!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Откриени 12 килограми марихуана во автомобил на Табановце


Табановце, 20 јули, 2017 - 14:59 (META) 

Полицијата вчера доцна вечерта спречила обид од Македонија во Србија да бидат прокриумчарени 12 килограми марихуана, скриени во автомобил.

Како што соопшти МВР, на полицајците им се сторил сомнителен автомобил „опел астра“ со скопски таблички, во кој биле двајца скопјани на возраст од 30 и 31 година.

При извршената детална контрола на возилото, под задните тапацири се пронајдени 25 пакувања марихуана, со вкупна тежина од околу 12,5 килограми. Скопјаните биле приведени.


Евозни отворен за сите видови возила


Скопје, 18 февруари, 2017 - 12:10 (META) 

Штрајкот на грчките земјоделци е прекинат. Граничниот премин Евзони е отворен за сообраќај за сите видови на возила, соопштуваат од Авто-мото сојузот на Македонија.

Од АМСМ информираат дека на граничните премини нема подолги задржувања за влез и за излез од државата. Оваа информација се однесува само за македонската страна на премините.

Сообраќајот на државните патишта се одвива по претежно суви коловози, освен на осојничавите места. Намалена видливост поради појава на магла до 50 метри има на патниот правец Гевгелија – Удово и од 50 до 100 метри на патниот правец Неготино – Градско.

Сообраќајот на патниот правец А3 Прилеп – Битола – Ресен, преку обиколница Битола е во прекин поради свлечиште кое е расчистено, но од превентивни причини сообраќајот се уште се пренасочува преку градот Битола.


Грчките земјоделци почнуваат да се повлекуваат од Евзони


Атина, 17 февруари, 2017 - 9:34 (META) 

Земјоделците кои го блокираа граничниот премин Евзони денеска ќе почнат да се повлекуваат од блокадата. Како што јавуваат грчките медиуми, земјоделците од пладне ќе започнат да го напуштаат блокот на граничниот премин.

„Одлучивме во петок на пладне да започнеме да се повлекуваме од клучката кај Идомени, блиску до преминот Евзони на границата меѓу Грција и БЈРМ и да се вратиме на нашите ниви“, изјави Томас Карипидис, претставник на земјоделците кои го блокираа Евзони за грчката информативна агенција АПЕ.

По средбата со вицепремиерот Драгасакис  фармерите не добија решение на повеќето барања, но Владата се обврза да достави до парламентот на гласање некои олеснувања во даночната и осигурителна програма.

Преминот Евзони беше блокиран од земјоделците од 30 јануари. Целосната блокада создаде огромни проблеми и за туристите и за товарниот превоз, за македонската индустрија и за солунското пристаниште кое беше преполнето со контејнери со производи за македонските компании.

Македонското МНР вчера по речиси три недели блокада испрати протестна нота до Грција за блокадата.


Продолжува блокадата на граничниот премин Евзони


Скопје, 14 февруари, 2017 - 10:06 (META) 

Поради штрајк на грчките земјоделци, граничниот премин Евзони и понатаму е затворен за сообраќај. Граничните премини Меџитлија и Дојран се отворени и нема подолги задржувања за влез и за излез од државата. Оваа информација од Автомото-сојузот на Македонија се однесува само за македонската страна на премините.

Сообраќајот на државните патишта сe одвива по наместа влажни коловози.

Сообраќајот на патниот правец А3 Прилеп – Битола – Ресен, преку обиколница Битола е во прекин поради свлечиште и се пренасочува преку градот Битола.

АМСМ препорачува исклучително внимателно возење, прилагодена брзина на движење и почитување на поставената сообраќајна сигнализација.


Блокадите продолжуваат, превозниците го намалуваат бројот на камиони


Скопје, 13 февруари, 2017 - 12:36 (META) 

Граничниот премин Евзони е затворен веќе две недели, а македонските превозници најмногу трпат од блокадата на грчките земјоделци кои протестираат против владините мерки на Грција.

Камионите кои превезуваат нафта и нафтени деривати се пренасочуваат преку Ново Село, но и преку Меџитлија, граничен премин преку кој од денеска може да поминуваат камиони кои пренесуваат само нафта, но не и друг вид на акцизна стока. Камионите кои превезуваат акцизна стока не можат да поминат преку граничниот премин Дојран, бидејќи нема одобрение од грчка страна.

– Компанијата „Окта“ превезува преку Ново Село, Бугарија. Но оттаму трошоците на превозниците се зголемуваат за 20-30 проценти, така што тие веќе го редуцираат бројот на камиони. Има патарини, километражата е поголема, па оттука и цената на превозот се зголемува –  вели за „Мета“, Билјана Муратовска од Здружението на превозници „Макам-транс“.

