиц –вели Ји.

Според него, охрабрува позитивниот тон што го гледа од македонскиот премиер, особено во однос на подобрување на односите со соседите.

-И двата круга на локалните избори кои неодамна се одржаа беа многу конкурентни и се одржаа во клима на почитување на основните слободи. Гласот на народот на земјата беше силен и јасен, потврдувајќи ја јавната поддршка на промените што ги претставува владата на Заев. Премиерот Заев има јасен мандат да продолжи со промовирање на клучните реформи – додава Ји.

Во однос на шпекулациите и информациите во медиумите дека тој би можел да биде нов американски амбасадор во Македонија, Ји вели дека не постојат такви планови, бидејќи Белата куќа е единствена надлежна за тие прашања и до сега нема соопштено ништо такво.


Хојт Ји: За интеграцијата во НАТО и во ЕУ е клучно да се утврди кој прислушувал


Скопје, 3 октомври, 2017 - 11:08 (META) 

Многу е важно да се утврди одговорноста за нелегалното прислушување и за наводните владини злоупотреби во врска со него, бидејќи тоа ќе биде клучен чекор за Македонија да ги увери НАТО и Европската Унија, како и другите меѓународни партнери, дека е подготвена да се интегрира во тие организации. Ова го истакна заменикот помошник државен секретар на САД, Хојт Брајан Ји, во интервју за емисијата „360 степени“ на „Алсат-М“.

– Тоа е важно и за граѓаните на земјата да се уверат дека е воспоставено владеење на правото. Ги повикуваме сите политички партии, политички и владини лидери, членовите на Собранието, да сторат сè што можат да биде спроведена правдата, СЈО да ја добие потребната поддршка за да си ја заврши работата и да нема политички притисок врз обвинителите и судиите од инволвираните во утврдување на одговорноста. Тоа треба да се направи во разумен рок и да не се одолжува – вели Хојт Ји.

Според него, клучно за државата е да се направат потребните реформи во судството, кои треба да овозможат независно судство, ослободено од политички притисок.

– Тоа е важно за граѓаните, за интеграцијата во НАТО и во ЕУ, но и за привлекување странски инвеститори – нагласува Ји.

Во врска со односите власт – опозиција, тој вели дека Македонија не може да си дозволи луксуз на постојани одложувања и опструкции од партиите. Според Хојт Ји, на секоја демократија ѝ е потребна силна влада, но и силна опозиција која нема само да блокира предлози со кои не се согласува, туку и ќе нуди алтернативи.

Тој во интервјуто се осврна и на влијанието на Русија во регионот на Западен Балкан. Според него, Македонија треба да се спротивстави на руското влијание и на дезинформациите што пристигнуваат од Москва.

– Гледаме дека Русија се обидува да ја обесхрабри интеграцијата на земјите од Западен Балкан во НАТО и во ЕУ. Важно е Македонија да работи со нас, со ЕУ и со партнерите во регионот, да продолжи да се противи на малигните влијанија од кој било извор, да продолжи да ја зајакнува независноста на медиумите, важно е да има силни, професионални, независни медиуми кои ќе се спротивстават на дезинформациите од Русија или други извори – изјави Хојт Ји.


Хојт Ји: Договорот меѓу Македонија и Бугарија е важен за целиот регион


Блед, 5 септември, 2017 - 11:01 (META) 

„Го поздравувам Договорот за пријателство, добрососедство и за соработка со Република Македонија. Тој е важен за народите на Република Бугарија и на Република Македонија, но и за целиот регион“.

Ова го изјавил заменик-помошникот државен секретар на САД, Хојт Брајан Ји, на средбата со бугарската вицепремиерка и министерка за надворешни работи, Екатерина Захариева, во рамките на Бледскиот стратешки форум во Словенија, соопшти бугарското МНР.

– Се надевам дека овој договор ќе создаде одлична атмосфера, во која Република Македонија ќе ги подобри односите и со другите соседи – додал Ји.

Захарива на средбата истакнала дека една од најголемите придобивки на договорот е тоа што тој е изработен без странска помош, со што двете страни покажале дека ги решаваат прашањата без посредници.

Захариева и Хојт Ји разговарале и за актуелната политичка ситуација во регионот и за иницијативите на Бугарија во надворешната политика.


Хојт Ји: Најтемниот момент на Балканот беше 27 април во Собранието на Македонија


Дубровник, 1 јули, 2017 - 16:12 (META) 

Најтемниот момент на Балканот годинава беше 27 април во Собранието на Република Македонија, а најдобрата вест во целиот регион – формирањето на новата реформска влада. Ова го истакнал заменик-помошникот на државниот секретар на САД за европски и евроазиски прашања, Хојт Брајан Ји, во рамките на панел-дискусијата на „Дубровник форум 2017“, што се одржува денеска на тема „Јадранско-медитеранската соработка и безбедноста во Југоисточна Европа“.

Шефот на македонската дипломатија, Никола Димитров, во своето обраќање на панел-дискусијата, истакнал дека „Балканот мора да порасне и тоа брзо, пред младата генерација целосно да дигне раце и да оди самата во Европа“.

