Бејли, Герет, Пломп, Османи и граѓани собираа ѓубре на кејот на Вардар


Скопје, 26 април, 2018 - 16:17 (META) 

Холандскиот амбасадор Ваутер Пломп, амбасадорот на Велика Британија Чарлс Герет и американскиот амбасадор Џес Бејли, заедно со вицепремиерот Бујар Османи денеска на кејот на Вардар зад Луна паркот го чистеа расфрланиот смет во еко акцијата, која трета година по ред ја организира амбасадата на Кралството Холандија заедно со „Пивара“ и „Пакомак“.

Ова е трета по ред волонтерска еко-акција што ја организираат „Пивара“, „Пакомак“ и Амбасадата на Холандија. Во претходните две акции беа исчистени брегот и водите на езерото Матка, како и кејот на реката Вардар, на кој и годинава се собираше целокупниот сув отпад. Годинешната акција е воедно и дел од активностите за одбележување на Денот на Кралот – националниот празник на Холандија.

– Се радувам што оваа година имавме можност да го одбележиме нашиот голем национален празник и со ваква акција. Го споивме убавото со корисното и уште еднаш се обидовме да го дадеме својот придонес за намалување на загадувањето кое е голем проблем за луѓето и за природата. Единствен ефикасен начин за трајно надминување на овој проблем е повеќе работа, посветеност и соработка меѓу јавниот сектор, компаниите и граѓаните. Со нашиот денешен ангажман сакаме да покажеме дека секој од нас може да даде личен пример за другите и да го поттикне решавањето на кој било проблем – истакна холандскиот амбасадор.

Целокупната логистичка поддршка за соодветен транспорт, селектирање и рециклирање на собраниот отпад ја обезбеди „Пакомак“.


#Одговорност е градот да не изгледа како голема канта за отпадоци


Скопје, 2 ноември, 2016 - 10:01 (META) 

Недостигот од канти за отпадоци е голем проблем со кој се соочува скопската општина Чаир. Во нивно отсуство, ѓубрето смрди низ улиците на главниот град.

Граѓаните што живеат во овој реон ги обвинуваат Општината и претпријатието за комунална хигиена дека го занемаруваат проблемот, но, исто така, и неодговорните граѓани.

На главните улици воопшто нема канти за отпадоци, а и некои што биле поставени се оштетени или веќе и не постојат.

Исто така, нивното отсуство се забележува и на автобуските постојки во оваа општина, каде што тие што чекаат автобус ги фрлаат отпадоците на земја, создавајќи, на тој начин, една грда слика за градот и за општината.

– Ги поставија пред неколку години, но не знам што се случи со нив. Исчезнаа, ги запалија, ги украдоа… Не знаеме… Но, и граѓаните се невнимателни, бидејќи кога гледаат дека нема каде да го фрлат отпадокот, треба да го задржат кај себе додека не најдат каде да го фрлат – велат жителите.

Со овој проблем не се соочуваат само жителите на Скопје, туку и на другите градови во Македонија, особено тие од Тетово и од Куманово.


Подземен контејнер пред споменикот на Григор Прличев во Охрид


Охрид, 9 септември, 2016 - 11:35 (META) 

По Струга и Дебар, како дел од проектот на Центарот за развој на Југозападниот плански регион, и во Охрид ќе бидат поставени три подземни контејнери во централното градско подрачје.

Локациите биле предложени од секторот за комунални дејности, сообраќај и улици и од секторот за урбанизам на Општината, а биле усвоени на седница на Советот на Охрид.

Охридската јавност реагира на избраната локација за едниот од контејнерите што се поставува. Имено, тој ќе биде поставен на само три метри од споменикот на Григор Прличев, македонскиот поет и преродбеник, роден во Охрид.

Најзагрижените предлагаат, кога веќе не може да се помести контејнерот, тоа да се направи со споменикот, кој, пак, е тука лоциран со децении, пред Центарот за култура што го носи името на Прличев.


