Граѓански организации побараа оставки од Спасовски и директорите на УБК и АР за бегството на Груевски


Скопје, 18 јануари, 2019 - 14:04 (META) 

Седум граѓански организации денеска побараа оставки да поднесат министерот за внатрешни работи Оливер Спасовски, директорот на Управата за безбедност и контраразузнавање (УБК) Горан Николовски и директорот на Агенцијата за разузнавање (АР), Зоран Иванов. Невладините порачуваат дека тие лица мора да понесат  политичка одговорност за бегството на Никола Груевски.

„Сметаме дека навршувањето на втор календарски месец од бегството е разумен рок за на јавноста да и’ бидат соопштени информации околу истрагите кои се водат како и да се утврдат пропустите на институциите кои што во конкретниот случај биле надлежни да постапуваат. Одолговлекувањето ги подгреа сомнежите на јавноста и дополнително придонесе да се зголеми перцепцијата дека културата на неказнивост опстојува во Македонија. Затоа сметаме дека е неопходно да се преземе политичка одговорност, односно да следуваат оставки“, порачуваат граѓанските организации.

Зад повикот застанаа Институт за демократија Социетас Цивилис- Скопје, Институт за европска политика, Институт за човекови права, Коалиција „Сите за правично судење“, Младински образовен форум, НВО Инфоцентар и Центар за економски анализи.


Отворен ден во Владата за иницијативи на граѓански организации за „Планот за чист воздух“


Скопје, 15 јануари, 2019 - 11:19 (META) 

Утре во 10 часот во прес центарот на Владата ќе се одржи четвртиот од серијата отворени денови за иницијативи на граѓански организации, којшто се однесува на „Планот за чист воздух“ за 2019-та година и временската рамка за негово спроведување.

Од Владата информираат дека на отворениот ден воведни обраќања ќе имаат заменик министерот за животна средина и просторно планирање, Јани Макрадули, шефот на кабинет на градоначалникот на Град Скопје, Никола Наумоски, Дарко Блинков од Државниот инспекторат за животна средина и Ана Чоловиќ Лешоска, од здружението „Еко – свест“.


Транспарентност и граѓанско учество во преговорите со ЕУ бараат „Евротинк“ и „Социетас цивилис“


Скопје, 13 декември, 2018 - 13:20 (META) 

Институтот за демократија „Социетас Цивилис“ и Центарот за европски „Евротинк“ денеска побараа подобар модел за преговори со ЕУ, како и поголемо учество на Собрранието и на граѓанското општество. Овие два аналитички центри бараат и поголема транспарентност на Владата за преговарачката структура, како и за критериумите за лицата кои ќе бидат вклучени во неа.

„Потребна е афирмација и зајакнување на улогата на Собранието како клучна институција за надзор и контрола на процесот на преговори. Владата нема монопол над процесот на преговори. Опозицијата мора да биде информирана и вклучена. Треба да се работи на надоврзување и искористување на веќе изградени институционални и административни капацитети со цел изградба на ефикасен модел кој може да биде отпорен на политичка нестабилност (промени на власта) и на партиски влијанија“, велат „Евротинк“ и „Социетас Цивилис“.

Тие повикуваат и да се развие добро осмислен, одржлив и инклузивен модел за вклучување на граѓанските организации во партнерство меѓу Владата, Собранието и граѓанските организации.

„Иако Владата е клучен актер во преговорите, никој нема монопол врз процесот во кој сите чинители полагаат надежи. Предлагањето на модел за вклучување на граѓанските организации без соодветна подготовка и широка консултација со засегнатите страни го сметаме за избрзано и неодржливо“, се вели во соопштението.


Граѓанските организации поставија рок од 10 дена за одговорност за бегството на Груевски


Скопје, 4 декември, 2018 - 12:21 (META) 

Вкупно 14 граѓански организации, меѓу кои и Фондација Отворено општество – Македонија, Фондацијата „Метаморфозис“ и Хелсиншкиот комитет за човекови права на Република Македонија, денеска упатија втора реакција до власта, поставувајќи рок од 10 дена да се лоцира одговорноста за бегството на поранешниот премиер Никола Груевски. Во спротивно, порача граѓанскиот сектор, ќе се бара политичка одговорност од највисоките функционери.

