!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Хакирани твитер-профилите на УНИЦЕФ, АИ, политичари и на медиуми


Лондон, 15 март, 2017 - 12:10 (META) 

Твитер-профилите на меѓународни организации, медиуми и на политички партии се хакирани, а веројатно зад тоа стојат Турците, пишува „Раша тудеј“.

Во објавите на „Твитер“ на официјалните профили на УНИЦЕФ САД и „Амнести интернешенал“ се наоѓа симбол свастика, како и хаштаговите „нациГерманија“ и „нациХоландија“.

„Се гледаме на 16 април“, пишува на еден твит, со кој се алудира на на референдумот во Турција, со кој би можело да се зголемат овластувањата на турскиот претседател Реџеп Таип Ердоган.

Исто така, твитовите содржат и линкови од „Јутјуб“, на кои се неколку снимки од Реџеп Таип Ердоган.

Сè уште не е јасно кој стои зад хакирањето, а „Булмберг“ пишува дека оштетен е „Ројтерс Јапонија“. „Форбс“, „Би-би-си“ за Северна Америка и германскиот весник „Велт“.

Хакирани се профилите на градоначалникот на Бордо, Ален Жипе, и на Марсело Клор од Европскиот парламент.


Трамп: За 90 дена ќе имаме извештај за „руското хакирање“


Њујорк, 11 јануари, 2017 - 20:00 (META) 

Новоизбраниот американски претседател, Доналд Трамп, денеска во Њујорк ја одржа првата прес-конференција.

Првото прашање на кое одговори беше за скандалот околу наводното хакирање, а Трамп изјави дека „зад тоа стои Русија, но учествувале и други поединци и земји“.

Трамп истакна дека разузнавачките агенции се многу важни и затоа ќе бидат вработени нови лица. Посочи дека за 90 дена ќе има извештај за хакирањето за да се запре таквиот нов феномен.

На прашањето за неговиот однос со Русија, Трамп наведе дека „доколку на Путин му се допаѓа Трамп, тогаш тоа е предност“ и дека со него како претседател, Русија многу повеќе ќе ги почитува Соединетите Американски Држави.

Трамп на прес-конференцијата повтори дека зголемените даноци за бизнисите надвор од границата ќе останат и ќе бидат спроведени, но и дека ѕидот со Мексико дефинитивно ќе биде подигнат.

– Го почитувам Мексико, претставниците и народот. Не ги обвинувам нив што ги искористија САД, но ѕидот мораме да го подигнеме. Се спроведува план за собирање пари за реализација, но штом ќе го средиме тоа, ќе подигнеме ѕид кон таа земја – изјави меѓу другото Трамп.

Трамп исто така најави дека неговиот приватен бизнис ќе им го препушти на своите синови и дека тој целосно ќе се повлече.

Инаугурацијата на Трамп ќе се одржи на 20 јануари.


Обама: Го потценив степенот на влијание што го имаат лажните информации


Вашингтон, 9 јануари, 2017 - 18:12 (META) 

Претседателот на САД во заминување, Барак Обама, изјави дека признава дека го потценил влијанието на „лажните информации и хакирањето“ врз демократијата.

Обама ова го истакна во интервју за „Еј-би-си“, алудирајќи на извештајот на разузнавачките служби за руското мешање во претседателските избори во САД. Во извештајот се тврди дека рускиот претседател Владимир Путин го наредил хакирањето, пуштањето лажни информации и медиумската манипулација за да се дискредитира кандидатката на демократите, Хилари Клинтон, а истовремено да се зајакне Доналд Трамп.

– Мислам дека го потценив степенот на влијание во оваа нова информативна ера, што го имаат лажните информации, особено на социјалните мрежи и како може да се вовлечат во нашата демократска практика – изјави Обама.

Обама за извештајот на разузнавачките служби рече дека Путин тоа го прави веќе извесно време во Европа, пред сè во некогашните советски држави.

Според неговите зборови, на ова мора да се обрне внимание пред претстојните избори во неколку европски земји сојузници на САД и предупреди на можно влијание.


Трамп ги критикува разузнавачките служби за извештајот за „руското хакирање“


Вашингтон, 4 јануари, 2017 - 11:44 (META) 

Избраниот претседател на САД, Доналд Трамп, повторно ги критикуваше американските разузнавачки служби на социјалната мрежа „Твитер“.

Трамп напиша дека поднесувањето на извештајот на разузнавачките служби за руското мешање во американските избори е одложено.

„Разузнавачкиот извештај за таканареченото „руско хакирање“ е одложено за петок, можеби и треба повеќе време за да изградат случај. Многу чудно!“, напиша Трамп.

