Евакуирани 10.000 жители поради вулканска ерупција на Хаваи


Хаваи, 4 мај, 2018 - 12:00 (META) 

Околу 10.000 жители на Хаваи се евакуираат принудно, поради новите ерупции на вулканот Килауеа.

На излевањето на лавата и пепелта од вулканот на островот Хаваи, најголемиот од сите острови на Хавајскиот Архипелаг, им претходеше  земјотрес со интензитет од 5 степени.

Властите стравуваат и од можноста лавата да дотече до куќите, но пред сè од сериозни последици по дишните патишта на луѓето и од задушување.

Еден очевидец вели дека видел како тече лавата како „завеса од оган“, како и дека почувствувал мирис на сулфур и запалени дрвја.


Човечка грешка предизвика паника на Хаваи со лажен аларм за напад со балистички ракети


Хонолулу, 14 јануари, 2018 - 11:53 (META) 

Поради човечка грешка, повеќе од милион и половина жители на Хаваи и туристи вчера беа вџашени и крајно вознемирени откако на своите мобилни телефони добија порака дека балистички ракети се упатени кон Хаваи и сите мора да се засолнат, со напомена дека не станува збор за грешка.

За среќа, алармот испратен вчера претпладне по локално време беше лажен, а станувало збор за грешка на еден вработен во службата за тревожење на Хаваи.

Жителите на островите по тревогата биле зафатени од паника и хистерија и огромен број од нив итале да се засолнат. Некои од нив влегувале во шахти и ги затворале капаците над себе.

Раководството на сојузната држава се извини за лажната тревога.

Причината е стискање на погрешно копче од страна на вработен Агенцијата за справување со итни состојби (ЕМА) на Хаваи,кога требало да ја предаде смената.

Дури 18 минути по лажната тревога исправка била испратена по електронска пошта, а нова порака со исправка на мобилните телефони на граѓаните стасала друи 38 минути подоцна.


Судија од Хаваи повторно ја блокираше забраната на Трамп


Вашингтон, 18 октомври, 2017 - 9:49 (META) 

Американски сојузен судија на Хаваи ја блокираше последната верзија на забраната за влез во земјата само неколку часа пред да стапи на сила мерката на претседателот САД, Доналд Трамп.

Окружниот судија, Дерек Вотсон, го одобри барањето на сојузната држава Хаваи привремено да ја блокира владата во Вашингтон до спроведувањето на мерката за забрана.

Забраната требаше да стапи на сила на полноќ според американско време.

Според новата измена на указот на Трамп, погодени се граѓаните на Чад, Иран, Либија, Северна Кореја, Сомалија, Сирија и на Јемен, како и некои владини претставници од Венецуела и членови на нивните семејства.

Хаваи се противи на одлуката и наведува дека е продолжение на „ветувањето на Доналд Трамп да се исклучат муслиманите од САД“.

Забраната се разгледува и во судовите во други сојузни држави, како Мериленд, во кои групите за заштита на граѓанските слободи се повикуваат на укинувањето на рестрикцијата за издавање визи и за патувања.


Најмалку тројца загинати во пожар во солитер на Хаваи


Хонолулу, 15 јули, 2017 - 11:43 (META) 

Најмалку три лица загинаа во пожар во солитер во Хонолулу, на Хаваи.

Пожарот избил вчера попладнето по локално време, на 26. кат од солитерот „Марко Поло“. Огнот бргу се проширил на другите катови.

Полицијата стравува дека тоа не е конечен број на жртви. Во пожарот повредени се 16 луѓе. Околу 100 пожарникари го гаснеле огнот четири и пол часа.

Зградата има 36 ката и 568 станови, а била изградена во 1971 година.


Судија од Хаваи ја блокираше новата уредба на Трамп


Вашингтон, 16 март, 2017 - 10:22 (META) 

Неколку часа пред да стапи на сила, федералниот судија од Хаваи ја блокираше новата извршна уредба на американскиот претседател Доналд Трамп за забрана за влез во САД.

Окружниот судија Дерик Вотсон ги доведе во прашање доказите и образложенијата на Трамп дека забраната се воведува поради национална безбедност, пренесува „Би-би-си“.

Тој истакна дека новата извршна уредба не ги исполнува правните односи и издаде привремена забрана, која важи на целата територија на САД.

– Хаваи има горда историја на пристигнување на илегални мигранти кои тука беа добредојдени и ние и понатаму ја славиме нашата разноликост. Одамна сме научени дека кога луѓето од различно потекло работат заедно, можат да остварат големи дела. Верувам дека постојните закони ќе осигураат ригорозен процес на проверка на луѓето што доаѓаат на Хаваи, со што се обезбедува сигурност и благосостојба на нашата заедница – вели Даг Чин, државен обвинител на Хаваи.
На собирот во Тенеси, Трамп изјави дека пресудата е без преседан и дека поради неа САД изгледаат слабо.

Тој додаде дека ќе оди докрај, односно дека ќе ја турка работата до Врховниот суд, каде оцени дека ќе победи.