Во контекст на мигрантската криза, Димитров додал дека поуката од неа е дека ниту една држава не може да се справи сама со големи предизвици, туку дека е потребна „координирана акција и заеднички одговор, особено превентивно делување во корените на проблемот“.

„И на домашен план, по внатрешно-политичката криза во Република Македонија научивме важни лекции: Стабилноста, демократијата и правната држава одат заедно. Една држава не може да биде стабилна на долг рок ако има фрагилни институции. Стабилноста доаѓа од силни институции, владеење на првото, независно судство, економски просперитет, слободни медиуми. Новата реформска влада посветено работи да ја врти државата на европскиот пат“, рекол Димитров, стои во соопштението на Министерството за надворешни работи.

Инаку, министерот Димитров и Хојт Брајан Ји имале средба на која била потенцирана поддршката на САД за евроатлантските интеграции на Македонија.

На форумот, како што информираат од МНР, биле дискутирани актуелните теми во регионот, решавањето на заедничките предизвици за безбедноста и стабилноста во Јадранско–медитеранската област, а во фокусот, исто така, биле „меѓузависноста на состојбите на Блискиот Исток, Северна Африка и Европа, како и мобилноста и образованието на младите“.


Хојт Ји: САД ќе продолжат да го поддржуваат напредокот на Македонија


Вашингтон, 18 мај, 2017 - 10:24 (META) 

Ќе работиме со новиот претседател на Собранието на поддршка на демократијата и на напредокот на Македонија на евроатлантскот пат, изјави заменик-помошникот на американскиот државен секретар за Европа и за Евроазија, Хојт Брајан Ји.

Тој во обраќањето пред Подкомитетот за надворешни работи на Претставничкиот дом на Конгресот, порача дека е неопходно македонските власти целосно да ги истражат нападите врз пратениците во Собранието, извршени на 27 април, и одговорните да бидат изнесени пред лицето на правдата.

– Етничките тензии на Балканот уште еднаш се во пораст. Неодамнешното насилство во Македонија ја потцртува сериозноста на нивните политички проблеми – рече Ји, додавајќи дека национализмот во регионот е во пораст и дека потребно е проблемите соодветно да бидат третирани затоа што претставуваат закана за американските интереси во Европа.

Претседателот на Поткомитетот, Дана Рорабахер, побара Ји да ја појасни ситуацијата во Македонија и да одговори за обвинувањата за наводното мешање на американскиот амбасадор Џес Бејли и на Институтот „Отворено општество“ на Џорџ Сорос по изборите. Ји ги отфрли ваквите обвиненија, истакнувајќи дека Македонија сака да им се приклучи на НАТО и на ЕУ.

– Ние, како партнери, им помагаме да ги достигнат стандардите неопходни за да се постигне таа цел. Кога го браниме владеењето на правото, незвисното судство, човековите права, тоа не е секогаш популарно за власта – изјави Ји.


ВМРО-ДПМНЕ бара СДСМ да го повлече Џафери, а не да бара мандат за влада од Иванов


Скопје, 2 мај, 2017 - 10:03 (META) 

Позиците на двете партии, според нивните редовни утрински соопштенија, еден ден по разговорите со заменик-помошникот државен секретар за Европа и за Евроазија на САД, Хојт Брајан Ји, остануваат непроменети. ВМРО-ДПМНЕ смета дека Талат Џафери е избран за претседател на Собранието надвор од сите процедури и на незаконски начин, додека од СДСМ нагласуваат дека тој е „новиот легитимен претседател на Собранието“.

Од ВМРО-ДПМНЕ велат дека ваквиот преседан на СДСМ отвора можност во иднина „на незаконски начин да се повтори ваквата процедура и на ваков начин да се гласа двојазичноста, албанските банкноти, двојазични униформи, геноцидот и сите елементи од тиранската платформа“.

„Тоа е суспендирање на правниот систем на државата. ВМРО-ДПМНЕ не поддржува физичко насилство, но во исто време го осудува и политичкото насилство што го направи СДС врз институциите, деловникот, законите и Уставот. Народот бара СДС да ја отфрли тиранската платформа и да го повлече претседателот на Собрание кој беше избран спротивно на деловникот на Собранието на Република Македонија. Граѓаните на Република Македонија бараат законите и процедурите да важат за сите и никој да не се осмели да ги прекрши или заобиколи“, стои во соопштението на ВМРО-ДПМНЕ.

Од СДСМ, пак, нагласуваат дека по изборот на претседател на Собранието, парламентарното мнозинство има одговорност да ја формира новата влада и дека тоа го очекува целата домашна и меѓународна јавност.

Оттаму велат дека досегашниот претседавач, Трајко Вељаноски, нема право за „личните интереси на Никола Груевски да ја усложнува политичката ситуација и да го окупира противуставно и неделовнички кабинетот на претседателот на Собранието“.

