Могерини и Хан го потврдија приемот на известувањето за новото име на Македонија


Брисел, 15 февруари, 2019 - 16:13 (META) 

Високиот претставник на ЕУ за надворешна политика, Федерика Могерини, и еврокомесарот за проширување Јоханес Хан соопштија дека го примиле известувањето од Република Северна Македонија за новото име и упатија честитки и до Скопје и Атина за постигнатиот напредок.

„Денеска Европската Унија беше формално известена од Република Северна Македонија за нејзиното ново име, по стапувањето на сила на Преспанскиот договор. Срдечно го поздравуваме овој историски чекор, којшто поставува пример за помирување во регионот на Западен Балкан и пошироко. Им честитаме на Хеленска Република и на Република Северна Македонија за ова значајно постигнување, со коешто се отвора нова страница во нашата заедничка иднина во ЕУ“, порачаа Могерини и Хан.


Кацин: Компромисот на Македонија и Грција во регионот треба внимателно да се проучува


Скопје, 14 февруари, 2019 - 10:46 (META) 

Без разрешување на сите билатерални спорови нема да има понатамошно проширување во Западниот Балкан, во изјава за „Јуропиан Вестерн Балканс“ порачува Јелко Кацин, постојан претставник на Словенија во НАТО и поранешен известувач во Европскиот парламент за Србија и Црна Гора.

Одлуката Република Северна Македонија да го смени името е резултат на историски политички договор, нагласува тој.

– Тоа е политички компромис што треба внимателно да се проучува од другите земји во регионот што се уште не ги разрешиле сите билатерални проблеми со соседите што избија по распаѓањето на поранешна Југославија  – вели Кацин.


Грчкото МНР изрази жалење и сочувство за трагичната сообраќајна несреќа


Атина, 14 февруари, 2019 - 9:23 (META) 

Длабоко жалење, како и сочувство и солидарност до граѓаните и владата, изрази Министерството за надворешни работи на Грција по трагичната сообраќајна несреќа на автопатот Скопје – Тетово.

„Длабоко жалиме за трагичната сообраќајна несреќа на автопатот Скопје- Тетово. Нашите мисли се со семејствата на жртвите и нивните најблиски. Изразуваме искрено сочувство и солидарност со граѓаните и владата на Северна Македонија“, напишаа од грчкото МНР на нивниот официјален Твитер профил.

Според грчката новинска агенција АНА-МПА, веднаш по несреќата, алтернативниот министер за надворешни работи на Грција, Јоргос Катругалос му се јавил на Никола Димитров за да изрази сочувство и поддршка во тешките моменти за земјата.


Документи со новото име граѓаните ќе добиваат откако МВР ќе направи набавка


Скопје, 11 февруари, 2019 - 11:49 (META) 

Личните документи со новото име Република Северна Македонија, односно пасоши, лични карти, возачки дозволи … граѓаните ќе може да ги добиваат откако, Владата ќе го објави во Службен весник датумот на влегување во сила на Уставните амандмани и Уставниот закон.

Протоколот од Атина се очекува да биде испратен денеска.

На прашањето, кога граѓаните ќе почне да добиваат документи со новото име, портпаролот на Владата, Миле Бошњакоски за „Мета“ одговори дека откако нотата ќе биде испратена и ќе биде објавено во Службен весник, потоа МВР треба да распише јавна набавка за новите документи.

„МВР треба да набави нови пасоши, документи. Нема ограничување за тоа, дали додека трае набавката на документите граѓаните ќе можат да вадат нови, бидејќи ќе си добијат документи по старо, кои потоа ќе треба да ги заменат во рок од пет години“, одговори Бошњакоски.

„Мета“ чека од одговор од МВР колку време ќе трае процедурата за набавка на нови документи.

Инаку, веќе почна промената на натписите и таблите на државните органи и Собранието, а утринава владината зграда осамна без натписот „Влада на Република Македонија“.


Грчкиот парламент треба да го ратификува Протоколот за влез на Македонија во НАТО


Атина, 8 февруари, 2019 - 9:27 (META) 

Во грчкиот парламент денеска треба да се одржи гласањето за ратификација на Протоколот за пристап на Македонија во НАТО, откако вчера доби „дозвола“ на Комитетот за надворешна политика и одбрана со мнозински број на гласови.

Протоколот беше потпишан во средата во Брисел од постојаните претставници на сите 29-земји членки на НАТО, а со Грција денеска почнува последната фаза од полноправниот влез на Македонија во Северноатлантската алијанса, односно ратификација на Протоколот во сите членки на НАТО

Се очекува грчките пратеници што го поддржаа Договорот од Преспа, исто така да гласаат „за“ Протоколот, односно се очекува да се постигне потребното мнозинство  – 151 пратеник.


