Бочварски најави стадион во Штип според стандардите на ФИФА


Штип, 6 ноември, 2018 - 16:44 (META) 

Градоначалникот на Општина Штип, Благој Бочварски понуди нов проект за граѓаните, на отчетот за неговата едногодишна работа. Станува збор за проектот за стадион со хотелски комплекс и две трибини со капацитет за 5.900 гледачи според стандардите на ФИФА, каде би можела да игра и репрезентацијата.

Стадионот не беше во позначајните проекти од неговата програма, но синоќа, на отчетот, градоначалникот рече дека стадионот каде игра фудбалскиот клуб „Брегалница“ е во многу лоша состојба, а Штип заслужува да има стадион со кој ќе се гордее.

– Се работи на проектот, кој е 800.000 денари, инаку, знаете, претходниот градоначалник направи проект, кој не можеше да помине никаде, ни во општината. Не можело да се издаде дозвола на тој проект – рече Бочварски.

Пред присутните беше понудена анимација за тоа како ќе изгледа новиот стадион, во кој општината и ФФМ во 2016 година, веќе вложија половина милион евра. Сепак, градоначалникот не појасни од каде пари за новата реконструкција.

На отчетот на Бочварски, од опозициската ВМРО-ДПМНЕ одговори дека „она што го сработил градоначалникот не е поврзано со неговата изборна програма, туку е дел од неговата секојдневна работа, нешто што секој градоначалник треба да го извршува“.

Неодамна, координаторот на ВМРО-ДПМНЕ, Иван Јорданов, го повика Бочварски на дуел на медиум, кој градоначалникот би го избрал, каде би зборувале за тоа што се смени во градот една година откако ги презеде СДСМ. На ова Бочварски одговори дека неговиот отчет ќе биде одговор на сите дилеми на Јорданов.


Екс-градоначалникот на Демир Капија подарил половина објект и Фондација на роднини


Демир Капија, 25 октомври, 2018 - 14:18 (META) 

Управата за финансиска полиција соопшти дека до Основното јавно обвинителство за гонење на организиран криминал и корупција поднела кривична пријава за злоупотреба на службената положба и овластување против поранешниот градоначалник на општина Демир Капија, Трајче Димитриев (61), во врска со малверзации со општински објект, како и против Т.П. (48), овластен проценител и П.М. (60) тогашен претседател на Совет на општина Демир Капија. Пријава како поттикнувач добила и М.Ј. (65), која станала сопственик на објектот.

Според пријавата, во март 2012 година, Делегацијата на Европската Унија во Скопје и Трајче Димитриев, како градоначалник на општина Демир Капија, потпишале договор за грант за проект „Центар за едукација и вмрежување во туризмот Ценет“,  во вредност од 262.366 евра. За овој центар се реконструирала стара училишна зграда, која половина била сопственост на општината, а половина на четвртопријавената М.Ј., а за тоа биле употребени 101.230 евра од грантот, додека останатите потребни пари, 82.000 евра, биле од буџетот на општината.

Потоа општинската половина од објектот со 800 квадратни метри површина, како и општинската половина од катастарската парцела, Димитриев на 12 јуни 2013 година ги продал на својата братучетка за 1,67 милиони денари (27.100 евра).

Тој износ е десет пати помал од реалната пазарна цена, велат од Финансиска полиција, дополнувајќи дека тој износ Димитриев прво од својата трансакциска сметка го префрлил на братучетката, а потоа и префрлил уште 4,49 милиони денари (73.000 евра) за да го доврши реконструирањето.

Реконструираниот објект бил наменет за сместување на фондацијата „Центар за едукација и вмрежување во туризмот – Ценет“, основана од страна на Општина Демир Капија, но Димитриев во април минатата година и таа Фондација без надомест ја отстапил на близок роднина.

Финансиска полиција ги товари сите обвинети за нанесена штета на  Буџетот на Општина Демир Капија во износ од 15.456.106 денари (251.000 евра).


