Добро е што по консултативниот референдум сега за Договорот ќе се расправа во Собранието, вели Мас


Берлин, 2 октомври, 2018 - 10:58 (META) 

Министерот за надворешни работи на Германија, Хајко Мас, за референдумот вели дека оние кои гласале сакаат земјата да го продолжи својот пат кон ЕУ и НАТО.

„Иако многумина би си посакале поголема излезност, се радувам што огромно мнозинство од оние, што го искористија своето демократско право, гласаа за Договорот со Грција. Тие сакаат нивната земја да го продолжи својот пат во правец кон ЕУ и НАТО и да се реши спорот, кој 27 години стоеше меѓу Македонците и Грците. Добро е што по консултативниот референдум сега за Договорот ќе се расправа во македонскиот парламент.

Мас ги повика сите политички сили во Скопје и во Атина, да ги искористат шансите на историскиот Договор и да го спроведат договореното. Според него, Договорот ги засилува добрососедските врски меѓу двете држави и придонесува за стабилноста на Западен Балкан и отстранува важна пречка за приближувањето на Скопје кон ЕУ и НАТО.


Мас: Со референдумот на дофат ви е историска шанса


Скопје, 18 септември, 2018 - 16:39 (META) 

Се надевам дека сите Македонци на 30 септември ќе го искористат своето право и ќе гласаат на референдумот. На дофат е историска шанса да се реши спорот за името и да се отвори европската перспектива на Македонија. Одлуката е во рацете на граѓаните, истакна на заедничката прес-конференција министерот за надворешни работи на Германија Хајко Мас со неговиот домаќин шефот на дипломатијата Никола Димитров.

Според него, решавањето на спорот за името е важен чекор во правец кон Европа.

– Македонија идната година може да почне преговори со ЕУ. Јас сум сигурен дека кај одговорните лица во Скопје ќе се отвори тој пат. Ние сме за европската перспектива на земјите од Западен Балкан. Тоа е важно за стабилноста на регионот и затоа тоа не е само ваш туку и наш европски интерес. Истовремено, пристапувањето во ЕУ подразбира и други критериуми – правна држава, борба со корупција и организиран криминал -кажа Мас.

Димитров рече дека со посетата на Мас, по на онаа на канцеларката Меркел на Денот на независноста и утрешната на германската министерка за одбрана, не може да има појасен сигнал за германската поддршка која се темели на една основна причини дека Берлин препознава решителниот кај Република Македонија да си ги реши проблемите, да застане на нозе и тргне напред.

– Не само од себични или наши причини сум почестен со оваа посета на Мас. Живееме во Европа која е многу зафатена самата со себе Германија и министерот е пример, столб за сегашната Европа и каде сакаме да одиме, убава комбинација на европски вредности принципи – рече Димитров.

Шефот на германската дипломатија, Хајко Мас турнејата во регионот ја завршува со посета и средби во Атина во четврток.

Хајко Мас во грчката престолнина ќе одржи средби со претседателот на Грција, Прокопис Павлопулос, со неговиот грчки колега, Никос Коѕијас и со лидерот на опозициската Нова демократија, Кирјакос Мицотакис.

Тоа е прва посета на Мас на Атина, како министер за надворешни работи на Германија. На средбите ќе се разговара за билатерални прашања и теми поврзани со европската политика.


Шефот на германската дипломатија Мас во посета на Скопје


Скопје, 18 септември, 2018 - 9:43 (META) 

Министерот за надворешни работи на Сојузна Република Германија, Хајко Мас, денеска и утре ќе престојува во официјална посета на Република Македонија на покана на министерот за надворешни работи, Никола Димитров.

Како што соопшти МНР, Мас доаѓа во возвратна посета на Македонија по јунската средба со министерот Димитров во Берлин и на само 10 дена по историската посета на канцеларката Ангела Меркел на 8 Септември годинава. Посетата, додаваат од МНР, преставува дополнителна потврда на активната и недвосмислена поддршка од СР Германија во насока на остварување на нашите стратешки цели – полноправно членство во ЕУ и НАТО.

На средбата, министрите Димитров и Мас ќе разменат мислења за најновиот развој на внатрешно-политичките состојби во Република Македонија, реформската ЕУ и НАТО агенда, регионалната соработка, како и за подготвителните активности поврзани за успешна реализација на референдумот на 30 септември.


Германија смета дека Македонија заслужува признание од цела ЕУ


Берлин, 14 јуни, 2018 - 11:51 (META) 

Германскиот министер за надворешни работи, Хајко Mас на прес-конференцијата со министерот за надворешни работи, Никола Димитров во Берлин рече дека Германија го поддржува договорот постигнат меѓу Македонија и Грција за кој смета дека е решение постигнато со заедничко разбирање кое ќе донесе промена кај граѓаните.

Тој рече дека одлуките за ЕУ и НАТО ќе бидат многу важен сигнал и истакна дека она што Македонија го постигнала во однос на исполнување на критериумите и процесот на реформи, навистина импресионира и дека заслужува признание од цела ЕУ.