„Нов собраниски претседател е Талат Џафери, со кого, како што соошти заменик-помошникот државен секретар за Европа и за Евроазија на САД, Хојт Брајан Ји, ќе работат и САД, а и ЕУ, НАТО и официјален Берлин. Новиот легитимен претседател на Собранието ќе испрати известување до Ѓорге Иванов дека е формирано демократско легитимино мнозинство и дека Иванов е должен да го додели мандатот на претседателот на СДСМ, Зоран Заев, за формирање влада“, стои во соопштението на СДСМ.

Во него се додава дека на Иванов ќе му биде предочено дека постои програма на новата реформска влада што во целост ја гарантира унитарноста на Македонија.

Од партијата нагласуваат дека крвавото насилство во парламентот, кога беше направен „кукавички обид за убиство на пратеници и насилство врз новинари и вработени во Собранието, мора да се истражи до крај и нарачателите и извршителите да понесат одговорност“ и дека Груевски, Иванов, Вељаноски и Чавков не смеат да го повторат насилството ниту повеќе да ги вознемируваат граѓаните со лаги и со нелогични барања за избори.


Заев: Не би сакале да се повтори 24 декември, не ги кажуваме тактиките на партијата


Скопје, 26 април, 2017 - 19:06 (META) 

„Постојат многу алтернативи, не ги кажуваме тактиките на партијата бидејќи може да предизвикаат чекори од нашиот опонент, па тоа да доведе до несакани состојби. Но, отворено зборувам дека не би сакале да се повтори 24 декември или нешто што е згрозувачко за македонската јавност. Видовме на што се подготвени ВМРО-ДПМНЕ и нивните коалициски партнери“, изјави лидерот на СДСМ, Зоран Заев, за „24 Вести“ на прашањето за можностите за решавање на политичката криза.

Заев смета дека парламентарното мнозинство има право и обврска да си преземе одговорност за водењето на парламентот преку избор на претседател од своите редови.

Лидерот на СДСМ го повтори партискиот став дека нема амнестија на криминалот, ниту нови парламентарни избори и дека Груевски мора да ја предаде власта.

Тој сакал заменик-помошникот државен секретар за Европа и за Евроазија во Стејт департментот, Хојт Брајан Ји, в понеделник да биде пречекан од нов претседател на Собранието.


Хојт Ји барал средба со Иванов, но претседателот е презафатен


Скопје, 26 април, 2017 - 12:05 (META) 

Заменик-помошникот државен секретар за Европа и за Евроазија во Стејт департментот, Хојт Брајан Ји, в понеделник нема да се сретне со претседателот Ѓорге Иванов, потврдија за „Мета“ од кабинетот на претседателот.

„До кабинетот на Претседателот на Република Македонија беше упатено барање за средба со заменик-помошникот државен секретар за Европа и за Евроазија во Стејт департментот, Хојт Брајан Ји, но со оглед на претходно утврдените обврски на претседателот на Република Македонија, Ѓорге Иванов, нема можност за реализација на таква средба“, велат во кабинетот.

Посетата на Ји доаѓа речиси два месеци откако тој од Загреб го повика Иванов да ја ревидира одлуката за доделување на мандатот.

– Искрено се надеваме дека македонскиот претседател ќе им овозможи на пратениците што изразија желба за тоа и на партиите што тие ги претставуваат да формира влада што е можно поскоро, бидејќи на Македонија ѝ треба влада која ќе ги продолжи и ќе ги доврши почнатите процеси во рамки на претпристапниот процес на Европската Унија – изјави Ји во Загреб.

Ји в понеделник ќе се обиде да помогне во надминувањето на политичката криза. Тој за време на еднодневната посета ќе разговара со политичките лидери за статусот на формирањето нова влада, за билатералните односи, како и за неопходните реформи за евроатлантска интеграција на земјава.


Хојт Ји на 1 мај доаѓа во Скопје на средба со политичките лидери


Скопје, 25 април, 2017 - 21:17 (META) 

Заменик-помошникот државен секретар за Европа и за Евроазија во американскиот Стејт департмент, Хојт Брајан Ји, в понеделник ќе допатува во Македонија во обид да помогне во надминувањето на политичката криза.

Ји, како што соопштија од Амбасадата на САД во Скопје, за време на посетата ќе разговара со политичките лидери за статусот на формирање нова влада, за билатералните односи, како и за неопходните реформи на евроатлантските интеграции.

Засега нема информации дали американскиот дипломат ќе има средба и со претседателот Ѓорге Иванов.

Заменик-помошникот државен секретар на САД во март, за време на посетата на Загреб, изрази загриженост за ситуацијата во Македонија и го повика претседателот Иванов да го додели мандатот за формирање влада.

– Искрено се надеваме дека македонскиот претседател ќе им овозможи на пратениците кои изразија желба за тоа и на партиите што тие ги претставуваат да формира влада што е можно поскоро, бидејќи на Македонија ѝ треба влада која ќе ги продолжи и ќе ги доврши почнатите процеси во рамки на претпристапниот процес на Европската Унија – изјави Ји во Загреб.