Таблата на Богородица доби налепница Република Северна Македонија (галерија)


Гевгелија, 13 февруари, 2019 - 13:31 (META) 

Царинската управа денеска на граничниот премин Богородица со Република Грција залепи налепница на таблата на која го пишува новото уставно име на државата – Република Северна Македонија.

Во рок од три дена Царинската управа треба да постави табли и на останатите гранични премини, државната граница на Република Северна Македонија и на двата аеродроми во Република Северна Македонија.

Директорот на Царинската управа, Ѓоко Танасоски појасни дека поради тоа што времето е кратко за спроведување тендерски постапки, а согласно заклучоците на Владата предвидено е таблите да бидат променети каде што е можно со налепници, а каде е можно со монтирање други табли, за да се исполни обврската во рок од три дена да бидат променети таблите на граничните премини со новото име Република Северна Македонија.


Рама: Косово е почеток, ќе ги укинеме границите со Македонија, Црна Гора, Грција…


Тирана, 2 јануари, 2019 - 15:17 (META) 

Во новогодишното обраќање, албанскиот премиер Еди Рама порача дека отворањето на границите на Албанија со Косово, што настапи на првиот ден на 2019 година, е само почеток и дека Албанија планира да ги отвори границите и со Македонија, Црна Гора и Грција, пишува „Газетa Обсервер“.

– Наскоро, верувам во текот на пролетта, границата помеѓу Албанија и Косово ќе биде според критериумите на Шенгенскиот договор. Отворените граници со Македонија, Црна Гора и Грција ни се во поблиска иднина отколку приемот на земјата во ЕУ – порача Рама.

Само три дена претходно, неговиот косовски колега Рамуш Харадинај порача преку својот профил на Фејсбук дека од тој ден „границата на Косово кон Албанија не постои“.

„Од денеска границата на Косово со Албанија не постои. Ќе имаме само еден заеднички граничен пункт. Работата продолжува и во март влегуваме во втората фаза на потполното отстранување на границите меѓу Косово и Албанија, врз основа на Шенгенските принципи“, напиша Харадинај.

Спогодбата за заеднички царински и полициски проверки беше потпишана на 26 ноември 2018 година во Пеќ.


Јовески: Груевски ја нема напуштено Македонија на било кој граничен премин


Скопје, 2 јануари, 2019 - 13:37 (META) 

Поранешниот премиер Никола Груевски територијата на Република Македонија ја нема напуштено на било кој граничен премин. Сослушани се и сведоци, но за да не наштетам на предистражната постапка други детали не можам да откривам, вели во интервју за МИА, државниот јавен обвинител Љубомир Јовески.

-Обвинителството презема повеќе дејствија за обезбедување докази, како што веќе соопштивме. Побарани се докази по меѓународна правна помош од надлежните органи на Република Албанија и Република Црна Гора. Добиени се снимките од безбедносните камери на патиштата, наплатните рампи, граничните премини, како и околу домот на поранешниот премиер – вели Јовески.

Обвинителството, како што додава, ја анализира содржината на прибавените докази, а истовремено очекува да се добијат и доказите од Албанија.

-При тоа Обвинителството не утврдува дали има пропусти на одредени институции, туку дали има кривично-правни дејствија од некои лица за овозможување на бегството. Надлежните институции, во рамките на нивната внатрешна организација, треба да утврдат дали и каква одговорност имало во нивното постапување и надлежност – посочува државниот јавен обвинител.

Во врска со амнестијата за учесниците во настаните на 27 април во Собранието, Јовески вели дека тоа е политички чин и не го коментира.

– Доколку ова зависеше од мене и од обвинителот кој постапува по предметот, Вилма Русковска, тоа немаше да се случи. Меѓутоа ова е мој професионален став, а Собранието при донесувањето на Законот ценело други околности кои мене не ми се познати. Обвинителството професионално ќе постапува до завршување на предметот. Но морам да укажам дека постапката за амнестија придонесе и за разјаснување на некои делови од настанот. Изјавите во судницата, на изненадување на многумина, укажаа на моменти од подготовка на случувањата на 27 април. Го разбирам разочарувањето на граѓаните и реакциите, но повторувам тоа е политичка одлука. Обвинителството е должно да го примени законот – вели Јовески.