– Ова решение е добро ние ќе го поддржуваме и натаму тој процес за влез на земјата во ЕУ. Не импресионира процесот на реформи што во последниве години се случува во Македонија. Земјата покажува резултати и треба да добие признание за тоа од целата Европска унија. Ви укажуваме да покажете решителност. Се надевам дека одлуките кои ќе се носат во иднина во однос н НАТО и ЕУ ќе бидат важен сигнал за граѓаните на вашата земја и ќе се оди во правец на европската перпектива, не сакаме некои други сили да ги остваруваат нивните планови во вашиот регион – рече Мас.

На новинарско прашање дали се подготвени да лобираат за помош за придвижување на евроинтеграцискиот процес на Македонија, Мас, рече дека се апсолутно подготвени.

– Уверен сум дека позицијата на Владата ќе биде прифатен од Парламентот, како и од нашите холандски и француски пријатели со кои интензивно ќе разговараме во следните денови за да дојдеме до заедничка позиција – рече Мас.

Шефот на македонската дипломатија, Никола Димитров рече дека мотивите во целиот овој процес на преговори, освен пријателство со Грција биле и членството во ЕУ и НАТО, при што според него, политичката одлука во јуни од Европскиот совет и поканата за членство во НАТО ќе значат дека компромисот што е постигнат ќе биде видлив за двете страни.

-Македонија живее историски денови, недели и месеци, на добар пат сме да затвориме еден спор кој беше како камен и ни го отежнуваше прогресот и не заклучи во чекалната каде многу години поминавме, од 2005 година како кандидат за членство, а годинава ја добивме деветтата препорака. Ова чекање создаде кризи, но научивме лекции. Сакаме да немаме спорови со соседите, да имаме независно судство, слободни медиуми и одговорни политичари – изјави Димитров во Берлин.

Според Димитров, Македонија на овој начин не создава само перспектива, туку го затвора и македонското прашање.


Димитров утре и задутре во официјална посета на Берлин


Скопје, 13 јуни, 2018 - 13:43 (META) 

Македонскиот министер за надворешни работи Никола Димитров денеска и утре ќе биде во посета на Берлин, каде што треба да се сретна со својот германски колега Хајко Мас.

Како што информираат од министерството за надворешни работи, Димитров ќе се сретне со советникот за надворешна политика на германската канцеларка, Јан Хекер, а ќе го посети и германскиот Бундестаг, каде што ќе се обрати пред членовите на Комисијата за европски прашања.

Ова е првата меѓународна активност на шефот на македонската дипломатија откако вчера премиерот Зоран Заев објави дека со грчкиот колега Алексис Ципрас формулирале договор за решавање на спорот меѓу Македонија и Грција. Димитров во последната половина година беше македонскиот преговарач во процесот под покровителство на ОН.


Германија ја повика ЕУ да размисли за турските потерници


Берлин, 22 август, 2017 - 14:12 (META) 

Германскиот министер за правда, Хајко Мас денеска ја повика ЕУ да преиспита како ќе се однесува кон турските барања за апсења.

Неговата изјава доаѓа после неодамнешното апсење на германскиот писател со турско потекло во Шпанија.

– Најмалку што можеме е да ги интензивираме разговорите внатре во ЕУ за тоа како ќе се однесуваме кон барањата за апсење од Турција – рече Мас и додаде дек Европа не смее да дозволи секој критичар на турскиот режим да биде произволно прогонет.

Германско-турскиот писател Доган Аканли е уапсен пред неколку дена во Шпанија врз основа на потерница од Интерпол, издадена од Турција. Ден подоцна шпанскиот суд му дозволи да се брани од слобода.


Мас: Помина времето на љубезен тон на Германија со Турција


Берлин, 28 февруари, 2017 - 20:24 (META) 

Германскиот министер за правда, Хајко Мас, во интервју за весникот „Велт“ изјави дека истече времето на љубезен тон во односот на Берлин со Анкара, откако турскиот суд одлучи да го затвори новинарот на германскиот весник „Велт“, Дениз Јуџел.

Мас оцени дека односот кон Јуџел е неприфатлив и оти тоа не е единствен случај во Турција, каде се уапсени голем број лица, посебно судии.

– Турскиот претседател Реџеп Таип Ердоган треба да сфати дека оној што систематски ги поткопува основите на слободата на медиумите и принципите на правната држава, ја оддалечува земјата од основните вредности на Европска Унија. Ако Турција не се придржува до тие вредности, доближувањето до ЕУ во практика ќе биде невозможно – рече германскиот министер.

Мас рече дека Берлин нема да го прекине дијалогот со Турција, но кога се замолчуваат новинари и се затвораат судии, нема веќе место за љубезен тон.

Турските власти на 17 февруари соопштија дека приведен е 43-годишниот Јуџел, под обвинение за учество во терористичка организација, неовластено користење информација и за пропаганда во корист на тероризмот.