Претставници на разузнавачките служи сепак тврдат дека нема одложување во распоредот за поднесување извештај.
Претставниците на неколку американски агенции, вклучувајќи ги ФБИ и ЦИА, веруваат дека руските хакерски напади биле насочени против кампањата на кандидатката на Демократската партија, Хилари Клинтон, во полза на кандидатот на Републиканската партија, Доналд Трамп.


Трамп: Ниту еден компјутер не е сигурен


Вашингтон, 2 јануари, 2017 - 18:10 (META) 

Новоизбраниот американски претседател Доналд Трамп изјави дека ниту еден компјутер не е безбеден кога станува збор за приватност на податоците.

Тој изрази скептицизам во поглед на безбедноста на интернет-комуникацијата која неговата администрација ќе ја користи секојдневно во планирањето на меѓународните односи.

Трамп на новинарите на новогодишната прослава што ја организираше на својот имот во Флорида, им рече дека ретко користи електронска пошта и компјутер, иако често твита.

Тој истакна дека повеќе доверба има во пораки кои ги пишува рачно.

– Ако нешто навистина ви е важно, ќе го напишете и ќе го испратите преку курирска служба, на старомоден начин. Затоа што, да ви кажам нешто, ниту еден компјутер не е безбеден – рече Трамп.

Новоизбраниот претседател на САД повеќепати ги отфрли тврдењата на американските разузнавачки агенции дека Русија се обидела да влијае на претседателските избори преку хакирање.

Тој најави дека следната недела ќе се сретне со официјални лица од разузнавачките агенции за да дознае повеќе за тие тврдења, истакнувајќи дека сака американските власти „да бидат сигурни во обвинувањата кои се прилично сериозни“.

Пред два дена Трамп истакна жалење поради компликациите што ги носи „ерата на компјутерите“ и соопшти дека компјутерите „значително ги комплицираат животите на луѓето“.


Путин одлучи да не протерува американски дипломати


Москва, 30 декември, 2016 - 15:00 (META) 

Рускиот претседател Владимир Путин денеска одлучи дека Москва нема да протерува американски дипломати како одговор на санкциите на Вашингтон.

Шефот на руската дипломатија, Сергеј Лавров, претходно предложи да се протераат 35 американски дипломати.

Претседателот на САД во заминување, Барак Обама, синоќа потпиша декрет за воведување нови санкции кон Русија поради мешање во американските претседателски избори и наложи протерување на 35 руски дипломати од руската амбасада во Вашингтон и од конзулатот во Сан Франциско, давајќи им рок од 72 часа со семејствата да ја напуштат САД.

Лавров рече дека Москва ќе одговори на новите санкции на Русија поради наводното хакирање веб-страници и е-мејлови на американската Демократска партија, но додаде дека министерството за надворешни работи на Русија му предложила на Путин да прогласи за „персона нон грата“ 31 вработен во амбасадата на САД во Москва и четворица вработени во американскиот конзулат во Санкт Петерсбург.

Путин, сепак, одлучи да не протерува американски дипломати како одговор на санкциите на Вашингтон.

 


Директорот на ЦИА до Трамп: Не чепкај го договорот со Иран и внимателно со Русија


Вашингтон, 30 ноември, 2016 - 10:44 (META) 

Директорот на Централната разузнавачка агенција (ЦИА), Џон Бренан, го предупреди новоизбраниот претседател на САД, Доналд Трамп, дека ставањето крај на договорот меѓу САД и Иран за нуклеарната програма на Техеран би било „катастрофално“ и „врв на глупоста“. Ваквиот став, Бренан го истакнува во интервју за „Би-би-си“, во кое исто така го советува Трамп да биде претпазлив во односите со Русија.

Во текот на својата кампања, Трамп се закани дека ќе го укине договорот со Иран и најави поблиска соработка со Русија.

Бренан, кој треба да замине од функцијата шеф на ЦИА во јануари следната година, во врска со ситуацијата во Сирија ги обвинува сирискиот режим и Русија дека се одговорни за масакрот врз цивилното население, кој го опишува како „недозволив“.

Тој истакна дека администрацијата на САД треба да продолжи со поддршката на силите на умеренетите бунтовници во нивната борба против војската лојална на сирискиот претседател Башар ал Асад.

Русија продолжува да ја игра клучната улога околу иднината на Сирија, вели Бренан во интервјуто, но изразува скепса за волјата на Москва да се дојде до некаков договор за прекинување на непријателствата.

Во врска со наводите за обидите на Русија да влијае на претседателските избори преку хакирање и пуштање на информации во јавноста, директорот на ЦИА во интервјуто потврдува дека имало такви активности од Москва, но за нивното евентулано влијание остава да се произнесат службите задолжени за тоа.