Тетовскиот отпад повторно се носи во Русино


Тетово, 22 август, 2016 - 16:10 (META) 

Блокадата за тетовскиот смет кон депонијата Русино е отстранета. Од саботата навечер камионите на Јавното комунално претпријатие „Тетово“ го носат сметот во Русино бидејќи жителите на гостиварските села постигнаа договор со Центарот за Полошки плански регион за исполнување на минимум услови за носење и за депонирање на смет во депонијата во Русино.

– Договорот за носење и за депонирање смет кој беше направен во вторникот, а предвидуваше да се носи сметот во 1 часот по полноќ и да се исчисти патот до Русино, првично не беше испочитуван. Но, во петокот повторно се сретнавме со жителите од гостиварските села и тие во саботата ја тргнаа блокадата кон Русино, затоа што договорот веќе почнува да се спроведува – изјави Назиф Јашари, раководител на комунална хигиена при ЈКП „Тетово“.

Поради блокадата, но и отежнатото носење на тетовскиот отпад до депонијата Дрисла, изминативе две недели на претоварната станица за смет во Тетово секојдневно се трупаа стотици тони отпад.

Од ЈКП „Тетово“ се надеваат дека за неколку дена станицата за претовар на сметот ќе биде целосно исчистена.


Претоварната станица во Тетово претворена во планина од отпад


Тетово, 15 август, 2016 - 18:38 (META) 

Поради блокадата кон Русино која важи за камионите на јавните комунални претпријатија од полошко, но и отежнатото носење на тетовскиот отпад до депонијата „Дрисла“, на претоварната станица за смет во Тетово, секојдневно се трупаат стотици тони отпад.

Граѓаните кои живеат во близина на станицата стравуваат од појава на заразни болести.

– Па има многу ѓубре на депонијата, многу смрдеа доаѓа оттаму, не можеш прозорец да отвориш – вели жителка на Тетово.

Граѓаните велат дека конечно мора да се преземат мерки и да се реши проблемот со депонијата.

Десетти  ден камионите на тетовското комунално претпријатие полни со смет се блокирани на влезот од Гостивар.

Жители од неколку гостиварски села на чело со гостиварскиот градоначалник Невзат Бејта, не им дозволуваат на камионите да го продолжат патот до депонијата Русино, каде тетовските комуналци тргнаа да го депонираат отпадот.

Револтирани се што депонијата работи без никакви стандарди а патната делница која води до Русино е целосно уништена од камионите на комуналните претпријатија од полошко,  кои го транспортираат сметот до регионалната депонија, лоцирана на само неколку километри од Гостивар.

Од Јавното комунално претпријатие Тетово, изјавија дека сметот редовно се носел во депонијата „Дрисла“. Но по поплавите во скопскиот регион е отежнато носењето на тетовскиот отпад. Поради ваквата состојба, донеле одлука сметот привремено да го депонираат во Русино каде наишле на блокада.

– По блокадите секојдневно се водат преговори со жители од гостиварските села. Се надеваме дека ќе се договориме и ќе исполниме дел од нивните барања, односно да им го асфалтираме патот кој води до Русино, но тие во иднина да не пуштат слободно да го носиме ѓубрето во Русино.


Чести пожари на тетовската дива депонија


Тетово, 12 јули, 2016 - 16:10 (META) 

Територијалната противпожарна единица Тетово деновиве постојано интервенира во гасење пожари, кои често се појавуваат на дивата депонија што се наоѓа на влезот од градот. Пред два дена интервенирале пет пати во гасење пожар кај депонијата.

– Наша работа е да интервенираме во гасењето на пожарот, но има некој несовесен кој ја пали депонијата. Не можам да сфатам каква корист има од тоа – вели Ука Алити, командир на тетовската противпожарна единица.

Од полицијата информираат дека досега немаат официјална пријава за палење на депонијата ниту, пак, имаат информација кој би можел да го предизвикува пожарот на оваа локација.

На дивата депонија, која Јавното комунално претпријатие Тетово ја користи за претовар на сметот, последниве неколку месеци се наталожени поголеми количества отпад. Тетовските комуналци имаа мал застој во транспортот на отпадот откако жители од гостиварски села не дозволија да се носи ѓубрето во регионалната депонија Русино.

Сега сметот се транспортира во скопската депонија Дрисла, каде е посложена процедурата за депонирање.