„Најостро ја осудуваме неажурноста на институциите во спроведувањето на истрагите поврзани со утврдување на пропустите и одговорноста за бегството на поранешниот премиер Никола Груевски. Бараме истрагите итно да завршат, и тоа во рок од 10 дена, и да се утврди одговорност за пропустите, евентуалното непостапување или соучество. Во спротивно ќе бараме политичка одговорност на највисоките функционери. Апелираме да не се подрива ЕУ перспективата на Македонија, која зависи од владеењето на правото. Имено, поминаа повеќе од две седмици од објавувањето на нашата прва реакција. Непреземањето на никаква одговорност и покрај индициите за сериозни пропусти и непочитување на одредбите од Законот за извршување на санкции и Правилникот за начинот на вршење на полициските работи од страна на Основниот суд Скопје 1 и Министерството за внатрешни работи, ги зголемува сомнежите дека не постои волја за утврдување на вистината. Со тоа повторно влегуваме во волшебниот круг на одржување на културата на неказнивост“, порачуваат организациите.

Целиот текст на реакцијата и списокот на сите организации што ја потпишаа може да се прочитаат тука.


Работилница за финансирање на меѓународните организации на Економскиот институт – Скопје


Скопје, 27 ноември, 2018 - 12:55 (META) 

На Економски институт – Скопје утре со почеток во 10 часот ќе се одржи работилница на тема „Финансирање на меѓународните организации: Искуства, можности и предизвици”.

Најавено е учеството на меѓународни и регионални организации, високообразовни установи и организации од граѓанскиот сектор. Настанот се организира во соработка со МВР.

На темата ќе говорат директорот на институтот, проф. д-р Зоран Јаневски и Магдалена Несторовска, државен секретар во МВР, како и Тања Левајковиќ, помошник-министер за внатрешни работи и Драганчо Апостоловски од Министерството за надворешни работи. Покрај нив, ќе учествуваат и Мелита Груевска – Грахам, Катерина Кулишевска, Келменд Зајази и уште неколкумина претставници на неколку меѓународни организации. Работилницата ќе биде модерирана од проф. д-р Силвана Мојсовска.

Во програмата е предвидено да бидат презентирани неколку меѓународни организаии, а ќе се дискутира и за состојбите, искустава и перспективите во финансирањето не само на меѓународните, туку и на регионалните организации.

Втората тематска целина е посветена на предизвиците во финансирањето на организациите, како и на можностите за зголемување на изворите на финансирање преку меѓуинституционална соработка.

Адресата на Економски институт – Скопје е ул. Пролет бр. 1, а програмата за утрешната работилница може да се види тука.


Осуда за пропустите на МВР и Кривичен суд за бегството на Груевски стаса од 14 организации


Скопје, 15 ноември, 2018 - 13:28 (META) 

Вкупно 14 истакнати граѓански организации денеска упатија остра осуда за, како што велат, пропустите, неажурноста и непочитувањето на одредбите од Законот за извршување на санкции и Правилникот за начинот на вршење на полициските работи од страна на Основниот суд Скопје 1 и Министерството за внатрешни работи (МВР), кои резултираа со бегството на Никола Груевски од Македонија.

Организациите, меѓу кои се и Фондација Отворено општество – Македонија и Хелсиншки комитет за човекови права, посочуваат дека осудениот требало да се јави во затвор веднаш по приемот на конечниот и правосилен упатен акт, наместо да се чека да заврши процедурата со жалби на решението.

Во реакцијата од организациите се вели дека според член 87 од Законот за извршување на санкции, доколку осудениот не се јави во зададениот рок со упатниот акт, установата (затворот) е должна да го извести судијата за извршување на санкции, кој треба веднаш да издаде наредба до МВР за приведување на лицето.