Нова демократија нема да го поддржи Протоколот за членство на Македонија во НАТО


Атина, 7 февруари, 2019 - 16:55 (META) 

Јоргос Кумуцакос, надлежниот за надворешна политика во најголемата грчка опозициска партија Нова демократија, пред членовите на Комисијата за национална одбрана и надворешни прашања во грчкиот Парламент рече дека неговата партија нема да гласа за ратификација на Протоколот за членство во НАТО

-Не гласаме за протоколот за влез на Скопје во НАТО, бидејќи тоа е она што формално произлегува од договорот, кој јасно е дека е штетен, бидејќи тоа е првиот договор, историски, во кој Грција дава нејзина согласност, нејзин потпис во прифаќањето дека постои наводен македонски јазик и македонска националност. Комбинацијата на името Северна Македонија со прифаќањето од Грција дека постои наводен македонски јазик и националност е основа за развој на на пост-преспанскиот иредентизам на Балканот – рече пратеникот.

Кумуцакос порача дека Договорот од Преспа не е балансиран, а „грчкиот народ никогаш нема да го засака“.

-Овој договор, интеграцијата во НАТО е првиот материјален, опиплив, конкретен, позитивен резултат за Скопје. Тие, веќе започнаа да имаат опипливи, позитивни резултати од Договорот од Преспа. И ќе следи исто така обврска на Грција, поддршка за почеток на процесот на интеграција во Европската Унија. Што имаат Грците материјално, позитивно од ратификацијата на овој договор? Ова е главното прашање на кое треба да одговорите – порача Кумуцакос.

Надлежниот за надворешна политика во Неа демократиа се осврна и на „следниот ден по членството во НАТО“, запрашувајќи се каков би бил ставот и на чија страна би било Скопје во случај на несогласувања меѓу Атина и Анкара за одредено прашање.


Протоколот за членство во НАТО пред комисија во грчкиот Парламент


Атина, 7 февруари, 2019 - 9:28 (META) 

Комисијата за национална одбрана и надворешни работи на грчкиот Парламент, денеска во 13 часот по локално време ќе го разгледа нацрт законот за „Ратификација на Протоколот кон Северноатлантскиот договор за пристап на Република Северна Македонија“, јави дописничката на МИА од Атина.

Известувачи за нацрт законот се пратеникот од СИРИЗА и поранешен министер за цивилна заштита, Никос Тоскас и пратеникот од Нова демократија, одговорен за надворешна политика, Јоргос Кумуцакос.

Се очекува комисијата да одржи една седница, а утре законот да биде донесен на пленарна расправа во грчкиот Парламент, што ќе заврши со гласање од пратениците.

Нацрт законот вчера бил доставен во грчкиот Парламент, потпишан од алтернативниот министер за надворешни работи, Јоргос Катругалос, од министерот за одбрана, Евангелос Апостолакис и од министерот за финансии, Евклисдис Цакалотос, а содржи три членови.

Во првите два члена се објаснети следните чекори по ратификацијата на Протоколот, а третиот се однесува на тоа дека Протоколот ќе биде доставен до архивата на американската администрација.


Македонскиот и грчкиот народ ги зближуваат невработеноста и сиромаштијата (инфографик)


Скопје, 30 јануари, 2019 - 12:11 (META) 

Со ратификацијата на Преспанскиот договор во грчкиот парламент се отвора ново поглавје во политичките односи меѓу Македонија и Грција, а уште поважно се создава можност за поголема економска соработка меѓу двете земји која досега беше обременета со несогласувањата околу спорот за името.

Главните економски параметри покажуваат дека нашата држава е економско џуџе во споредба со Грција, но и дека заедничка мака за граѓаните на двете земји се невработеноста и високата стапка на сиромаштија.

Според податоците на Светска банка, бруто домашниот производ по жител во Грција на крајот на 2017 година изнесувал 18.613 американски долари што е три пати повеќе отколку македонскиот кој изнесува 5.414 долари.

Според последните статистички податоци стапката на невработеност во Грција изнесува 18,6 отсто, а во Македонија 20,8 отсто, што ги става двете земји на врвот на листата во Европа по процентот на невработени лица.

Двете држави се уште поблиску по процентот на сиромашни лица, кој во Грција изнесува 20,2, а во Македонија 22,2 отсто од вкупната популација.