Кривична пријава за градоначалникот на Зрновци, Блаже Станков


Кочани, 14 септември, 2018 - 13:20 (META) 

Градоначалникот на Зрновци, Блаже Станков, доби кривична пријава поради незаконско зголемување на цената на водата во 2015 година, во текот на претходниот мандат. Интересно е што МВР во истиот случај го товари и актуелниот директор на општинското комунално претпријатие поради тоа што цените ги вратил по старо.

Станков е второпријавен, а полицијата го товари за несовесно работење, поради тоа што не проверил дали е законско зголемувањето на цената на водата во март 2015 година, кое се применувало до 1 јуни годинава.

За незаконското зголемување на цената на водата од 20 на 25 денари за кубен метар и за зголемувањето на надоместокот за канализација од 4 на 6 денари по квадратен метар, Полициската станица во Кочани го товари В.Ѓ. (59) тогашен директор на ЈКП „Водна Кула“ – Зрновци. Тој тоа го направил без одлука на Управен одбор на претпријатието и без одлука на Советот на општината.

Третопријавен е Г.К. (39), актуелен директор на ова јавно комунално претпријатие. Него полицијата го товари затоа што во јуни годинава ги вратил цените на претходниот износ, без да ги провери законските прописи.


ВМРО-ДПМНЕ: Стојановски треба да се товари за сериозно кривично дело


Скопје, 10 септември, 2018 - 15:07 (META) 

Шерифлукот на СДСМ е многу посериозен од обична расправија, како што тврди МВР кое што се обидува да го релативизира случајот со градоначалникот на Општина Демир Хисар, Марјанче Стојановски, изјави на прес-конференција портпаролот на ВМРО-ДПМНЕ, Димче Арсовски.

Арсовски прашува „како стасале материјалите од нелегалното прислушкување до лик како што е Марјанче Стојановски од Демир Хисар?“

– Дали за овие материјали за кои градоначалникот на Демир Хисар зборува знаaт органите на прогонот? На крајот на краиштата, дали некојси Марјанче Стојановски е дел од една партиска структура на СДСМ која вршела прислушкување на граѓаните и истите материјали ги злоупотребувала во изборни цели, уцени на граѓаните и притисоци на администрацијата во пресрет на политичките случувања како што е претстојниот референдум, а можеби тоа било дел од стратегијата да стане градоначалник? – изјави Арсовски на прес-конференција.

Тој додаде дека се очекува „овој скандал да биде разјаснет во целост, а не да заврши со информативен разговор во полиција, онаму каде што работел Стојановски и од каде имал пристап да ги прислушкува сите граѓани, а сега веќе и да им се заканува.“

– Обвинителството треба да излезе со сериозно кривично дело, а не со минорни обвинувања. Оставката на градоначалникот Стојановски е нешто што јавноста најмалку го очекува во моментов – додаде Арсовски.


Градоначалникот на Демир Хисар пуштен од притвор, но истрагата за заканите продолжува


Демир Хисар, 10 септември, 2018 - 9:47 (META) 

Градоначалникот на Демир Хисар, Марјанче Стојановски беше приведен во полициска станица на информативен разговор, бидејќи им се заканувал на вработените во училиштата дека ги прислушува нивните телефонски разговори.

Тој изјавил дека снимката која се појавила на интернет е од протест во ОУ „Гоце Делчев“ во Демир Хисар кој се случил во средината на месец јануари 2018 година. Протестот се одржал поради промена на две учителки во други подрачни училишта.

„По насока на Јавно обвинителство во Битола, Стојановски по разговорот е пуштен од полициската станица, а во врска со овој случај ќе се повикуваат повеќе лица на службен разговор со цел негово целосно расчистување“, додаваат од МВР.


Кривични пријави за Јакимовски и четиримина поранешни соработници


Скопје, 8 август, 2018 - 15:02 (META) 

Кривична пријава за злоупотреба на службената положба и овластување доби лидерот на ГРОМ, Стевчо Јакимовски, поради три спроведени јавни набавки во текот на мандатот како градоначалник на Општина Карпош, поднесе денеска Управата за финансиска полиција, откако вчера се вршеа претреси во неговите куќи. Покрај пријавата за него, до Основното јавно обвинителство за гонење на организиран криминал и корупција се поднесени кривични пријави и против уште четири лица, раководители на сектори или одделенија во Општина Карпош.

