Електричен автобус ќе сообраќа шест месеци на линијата „15“ во Скопје


Скопје, 4 мај, 2018 - 12:23 (META) 

Новиот електричен автобус, за кој Град Скопје пред неполни три месеци потпиша договор со израелската компанија „Чериот Моторс“ за пробно користење, од денеска во наредните шест месеци ќе сообраќа на линијата „15“.

– Автобусот е направен во согласност со последните технолошки трендови во оваа индустрија. Станува збор за енергетски ефикасен автобус кој троши минимално количество електрична енергија и е опремен со систем за брзо полнење. Најголемата предност е тоа што воопшто нема емисија на издувни гасови што го загадуваат воздухот – рече градоначалникот Шилегов на денешната презентација на новиот електричен автобус.

Станиците за полнење на крајните постојки во Ново Лисиче и во Карпош 4 се поставени од ЕВН.

Во Скопје веќе сообраќаат два екоавтобуси на гас, на линијата број 5 и на линијата број 2.

– Решавањето на деценискиот проблем со јавниот превоз во Скопје е дел од листата приоритети на градот. Годинава предвидовме буџет за субвенции за набавка на екоавтобуси  во висина од 100 милиони денари и за приватните превозници во висина од 20 милиони денари зашто Скопје заслужува автобуски превоз кој нема да загадува, ќе биде енергетски ефикасен и кој во целост ќе излезе во пресрет на потребите на граѓаните коишто го користат. Свесни сме дека ова не го решава во целост проблемот со загадувањето на Скопје во зимскиот период, но затоа работиме на тоа еден по еден да ги елиминираме причинителите за загадувањето, на долг рок – нагласи Шилегов.


Јованоски: Во Прилеп работиме на сите полиња и на сите ветени проекти


Прилеп, 27 април, 2018 - 13:14 (META) 

Советот на Општина Прилеп работи непречено. Се донесуваат одлуки, се штитат интересите и потребите на граѓаните. Советниците од ВМРО-ДПМНЕ ги очекува голема работа, се подготвуваат проекти… Дали и како ќе гласаат, сепак, тоа е нивна одлука, секој треба да си ја понесе својата одговорност,  вели градоначалникот на Општина Прилеп, Илија Јованоски во интервјуто за „Вистиномер“ направено во рамките на проектот „До отчетни општини преку активни граѓани“, спроведуван од Фондацијата „Метаморфозис“, а поддржан од американската непрофитна фондација NED (National Endowment for Democracy).

Јованоски посебно се осврнува на наследениот долг од 3,5 милиони евра.

– Тоа е утврдено и со Записникот за примопредавање, кој е изработен од страна на стручните служби, каде што раководителите се сè уште лицата поставени од ексградоначалникот Марјан Ристески. А, овој Записник само да кажам дека до денеска не е потпишан од страна на Ристески, иако му беше доставен на увид. Овде се и обврските кон добавувачите, обврските по кредити, ризиците врз буџетот на Општината. Бидејќи јасно е колкав е основниот ризик, но не се знае колку ќе изнесуваат крајните ризици! – објаснува градоначалникот на Прилеп.

Јованоски обвинува за многу пропусти на неговиот претходник, Марјан Ристески. Вели дека цели три мандати тогашниот градоначалник работел без визија и дека многу работи што се суштински за граѓаните и општината не се реализирани.

– Реално не очекував дека ситуацијата ќе биде толку лоша, да не речам катастрофална. Но, не само од финансиски, туку од секој аспект. Во Општината нема проекти, не се работени ДУП-ови. Не сфаќам што се правело 12 години. Цел тој период се немало визија, ни дефинирани цели каде треба да се движи општината, условно кажано. Многу неодговорно се работело на приходите на Општината. Набрзо според насоките од Државниот завод за ревизија, Општина Прилеп ќе треба да отпише околу 100 милиони денари побарувања, по разни основи за комунални такси и надоместоци, закупнини и сл. парични средства, што се едни од сопствените приходи на финансирање на Општината. Дел од побарувањата можеби оправдано се отпишани. Но, најголем дел се последица на неодговорно и недомаќинско работење на Ристески и претходната локална власт – вели прилепскиот градоначалник.

За горливиот проблем на прилепчани – лошата состојба на улиците и некои патишта, вели дека ќе се реагира на три начини – со санација на дупки, онаму каде што останатиот дел од улиците е во добра состојба, за што се издвоени 10 милиони денари, потоа со  реконструкција и рехабилитација на делови или цели улици од помал обем, како и со изградба на нови улици.

Во поглед на состојбата во населбата Тризла, каде живеат Роми, вели дека се реализирани некои работи, но ќе се работи уште.

– Што се однесува до инфраструктурното уредување на „Тризла“, односно населбата „Три багреми“, состојбата е следна: ЕВН изгради трафостаница, тампониран е патот, отстранети се дефектите на водоводната мрежа, обезбеден е бесплатен превоз за учениците, се бараат решенија за да се обезбеди доволно вода, се ставаат контејнери за собирање отпад, во тек се мапирањето на граѓани без документи за лична идентификација како и активности за легализација на дивоградбите, што е основа да се изработи ДУП за населбата – вели Јованоски.