Белград без официјална реакција за „случајот Груевски“


Белград, 16 ноември, 2018 - 11:43 (META) 

Поголемиот дел медиуми во Србија денеска ги пренесуваат информациите од министерствата за внатрешни работи на Албанија и Црна Гора дека поранешниот македонски премиер Никола Груевски избегал од Македонија преку Албанија и Црна Гора во автомобил на амбасадата на Унгарија во Тирана, и тоа два дена пред за него да биде распишана потерница.

Но српската власт сè уште не се огласила за „Случајот Груевски“.

Министерството за внатрешни работи на Србија за регионалната телевизија „Н1“ претходно објасни дека Груевски нема српски пасош, ниту државјанство. Но, одговор на прашањето дали Груевски на пат кон Унгарија поминал и на територијата на Србија уште не стаса.

Провладиниот српски весник „Политика“ вчера на насловната страница објави текст потпишан од редакцијата кој, без да наведува извори, изнесе повеќе тврдења за бегството на Груевски, меѓу кои и неточното, дека Груевски од Тирана одлетал за Будимпешта. Но албанската полиција вчера соопшти дека Груевски во неделата, два дена пред за него да биде распишана меѓународна потерница, ја напуштил Албанија на граничниот премин „Хани и Хоти“ кон Црна Гора.


Полициите на Албанија и Црна Гора потврдија дека Груевски ги минал нивните граници


Скопје, 16 ноември, 2018 - 10:30 (META) 

Полициите и на Албанија и на Црна Гора вчеравечер се огласија со соопштенија по бројните написи во медиумите дека поранешниот македонски премиер Никола Груевски за Будимпешта заминал преку двете земји. Двете земји потврдија дека во неделата Груевски ги напуштил земјите. Со оглед на фактот дека од Подгорица и од Тиват тој ден немало летови за Будимпешта, најверојатно Груевски ја напуштил земјата по сувоземен или по морски пат, или пак летал за Будимпешта преку Белград.

Според Одделот за граници и миграции на Државната полиција на Албанија, „Н.Г. на 11.11.2018 во 19.11 часот ја напуштил територијата на Албанија преку граничниот премин „Хани Хоти“ и влегол во Црна гора како патник во возило со регистерски таблички CD1013A, сопственост на унгарската амбасада во Тирана“.

Дополнително, албанската полиција соопштува дека во времето на неговото преминување немала добиено потерница или белешка дека по Груевски се трага.

„Интерпол Скопје на 13 ноември 2018, во 19.35 до Интерпол Тирана испрати меѓународна потерница за ова лице“, соопшти Државната полиција на Албанија.

Управата за полиција на Црна Гора пак соопшти дека Груевски ја напуштил земјата истиот ден кога влегол, а полицијата во целост ги почитувала законските процедури.

„По повод написите објавени во медиумите, како и по интересирањето на медиумите за ова прашање, а кои се однесуваат на тоа дека поранешниот премиер на Македонија, Никола Груевски, влегол во Црна Гора на 11 ноември 2018 година, заради вистинито информирање ве известуваме за следното: Никола Груевски влегол во Црна Гора во наведениот ден и во истиот ден излегол од Црна Гора. Црногорската полиција во овој случај во целост ги почитувала законските процедури“, гласи соопштението на црногорската полиција.

За разлика од нивните колеги од Албанија, црногорската полиција не известува каде и во колку часот Груевски ја напуштил земјата.

