Продолжува сообраќајниот хаос во Тетово


Тетово, 3 октомври, 2018 - 14:23 (META) 

Полициската станица за безбедност на патниот сообраќај Тетово, деновиве ги интензивира контролните активности за поголем ред со паркирањето во градот и законско санкционирање на непрописното паркираните возила.

Сепак, граѓаните се жалат дека сообраќајниот хаос е секојдневна слика во Тетово, особено во попладневните часови. Велат, ниту зонското паркирање не ја регулира хаотичната ситуација во градот. Сликата за Тетово е таква веќе неколку години.

Само во текот на вчерашниот ден, во Тетово откриени и подигнати се 20 погрешно паркирани возила, како и 5 возила кои ги управувале лица без положен возачки возачки испит, информираат од Секторот за внатрешни работи Тетово.

Овие и другите прекршоци заокружени се со 20 прекршочни и 41 мандатен платен налог, а активностите ќе продолжат и во текот на наредните денови со ист интензитет, стои во соопштението на СВР Тетово.


ААВМУ не може да избегне одговорност за медиумскиот хаос, велат од Владата


Скопје, 5 март, 2018 - 16:09 (META) 

Владата и Агенцијата за аудио и аудиовизуелни медиумски услуги (ААВМУ) вчера и денеска разменија остри забелешки за проблемите во медиумската сфера во изминатиот период, по обвинувањето од министерот Роберт Поповски во петокот дека Агенцијата со години не функционирала и не си ги вршела надлежностите, во контекст на реемитување странски програмски сервиси без авторски права.

ААВМУ вчера реагираше дека станува збор за „неаргументирани, паушални изјави чија намера е да се дискредитира работата на Агенцијата, а особено изненадува што тие се дадени од министер чија примарна задача треба да биде точно и аргументирано информирање на јавноста“.

Од ААВМУ велат дека операторите што реемитуваат програми мора да ги регистрираат во Агенцијата, а притоа доставуваат изјава под полна одговорност дека за реемитување на програмските пакети има уредено авторски и сродни права.

„Агенцијата редовно врши мониторинг врз кабелските оператори и доколку констатира дека некој оператор реемитува нерегистрирани програмски сервиси, на истиот му изрекува мерка и му наложува веднаш да ги исклучи програмските сервиси. Истовремено, Агенцијата ги известува имателите на правата, за да можат да покренат соодветна постапка против операторот, имајќи предвид дека Агенцијата нема можност да покренува судска постапка во нивно име“, стои во реакцијата од ААВМУ.

Во 2015 по таа основа агенцијата изрекла 62 мерки и покренала 23 прекршочни постапки, а пак во 2016 година изрекла 13 мерки без ниту една прекршочна постапка. Минатата година изрекла само шест мерки, повторно, без ниту една прекршочна постапка.

„Со оглед на фактот што обемот и бројот на спроведени надзори се на исто ниво во посочените години, значителното намалување на прекршувањата покажува само едно – дека Агенцијата обезбедува доследна имплементација на законот“, стои во реакцијата.

Владата на Република Македонија пак, денеска реагираше до АВМУ велејќи дека Агенцијата не може да избегне одговорност за медиумскиот хаос во изминативе години.

„Како регулаторно тело за медиумите во Македонија, АВМУ е директно одговорна за со години непречениот политички и финансиски диктат врз медиумите, нејасните и нерегулирани односи помеѓу операторите и медиумите, кршење на авторски права, итн. Агенцијата залудно се обидува да се скрие зад нафрлени бројки и статистики кои не дале никаков ефект за спречување на таквото безредие во медиумската сфера во земјава. Медиумското безредие беше константно премолчувано од надлежните институции, меѓу кои првоповикана да стави ред е АВМУ. Оттаму произлезе и потребата за измени и дополнувања на Законот за аудио и аудиовизуелни медиумски услуги“, стои во реакцијата од Владата.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Изложба на фотографии на тема „Победата над фашизмот“


Охрид, 8 мај, 2017 - 15:40 (META) 

Денеска во Центарот за култура „Григор Прличев“ во Охрид беше отворена изложбата „Победата над фашизмот“, по повод Денот на победата над фашизмот, 9 Мај.

– Преку 30 фотографии е претставен денот на ослободувањето на различни градови низ Европа, во кои учествувала и руската армија. Ова е еден наш придонес во севкупното одбележување и манифестаците кои се одвиваат во Македонија и во светот по повод овој значаен историски датум – рече на отворањето почесниот конзул на Руската Федерација, Велимир Стојковски.

