!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Царовска: Во буџетот предвидени се повеќе пари за градинките и минималната плата


Скопје, 12 декември, 2017 - 14:30 (META) 

Предлог-буџетот на Министерство за труд и социјална политика e околу 700 милиони евра и е со највисок износ од сите владини ресори, а најголемиот дел од средствата одат директно кај граѓаните, рече денеска на прес-конференција, министерката за труд и социјална политика, Мила Царовска.

На презентацијата на предлог-буџетот, таа додаде дека повеќе пари се наменети за детски градинки и минимална плата, а укинати се нерационалните трошоци. МТСП ќе се фокусира на подобрување на опфатот на деца во детските градинки и подобрување на просторните и кадровски капацитети.

– Буџетот е дизајниран за поддршка на социјално загрозените категории, за инклузија и за помош на ранливите групи на граѓани. Имено, над 120 илјади граѓани се корисници на социјални надоместоци во износ од 8 милијарди денари. Тоа се средства наменети за правата од социјална заштита, детска заштита, цивилни инвалиди, борци и воени инвалиди итн – рече Царовска.

МТСП за активните мерки за вработување, предвидува околу 16 милиони евра, а за финансиска поддршка на фирмите, за исплата на минимална плата, планирани се 7.500.000 евра.

Министерката Царовска нагласи дека, во буџетот за идната година се намалени нерационалните трошоци за репрезентација во министерството и намалени се или укинати надоместоците за учество во комисии и работни групи, кои во изминатите години биле неоправдано високи.


Царовска: Зголемувањето на платата во градинките ќе биде до 2.040 денари


Скопје, 12 октомври, 2017 - 11:59 (META) 

Eфектот од зголемувањето на минималната плата и зголемувањето од 2 процента кај вработените во градинките ќе биде до 2.040 денари во зависност од нивното работно место, рече денеска министерката за труд и социјална политика, Мила Царовска.

– Основната бруто-плата пред зголемувањето од 2 процента за септември за одредено работно место би изнесувало 15.090 денари, со зголемувањето од 2 отсто на бруто-платата добиваме сума од 15.392 денари, а со зголемувањето на минималната плата за истата бруто-плата добиваме 17.130 денари. Тоа значи дека зависно од одредено работно, место ефектот од зголемувањето од 2 процента и зголемувањето на минималната плата за вработените во градикните ќе изнесува до 2.040 денари – рече на денешната прес-конференција министерката за труд и социјална политика, Мила Царовска.

Овие средства на вработените во градинките им се исплатени со септемвриската плата, која се исплаќа во октомври.

Царовска додаде дека минималната плата во иднина ќе мора да се исплаќа бидејќи тоа е регулирано преку Управата за јавни приходи, каде нема да можат да поминат плати пониски од законски предвидената минимална плата од 12.000 денари.


И во Карпош ќе има референдум за населувањето мигранти


Скопје, 5 септември, 2017 - 17:41 (META) 

Советот на Општина Карпош денеска на 73. седница едногласно ја прифати предлог-одлуката за распишување на референдум на локално ниво, на кој жителите на општината ќе се изјаснат во врска со населувањето мигранти на територија на Општина Карпош.

Во согласност со одлуката, локалниот референдум ќе го спроведе Општинската изборна комисија на Карпош и општинските избирачки одбори.

Советниците, исто така, утврдиле дека не постојат услови за спроведување на одлуката на Министерството за труд и социјална политика, според која се воведува двосменско работење во градинките. Со одлука на Советот, градинките во Карпош ќе продолжат да работат според старото работно време, односно до 18 часот.

Градоначалникот на Карпош, Стевчо Јакимовски, оцени дека идејата е добра, но дека потребно е да се направат суштински измени за таа да профункционира, односно да се вработи дополнителен стручен и технички кадар, а Општината да обезбеди поголеми финансиски средства за да ги покрие дополнителните трошоци.