Тој потврдува дека околу ова прашање имал разговори со руските тајни служби од кои барал одговор за овие активности и ги предупредил дека тие можат да завршат лошо.

САД не би требало да „се задржат на нивното ниво“ или да ризикуваат ескалација во односите со Русија одговарајќи на идентичен начин, вели Бренан, и додава дека постојат други начини за да се осигури дека Москва ја разбира пораката дека ваквите активности се неприфатливи.

Тероризмот, вели Бренан, и понатаму останува главна грижа на безбедносната политика на САД. Директорот на ЦИА, посочува дека Исламска држава и понатаму е „многу активна“ и дека бара начин тоа да го покаже, без разлика на случувањата на бојното поле.

„ИД е сè уште способна да изведува терористички напади против Западот“, вели Бренан, кој четири години е на чело на ЦИА.


Кремљ ги отфрла обвинувањата на МИ5 за зголемување на агресивноста на Русија


Москва, 1 ноември, 2016 - 15:05 (META) 

Кремљ денеска ги отфрли обвиненијата на шефот на разузнавачката служба на Велика Британија, МИ5, Ендрју Паркер, дека Русија изведува сè повеќе кибернетички напади и користи други агресивни методи кои претставуваат сè поголема закана за Европа.

Портпаролот на Кремљ, Дмитриј Песков, рече дека обвиненијата на Паркер не одговараат на реалноста.

Тој додаде дека сè додека некој не понуди докази за изјавите, тие ќе се сметат за неточни и за неосновани.

Endrju ParkerШефот на британската разузнавачка служба МИ5, Паркер, за весникот „Гардијан“ вчера изјави дека Русија користи цел спектар државни органи и разузнавачки елементи за својата надворешна политика да ја спроведува на сè поагресивен начин и тоа да вклучува пропаганда, шпионажа, субверзии и кибернетички напади.

Паркер рече дека Русија сè поинтензивно се обидува да се дефинира себеси како опозиција на Западот и прави сè да изгледа така.

Како што рече првиот човек на МИ5, докази за тоа се гледаат во активностите на Русија во Украина и во Сирија. Тој додаде дека Русија, исто така, спроведува активности од голем обем кои засега не претставуваат кибернетички закани.


Клинтон: Има веродостојни наводи дека руската влада се меша во изборите


Вашингтон, 6 септември, 2016 - 10:34 (META) 

Демократскиот кандидат за претседател на САД, Хилари Клинтон, изрази загриженост поради, како што вели, веродостојните наводи за мешањето на руската влада во изборите.
Освен тоа, поранешната државна секретарка и прва дама на САД, додаде дека нејзиниот ривал, Доналд Трамп, е опседнат со диктатори.

Клинтон на новинарите во Илиноис им рекла дека во САД никогаш не е забележано дека некоја странска сила се меша во изборниот систем, како што е случај со неодамнешното хакирање на мејловите на Демократскиот национален комитет.

Таа, исто така, додаде дека никогаш немало кандидат кој бара земјата уште повеќе да се хакира, алудирајќи на нејзиниот републикански ривал Доналд Трамп.

– Русија, ако слушаш, се надевам дека ќе можеш да ги пронајдеш 30.000 мејлови кои недостигаат – рече Трамп на конференцијата во јули.

Подоцна тој изјави дека тоа било сарказам.


„Мосак Фонсека“: Никој не известува за хакерскиот упад


Панама сити, 6 април, 2016 - 10:24 (META) 

Рамон Фонсека, еден од основачите на адвокатската фирма „Мосак Фонсека“ која е во центарот на скандалот „Панама пејперс“, изјави дека неговата компанија е хакирана од сервер од Европа и дека на тој начин се украдени имињата на сите светски лидери и познати личности што ги криеле парите во даночните оази.

Адвокатот на фирмата од каде што протекоа документи за регистрирање на офшор-компании, за агенцијата АП изјавил дека по повод хакирањето, поднел тужба до панамското обвинителство, но не сакал да изнесува повеќе податоци бидејќи истрагата е во тек.

Фонсека посочил дека никој од медиумите не пишува за хакирањето, што, според него, е единствено кривично дело што е направено во случајот.

Тој се пожалил дека медиумите во известувањето за 11,5 милиони документи украдени од компјутерскиот систем на „Мосак Фонсека“ се фокусирале на познатите клиенти кои преку нив основале офшор-компании.

– Не ми е јасно. Светот изгледа прифати дека приватноста не е една од човековите права – изјавил тој.

Според него, неговата компанија не направила никакво злосторство, а луѓето „по оваа песочна бура јасно ќе прогледаат“.