Обновливите извори на енергија го победија јагленот во Германија


Берлин, 11 јули, 2018 - 13:56 (META) 

Во првото полугодие на годинава, Германија добила повеќе струја од обновливите извори на енергија, отколку од јагленот, соопшти германската Асоцијација за енергија и вода.

Со тоа Германија и официјално влегува во иднината. Иако досега производената струја од хидроелектрани, соларни електрани и ветроелектрани и од биогас го надминуваше производството од јаглен и лигнит, тоа се случуваше само во одредени денови или седмици, но ова е првпат обновливите извори да доминираат во толку долг период.

Од јануари до јуни, обновливите извори учествувале со 36,3 отсто од вкупното производство, а јагленот само 35,1 отсто. Остатокот отпаѓа на струјата произведена од природен гас и од нуклеарните електрани.

Пресметките велат дека „зелената“ струја изнесувала 118 милијарди киловат часови, а тоа е дури 10 отсто повеќе отколку во истиот период во 2017 година. Струјата произведена со согорување лигнит и јаглен изнесувала 114 милијарди киловатчасови, значително помалку од 127 милијарди киловатчасови во првата половина на 2017 година.

Опаднало и производството на струја од природен гас – од 44 милијарди киловатчасови во првата половина на 2017 година, на 40 милијарди киловатчасови во првото шестмесечје на годинава.  Нуклеарната енергија во првата половина на годинава придонела со 37 милијарди киловатчасови.


ЕЛЕМ: Планирано исклучување на блок 3 во РЕК Битола


Битола, 11 јули, 2018 - 13:16 (META) 

АД ЕЛЕМ информира дека РЕК Битола во текот на вечерта ќе изврши планирано исклучување на блок 3.

„Причината за планираното исклучување е намалениот конзум на електрична енергија во овој период и добрата хидролошка состојба која овозможува производство од хидроелектраните, што дава можност овој период да се искористи за превентивна нега на блокот, отстранување на помали дефекти и за зајакнување на оперативноста и на расположливоста на блокот. Блок 3 ќе биде вратен во мрежа на почетокот на следната недела. РЕК Битола ќе го продолжи континуираното производството на електрична енергија преку блок 2, додека на блок 1 се изведува капиталниот ремонт“, се вели во соопштението на ЕЛЕМ.


Балканските земји бараат СБ и ЕИБ повеќе да финансираат во новите хидроелектрани


Подгорица, 26 ноември, 2017 - 15:16 (META) 

Државните електростопанства на земјите од Балканот бараат од меѓународните финансиски институции, како Светската банка (СБ) и Европската инвестициска банка (ЕИБ) повеќе да ги финансираат новите проекти за изградба на хидроелектрани на Балканот.

Ова било истакнато на дебатата на конференцијата „Хидроенергија Балкан 2017“ (Hydro Power Balkans 2017) која се одржа во Подгорица, Црна Гора, на која се дискутирало за проблемите во планирањето и изградбата на нови хидроелектрани, соопштија од „Електрани на Македонија“ (ЕЛЕМ), чии претставници учествувале на конференцијата.

„Учесниците од земјите од регионот се согласија дека е потребно забрзување на сложениот процес на усогласување на дел од локалните закони со законите на Европската Унија, во делот на заштитата на животната средина, бидејќи меѓународните финансиски институции влегуваат во финансирање само на проекти за нови хидроелектрани кои ги запазуваат високите стандарди на ЕУ за заштита на околината“, стои во соопштението.

Претставниците на ЕЛЕМ на конференцијата ја истакнале нужноста од инвестирање во производството на овој вид електрична енергија, како чиста и долгорочно најисплатлива, и во таа насока ги презентирале идните развојни проекти, хидроелектраните „Чебрен“ и „Галиште“ и дел од Вардарска Долина.

„Со оглед на тоа што овие проекти не се наоѓаат во заштитени подрачја за кои важат посебни одредби, истите предизвикаа интерес кај меѓународните инвеститори, како и кај производителите на опрема, присутни на конференцијата“, велат од ЕЛЕМ.


СДСМ: ЕЛЕМ го загрози Охридско Езеро, ќе има одговорност


Скопје, 6 февруари, 2017 - 12:51 (META) 

Во денови на најмал дотек на вода во Охридско Eзеро, енергетската компанија АД ЕЛЕМ произвела струја повеќе од планираното токму преку двете хидроелектрани што користат вода од езерото, се вели во соопштението на СДСМ.

– Документот се однесува на декември 2016 година и од него може да се види дека хидроелектраните Глобочица и Шпилје, коишто користат вода од Охридско Езеро, произвеле повеќе од 16 гигават-часови пoвеќе електричнa енергијa oд тоа што било плaнирaнo. Очигледно дека компанијата ЕЛЕМ, соочена со потребата од скап милионски увоз на струја и со недостиг на други домашни енергетски капацитети, недозволиво посегнала по максимално производство на струја преку водите на Охридско Езеро – велат од СДСМ.

Во соопштението на партијата се додава дека „граѓаните знаат дека раководството на ЕЛЕМ поврзано со криминалното раководство на ВМРО-ДПМНЕ деновиве несовесно зборува за инвестиции во домашни енергетски капацитети, само да го оттргне вниманието од овој скандал“.


Италијанската компанија „Кондоте“ ќе гради 4 мали хидроелектрани


Скопје, 13 јануари, 2016 - 15:40 (META) 

Италијанската компанија „Кондоте“ ќе гради четири мали хидроелектрани, кои претставуваат инвестиција во вкупна вредност од 19 милиони евра.

– Оваа инвестиција во делот на обновливите извори на енергија на водечката италијанската градежна компанија „Кондоте“, преку фирмата ИМПГ ДОО Скопје, покрај изградбата на четири хидроцентрали, и тоа на Ештеричка, Кадина и на Зрновска Река, каде ќе бидат изградени две централи, придонесе за ангажирање на многу локални македонски компании во изведбата на овие мали хидроцентрали и на тој начин дополнително позитивно влијае на македонската економија – изјави министерот за економија, Беким Незири.

Првата хидроцентрала, лоцирана на Ештеричка Река, над Пробиштип, со комерцијална работа почнува зимава, а другите три хидроцентрали се во фаза на градежни активности, пробивање на пристапни патишта или подготвителни активности за реализација на проектите, во зависност од локацијата.

Сопственикот на „Кондоте“, Дучо Асталди, изрази задоволство од соработката со локалните македонски компании.

-Компанијата „Кондоте“, со историја од 135 години, ја реализираше првата инвестиција од 19 милиони евра во четири мали хидоелектрани за производство на електрична енергија. Планираме да продолжиме со нови ивестиции во Македонија во иднина – изјави Асталди.