– Уредбата што судијата од Хаваи ја блокираше е ублажена верзија на првата уредба, која исто така е блокирана од друг судија, што, според мене, никогаш не требаше да се случи. Овој потег, според многумина, е надминување на судските овластувања без преседан. Законот и Уставот му даваат овластувања на претсеателот да ја суспендира имиграцијата во САД кога тој смета дека тоа е неопходно, а во интерес на американскиот народ – рече Трамп.

Новата извршна уредба за забрана на влезот во САД треба денеска да стапи на сила. Со неа се забранува влез во САД на државјани на Иран, Либија, Сомалија, Судан, Сирија и на Јемен на 90 дена, а на бегалците на 120 дена.


Историска посета на јапонскиот премиер Шинзо Абе на Перл Харбор


Хонолулу, 27 декември, 2016 - 10:20 (META) 

Јапонскиот премиер Шинзо Абе посети неколку споменици на Хаваи пред неговата историска посета на Перл Харбор.

Абе ќе биде првиот јапонски премиер што го посетил Перл Харбор. Покрај него ќе биде и претседателот на САД, Барак Обама, кој пред само неколку месеци стана првиот американски претседател што ја посети Хирошима.

Абе на Перл Харбор ќе им оддаде почит на мртвите, но нема да се извини, исто како што во Хирошима направи Обама.

По слетувањето на Хаваи, јапонскиот премиер прво се упати на националните гробишта каде што положи венец. Светските медиуми пишуваат дека Абе на гробиштата останал подолго време во тишина.

За време на јапонскиот напад на Перл Харбор убиени се околу 2.300 Американци и тоа беше причина САД да се вклучи во Втората светска војна.

За време на нападот на Перл Харбор, сите осум воени бродови беа оштетени, а четири беа потопени.

Абе и Обама ќе се помолат за мртвите на местото на нападот по самитот кој ќе се одржи на Хаваи, последен пред Обама да го напушти местото претседател во јануари.

Обама пред неколку месеци ја посети Хирошима, каде САД фрлија атомска бомба од која загинаа 150.000 луѓе.


Два хеликоптери се судрија над Хаваи


Хонолулу, 15 јануари, 2016 - 15:53 (META) 

Два воени хеликоптери денеска се судрија во воздух над брегот на Хаваи, јавуваат американските медиуми.

Вкупно 12 патника летале во хеликоптерите, а се судриле на северниот брег на островот Оаху, јавува американската крајбрежна стража.

Спасувачките екипи воочиле оган на површината на морето, каде лебделе и остатоци од хеликоптерите. Во морето имало и празен сплав за спасување. Крајбрежната стража и понатаму трага по преживеани, а помош им пружаат и маринците и пожарникарите од Хонолулу.

Потрагата дополнително е отежната поради големите бранови и силните струи.


На Хаваи целосно забранета употребата на пластични кеси


Хонолулу, 2 јули, 2015 - 12:14 (META) 

Во американската сојузна држава Хаваи, од вчера стапи на сила одлуката со која целосно се забранува диструбицијата и употребата на пластични кеси во продавниците, јавуваат американските медиуми.

Властите на градот и на областа Хонолулу, која во целост го покрива Оаху, најнаселениот остров на Хаваи, донеле одлука со која им се забранува на продавниците да им даваат пластични кеси на своите клиенти.

Хаваи е првата сојузна држава на САД што целосно ја забрани употребата на пластични кеси.

Калифорнија пред извесно време донесе закон со кој се бара продавниците да наплаќаат за кесите, но мерката е ставена во мирување до референдумот закажан за ноември оваа година, на кој граѓаните треба да се изјаснат за ова прашање, пишува „Хафингтон пост“.

За разлика од Калифорнија, каде мерката е донесена од државното законодавство, во Хаваи таа била спроведена на локално ниво.

„Ова не се прави од страна на државното законодавство, туку од сите четири окружни совети“, изјавиле од Фондацијата „Сурфрајдер“ и адвокатска група за животна средина во 2012 година, кога забраната за употреба на пластични кеси првпат била донесена.

Од групата, мерката ја дефинирале како „одличен пример за тоа како локaлните активисти и донесувачите на одлуки можат заеднички да придонесат во решавањето на проблемот со загадувањето со пластичен отпад“.


Во хеликоптерска несреќа на Хаваи загина еден војник


Хонолулу, 18 мај, 2015 - 9:19 (META) 

Хеликоптер „МВ-22 оспреј“ на американската морнарица доживеа несреќа при принудно слетување на Хаваи, при што загина еден војник, а 21 се повредени.

За време на принудното слетување, хеликоптерот се користел за обука во воздухопловната база во Беловс на островот Оахо.

Причината за несреќата се истражува.


Експлодира вулкан на Хаваи


Хонолулу, 5 мај, 2015 - 13:36 (META) 

Вжештена лава, камења и гас полетаа низ воздухот по експлозија на вулканот Килауеа на Хаваите, што беше предизвикана од уривање на ѕидот на кратерот.

Уривањето на карпите предизвика експлозија, излевање на лава и ширење на вулкански материјал околу кратерот Халемауману, на вулканот Килауеа, соопшти хавајската вулканска опсерваторија.

Карпите што го опколувале езерото од лава попуштиле под влијание на гасовите и на крај паднале во езерото, предизвикувајќи експлозија која исфрли материјал во небото во висина до 280 метри.