Таа вели дека превозниците засега не најавуваат одредени протести, бидејќи користат алтернативни патишта за превоз, а поскапувањето на нафтата ќе зависи од одлуката на Регулаторна комисија за енергетика.


Затворен и граничниот премин Дојрани до 14 часот


Скопје, 10 февруари, 2017 - 12:36 (META) 

Граничниот премин Дојрани денеска во 12 часот е затворен за сообраќај за сите видови возила, а се очекува да биде отворен во 14 часот, информираат од Автомото-сојузот на Македонија.

Поради штрајк на грчките земјоделци, граничниот премин Евзони сè уште е затворен за сообраќај.

Сообраќајот е во прекин и на патниот правец Штип – Радовиш поради сообраќајна несреќа.

Сообраќајот на државните патишта се одвива по на места влажни коловози. Слаб снег кој не се задржува на коловозот провејува на планинскиот премин Стража. Поради магла, видливоста на Стража е од 80 до 100 метри. Слаб дожд врне во Тетово и во Удово.


Сообраќајот Скопје – Велес се одвива по една лента поради сообраќајка


Скопје, 9 февруари, 2017 - 9:58 (META) 

Поради сообраќајна несреќа на патниот правец Скопје – Велес, кај Катланово, сообраќајот се одвива по една коловозна лента, информираат од Автомото-сојузот на Македонија.

Сообраќајот на државните патишта се одвива по на места влажни коловози. Намалена видливост од 50 до 100 метри, поради магла, има на патниот правец Лисец – Попова Шапка.

Поради штрајк на грчките земјоделци, граничниот премин Евзони сè уште е затворен за сообраќај. Премините Дојран и Меџитлија се отворени за сообраќај.


Блокиран граничниот премин Евзони поради штрајк на грчките земјоделци


Скопје, 30 јануари, 2017 - 19:52 (META) 

Од 16.30 часот, на самиот граничен премин Евзони се поставени трактори, поради што сообраќајот не функционира во двата правци, и за патнички и за товарни моторни возила, преку граничниот премин Богородица, информираат од Автомото-сојузот на Македонија.

Сообраќајот на патниот правец А3, Прилеп – Битола – Ресен преку обиколницата кај Битола е во прекин поради свлечиште и сообраќајот се пренасочува преку градот Битола.

Патниот правец Скопје – Македонски Брод преку националниот парк Јасен е непрооден.

Сообраќајот на државните патишта се одвива во зимски услови по на места влажни коловози.

АМСМ препорачува исклучително внимателно возење, прилагодена брзина на движење и почитување на поставената сообраќајна сигнализација.


МНР: Грчките земјоделци ќе го блокираат преминот Евзони околу пладне


Скопје, 28 јануари, 2017 - 10:21 (META) 

Грчките земјоделци денеска ќе го блокираат граничниот премин Евзони во рамки на протестите против владините политики на Грција, информира Министерството за надворешни работи.

Оттаму додаваат дека блокирањето на граничниот премин се очекува да почне околу пладне и нема информација колку ќе трае блокадата.


Грчките земјоделци размислуваат и за блокади на граничниот премин кон Македонија


Атина, 25 јануари, 2017 - 11:35 (META) 

Нова блокада од грчките земјоделци на преминот Евзони-Богородица кон Македонија е сè поизвесна како што се интензивираат земјоделските протести во Грција. Кон штрајкот и блокадите на земјоделците се очекува од утре да се приклучат уште повеќе нивни колеги од северниот дел на земјата.

Според информациите од грчката информативна агенција АПЕ, земјоделците размислуваат да се блокира повремено преминот Евзони на македонско-грчката граница, како и преминот Промахонас кон Бугарија.

Грчките земјоделци исти вакви блокади организираа минатата година и ги блокираа сите гранични премини и автопатиштата во државата, креирајќи големи проблеми и за туристите и за товарниот превоз од Грција кон Балканот и кон Европската Унија. Главната одлука дали и кога ќе почнат блокадите се очекува да биде донесена в петок, на новиот состанок на земјоделците во Поликастро.

Според информациите, земјоделците од Кукуш, Пела, Пиерија, Халкидики и од другите делови од Северна Грција се подготвени да им се приклучат на демонстрантите кои со трактори и со земјоделски машини веќе блокираат дел од автопатиштата низ државата.

Земјоделците со овие нови блокади го изразуваат својот револт кон новите мерки за штедење и владината политика со која се укинати некои бенефиции и даночни поволности за земјоделскиот сектор.