Посебно се гордее со остварувањето на едно од неговите ветувања.

– Бесплатниот превоз за пензионерите е реалност, тој функционира секој работен ден од 8-12 часот. Моето изборно ветување е остварено. Зборот е збор!

Повеќе од интервјуто, како и изјавите на Јованоски за транспаретноста, може да прочитате тука.


Шилегов: Градскиот превоз ќе биде бесплатен се до намалување на загадувањето


Скопје, 8 јануари, 2018 - 13:43 (META) 

Градоначалникот на Град Скопје, Петре Шилегов денеска соопшти дека градскиот автобуски превоз ќе биде бесплатен се до намалување на загадувањето.

Тој соопшти дека како дел од вонредните мерки што Град Скопје ги воведува за да се намали загадувањето ќе биде и прекинот на сите градежни активности на градилиштата, интензивно миење на градските улици, зајакнати инспекциски надзори како и ограничувањето на обуките на автошколите.

Шилегов апелираше да не се користат возилата без потреба и граѓаните да се организираат и да користат заеднички превоз, но и за затоплување да не се користат отпадни материјали, туку само суво дрво.

-Борбата против аерозагадувањето бара поголема вклученост од сите нас, бидејќи сите го дишеме истиот воздух – рече Шилегов.

Тој информираше дека автобусите во наредниот период, се додека се на сила вонредните мерки за намалување на загадувањето, ќе сообраќаат зачестено, а превозот ќе биде бесплатен.


Кривична пријава за поранешниот градоначалник на Кочани, Ратко Димитровски


Кочани, 25 декември, 2017 - 13:09 (META) 

Полицијата поднесе кривична пријава за злоупотреба на службената положба и овластување против Ратко Димитровски, поранешниот градоначалник на Кочани и го товари за штетен договор за субвенционирање на градскиот превоз.

Како што соопшти МВР, Димитровски од декември 2013 година до април 2014 година, без претходно донесена одлука од Советот на општина Кочани за субвенционирање на градскиот превоз наподрачјето на општина Кочани, склучил Договор за вршење на јавен градски превоз за пробен период со Авто Атом ДОО Кочани. Договорот предвидувал општината да субвенцира половина од износот на секој продаден билет на превозникот, и со тоа на Авто Атом му овозможил противправна корист, а буџетот на општина Кочани бил оштетен за три милиони денари (48.700 евра).


Од утре, секој викенд на Водно без автомобили


Скопје, 24 ноември, 2017 - 16:05 (META) 

Најавената забрана за движење возила на патот до Средно Водно ќе се воведе викендов, соопшти скопскиот градоначалник Петре Шилегов.

Според планот, забраната ќе биде од 9 до 16 часот, а ќе важи од клучката за Сопиште и од манастирот „Свети Пантелејмон“ до Средно Водно. Ќе биде на сила за време на викендите и на државните празници, а се однесува на сите возила освен на тие на ЈСП, полицијата, пожарникарите, брза помош и на штабовите за итни интервенции.

Истовремено со воведувањето на забраната, Град Скопје воведува две нови пробни автобуски линии со броевите 25а и 25б. Тие ќе сообраќаат од своето поаѓалиште без застанување, сè до Средно Водно. Едната автобуска линија ќе тргнува пред катната гаража на улицата Свети Кирил и Методиј, а втората ќе тргнува од паркиралиштето кај Цветниот пазар.

На почетокот, возењето ќе биде бесплатно, а Град Скопје ќе овозможи бесплатно паркирање на двете поаѓалишта на овие автобуски линии.

Покрај новите линии, граѓаните може да ја користат и редовната линија со број 25, со која возењето исто така ќе биде бесплатно во наредниот период.


Поради грипот, распустот на учениците продолжен до 23 јануари


Скопје, 12 јануари, 2017 - 18:11 (META) 

Распустот за учениците ќе биде продолжен до 23 јануари, односно наместо на 18, второто полугодие од оваа учебна година ќе почне на 23 јануари. Ова денеска го соопшти министерот за здравство, Никола Тодоров, како една од мерките за намалување на ширењето на грипот во земјава.

Покрај продолжувањето на распустот, како мерки се предвидени и секојдневна дезинфекција на автобусите во јавниот градски превоз во Скопје и во другите градови со организиран јавен превоз, како и темелна дезинфекција на училиштата пред почетокот на второто полугодие од учебната година.
­
– Прифативме мерка да се продолжи зимскиот распуст до 23 јануари, односно второто полугодие, наместо на 18 јануари, како што беше предвидено, да почне на 23 јануари. Оваа мерка е повеќе од потребна имајќи ја предвид тенденцијата на намалување на бројот на заболени од грип кај децата до 14 години во време на распустот – рече министерот за здравство на денешната прес-конференција, заедно со членови на Комисијата за заразни болести.

Инаку, според извештајот на Институтот за јавно здравје, за состојбата со грипот за периодот од 1 до 8 јануари, објавен денеска, во текот на оваа недела регистрирани се два смртни случаи поврзани со грип. Станува збор за деца на возраст од три и од четири години од Кичево и од Гостивар, кои биле хоспитализирани на Клиниката за детски болести во Скопје, на одделот за интензивна нега.