Пожар на имотот на Хилари и Бил Клинтон


Њујорк, 4 јануари, 2018 - 11:04 (META) 

Пожар избил на имотот на поранешниот претседател на САД, Бил Клинтон и неговата сопруга Хилари, која му беше противкандидат на актуелниот претседател Доналд Трамп.

Полицијата во 14.50 часот по локално време вчера, примила дојава за пожар на вториот кат на помалиот објект на имотот на Клинтон во Чапаква, во државата Њујорк, кој го користи Тајната служба.

Нема информација за повредени во пожарот, a полицијата го расветлува случајот.

 


Трамп: Тоа со Манафорт било пред многу години, зошто Хилари не е во фокусот?


Вашингтон, 30 октомври, 2017 - 19:05 (META) 

Претседателот на САД, Доналд Трамп, по повод обвинувањата против поранешниот шеф на неговата кампања, на „Твитер“ порача дека фокусот би требало да биде на Хилари Клинтон.

Трамп повторно ја употреби конструкцијата „нечесната Хилари“.

„Извинете, но ова било пред многу години, пред Пол Манафорт да стане дел од кампањата на Трамп. Зошто нечесната Хилари и демократите не се во фокусот“, праша Трамп.

Поранешниот шеф на неговата кампања, Манафорт, е обвинет за заговор против САД, проневера, перење пари, лажно сведочење и повеќе други дела затоа што заедно со неговиот соработник, Рик Гејтс, заработил милиони долари работејќи за украинскиот претседател Виктор Јанукович, а приходите не ги пријавил.


Хилари Клинтон формира ново политичко движење – „Заеднички напред“


Вашингтон, 16 мај, 2017 - 13:27 (META) 

Хилари Клинтон соопшти дека формирала ново политичко движење „Заеднички напред“, чија цел е да им помага на групите што ги поттикнуваат луѓето да се ангажираат во политиката и тие кои се против администрацијата на претседателот на САД, Доналд Трамп, јавуваат светските агенции.

Како што коментираат американските медиуми, формирањето на движењето го означува враќањето на Хилари Клинтон на политичката сцена по нејзиниот пораз од Доналд Трамп на претседателските избори во САД, на кои таа беше кандидат на Демократската партија.

„Изминатите неколку месеци размислував, го поминував времето со семејството и шетав низ шума. Повеќе од кога и да било, сега верувам дека граѓанскиот ангажман е од витално значење за нашата демократија. Ме инспирираат сите што се обидуваат да се организираат и да предводат. Оваа годиа не излезе онаква каква што предвидував, но знам зошто сè уште се борам: за похумана, похрабра, инклузивна Америка. Напред!“, пишува Клинтон во серијата твитови преку кои ја објави веста.

Таа конкретно наведува пет групи кои ќе ги поддржува нејзиното движење, меѓу кои е и „Неделиви“, чија декларирана цел е да се спротистават на Трамп, потоа организацијата за расна еднаквост „Боја на промените“ и водечката демократска програма за обука на жени „Америка што никнува“.

Како што пишува „Хафингтон пост“, движењето „Заеднички напред“ е организирано како добротворна непрофитна организација врз основа на американските правила за основање такви организации.

Тоа значи дека движењето ќе може да собира парични средства од кој било извор, а да не ги објавува имињата на своите донатори, пишуваат американските медиуми.


И Пенс, како Клинтон, вршел државни работи преку приватна е-пошта


Американскиот потпретседател Мајк Пенс ја користел својата приватна е-пошта за вршење јавни работи во време додека бил гувернер на американската држава Индијана, покажуваат јавните податоци во кои имале увид „Индијанаполис стар“.

Весникот вчера објави дека е-пораките, кои се добиени по барање за јавен пристап на податоци, покажуваат дека Пенс, додека бил на таа функција, комуницирал со советниците преку налог на „АОЛ“ за прашања за национална безбедност.

Пенс, исто така, имал безбедносни проблеми со својата е-пошта. Неговиот налог бил мета на обиди за кражба минатата пролет.

На контактите на Пенс им испратил е-порака во која лажно се твдело дека тој и неговата сопруга се заглавени на Филипини и дека им се потребни пари.

Тој потоа почнал да користи друг налог на „АОЛ“ со дополнителни безбедносни мерки, соопшти портпаролот на Пенс, Марк Лотер, истакнувајќи дека Пенс престанал да го користи личниот налог откако станал потпретседател на САД.

Според законите на Индијана, на јавните функционери не им е забраното да користат лични налози за е-пошта.


Електорите денеска ќе гласаат за претседател на САД


Вашингтон, 19 декември, 2016 - 15:14 (META) 

САД денеска официјално избираат претседател така што група од 538 електори ќе гласаат. Се очекува тие да ја потврдат победата на Доналд Трамп.

Трамп на изборите на 8 ноември, врз основа на гласовите на избирачите, доби мнозинство електори. Според системот од 18 век, секоја сојузна држава во САД има различен број на електори, пропорционално на бројот на жители.

