ЕФБ: Декларација за европско партнерство со Балканот, се бара искреност и брзина


Белград, 17 април, 2018 - 10:23 (META) 

Европското партнерство со Балканот мора да се темели на поискрени и потранспарентни односи кои и даваат предност на демократската трансформација, се наведува во Декларацијата за европско партнерство со Балканот, која беше промовирана синоќа на регионална конференција по повод 10-годишнината од Европскиот фонд за Балкан (ЕФБ) во Белград.

На одбележувањето и на промоцијата присуствуваше и шефот на македонската дипломатија Никола Димитров, кој беше и еден од главните говорници синоќа и рече дека „сите сме во ист чамец“.

„Крајно време е подрачјето на Западен Балкан во процесот на пристапување кон Европската унија храбро да се соочи со проблемите што го оптоваруваат и заеднички да гради иднина“, рече Димитров.

Во Декларацијата, меѓудругото се наведува дека „членството во ЕУ не е прашање на политички опортунизам, туку генерациска политичка и социјално-економска определба“.

„Сто години по завршувањето на Првата светска војна, 2018 година треба да значи историска пресвртница. Новата стратегија на Европската комисија и самитот за Западен Балкан закажан во мај 2018 година, ја потврдуваат цврстата определеност на ЕУ за исполнување на оваа цел“, се вели во Декларацијата.

Но, истовремено се предупредува од можна дестабилизација доколку не се искористи моментот.

„Ако регионот ја искористи оваа шанса, тој може да стане дел од ЕУ. Но, ако Западен Балкан ја испушти оваа шанса, ризикува да заостане зад ЕУ, без јасна визија, изложен на дополнителна дестабилизација“, се додава во неа.

На перспективите, но и можните негативни сценарија за Балканот, се осврна и поранешниот потпретседател на Европскиот парламент Ханес Свобода, кој се заложи за брзо „условено членство“.

„Помалку права и обврски, а доколку државата кандидат ги исполни сите услови успешно, станува полноправен член. Во спротивно ќе се случи катастрофа“, рече Свобода.

Конференцијата продолжува и денеска со учество на повеќе познати сегашни и поранешни политичари, меѓу кои се Димитров, Свобода, Ерхард Бусек, Горан Свилановиќ, како и околу 200 други угледни јавни личности, претставници на тинк-тенк организации или вработени во министерствата од земјите од регионот.


Европските политичари го критикуваа Курц за поддршката на ВМРО-ДПМНЕ


Виена, 29 ноември, 2016 - 10:44 (META) 

Поранешниот шеф на социјалдемократите во Европскиот парламент, Ханес Свобода, изрази жалење поради настапот на шефот на австриската дипломатија, Себастијан Курц, на предизборниот митинг на владејачката партија ВМРО-ДПМНЕ во Скопје.

„Крајно време е Македонија да тргне по нов пат врз основа на европските вредности. Затоа посебно е за жалење што министерот Курц ги поддржа оние кои се одговорни за тешката ситуација во која се наоѓа земјата“, стои во соопштението на Свобода.

Тој оцени дека на Македонија ѝ се потребни слободни избори, без влијание од странски министри или влади.

Свобода потсетува дека скандалот со прислушувањето, злоупотребата на службената должност, како и на корупцијата на владата со која раководат ВМРО-ДПМНЕ и ДУИ довеле до одржувањето на новите избори, кои се закажани за 11 декември.

„Почитувањето на владеењето на правото станува неважно кога се работи за задржување на бегалците?“, праша на „Твитер“ заменик-претседателот на „Европската иницијатива за стабилност“, Кристоф Бендер.

Директорот на Центарот за студии за Југоисточна Европа при Универзитетот во Грац, Флоријан Бибер, за австрискиот весник „Стандард“ изјави дека Австрија „го поддржува авторитарниот чувар на капијата“.

Австриското министерство за надворешни работи истакнува дека Курц на предизборниот митинг учествувал, не како шеф на дипломатијата, туку како претставник на Европската народна пратија, чиј член е и неговата Народна партија на Австрија, како и ВМРО-ДПМНЕ.

Тие укажуваат дека и германскиот пратеник Тобијас Зех од редовите на СЦУ одржал говор на предизборниот митинг во Скопје.

Министерството истакнува дека состојбата во Македонија не смее еднострано да се набљудува, туку дека е неопходно ВМРО-ДПМНЕ и СДСМ да преземат реформски напори. И двете страни, како што порачуваат од Виена, треба да создадат услови за слободни и фер избори.

„Одлучувачки за мене е балканската рута да остане затворена, а актуелната влада е гарант за тоа,“ ја пренесува австриското МНР пораката на Курц.

Шефот на австриската дипломатија вчера по средбата со Попоски, рече дека на завчерашниот митинг на ВМРО-ДПМНЕ присуствувал како член на Европската народна партија и тука нема ништо спорно.

– Овде сум како австриски министер за надворешни работи. Вчера бев на настан на партијата, присутен како претставник на Народната партија на Австрија. За мене не е невообичаено да се посетуваат настани на сестрински политички партии. Во мојот говор не им посочив на луѓето за кого да гласаат. Ги повикав да излезат на избори, а одлуката треба тие да ја донесат – рече вчера Курц.

Европската комисија вчера не сакаше да ги коментира учеството на австрискиот министер за надворешни работи Себастијан Курц на партискиот митинг на ВМРО-ДПМНЕ и неговата државничка средба со шефот на македонската дипломатија, Никола Попоски.

На прашање од „Мета“, како ја коментираат ваквата посета на висок претставник на земја-членка на ЕУ, од Брисел рекоа дека стојат зад изјавата која на 18 ноември ја даде евроамбасадорот Самуел Жбогар и амбасадорите на земјите членки на ЕУ во Македонија за претстојните избори, во која истовремено се повикува и на одвојување на партиските од државните активности.