Првиот секретар во Амбасадата на Руската Федерација во Македонија, Александар Алексеев, рече дека експонатите, фотографирани во време кога не постоела современа технологија, се реален израз на луѓето кои со голема радост ја дочекале слободата.

– А, за оние кои се подготвуваат или имаат намера да го реинкарнираат фашизмот, ова треба да биде знак и јасен сигнал каков крај ќе го дочека таквиот обид да се внесе хаос и немир во светот – подвлече Алексеев.

Организатори на изложбата се Амбасадата на Руската Федерација во Македонија, почесниот конзулат на Руската Федерација во Охрид и Општина Охрид.


Ердоган: Ќе се бориме докрај против сите напади на терористичките групи


Истанбул, 1 јануари, 2017 - 15:04 (META) 

По повод терористичкиот напад во ноќен клуб во Истанбул, во кој загинаа 39 лица, претседателот на Турција, Реџеп Таип Ердоган, изјави дека Турција ќе се бори докрај против сите напади на терористичките групи и на нивните поддржувачи и додаде дека ваквите напади не се независни од случувањата во регионот.

– Тие се обидуваат да создадат хаос, да го деморализираат нашиот народ и да ја дестабилизираат земјата со ваквите напади насочени против цивили. Ние ќе ја сочуваме присебноста како нација, уште повеќе ќе се сплотиме, никогаш нема да отстапиме пред ваквите валкани игри – се вели во писмената изјава на претседателот, објавена денеска.

Нападот во Истанбул го осудија голем број светски политичари меѓу кои рускиот претседател Владимир Путин, германската канцеларка Ангела Меркел, францускиот претседател Франсоа Оланд, како и Европската Унија и Белата куќа.


Министерот за правда Џафери мртов ладен додека ресорот му го тресат скандали


Скопје, 17 ноември, 2016 - 16:20 (META) 

Иако во најголемиот кривичен суд во земјава, Основниот суд Скопје 1, се случува циркус, а Извештајот на Европската комисија за напредокот на Македонија нотира сериозни недостатоци во правосудниот систем и опструкции врз работата на Специјалното јавно обвинителство, најодговорниот за правосудниот систем во земјава, министерот за правда, е целосно отсутен од случувањата во неговиот ресор – го нема во јавноста и не се изјаснува за ништо.

Дали во земјава има министер за правда и што тој прави деновиве?

Младиот кадар на ДУИ, 26-годишниот министер за правда, Валдет Џафери, досега не излезе со никаков коментар и со став околу извештајот на ЕК, а молчи и за случувањата во Кривичниот суд, каде судии преку писма и претставки се бунтуваат против претседателот на судот, Владимир Панчевски, а вработени меѓусебната нетрпеливост ја решаваат со навреди, закани и со физички пресметки.

Последната активност на министерот Џафери објавена на официјалната интернет-страница на Министерството за правда е неговото учество на традиционалната манифестација „Нотарски денови“ од 31 октомври годинава. На страницата, во категоријата каде треба да биде биографијата на Џафери, кој на функцијата беше назначен во април годинава, не само што нема никакви податоци, туку го нема ниту неговото име. Стои само слика.

Од манифестацијата „Нотарски денови“ досега во Кривичниот суд и во сферата на правосудството се случија следните настани, кои како да не го интересираат младиот министер Џафери:

  • Судијата Иван Џолев поднесе кривична пријава против претседателот на Кривичниот суд, Владимир Панчевски, за примање награда за противзаконско влијание;
  • Европската комисија во годинешниот Извештај за напредокот на земјава во евроинтеграциите, во делот за судството нотира назадување, политичкото влијание, опструкции, недостиг од независност и недостигот од спречување на селективна правда;
  • 13 судии испратија писмо и претставка до Судскиот совет од кого бараат да го санкционира Панчевски, поради злоупотреби и користење на официјалната интернет-страница на судот за лични постапувања и ставови за одреден судија;
  • Панчевски преку страницата на Кривичниот суд информираше дека дал исказ во Обвинителството за организиран криминал и корупција по пријавата до Џолев и дека веднаш потоа му поднел на колегата контрапријава за лажно пријавување на кривично дело;
  • Претседателката на највисокиот суд во земјава, Врховниот суд, Лидија Недлекова, во интервју за емисијата 360 степени“ на „Алсат М“ меѓу другото искоментира дека во судскиот систем во земјава има сериозни проблеми, а нејзиниот колега Владимир Панчевски не заслужува нов мандат како претседател на Кривичниот суд, со оглед на тоа како досега ја извршувал функцијата;
  • Кривичниот суд соопшти дека референтот за човечки ресурси првин ѝ се заканувал по животот, а потоа и физички ја нападнал портпаролката на судот, поради што интервениралa полиција и се правел записник. Референтот вчера тврдеше дека не ја нападнал колешката и го обвини Панчевски дека им се заканува на вработени кои реагирале на воспоставената норма за работа и незаконското распоредување на службениците;
  • Во меѓувреме, Панчевски изјави дека „секој судија во Основниот суд Скопје 1 е дуќанче, секој судија е чешмичка. Чешмичките им се затворија, па затоа се бесни“.