Вкупните штети на општинскиот буџет за кои се товарат петмината е 36,6 милиони денари (595.685 евра).

Финансиска полиција го товари Јакимовски дека како градоначалник во 2012 и 2013 година спровел две постапки за јавни набавки со фирмата „Алконпроект“ од Тетово, иако фирмата не доставила банкарски гаранции за навремено и квалитетно извршување на договорот. Во прашање е изградба на новиот општински објект. Тој не го раскинал договорот и не ја активирал банкарската гаранција на понуда, туку му дозволил на изведувачот да почне да работи, а потоа поради неквалитетно и ненавремено извршување на работите, ги раскинал договорите, со што на изведувачот „Алконпроект“ од Тетово му овозможил да стекне противправна корист од 911.166 денари, на штета на буџетот на Општина Карпош, велат од Управата за финансиска полиција.

Исто така, Јакимовски дозволил фирмата да почне со градежни активности иако не било издадено одобрение за градење, без решение за локациски услови и архитектонско-урбанистички или идеен проект, како и без изработен изведбен проект. Како што велат од УФП, Јакимовски усно давал инструкции за реализација на некои позиции надвор од техничката спецификација за објектот кој треба да биде општинско седишто, а со тоа на буџетот на Општина Карпош му нанел штета од 32,8 милиони денари.

Втората работа за која го товари Финансиска полиција е за изградба на плоштад во Жданец, односно спровел постапка за јавна набавка иако фирмата „ДГПТУ СМ Компани ДОО“, Свети Николе, не доставила банкарска гаранција за квалитетно и навремено извршување на работите, сепак Јакимовски го потпишал договорот на 12 април 2016 година. Со тоа Јакимовски овозможил на оваа фирма да ја заврши работата, но со тоа остварила противправна корист од 2,8 милиони денари буџетот на Општина Карпош.

Пријави добија и М.Д., раководител на секторот за јавни набавки во Општина Карпош, оти во двете погоре наведени јавни набавки за изградбата на објектот на местото на старата општина и за скверот во Жданец не предложил наплата на банкарската гаранција за понуда, туку ги пуштил во понатамошна постапка.

Н.Н., претседател на Комисијата за јавна набавка на Општина Карпош, како и С.М., член на таа комисија, и А.С., заменик-член на комисијата се товарат за случајот со плоштадот во Жданец, односно ја прифатиле понудата на фирмата од Свети Николе, иако таа не доставила сертификат за вградените материјали, а со тоа овозможиле фирмата да стекне корист на штета на Општина Карпош во износ од 2,8 милиони денари.


Стевчо Јакимовски приведен, чека распит пред судија


Скопје, 8 август, 2018 - 9:31 (META) 

Поранешниот градоначалник на Општина Карпош, Стевчо Јакимовски, синоќа половина час пред полноќ, е приведен и се наоѓа во една од полициските станици во Скопје. До крајот на денот се очекува да биде изведен пред судија на претходна постапка.

Според Виктор Цветковски, адвокат на поранешниот градоначалник, ова е атак врз политичкиот ангажман на Стевчо Јакимовски.

Финансиската полиција вчера влезе во неколку станбени објекти на семејството Јакимовски, барајќи документи за одредени случаи. Засега од таму нема официјални информации.


Ѓорчев до Заев: Зошто вашиот личен адвокат го спасуваше градоначалникот на Ново Село?


Скопје, 26 јули, 2018 - 12:28 (META) 

Пратеникот од ВМРО-ДПМНЕ, Влатко Ѓорчев на седницата за пратенички прашања го праша премиерот Зоран Заев зошто неговиот личен адвокат го спасувал градоначалникот на Ново Село кој беше обвинет за шверцување цигари.

-Сите декларации и ветувања паѓаат во вода кога вчера вашиот личен адвокат ќе отиде да го вади градоначалникот од Ново Село. Брука е тоа што се случи. Ќе го исклучите ли од СДСМ – праша Ѓорчев.