„Доколку лицето не е достапно на органите на прогон, МВР треба да издаде потерница. Согласно информациите од медиумите, директорот на Затворот Скопје – Скопје, Ѓоко Котевски го известил Основниот суд Скопје 1 Скопје, дека осуденикот не се јавил доброволно на отслужување на затворска казна на 10.11.2018, еден ден после трите неуспешни обиди за доставување на упатниот акт. Во овој момент се јавува најголемиот пропуст на судот и прекршување на одредбите од Законот за извршување на санкции. Апсолутно е нејасно зошто Судот не постапил во согласност со закон и го игнорирал начелото на итност од став 3 на чл 87 од Законот за извршување на санкции, па за издавање на наредба за приведување на осуденикот, чекал два дена од добиеното известување од директорот на затворот и истата ја издал до СВР Скопје на 12.11.2018 во 16:30 часот, со барање за издавање на национална потерница“, се вели во реакцијата.

Организациите посочуваат и дека обезбедувањето не смеело да го остави Никола Груевски.

„Ова е четврто лице осудено во високопрофилираните кривични постапки, кое поради неажурност и некоординираност на судските власти и органите на прогон, успеало да избега од државата и да го избегне издржувањето на казна затвор определена со правосилна и извршна пресуда, што укажува на итната потреба од преиспитување на функционалноста на органите на прогон, граничните служби и судските власти“, се вели во соопштението од 14-те граѓански организации.

Целата реакција и списокот на организациите може да се прочитаат тука.


УСАИД и „Метаморфозис“ со нов повик до граѓанските организации


Штип, 10 октомври, 2018 - 9:54 (META) 

Граѓанските организации беа светлото, кое за време на политичката криза укажување на недостатоците, што придонесе за демократизација на процесите. Ова вчера во Штип го изјави директорот на Канцеларијата за општ развој на УСАИД, Едвард Гонзалес, кој најави дека остануваат со поддршката за овие организации, кои продолжија да ја играат улогата на контролор на власта.

-Сметам дека владата успеа да усвои инкулзивен и транспарентен дискурс, но граѓанските организации и понатаму треба да бидат поддржувани во вршењето на нивната улога на „воч дог“ или следачи на работата на власта. Затоа од таа причина, УСАИД продолжува да поддржува проекти, како тие на Платформата за спречување на корупција и на Центарот за граѓански комуникации, бидејќи тие ја играат вистинската улога на „воч дог“, бидејќи тие се оние кои ги следат постапките на владата и отчетноста во работењето – рече Гонзалес.

Во Штип Фондацијата за интернет и општество „Метаморфозис“ заедно со УСАИД – Проект за граѓанско учество, го презентираа новиот повик до граѓански организации, со кој се предвидува финансирање на седум проекти во висина до 90.000 долари. Од граѓанските организации се очекуваат идеи за одржливи заедници и градови, потоа поддршка на организации кои ќе работат во компонентата на издржливост на заедницата во Националната стратегија на Владата на Република Македонија за борба против насилниот екстремизам и социјалното претприемништво.


Штипската опозиција обвинува дека граѓанските пари завршија во партиски џебови


Штип, 4 септември, 2018 - 10:17 (META) 

Поделбата на близу милион денари од буџетот на Општината Штип на седум граѓански организации, ги спротивстави ВМРО-ДПМНЕ и СДСМ. Опозициската ВМРО-ДПМНЕ обвини дека пари добила организација чиј претседател беше кандидат за советник од листата на СДСМ на последните локални избори, а две од седумтте организации – добитници, имаат исто лице во управувачката структура.

Со одлука на Советот на Општината Штип, за прв пат ќе се финасираат седум проекти на граѓански организации и фондации, со цел локален економски развој. На Општината и требаше половина година за да одлучи кому да ги додели средствата, додека неофицијално се говореше за лобирања и притисоци. Поради тоа, имаше и неофицијална најава дека повикот за финансирање ќе биде поништен.

Повикот беше распишан на први март годинава, по методологија утврдена од Општината. На последната седница на Советот во петокот, мнозинството и официјално ја прифати одлуката за оваа поделба од Комисија составена од претставници на Општината и граѓанскиот сектор.

Љубе Здравков од ВМРО-ДПМНЕ побара отчет за начинот на кој е одлучувано кои проекти да бидат прифатени и праша дали добија само тие организации што ги застапуваат ставовите на СДСМ.

