Таксист загинал во судир со камион на патот Градско – Прилеп


Кавадарци, 28 февруари, 2018 - 14:39 (META) 

Во тешка сообраќајна несреќа што се случила денеска во 10.10 часот на магистралниот пат Градско – Прилеп, загинал таксист кој управувал со автомобил „мерцедес“ со скопски таблички.

Како што извести полицијата, се судриле „волво“ камион со приколка управуван од Ј.Г.(30) од Велес и такси возилото со кое управувал К.Л.(35) од Скопје. Таксистот го загубил животот веднаш, додека сопатничките во возилото, М.И.(64) и А.И.(31), двете од Битола, биле повредени и биле пренесени во болницата во Кавадарци. По укажаната прва помош се пренесени во Клиничкиот центар „Мајка Тереза“ во Скопје.

Возачот на камионот и неговиот сопатник не биле повредени.


Стечајците од „Фени“ денеска повторно ќе го блокираат патот Градско – Прилеп


Кавадарци, 4 декември, 2017 - 12:32 (META) 

Ако до пладне не им биде исплатена платата за октомври, вработените во комбинатот „Фени“, кој од пред помалку од една седмица е во стечај, ќе го блокираат патот Градско – Прилеп.

Во средата Основен суд Велес одлучи да биде отворена стечајна постапка за фабриката. Трите најголеми доверители, „Комерцијална банка“, „Стопанска банка“ и „Силк роуд банка“, се надеваат дека фирмата ќе биде преземена од странски инвеститор, кој ќе ги намири сите долгови на „Фени“ – платите на вработени, долговите кон банките и долговите кон доставувачите.

Привремениот стечаен управник Мирослав Анастасиевски пред некој ден рече дека се преземаат сите мерки за побрзо враќање на вработените на работа и за заштита на капиталот и на правата на работниците на „Фени“, како клучен сегмент во овој процес.


Бочварски: Поради пропусти во проектот, проблеми има и на патот Градско – Прилеп


Скопје, 8 јули, 2017 - 14:59 (META) 

По очигледните огромни пропусти на автопатoт Кичево – Охрид, каде само за еден тунел, поради пропусти во проектот, цената ќе се зголеми од 29 на 89 милиони евра, слични проблеми се јавуваат и во изведбата на експресниот пат Градско – Прилеп, изјави денеска потпретседателот на СДСМ, Благој Бочварски.

– Постојат сериозни пропусти во проектната документација, непостоење или, пак, минимални геотехнички истражувања, како и појава на три досега неевидентирани археолошки локалитети поради кои е издадено решение за привремен прекин на работите. Ова е само уште една потврда за неспособноста, нестручноста и за неодговорноста на претходната влада предводена од ВМРО-ДПМНЕ и од Никола Груевски. Брзајќи да ги земат договорените провизии за автопатишта, Никола Груевски и неговите соработници нанесоа огромни штети врз интересите на граѓаните и буџетот – вели Бочварски.

Потпретседателот на СДСМ нагласи дека ќе има одговорност за сите пропусти на споменатите автопатишта, за сите земени провизии, за сите криминални тендери и за секое криминално богатење на поединци на сметка на граѓаните и на државата.