Со оглед на фактот дека од аеродромите во Подгорица и во Тиват тој ден немало летови за Будимпешта, најверојатно Груевски ја напуштил земјата по сувоземен или по морски пат, или пак летал за Будимпешта преку Белград, Истанбул или Москва. Засега нема реакции од владите и министерствата за внатрешни работи на БиХ и Србија.


Кој, каде и како ја кренал рампата за Груевски?


Скопје, 15 ноември, 2018 - 16:38 (META) 

Откако владиниот портпарол Миле Бошњаковски денеска соопшти дека Одделот на внатрешна контрола во МВР спроведува постапка за можна инволвираност на полициски службеници дека му помогнале во бегството на Никола Груевски, а дополнително СВР Скопје, го утврдува начинот на бегството, како и евентуално надворешни помагатели, се поставува прашањето дали поранешниот премиер државната граница ја минал нелегално или на граничен премин.

Ова уште повеќе бидејќи во албанските медиуми излезе информацијата дека „извештаите на албанската полиција сугерираат дека поранешниот македонски премиер Никола Груевски на 11.11.2018 година во 19:11 излегол од Албанија во Црна Гора со автомобил на унгарската амбасада во Тирана – возило таблички CD1013A.“. Потоа и  шефот на кабинетот на унгарскиот премиер Орбан, тврди дека Груевски барање за азил во Унгарија го поднел во „унгарска амбасада надвор од Македонија“.

Во случај бегството да е направено со илегално преминување на државната граница, за тоа би му бил потребен најмалку еден помагач или Груевски пребегал во договор со припадник или припадници на граничната полиција.

Од друга страна, ако преминал на граничен премин, невозможно е  поранешен премиер што ја извршуваше таа функција 10 години да биде непрепознаен по лик при полициската контрола. Доколку пак бил маскиран и со лажен пасош или лична карта, вистинскиот идентитет би се утврдил без проблеми, со биометриска проверка за да се види дали лицето што сака да ја мине границата ги има биометриските параметри снимени во личниот документ. За такво нешто полицаецот има право да го задржи патникот и до 24 часа, вели членот 13 од Законот за гранична контрола.

„Полицискиот службеник при извршувањето на граничните проверки на лица е овластен:
– да побара валиден патен  документ или друг документ пропишан за преминување на државната граница,
– да го утврди идентитетот на лицето кое има намера да ја премине државната граница,
– да провери дали се исполнети условите за влез и излез од Република Македонија утврдени со закон,
– да даде упатства и наредби со цел за непречено и брзо одвивање на граничните проверки.
– доколку постојат индиции, односно основи за сомневање за сторено кривично дело или прекршок, да изврши гранични проверки на втора линија што подразбира и преглед или претрес на лицето, предметите и превозното средство што истото ги поседува,
– да ја провери валидноста на патниот документ, односно на друг документ пропишан за преминување на државната граница,
– да изврши проверка на отпечатоци од прсти и дланки и други биометриски податоци во соодветните евиденции,
– да изврши проверка во оперативните (побарани) и други евиденции и електронски бази на податоци за лица, предмети превозни средства и
– да го задржи лицето за време неопходно потребно за извршување на граничните проверки, но не подолго од 24 часа.“, стои во членот 13.

Според наведените обврски од оваа законска одредба, доколку Груевски бил пред очите на полицискиот службеник а бил пуштен да помине, вината на службеното лице е јасна. Доколку пак бил сокриен во некое возило, станува збор најмалку за „несовесно работење во службата“.


Сугарески: Патот Ранковце – Крива Паланка е од регионално значење за економијата


Крива Паланка, 25 септември, 2018 - 14:56 (META) 

Експресниот пат Ранковце – Крива Паланка кој е со вкупна должина од 25 километри почна да се гради јуни годинава и треба да биде завршен за три години, информираше министерот за транспорт и врски Горан Сугарески, кој денеска изврши увид во градежните работи.