Министерството за правда, иако еден од најважните ресори во Владата, изминативе години го водеа министри кои не се покажаа многу на оваа функција, а некои од се најдоа вплеткани и во скандали.

Валдет Џафери министерската фотелја ја презеде од Аднан Јашари (исто така кадар на ДУИ), кој иако беше поактивен, речиси двегодишното министерување го заврши без позначајни резултати.

Неговиот претходник пак Блерим Беџети, не само што не помогна во унапредувањето на правосудниот систем, во јуни 2013 година се најде на тапет на јавноста, откако пратеникот на ДПА во Собранието, Беким Фазлиу рече дека за време на полициска акција во ноќниот клуб „Шери“ во Градскиот парк, кај Беџети бил најден пиштол и дрога.

Тогашниот министер за правда ги демантираше ваквите тврдења, но случајот остана нерасчистен и без епилог.


СДСМ: Иванов донел две одлуки за поништување на помилувањето со ист број


Скопје, 30 мај, 2016 - 14:40 (META) 

Опозициската СДСМ, денеска преку соопштение обвини дека со одлуките за повлекување на аболицијата, претседателот Ѓорге Иванов направил само поголем хаос.

„По објавувањето на одлуките за поништување на дел од неуставните одлуки за помилување, видливо е дека лицето Ѓорге Иванов има донесено две одлуки со ист број: 08-534/1. Овие Одлуки на Иванов се со ист број иако се однесуваат на различни случаи коишто се предмет на спроведување на постапка. Со тоа едната Одлука на Иванов е неважечка и нема правно дејство. Дополнително, тоа значи дека Одлуката на Иванов со број: 08-543/1 објавена во Службен весник на 12 април 2016 година се уште е на сила. Или Иванов намерно го проширува хаосот или воопшто не знае какви одлуки носи. Хаосот што го создаде Иванов, за да ги заштити криминалците во власта, може да се реши само со целосно поништување на неуставните одлуки за аболиции“, пишува во соопштението на СДСМ.


Спасовски: Владата создаде услови за пуч во МВР


Скопје, 22 април, 2016 - 15:13 (META) 

Владата создаде услови за извршување пуч во МВР, изјави денеска на прес-конференција министерот за внатрешни работи, Оливер Спасовски. Тој истакна дека е оневозможен од страна на Владата да раководи со Министерството, „во овие исклучително тешки моменти за државата“ и да одговара за „последиците од ваквиот свесно креиран хаос во министерството“.

– Владата, од неразјаснети за мене причини, не ја испочитува мојата јасно изразена волја преку оставката што ја поднесов на 6 април 2016 година од функцијата министер за внатрешни работи и не ја достави до Собранието. Од друга страна, Владата двапати ги поништи решенијата и правилниците донесени од моја страна. Со тоа органот кој треба да биде чувар на Уставот и на законите во Република Македонија, со своите незаконски одлуки целосно го дерогираше правниот систем и направи целосен хаос во функционирањето на Министертвото за внатрешни работи – изјави Спасовски.

Според министерот за внатрешни работи, и покрај сите укажувања, предупредувања и наредби доставени до директорите на органите во МВР и до сите вработени во министерството, Владата со одлуката донесена ноќта пред распуштањето на Собранието го задала завршниот удар на правниот систем во Македонија и на нормалното функционирање на МВР.

– Замислете, Владата му забрани на министерот за внатрешни работи да потпишува документи, а со тоа и да раководи со органот. Не постои држава во светот каде што е позната ваква небулозна наредба издадена од највисокиот извршен орган на земјата – вели Спасовски, додавајќи дека освен што му е забрането да ги извршува своите надлежности како министер, Владата ги потикнала другите функционери во министерството да ги спроведат нејзините незаконски одлуки и да вршат кривични дела.

Спасовски тврди дека последните два дена директорите на Управата за безбедност и контраразузнавање и државниот секретар на МВР, надвор од законот, издавале усни наредби за одземање на канцелариите, менување на бравите, исклучување на службените картички на дел од вработените чии решенија Владата незаконски ги поништи.