Електорските гласови ќе ги преброи и ќе ги потврди Конгресот на 3 јануари, а како што оценува „Си-ен-ен“, кој било резултат освен победа на Трамо, би вовел „хаос во САД каков што не е виден во последните 140 години“.

Според „Си-ен-ен“, постои мала можност електорите да донесат изненадувачка одлука и да гласаат по свое убедување, бидејќи ниту еден електор нема уставна обврска да ја следи волјата на народот, односно да гласа како што се изјасниле гласачите во неговата држава.

Од тие причини, на денешните избори, таканаречените „превртливи електори“ би можеле да гласаат по сопствено убедување и да му го земат претседателскиот мандат на Трамп. Законски тоа е возможно, но шансите се мали.

На почетокот од ноември, по предизборната кампања која траеше повеќе од една година, републиканецот Доналд Трамп доби 62.979.636 гласови од избирачи во 30 сојузни држави, во кои освои 306 електори, а неговата противкандидатка, демократката Хилари Клинтон, доби повеќе гласови од избирачи – 65.844.610, но во 20 сојузни држави со помалку електори, па има само 232.

Во меѓувреме, американските медиуми јавуваат дека електорите се „под опсада“ поради Трамп и оти добиваат вознемирувачки телефонски повици, мејлови полни со омраза, па дури и закани по живот.


Хилари Клинтон призна дека е разочарана од поразот на претседателските избори


Вашингтон, 17 ноември, 2016 - 11:53 (META) 

Во своето прво појавување во јавноста по големиот пораз на претседателските избори во САД од Доналд Трамп, претседателската кандидатка на демократите, Хилари Клинтон, не ја скри својата разочараност. Во говорот што го одржа во Вашингтон, таа рече дека по објавувањето на резултатите не сакала „никогаш повеќе да го напушти својот дом“.

– Ќе признаам дека доаѓањето тука не беше лесна работа. Имаше неколку моменти минатата недела кога сè што сакав да направам е да се склопчам со добра книга и да не излезам од дома. Знам дека многу од вас се разочарани од резултатите. И јас сум, многу повеќе отколку што можам да опишам. Знам дека не е лесно. Знам дека претходната недела многу од вас се прашаа дали Америка е земја каква што сме мислеле дека е – рече Клинтон, но додаде дека секој треба да работи на тоа Америка да биде подобра, посилна и поправедна.

Таа рече дека длабоки се поделбите што настанале на овие избори.

– Америка вреди. Нашите деца вредат. Верувајте во нашата земја и борете се за нашите вредности и никогаш не откажувајте се – нагласи Клинтон.

По изборите, таа имаше само кратко обраќање, а во телефонски разговор со американските медиуми го обвини шефот на ФБИ, Џејмс Коми, за поразот.

Клинтон освои најмногу гласови од гласачите, но не и гласови од електоратите, кои во специфичниот изборен систем на САД формално го избираат претседателот. Таму, врз основа на бројот на освоените гласови на избирачите од сојузните држави, на кандидатите им се доделува соодветен број на електорски гласови, што е пресудно за изборот на шеф на држава.


Клинтон го обвинува директорот на ФБИ за поразот на изборите


Вашингтон, 13 ноември, 2016 - 12:10 (META) 

Демократската кандидатка на претседателските избори во САД, Хилари Клинтон, го обвини директорот на ФБИ, Џејмс Коми, за нејзиниот пораз на изборите на 8 ноември.

Хилари Клинтон, на затворена конференција, со главните донатори на Демократската партија, соопштила дека анализите покажале дека изјавите на директорот на ФБИ влијаеле на крајниот исход од изборите. Дел од говорот „протече“ во американските медиуми.

„Постојат повеќе причини изборите, какви што беа овие, да бидат неуспешни, но нашата анализа покажа дека писмото на Коми до Конгресот, околу новата истрага, покренаа дилеми и сомнежи дека нешто сепак има“, изјавила Клинтон пред донаторите и истакнала дека во истиот момент се разнишала дотогашната позиција и сигурното водство на демократскиот кандидат.

Коми, 10 дена пред изборите, соопшти дека повел нова истрага за користењето на приватниот сервер на Клинтон за испраќање и за примање службена електронска пошта. Тој претходно во јули соопшти дека се запираат сите понатамошни истраги бидејќи е утврдено дека Клинтон не сторила никакво кривично дело.

Два дена пред изборите, по реакциите од Белата куќа за тоа дека директорот на ФБИ ја прекршил досегашната практика на бирото да не коментираат нецелосно завршени истраги, Коми излезе со ново соопштение во кое рече дека ФБИ останува на првичната одлука – дека нема кривично дело – и дека постапката околу електронската пошта се затвора.


Протести во повеќе градови во САД поради победата на Доналд Трамп


Вашингтон, 10 ноември, 2016 - 9:39 (META) 

Mасовни протести во повеќе американски градови имаше синоќа по изборната победа на Доналд Трамп.