– Експресниот пат Ранковце – Крива Паланка како дел од доизградбата на Коридор 8 е од особена економска важност за Македонија. Со него овозможуваме брза врска на пан-европскиот Коридор 8 кој нè поврзува со Бугарија, а со тоа отвораме можност за подобрување на економските врски со Европската Унија. Покрај регионално поврзување, со комплетирање на Коридор 8 и создавање на модерна патна мрежа ќе придонесеме за брз и безбеден транспорт на стоки и услуги и ќе им овозможиме на домашните компании полесно да се пробијат на нови пазари. Во таа насока го потпишавме и договорот со ЕБОР за реконструкција и проширување на патот од Крива Паланка до граничниот премин Деве Баир, со што создаваме комплетно нова патна делница на овој Коридор од значење не само за нашата земја, туку и за целиот регион – изјави Сугарески.

Вкупната вредност на инвестицијата изнесува 58,5 милиони евра.


Вучиќ не се меша за референдумот, вели за Белград е добра вест ако се реши спорот


Табановце, 3 септември, 2018 - 10:08 (META) 

Претседателот на Србија Александар Вучиќ во врска со претстојниот референдум во Македонија рече дека Србија не сака да се меша во внатрешните прашања на другите земји, но дека ќе поддржи сè што води кон стабилност во регионот и дека секогаш позитивно ќе реагира ако нејзините соседи ги решаваат проблемите.

– Сè што придонесува за регионалната стабилност е од значење за целиот регион – рече Вучиќ на заедничката прес-конференција со македонскиот премиер Зоран Заев на граничниот премин Прешево – Табановце.

На прашањето дали ќе ги повика Србите во Македонија на референдумот да го поддржат договорот со Атина, Вучиќ рече дека Србија не сака да се меша и дека за Белград е добра вест ако Скопје и Атина го решат овој спор.

Заев рече дека сите лидери во регионот треба да бидат обединети околу целта за да се постигне заеднички мир.

– Македонија го поддржиува решението за Косово. Решение кое ќе го унапреди животот на Србите и на Албанците. Решение кое ќе го гарантира митор и безбедноста во Србија и на Косово – рече Заев.

Заев и Вучиќ на граничниот премин разговараа за воспоставување обединет граничен премин меѓу двете држави со што на границата ќе има само една гранична контрола и царина со што ќе се преполови времето на чекање.


На Богородица и Табановце се чека од 15 до 30 минути за излез од државата


Скопје, 8 август, 2018 - 13:02 (META) 

Сообраќајот на државните патишта се одвива по суви коловози со зголемен интензитет на патните правци надвор од градските средини. На граничните премини Богородица и Табановце има зголемена фреквенција на возила и за излез од државата се чека од 15 до 30 минути, информира АМСМ.

На останатите гранични премини, од македонска страна, нема подолги задржувања за влез и излез од државата.

Од АМСМ препорачуваат внимателно возење, прилагодена брзина на движење и почитување на поставената сообраќајна сигнализација. Во клисурите и засеците можна е појава на одрони, особено на патните правци: Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.


Шверцери фатени на „Табановце“ со големо количество антички монети и други артефакти


Куманово, 8 мај, 2018 - 14:00 (META) 

Македонски државјанин што живее во Виена и српски државјанин што живее во валандовско Марвинци добија кривични пријави поради шверцување антиквитети.

Случајот бил откриен во петокот рано наутро на граничниот премин „Табановце“ на излез од Македонија. Во облеката на С.Г. (47) од Србија со живеалиште во Марвинци се пронајдени 20 антички монети, едно античко копче, а во автомобилот „волво с80“ сопственост на М.Ј. (51), гастарбајтер во Австрија, биле пронајдени 68 антички пари, како и девет други антиквитети.

Потоа бил претресен домот на Србинот во Марвинци, при што биле пронајдени околу два килограми непозната растителна материја и неколку стари монети и други предмети.

Запленетите антиквитети СВР Куманово наскоро ќе ги достави до Археолошки музеј на Македонија, кој ќе врши процена на оригиналноста на уметничките предмети.