– Со овој чин, фактички и директорот на УБК и државниот секретар, од своја страна ги потикнуваат вработените да извршуваат кривични дела, преку реализирање на овие оперативни задачи, за кои се одговара според Кривичниот законик. Според информациите што ги имам, државниот секретар ја презема улогата да раководи со МВР. Сигурно ви е јасно дека со тоа се создава безвластие и комплетен хаос во Министерството за внатрешни работи. Јас сум министер за внатрешни работи и не прифаќам никакви палијативни решенија и комбинации на заедничко раководење со министерството, па, според тоа, не прифаќам ни наметната одговорност за надлежности кои свесно ми се одземени – изјави Спасовски на денешната прес-конференција.


СДСМ: Хаотичниот избирачки список потврдува изборна измама


Скопје, 6 март, 2016 - 11:44 (META) 

„Се потврди дека Никола Груевски и ВМРО-ДПМНЕ спроведувале криминални избори, преку фантомски гласачи и злоупотреби на државните институции. Jавноста секојдневно се запознава со хаотичниот избирачки список“, се вели во соопштението на СДСМ.

Од опозициската партија додаваат дека само неколку примери покажуваат дека на една адреса фигурираат и по стотина, па дури и повеќе лица.

– На една адреса во Скопје се запишани 112 лица, а на друга 66, на трета 33 лица. На една адреса во Ресен се запишани 34, на друга, 24, на трета осум лица. Големиот број лица впишани на иста адреса, но и бројките на станари кај пратеници и министри од ВМРО-ДПМНЕ, покажа дека планот за изборна измама бил направен во врвот на ВМРО-ДПМНЕ. Се виде за каква злосторничка банда се работи, какви изборни измами правела – се вели во соопштението на опозициската партија.

Оттаму ја повикуваат Државната изборна комисија што побргу да даде инструкции, а граѓаните да го искористат своето законско право да пријават неправилности, но да доставуваат информации и до МВР, за да се покренат соодветни постапки.


Европа не смее да ја остави Грција на цедило, порачува Меркел


Берлин, 29 февруари, 2016 - 10:07 (META) 

Европа не смее да дозволи Грција да западне во хаос, изјавила германската канцеларка Ангела Меркел во интервју за телевизијата АРД, пренесува „Би-би-си“. Изјавата на Меркел доаѓа во време кога постои голема поделеност меѓу земјите-членки на Европската Унија околу начинот на решевање на мигрантската криза.

Германската канцеларка рекла дека членките на ЕУ не се бореле минатата година да ја задржат Грција во еврозоната за сега, по само една година, „да ја остават на цедило“.

„Дали навистина верувате дека сите членки на ЕУ, кои минатата година се бореа Грција да остане во еврозониата, меѓу кои ние бевме најстрогите, по една година ќе дозволат Грција да биде фрлена во хаос“, изјавила Меркел.

Таа, истовремено, во интервјуто, ја бранела својата одлука Германија да ги отвори границите за бегалците и покрај тоа што таа одлука имаше негативен ефект на нејзината популарност.

Повеќе од еден милион баратели на азил минатата година пристигнаа во Германија, што предизвика несогласувања во самата владејачка коалиција и пораст на десничарскиот екстремизам.

Според процените, во моментов во Грција има повеќе од 25.000 мигранти. Бегалците од Ирак, Сирија и од Авганистан се распоредуваат низ мигрантските центри и во привремените засолништа низ целата земја.


ВМРО-ДПМНЕ: Целта на Заев е да направи хаос


Скопје, 16 јуни, 2015 - 21:14 (META) 

Зоран Заев сака да ја излаже целокупната јавност, и Македонците, и Албанците, и Турците, и Србите, и Ромите, и Бошњаците, и Власите, дека се грижи за нив, а всушност сè што сака да направи е да се спаси себеси од криминалите што стојат зад него и зад неговата фамилија, пишува во реакцијата на ВМРО-ДПМНЕ на денешната прес-конференција на СДСМ.

Во писмената реакција на ВМРО-ДПМНЕ се наведува дека Заев сака да направи хаос за да дојде на власт без избори и да се заштити себеси од последиците од, како што се вели, неговото коруптивно однесување.

– Граѓаните јасно му дадоа до знаење дека не поддржуваат вакво нелегално и деструктивно сценарио. Граѓаните сакаат стабилна држава, економски прогрес, нови фабрики и нови работни места – пишува во реакцијата на ВМРО-ДПМНЕ.