Почнува двосменското работење во институциите и во градинките


Скопје, 1 септември, 2017 - 10:27 (META) 

Од денеска повеќе државни институции почнуваат со двосменско работење, во согласност со одлуката што ја донесе Владата. Управата за јавни приходи, Царинската управа, градинките, Управата за водење матични книги, службите за издавање лични карти и пасоши во МВР и одделенијата за одбрана во градовите и во општините во рамките на Министерството за одбрана се првите кои почнуваат со работа во две смени.

Работното време во овие институции ќе биде од 7 до 14.30 часот и од 14 до 21.30 часот, а ќе се работи и првата сабота во месецот, но само во една смена, од 8 до 16 часот.

Втора смена се воведува и во градинките, кои ќе загрижуваат деца до 21.30 часот.

Од денеска почнува и примената на одлуката за флексибилно работно време во Владата, министерствата и во органите на државната управа.

Како што соопшти Министерството за информатичко општество и администрација, секој вработен во Владата и во министертствата може да пристигне на работа помеѓу 7.30 и 8.30 часот и да замине од работа во периодот меѓу 15.30 и 16.30 часот.

За спроведување на мерката, секоја институција треба да обезбеди систем за евиденција на работното време, за контрола при влез и излез на вработените.

Од денеска на сила стапуваат и промените во Агенцијата за катастар на недвижности, каде покрај намалување на цените на услугите за 50 отсто, се укинува и плаќањето за повторно поднесување пријава во Агенцијата.

Од понеделник со ново работно време почнуваат и судовите и обвинителствата, кое ќе трае од 7.30 до 15.30 часот, наместо како досега – од 8.30 до 16.30 часот.


УЈП, МВР и Царина се меѓу првите институции што ќе воведат двосменско работење


Скопје, 31 август, 2017 - 10:23 (META) 

Управата за јавни приходи, Царинската управа, Управата за водење матични книги, Министерство за внатрешни работи, подрачните единици во Секторот за управно-надзорни работи, Министерството за одбрана први ќе почнат да работат во две смени, информираат од Министерството за информатичко општество и администрација.

Работното време на овие институции ќе биде од 7 до 14.30 часот и од 14 до 21. 30 часот, а ќе се работи и првата сабота од месецот, но само во една смена од 8 до 16 часот.

Што се однесува до флексибилното време кое ќе се воведе, работниот ден ќе трае 8 часа, со што почетокот на работното време ќе биде помеѓу 7.30 и 8.30 часот, а завршувањето помеѓу 15.30 и 16.30 часот.

Од утре, втора смена се воведува и во градинките, кои ќе згрижуваат деца до 21.30 часот. Работна ќе биде и секоја прва сабота од 8 до 16 часот.


Од 1 септември градинките ќе работат во две смени и секоја прва сабота во месецот


Скопје, 18 август, 2017 - 11:06 (META) 

Од 1 септември градинките треба да почнат со двосменското работење, согласно владината одлука, донесена на 10 јули оваа година, соопшти денеска на прес-конференција министерката за труд и социјална политика, Мила Царовска.

Според одлуката, првата смена ќе биде од 7 до 14.30 часот, а втората од 14 до 21.30 часот, а ќе се работи и секоја прва сабота во месецот од 8 до 16 часот.

– Целта на двосменското работење е децата и родителите да ја добијат потребната грижа од јавите установи – рече Царовска на прес-конференцијата.

Таа најави нови инвестиции во градинките и руралните средини и истакна дека Министерството е подготвено за отворање нови работни места, што како потреба ќе ги наложи двосменското работење.


Ѓорчев: Владата да објасни зошто ја менува стратегијата за мигранти


Скопје, 22 јули, 2017 - 15:58 (META) 

Владата и Министерството за труд и социјална политика треба да одговорат зошто ја менуваат стратегијата на Македонија во поглед на мигрантите, бегалците и на странците, со која Македонија од транзитна земја станува земја за траен престој на голем број луѓе што ќе дојдат во Македонија, изјави на прес-конференција Владимир Ѓорчев, по повод објавувањето на новата нацрт-стратегија за интеграција на бегалци и на странци во Македонија за периодот 2017-2027 година.