На ова премиерот Заев одговори дека адвокатот Ване Андреев кој му бил адвокатите во некои судски процеси е приватен адвокат и тој може кој сака да го ангажира бидејќи не е на функција. Тој додаде дека градоначалникот на Ново Село е негов личен пријател, но секој кој што згрешил треба да одговара.

На прашањето зошто било дозволено пари од Фондот за иновации да завршат кај функционери, Заев рече дека правно тоа е дозволено но не е етички.

-Го поздравувам етичкиот момент кога фирмите во кои што имаат дел политичари се повлекуваат. Легално тоа е возможно но етички не е па затоа носителите на јавни функции ги преземаа соодветните дејствија. Фондот располага со огромни пари преку Буџетот, најголем дел од тие пари се наменети за домашни фирми за отворање на нови работни места. Јас не можам да правам увид во моите фирми и фирмите на Заеви затоа што немам време. Сакам да ги следиме етичките кодекси и да бидеме транспарентни, повторувам се е според законот, но ете ги исполнуваме и етичките дилеми – рече Заев.

Ѓорчев праша зошто било прикривано убиството на Никола Саздовски, на што Заев му одговори дека никој после Мартин Нешкоски не може да прикрива убиство во државата.

-Влијае нашата дебата, влијае и ние како се однесуваме и дали само сакаме да добиеме политички поени или навистина ни е грижа. Будното око на јавноста е најголем коректив. Мора да бидеме внимателни, се преземаат дејствија законот да мора да важи за сите – додаде Заев.

Во последното прашање, пратеникот на ВМРО-ДПМНЕ му порача на министерот за култура, Асаф Адеми да не го чепка музејот на ВМРО зошто тој е нешто свето, а во спротивно ќе одговара за тоа.


Поднесено обвинението против градоначалникот на Ново Село и соучесниците


Струмица, 18 јули, 2018 - 14:16 (META) 

Основното јавно обвинителство Струмица денеска до судот доставило Обвинителен предлог против градоначалникот на општина Ново Село, Боро Стојчев, неговата сопруга, синот и двајца соучесници и ги гони за криумчарење.

Притоа, за четиримина од обвинетите е поднесен предлог за продолжување на притворот.

Обвинетите се товарат дека на 10 јули 2018 година, избегнувајќи ја царинската контрола, пренесувале цигари во голема вредност.

Првин двајца од обвинетите во селото Ново Коњарево во две теренски возила натовариле 66 картонски кутии во кои имало 32.980 кутии цигари од марката „Калипсо“. Како што соопшти полицијата на 11 јули, тоа биле градоначалникот и неговиот син. Потоа тие  заедно со уште двајца обвинети со возилата се упатиле по полскиот пат кон селото Бадилен, продолжиле кон граничниот појас помеѓу Македонија и Бугарија каде петтиот обвинет кој ги чекал, имал задача да го надгледува теренот за да извести за евентуално присуство на полицијата.

При пристигнување во местото Попина Чука, на два километри од границата, биле откриени и фатени од полициски службеници.​


ВМРО-ДПМНЕ: Боро Стојчев не е единствениот од власта вмешан во криминал


Скопје, 12 јули, 2018 - 10:53 (META) 

Градоначалникот на Ново Село, Боро Стојчев, не е единствениот функционер на власта за кој што постојат сериозни индиции за криминал. Наместо обиди за дефокусирање од големите криминали, јавноста очекува истраги за сомнителните милионски тендери на Заеви, Анѓушев и Спасовски. Заради нив Македонија е на дното на листите за корупција и срам за цела Европа, порача ВМРО-ДПМНЕ денеска.

„Доколку властите не поткренат истраги за милионските тендери во РЕК Битола и вмешаноста на камионите на Заеви, милионските тендери на Анѓушев, како и милионскиот тендер за набавка на возила за МВР распишан од Спасовски, ќе се потврдат сомнежите дека ова е само дефокус од милионскиот криминал. Овој случај само ја покажува криминогеноста на власта, дури и на нејзините најмали пипци“, велат од ВМРО-ДПМНЕ, велејќи дека Зоран Заев и оваа власт не работат за Македонија, туку „на штета на државата и нејзините интереси и само за профитот на своите фирми“.