Демонстранти излегоа на улиците на Њујорк, Филаделфија, Чикаго, Бостон, Сиетл, Портланд, Сан Франциско и на Вашингтон, извикувајќи „Не е мојот претседател“ – фраза, која стана популарен хаштаг и на „Твитер“.

Илјадници луѓе излегоа на Шестата авенија во Њујорк, на која се наоѓа кулата „Трамп“, каде е бизнис-империјата на новоизбраниот претседател.

Демонстрантите во Чикаго скандираа „Еве како изгледа демократија“. Во северозападниот град Сиетл демонстрантите скандираа „Солидарност!“ и „Станете и возвратете на ударот“.

Група од повеќе од 100 лица во Вашингтон скандираше „Љубов, а не омраза“, во протестот што се одржа на две улици од Белата куќа.

Приближно 24 часа порано, слични протести избија и во повеќе градови од западното крајбрежје на САД, по неочекуваната победа на Трамп над Хилари Клинтон во претседателската трка.


Хилари Клинтон: Резултатите беа болни за мене, но му посакувам успех на Трамп


Њујорк, 9 ноември, 2016 - 18:55 (META) 

Демократската кандидатка за американски преседател, Хилари Клинтон, денеска изрази надеж дека нејзиниот противкандидат во изборната трка, републиканецот Доналд Трамп, ќе биде успешен претседател на сите Американци.

Во својата прва изјава по изборниот пораз, Клинтон изјави дека резултатите од изборите биле болни за неа и дека е разочарана, но му посака успех на Трамп и нагласи дека му понудила соработка.

– Синоќа му честитав на Трамп и му понудив соработка за доброто на нашата земја – изјави Клинтон во обраќањето во хотел во Њујорк.

Клинтон оцени дека вчерашните избори покажале оти „земјата е многу подлабоко поделена отколку што се мислело“, но сепак ги повика своите привразници да ги прифатат изборните резултатити.

– Треба да ја градиме Америка исполнета со надеж, со инклузивност и со големо срце. Мора да се почитува и да се брани владеењето на правото, рамноправноиста и слободата на веросповед. На Трамп му нудиме отворен ум и шанса да ја поведе земјата – истакна Клинтон.

Инаку, во меѓувреме беше соопштено дека Клинтон победила во сојузната држава Минесота, со што освои уште 10 електорски гласа.

Сепак, овие резултати не можат да влијаат на изборот на Трамп за претседател, бидејќи тој веќе освои 276 електорски гласови или шест повеќе од непоходните 270 за победа.


Доналд Трамп стана претседател на САД во неизвесна трка до самиот крај


Вашингтон, 9 ноември, 2016 - 8:52 (META) 

Републиканскиот кандидат за претседател, Доналд Трамп, во неизвесна и непредвидлива трка до самиот крај, ја победи противкандидатката од Демократската партија, Хилари Клинтон, и стана 45. претседател на Соединетите Aмерикански Држави.

Американскиот милијардер, според анализата на „Њујорк тајмс“, ги освои потребните 270 електорски гласови од сојузните држави Кентаки, Индијана, Западна Вирџинија, Оклахома, Тенеси, Мисисипи, Алабама, Јужна Каролина, Северна Дакота, Јужна Дакота, Вајоминг, Небраска, Канзас, Тексас, Арканзас, Луизијана, Монтана, Мисури, Охајо, Ајдахо, Северна Каролина, Небраска, Флорида, Џорџија, Ајова, Монтана, Јута, Аризона, Алјаска, Мичиген, Висконсин.

Поранешната државна секретарка Клинтон освои 219 електорски гласови од државите Вермонт, Илиноис, Њу Џерси, Масачусетс, Мериленд, Роуд Ајленд, Вашингтон ДЦ, Делавер, Њујорк, Конетикат, Њу Мексико, Вирџинија, Колорадо, Калифорнија, Хаваи, Орегон, Вашингтон, Невада, Мејн, Њу Хемпшир.

Кандидатите на изборниот ден тргнаа со практично еднакви шанси, но Клинтон имаше епитет на фаворит за време на целата кампања. Сепак, за време на изборната ноќ работите драстично се променија.

Во изборниот штаб на Хилари Клинтон за неколку часа ситуацијата драстично се промени, па сега владее шок и неверување, а во штабот на Доналд Трамп прославувањето почна уште пред тој официјално да биде прогласен за претседател.

Клинтон се надеваше дека ќе стане првата жена претседател на САД, но повеќе од половината од белците гласаа за републиканецот, додека 90 отсто од Афроамериканците и две-третини од Латиноамериканците гласаа за демократката.

Убедлива победа на Републиканската партија се очекува и на паралелните избори кои се водат за Конгресот и за Сенатот.

Исчекувајќи ги последните резултати од неизвесната трка за претседател на САД во која засега води Доналд Трамп, во хотелот „Александар палас“ се обрати амбасадорот на САД во Македонија, Џес Бејли, кој рече дека по изборниот период е време да се тргнат чуствата настрана и дека е време на патриотизам.

Тој додаде дека САД се партнери на Македонија 25 години и дека Македонија добила поддршка од четири различни администрации на САД.