Општинските власти сè уште го немаат исполнето ветувањето за дислокација на станицата, каде комуналното претпријатие го претовара сметот. Ветија дека за оваа намена ќе најдат место надвор од градот, но ветеното речиси една деценија не се исполнува.


Ребаланс на буџетот ќе го реши штрајкот на беровските комуналци


Берово, 5 април, 2016 - 16:39 (META) 

Преку ребаланс на општинскиот буџет, ќе се решаваат долговите на Јавното комунално претпријатие „Услуга“ од Берово, чии работници веќе четврти ден штрајкуваат, барајќи ги неисплатените четири плати.

Ова е одлуката на синоќешната вонредна седница на Советот на Општина Берово. Зголемување на цените на водата и на другите комунални услуги, исто така, според претседателот на Советот, Јован Матеничарски, е едно од можните решенија.

– Предлог на советничката група на ВМРО-ДПМНЕ беше да се разгледаат одлуките на управниот одбор на јавното претпријатие од 2013 година за зголемување на цената на водата и на другите комунални услуги – изјави Матеничарски.

Попладнево заседава управниот одбор на комуналното претпијатие, чии заклучоци ќе бидат доставени до Советот. Уште во 2013 година одборот предложил цената на кубик вода да се зголеми за седум денари.

Работниците кои штрајкуваат бараат исплата на платите и обезбедување на основните услови за работа. Претпријатието има загуба од 3,5 милиони денари, што, според СДСМ, се должи на превработеноста и на максималниот број од 84 вработени за едно мало комунално претпријатие.

На синоќешната вонредна седница на беровскиот Совет имаше инцидент, бидејќи на новинарот на веб-порталот „Малеш нет“, Јане Мамутчевски, не му било дозволено следење на седницата, иако, според статутот, седниците се јавни.

– На влезот бев сопрен од општинското обезбедување, кое ми побара акредитација. Им реков дека седниците се јавни и може секој да присутвува. Сепак, ја извадив акредитацијата и тогаш од обезбедувањето ми рекоа да почекам за да се јават кај градоначлникот Драги Наџински. Градоначалникот кажа дека мене ми е забрането да присутвувам во оваа зграда – рече Мамутчевски.

Новинарот бил поканет од претседателот на Советот, Матеничарски, кој потврди дека бил добредојден да ја следи седницата.

– На влезот го забележав Јане и реагирав да биде пуштен, бидејќи седниците се јавни. Влегов внатре и не ја почнав седницата сè додека не испратив луѓе од општинската администрација да го повикаат да влезе. Додека влегував, слушнав од обезбедувањето дека градоначалникот наредил за Јане седницата да е затворена – изјави Матеничарски.

Новинарот Мамутчевски сведочи оти му било пренесено дека може да ја следи седницата, но без новинарската опрема, како обичен граѓанин, а тој го одбил тоа и си заминал.

Ова, според новинарот на „Малеш нет“, не е единствениот конфликт што го имал со локалната власт откако јавно ја критикувал работата на Општината и на јавното претпиријатие. Неодамна била нападната веб-страницата, а му бил хакиран и фејсбук-профилот.

– Пред некој ден, кога ја објавив веста за штрајкот во јавното претпријатие и дека Берово се задушува во смет, дури ми беа избришани текстовите од веб-страницата. Запрепастен сум од цензурата на локалната власт кон мене и гласилото во кое работам – изјави Мамутчевски, кој за ова ги информирал и институциите.

Регионалниот центар на новинари „Исток“ во состав на ЗНМ, побара јавно извинување од градоначалникот кон новинарот Мамучевски, а во спротивно, оттаму велат дека новинарите членови на ЗНМ нема да ги следат неговите активности и да известуваат од нив, што ќе биде на штета на граѓаните на општина Берово.


Охрид: „Кој фрла ѓубре е магаре“


Охрид, 4 мај, 2015 - 15:02 (META) 

Првомајските празници ја оставија вообичаената слика на охридското крајбрежје: свежи отпадоци, пластични шишиња, кеси, стари душеци, тоалет-хартија, храна…

Годинава сезоната со убавото време за Велигден и за 1 Мај како да почна парано, плажите се полни со гости и со охриѓани кои се релаксираат на благото сонце.