– Дали е во ред да се доделуваат средства на лице кое беше на советничката листа на СДС, лице кое веќе неколку пати во текот на годината има добиено средства од Општина Штип за настани кои се слабо посетени, а Советот на Општина Штип нема увид во начинот на трошење на тие средства и лице кое преку група на граѓани остварува свои лични интереси? И дали при доделување на средства на две организации, нема судир на интереси на едно лице, кое во едната организација е претседател, а во другата организација, заедно со целото семејство е во Основачко собрание? – рече Здравков на прес-конференција.

Пари од општинскиот буџет доби „Македонски Егеј“, на чие чело стои Јордан Тунев. Тој на последните локални избори беше дел од советничката листа на СДСМ , што резултираше со протест на членовите на Здружението, кои тврдеа дека се против неговата кандидатура за советник.

Реплицираше на говорница советничката од СДСМ Маријана Рогожарска, според која, првичната одлука за доделување на средства за граѓанските организации не е на Советот, ниту градоначалникот, туку на формираната Комисија, во која членуваат и надворешни лица.

– Изборот го направи Комисијата, по методологија што беше презентирана од страна на лицата, кои го доставија до Советот барањето за финансирање на проекти од Општината и Советот ја усвои истата. Ако бевте на комисии ќе знаевте дека изборот не го вршат само лица од Општината , туку и надворешни членови, од кои секој посебно бодираше – рече Рогожарска која е претседател на Комисијатаза финансирање и буџет.

За начинот на избор на проекти објасни и членот на комисијата за избор, Никола Илиев, според кого, рангирањето се извршило според бодовите на секој член од оваа комисија.

Советниците на ВМРО-ДПМНЕ останаа на искажаните сомневања и гласаа против оваа одлука. Сепак, мнозинството одлучи да додели пари на проекти на „Македонски Егеј“, „Гласен Текстилец“, „Виножито“, „Организација на жени“, „Бизнис информативен и консултантски центар“, и „Черења“.

Досегашните локални гарнитури парите за граѓанските проекти не ги доделуваа, со образложение дека нема квалитетни идеи, без при тоа, да распишат повик за финансирање.


Граѓанските организации со повеќе предлози до Владата за борба против корупција


Скопје, 6 јули, 2018 - 15:16 (META) 

Од софтверски алатки за следење на регуларноста на јавните електронски наддавања преку испитување на работата на државниот правобранител до забрзување на некои законски реформи и јакнење на интегритетот на функционерите, службениците и институциите, беа дел од иницијативите што десетина граѓански организации денеска ги презентираа пред повеќе министри и претставници од Секторот за односи со јавноста во Владата.

На вториот отворен ден за иницијативи од граѓанските организации, претставниците на Владата порачаа дека борбата против корупцијата, иако оди тешко, е една од најголемите заложби на актуелната владина гарнитура, а за тоа е неопходна помошта и од граѓаните и од граѓанските организации и од експертите.

Како што рече заменик-министерот за правда Оливер Ристовски, Министерството за правда никогаш во изминативе десетина години не било во толку блиска соработка со граѓанските организации како во последната година, напоменувајќи дека во подготовката на новите верзии на законите за укажувачи и за спречување корупција, најголемиот дел од работата и од предлозите се токму од невладиниот сектор и од експертите.

Лилјана Пецова – Илиеска од Фондацијата за интернет и општество „Метаморфозис“ порача дека иницираат итна подготовка, усвојување и имплементација на планови за интегритет или друга внатрешна политика за борба против корупција која што вклучува мерки за спречување и елиминација на различни форми на коруптивно и неетичко однесување во рамки на институцијата и тоа во четири области на јавниот сектор, избрани како приоритети за имплементација: образование, здравство, правда и полиција.

– Треба да се работи на подигнување на свеста за заштитата на информаторите, за конфликтот на интереси, за примањето подароци за јавните службеници, за ограничувањето на деловните активности, плановите за интегритет и за лобирање не само во јавниот сектор, туку и во пошироката јавност – рече Пецова – Илиеска.

