!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

МНР реагира до Атина и Брисел за блокадата на границата на Евзони


Скопје, 16 февруари, 2017 - 16:46 (META) 

Министерството на надворешни работи (МНР) официјално реагирало до грчките власти како и до Европската комисија за блокадата на граничниот премин Евзони, потврдија од МНР за „Мета“.

Од Грција по дипломатски пат добиле објаснување дека и тие вложувале напори за решавање на проблемот и правеле се што можат, бидејќи и тие трпеле штети, а не само Македонија.

Во писмото до Европската комисија, МНР навеле дека со тековната блокада на граничниот премин која трае веќе 18 денови се крши Спогодбата за стабилизација и асоцијација со ЕУ која гарантира слободно движење на стоки и луѓе и е потпишана од Грција.

Од МНР го посочуваат пристаништето во Драч како алтернатива за дел од македонските компании, во зависност од товарот што се превезува.

Поради блокадата на грчката граница од страна на грчките земјоделци, македонските превозници ги користат граничните премини Меџитлија и Ново Село.


Грчките земјоделци ќе протестираат се додека не се сретнат со Ципрас


Атина, 14 февруари, 2017 - 11:14 (META) 

Граничниот премин Евзони останува затворен и денеска. Земјоделците од Северна Грција кои веќе две недели ја блокираат грчко-македонската граница остануваат на своите места без никаква најава за повлекување на блокадата, додека не се сретнат со грчкиот премиер Алексис Ципрас.

Грчкиот весник „Прото тема“ јавува дека дел од земјоделците од Северна Грција планираат тричасовна блокада на клучката кај Херсо, која води кон граничниот премин Дојран на македонско-грчката граница. Според најавата, блокадата треба да започне во 12 часот по локално време, односно 11 по македонско и ќе трае три часа.

Земјоделците од останатиот дел на Грција денес се во Атина и ќе одржат протест во центарот на градот. Протестот ќе го поддржат Комунистичката партија и работничкиот синдикат АДЕДИ.

Двонеделните блокади и денешниот протест се одржуваат во знак на револт на земјоделците против владината политика и кратењата во земјоделскиот сектор. Поконкретно бараат намалување на возрасната граница за пензионирање, финансиски бенефиции за нив и семејствата, поефтина нафта која нема да биде подложна на повисоките даноци.


Сообраќајот Скопје – Велес се одвива по една лента поради сообраќајка


Скопје, 9 февруари, 2017 - 9:58 (META) 

Поради сообраќајна несреќа на патниот правец Скопје – Велес, кај Катланово, сообраќајот се одвива по една коловозна лента, информираат од Автомото-сојузот на Македонија.

Сообраќајот на државните патишта се одвива по на места влажни коловози. Намалена видливост од 50 до 100 метри, поради магла, има на патниот правец Лисец – Попова Шапка.

Поради штрајк на грчките земјоделци, граничниот премин Евзони сè уште е затворен за сообраќај. Премините Дојран и Меџитлија се отворени за сообраќај.


Кучи тврди дека сме подготвени да ја надминеме нафтената криза, но не кажа како


Тетово, 8 февруари, 2017 - 15:16 (META) 

Како влада, ги преземаме сите мерки да не се случи нафтена криза во Македонија, изјави министерот за економија, Дритон Кучи, по неколкудневните протести на грчките земјоделци на граничниот премин Евзони, каде се блокирани голем број македонски камиони и цистерни, кои од Грција превезуваат нафта и други горива.

Министерот Кучи рече дека кружат информации дека протестите и блокадите во Грција ќе се прошират, но истакна дека како држава сме подготвени да ги надминеме проблемите, без да посочи кои се можните решенија.

– Вчера имав директен контакт со нашиот амбасадор во Грција, кој ни укажа на проблемите. Таму, во Грција, веќе се зборува дека освен кај Евзони, блокади ќе има и на автопатот Игнатија и на други места, информации кои не укажуваат на надминување на внатрешните проблеми во Грција. Но, ние, како влада, ќе повторам, ги преземаме сите мерки да не се случи нафтена криза – рече Кучи.