!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Во Охрид пронајдени гробови и предмети од втори век пред наша ера


Охрид, 17 август, 2016 - 13:14 (META) 

Стручните екипи на Заводот Музеј од Охрид откриле 85 гроба од кои 12 датираат од македонско-хеленистички период, односно некаде од трети и втори век пред наша ера, а останатите се од османлискиот период, од 15 до крајот на 18 век.

Како што информираат од Министерството за култура, во гробниците од македонско–хеленистички период кои се со гробни конструкции од необработен камен, досега пронајдени се најразлични прилози како керамички амфори, калапени чаши, делови од војничката опрема- копја, ножеви, накит-златни обетки со негроидни глави и со претстави на ерос, ѓердани со мониста од стаклена паста, привезоци, фибули и прстени, а во три гроба се пронајдени и бронзени садови.

Од периодот на доцната антика откриени и истражени се 11 јами и дел од рустикален објект, а пронајдено е поголемо количество византиски монети, неколку сребрени венецијански грошеви и една сребрена монета на кралот Волкашин.

Гробовите од османлискиот период пак главно се христијански и во нив се пронајдени бронзени копчиња, обетки, срма, а зачувани се и делови од органски материјали-кожни обувки, дрво.

При претходни истражувања, пред повеќе години, на истиот локалитет во еден од гробовите беше пронајдена златната маска, златната ракавица и уште 70-на други златни, сребрени, бронзени, килибарни и други предмети.

Во текот на досегашните истражувања најстар наод на теренот е праисториско камено секирче.


Откриени две нови простории во гробницата на фараонот Тутанкамон


Каиро, 1 октомври, 2015 - 19:07 (META) 

Kралицата Нефертити можно е да е погребана во една од двете новооткринеи простории во гробницата на фараонот Тутанкамон, смета британскиот археолог Николас Ривс, пренесува „Би-Би-Си“.

Според Ривс, скeнарањата извршени со специјален радар, за чија употреба британскиот археолог добил дозвола од египетските власти, откриле две дополнителни простории, сокриени во ѕидовите на гробницата.

Инаку, Ривс се обидува да ја докаже својата теорија дека сè уште неоткриените посмртни останки на кралицата Нефертити, која владеела во 14 век пред новата ера, се наоѓаат во една од тие простории. Тој верува дека телото на Тутанкамон, кој умрел пред 3.000 години, на возраст од 19 години, било сместено во дел од гробницата оригинално направена за Нефертити.

Посмртните останки на Тутанкамон, за кој се смета дека е син на Нефертити, беа откриени во 1922 година.


Амфиполис – споменик за Ифестион


Атина, 1 октомври, 2015 - 9:16 (META) 

Грчките археолози ја разрешија загатката на Амфиполис. Анализите на археолошките артефакти и плочи покажале дека не се работи за кралска гробница, туку за посебен меморијален споменик изграден во чест на Ифестион, блискиот пријател на Александар Македонски, по наредба на самиот антички војсководец.

Археологот Катерина Перистери, која го водеше процесот на ископување и на анализа на пронајдоците од Амфиполис, на презентација на Универзитетот „Аристотел“ во Солун посочи дека се работи за споменик кој бил нарачан и исплатен од самиот Александар Македонски.

На почетокот грчките археолози се сомневаа дека поради грандиозноста на локалитетот во близина на Серес можно е да се работи за гробницата на Роксана и на Александар Четврти, сопругата и синот на Александар Македонски.

На плочите најдени на три архитектонски зданија во локалитетот се воочени написи кои наликуваат на договор за изградба на споменик на Ифестион од Антигон Едноокиот, воин во војската на Александар Велики и основач на династијата Антигониди.
Перистери тврди дека Александар ја финансирал изградбата и поставување на споменикот за Ифестион.


Париз: Под супермаркет пронајдени 200 черепи


Париз, 4 март, 2015 - 14:07 (META) 

Работници кои копале под супермаркет во Париз, пронашле повеќе од 200 скелета, јавува „Си-Ен-Ен“. Работниците, кои го реновирале супермаркетот, под подот наишле на дел од некогашните болнички гробишта, а истражувачите и археолозите спроведуваат карбонски и ДНК-тестови за да утврдат кога лицата биле погребани.

Археологот Изабел Абади вели дека според начинот на кој телата се поставени, јасно се гледа дека луѓето умреле отприлика во исто време.

– Тоа што изненадува е дека телата не се фрлени во гробницата, туку внимателно се положени во неа – вели Абади, додавајќи дека гробиштата се затворени пред неколку века, кога повеќето посмртни остатоци биле пренесени во Париските катакомби – подземна костурница во која има остатоци од повеќе од шест милиони тела.

Париз претрпел неколку епидемии на чума во времето кога работела болницата „Свето Тројство“, на која ѝ припаѓале гробиштата.


Во Амфиполис пронајдени монети со ликот на Александар Велики


Амфиполис, 1 декември, 2014 - 18:20 (META) 

Археолозите пронашле монети со ликот на Александар Велики на локалитетот Амфиполис, пренесува „Сител“. Тимот археолози ги пронашол кованиците во најголемата античка гробница на грчка територија, која датира од 4 век и сè уште не се знае кому му припаѓа. Во гробницата е пронајден скелет за кој низ грчката јавност се шпекулира дека можеби припаѓа на сопругата на Александар – Роксана, или неговата мајка Олимпија, но не е исклучена можноста да припаѓа на некој од неговите најпочитувани генерали. Историчарите сметаат дека е сосема мала веројатноста да се работи токму за гробот на Александар Македонски.