Како што појасни таа, иницијативата произлегла поради неисполнетост на индикаторите за интегритет во рамките на истражувањето спроведено преку проектот „Action SEE“, на кој „Метаморфозис“ работи.

На крајот на денешниот отворен ден, вицепремиерот и министер за внатрешни работи Оливер Спасовски ја истакна како веројатно најважна иницијативата за јакнење на интегритетот на државни службеници и институции, што ја образложи Пецова – Илиевска.

– Тоа  е број 1 ако сакаме вистинска борба против корупција. Ќе знам дека има вистинска борба само кога ќе видам како се покренува иницијатива за полициски инспектор, обвинител или судија, каде знаеме дека исто така има проблеми – рече тој.

Жаклина Хаџи Зафирова од СКУП реагираше што уште не се остварени ветувањата од Владата за да се скрати рокот во кој институциите ќе треба да дадат одговори на барањата за слободен пристап до информации од јавен карактер, а побара и поголема транспарентност од институциите.

Од министерот Роберт Поповски доби одговор дека е при крај подготовката на текстот на законските измени за пристап до информации од јавен карактер, но сè уште се размислува дека можеби во некои случаи скратениот рок за одговор би создал проблеми кај некои институции што не се подготвени за тоа.

– Сепак, владата се максимално се залага да ги направи сите институции транспарентни и отворени до крај – рече Поповски.


Владата ги повика граѓанските организации внимателно да ги следат сите јавни набавки


Скопје, 20 јуни, 2018 - 11:00 (META) 

Ги повикуваме сите граѓански организации внимателно да ги следат сите постапки на јавните набавки, со една цел, колку што е можно повеќе да ги отстраниме сите сомнежи како се прават постапките, рече министерот задолжен за комуникации, отчетност и транспарентност, Роберт Поповски, на денешната прес-конференција, на која, со министерот за здравство, Венко Филипче, генералниот директор на ЕЛЕМ, Драган Миновски и директорот на Службата за општи и заеднички работи на Владата, Пеце Мирчевски ги повикаа граѓанските организации внимателно да ги следат сите јавни набавки на државните органи.

– Ги повикуваме граѓанските организации што имаат експертиза за тоа, медиумите и граѓаните, внимателно да ги следат сите набавки. Целта е да се следи како се трошат парите на граѓаните и граѓанските организации ќе имаат можност да се вклучат од самиот почеток на постапката се до склучување на договорите – рече Поповски.

Министерот за здравство Венко Филипче, рече дека сите заинтересирани граѓански здруженија ќе имаат можност за увид од почнување на тендерската постапка, па се до склучување на договорите во министерството за здравство. Дополнително, тие ќе може да присуствуваат на сендиците на комисиите за јавни набавки.

– Во следниот период Министерството за здравство, во соработка со експерти од невладиниот сектор, ќе изврши анализа на ризиците од корупција во јавните набавки во Министерството за здравство. Со увид на ризик-факторите при процес на јавните набавки, ќе се намали и ризикот од судирот на интереси, во насока на спречување на непотизам и блиски релации со компании пријатели. Се прават анализи и за промена во самите тендерски постапки. Се проценуваат потребните количини за набавка на лекови, за да се намали потребата од интервентен увоз на лекови, но се прават и обиди за заштеда од неколку милиони евра со систем на централизирани набавки – изјави Филипче.

Генералниот директор на ЕЛЕМ, Драган Миновски исто така рече дека компанијата е целосно отворена за увид во тендерските постапка од почеток до крај, па дури и во оние фази за кои постои доверливост во постапката.

– Имавме состанок со неколку невладини организации и сме максимално отворени за бараните податоци. Подготвени сме на партнерски однос, заштита на доверливоста за неизнесување на податоци на трети страни за да не се наштети на постапката – рече Миновски.

Директорот на Службата за општи и заеднички работи на Владата, Пеце Мирчевски рече дека оваа служба ги отвора вратите за граѓаните да ги мониторираат јавните набавки.

– Нема место за провизии и приоритетни добавувачи. Сите тендерски договори ги објавуваме пред очите на јавноста – рече Мирчевкси.