Во Грција просечната плата е позиционирана на 1.166 евра, а во Македонија на 399 евра. Сепак, статистичките податоци по сектори откриваат дека поголем број од работниците од двете држави може само да сонуваат за просечна плата. Најголем број од работниците кај нас земаат плата до 350 евра, а во Грција до 800 евра.

Инаку, економските придобивки од затоплувањето на односите меѓу двете земји дојдоа  само неколку дена по ратификацијата на Преспанскиот договор во грчкиот парламент. Каматите на 10-годишните обврзници на Грција се намалија за 1,5 отсто на 4.07 отсто, што е најниско ниво од септември, минатата година. Подобрување имаше и кај македонските обврзници. Приносите на обврзницата која достигнува во 2025 година се намалија на 2,51 отсто, што најниско ниво во изминатава година.

Ваквото движење на меѓународните финансиски пазари значи дека инвеститорите гледаат позитивни сигнали во имплементацијата на Преспанскиот договор што резултира со намалување на трошоците за задолжување на двете земји.


Македонија во февруари првпат „на столче во НАТО“


Скопје, 28 јануари, 2019 - 17:40 (META) 

Состанокот на министрите на земјите-членки на НАТО за одбрана, што ќе се одржи во Брисел на 13 и 14 февруари, е првиот состанок на кој Македонија „ќе седне на столчето во НАТО“, односно на кој ќе учествува како земја-пристапничка на Алијансата, но сè уште без право на глас. Оваа или следната недела НАТО и Македонија треба да го потпишат Протоколот за пристапување на земјата кон Вашингтонскиот договор, практично анекс на оригиналниот основачки документ од 1949 година, со кој Македонија ќе стане 30. членка на Северноатлантската алијанса.

– Оваа недела или на почетокот на идната треба да се потпише Протоколот за НАТО. Потоа тој треба да се врати во грчкиот Парламент на ратификација. Штом се ратификува во грчкиот Парламент, ќе го добиеме столчето во Алијансата. И тогаш стапуваат во сила уставните измени и другите одредби од Преспанскиот договор – изјави министерот за надворешни работи Никола Димитров по денешната средба со својот литвански колега Линас Линкевичиус.

Линкевичиус, пак, најави дека неговата земја ќе биде меѓу првите кои што ќе го ратификуваат протоколот.

– Литванија ќе биде меѓу првите земји што ќе го потпише Протоколот за пристапување на Македонија во НАТО, со што ќе се овозможи и заокружување на Спогодбата од Вилнус од 2000 година како Декларација за меѓусебна поддршка и солидарност во евроатлантските интеграции, бидејќи Македонија е последната држава од таа група која сега влегува во Алијансата – изјави Линкевичиус.

Минатата недела чешкиот министер за надворешни работи Томаш Петричек најави дека неговата влада денеска „ќе предложи Република Северна Македонија да го потпише пристапниот протокол за НАТО“, а забрзување на процедурата најави и Словенија.

Протоколот за пристапување треба да го ратификуваат сите 29 членки на НАТО, што би требало да заврши до крајот на годината. Целата процедура за прием, која завршува кога одлуката за пристапување ќе му се предаде на американскиот Стејт департмент, „чуварот“ на Вашингтонскиот договор, се очекува да заврши најдоцна до средината на следната година.


Јункер, Могерини и Хан го поздравија ратификувањето на Преспанскиот договор


Брисел, 25 јануари, 2019 - 15:03 (META) 

Со заедничка изјава, претседателот на Европската Комисија, Жан Клод Јункер, високата претставничка за заедничка надворешна политика Федерика Могерини и еврокомесарот за проширување Јоханес Хан ја поздравија ратификацијата на Преспанскиот договор во грчкиот парламент.

„Со радост го поздравуваме најновиот клучен чекор во ратификацијата на Преспанскиот договор, со денешното гласање во грчкиот парламент.

Од самиот почеток Европската Унија силно го поддржуваше историскиот договор потпишан од премиерите Ципрас и Заев, по преговорите под покровителство на ОН. Беа потребни политичка храброст, лидерство и одговорност од сите страни за да се разреши еден од најдлабоките спорови во регионот. Двете земји ја искористија оваа уникатна можност која поставува пример за помирување во Европа како целина и ќе даде дополнителен поттик на Европската перспектива на регионот.

Додека со радост ги исчекуваме следните процедурални чекори што ќе доведат до целосно спроведување на договорот, можеме со сигурност да кажеме дека Атина и Скопје заедно испишаа нова страница на нашата заедничка иднина во ЕУ“, гласи изјавата на Јункер, Могерини и Хан.