Факт е дека на плажите нема написи „Забрането фрлање отпадоци“, но зарем стигнавме до таму некој да нè потсетува дека не треба да го правиме тоа.

Комбинацијата од некултура, бесчувствителност на посетителите и неангажираноста на локалната самоуправа го гнаси брегот.

„Мета“ предлага наместо натписи „Забрането фрлање отпадоци“, Општината или локалните „зелени“ да стават транспаренти „Кој фрла ѓубре е магаре“.


Монт Еверест стана голем контејнер


Катманду, 9 март, 2015 - 14:18 (META) 

Повеќе од 700 алпинисти, туристи и високогорски водичи Шерпаси, кои секоја година минуваат повеќе од два месеци на падините на Еверест во текот на сезоната за искачување, оставаат зад себе големи количества секаков отпад, меѓу кој и измет, а проблемот сè уште не може да се реши бидејќи дури минатата година е донесен пропис, според кој, секој што се враќа од Монт Еверест мора да врати најмалку осум килограми отпад, вклучувајќи го и горенаведеното, пренесе „Порта3“.

Непалската влада има намера да ги заостри прописите за да се исчисти планината и да се доведе во беспрекорна, недопрена состојба на снежната убавина како во времето кога во 1953 година Хилари и Тензинг првпат стапнаа на врвот. Од почетокот на оваа сезона, ќе се следи грижата за отпадот на сите учесници, а ќе мораат да платат и 4.000 долари депозит.

Првите освојувачи останале занемени од „најосаменото место на светот, ледената пустина без кислород, сместена речиси на 9.000 метри надморска височина“. Но денес, сите стандардни рути за освојување на врвот се пренатрупани со отпад. Најголем дел од овој отпад го собираат висинските носачи во вреќи и го пренесуваат во ископана јама во близина на едно село, на 4.900 метри надморска височина.

Во последните 62 години, повеќе од 4.000 луѓе  го освоиле врвот. Тие што успеале, но и оние што не успеале и чиј број е далеку поголем, поминуваат во просек два месеци на планината, постепено се аклиматизираат и напредуваат од базниот до јуришниот логор пред врвот. Метежот, па така и загаденоста се најголеми околу базниот логор, но тој отпад е полесно да се транспортира во долината. Состојбата е најкритична на висинските логори, каде целиот отпад најчесто останува трајно на планината.

Од 2008 година, за чистотата на Еверест се грижат доброволци, учесници во експедициите на кои третирањето на отпадот им е единствена грижа. Отпадот веќе станува и здравствена закана за учесниците во експедициите. Многумина признаваат дека топењето на снегот и превривањето на водата за пиење не се веќе сигурни методи. Од една страна, снегот е загаден со фекалии, а од друга страна, пак, и превривањето со оглед на пониската температура на вриење на тие височини не е доволно за уништување на бактериите и на другите загадувачи.

Една група непалски уметници неодамна собрале 1,5 тон ѓубре од Еверест, вклучувајќи и делови од срушен хеликоптер. Овој отпад го преобразиле во 74 уметнички дела.


Охридско Езеро исфрли огромни количества отпад


Охрид, 4 февруари, 2015 - 11:56 (META) 

Огромни количества пластични шишиња, хартија, трска и друг вид отпад, подигнаа во изминативе два дена екипите на ЈП „Охридски комуналец“.

Се проценува дека Охридско Езеро од своите длабочини исфрлило најмалку 30 кубни метри отпад, по должината на градскиот кеј, на потегот од пристаништето до Холандскиот парк.

Во акцијата беше ангажиран ровокопач, два камиони за товарење и за транспорт на отпадот, три комунални работници кои рачно од езерските води го расчистувале отпадот и 10 метачи.

Еколозите, граѓаните и целата јавност ја поздравија акцијата, упатувајќи апел таа да се практикува по секое невреме проследено со дожд и со ветер.

На примерот од оваа грда слика, еколозите упатија апел до граѓанството да внимава каде го фрла отпадот.