Тој додаде дека со измените што ги предвидува стратегијата, ќе биде олеснето доделувањето државјанство на овие лица, ќе се овозможи нивно сместување и ќе се изградат цели населби, а понатаму ќе се олесни и нивниот пристап до градинки и до училишта, како и до вработување, на сметка на граѓаните на Република Македонија.

– Стратегијата што ни ја предлага новата Влада и Министерството за труд и социјална политика, целосно ги маргинализира граѓаните на Македонија, а им дава приоритет на мигрантите и на другите категории лица. Владата да одговори на кои места ќе бидат изградени колективните центри – изјави Ѓорчев.


Потребно е економско зајакнување на жените, порача Заев


Скопје, 14 јуни, 2017 - 13:05 (META) 

„Владата ќе работи на подигнување на свеста дека и жените и мажите се еднакво одговорни за домашните активности и за грижата за децата. Поделбата на оваа таканаречена неплатена работа е првиот чекор кон воспоставувањето родова еднаквост“, истакна премиерот Зоран Заев на обраќањето на конференцијата посветена на родовата еднаквост, организирана од Програмата за развој на ОН (УНДП), телото на Обединетите нации за родова еднаквост и за зајакнување на жените (UN Women) и од Меѓународната организација за труд (МОТ).

Тој истакна дека целта на Владата е да овозможи градинките да работат во две смени.

„Ја разгледуваме можноста да го зголемиме бројот на вработени во јавните детски градинки. Со тоа ќе им олесниме на родителите што работ и по 18 часот, да бидат спокојни на работното место. Во програмата предвидовме еднородителските семејства кои имаат плата пониска од просечната, да не плаќаат надоместок за градинка или за основно училиште“, истакна Заев.

Помеѓу мерките беше спомнато и флексибилно работно време за таткото во првите три месеци по раѓањето на децата.

Тој додаде дека потребно е да се намали товарот на неплатената работа на жените и да се унапреди нивната економска моќ.


СДСМ: Миноски да каже за што ги задолжувал граѓаните 40 милиони евра месечно


Скопје, 3 февруари, 2017 - 11:53 (META) 

Министерот за финансии во заминување, Кирил Миноски, ќе мора да одговори за што ги задолжил граѓаните 484 милиони евра само во 2016 година. Тоа значи дека секој месец лани, оваа власт во заминување ги задолжувала граѓаните и државата со нови 40 милиони евра, се вели во соопштението на СДСМ.

Од партијата додаваат дека со 40 милиони евра, за само еден месец ќе можеа да се изградат 133 градинки во Македонија.

– Ако власта во заминување на ВМРО-ДПМНЕ штедела за граѓаните, како што Груевски знаел да штедел на личните штедни книшки, за шест месеци и износот од 240 милиони евра ќе се изградеа најмалку три нови клинички центри во Македонија. Со целото задолжување од 484 милиони евра ќе беа изградени Чебрен и Галиште, со што Македонија немаше да биде зависна од најскапиот увоз на струја оваа зима, а граѓаните немаше да плаќаат високи сметки за струја – се додава во соопштението.


Рано е да се каже дали грипот и студот ќе го продолжат зимскиот распуст


Скопје, 4 јануари, 2017 - 15:26 (META) 

Сè уште е рано е да се размислува за тоа дали зимскиот распуст за учениците, кој трае до 18 јануари, ќе биде продолжен поради состојбата со грипот, велат неофицијално од Министерството за образование и наука (МОН).

Официјален одговор на прашањето на „Мета“ дали поради грипот се размислува распустот за учениците да биде продолжен, сè уште не сме добиле.

Оваа мерка за спречување на ширењето на грипот ја презедоа некои соседни држави.

Министерството за здравство на Албанија вчера предупреди дека се „создаваат поволни услови за понатамошно ширење на вирусниот грип“ и наложи цела недела да бидат затворени градинките, основните и средните училишта, иако требаше да почнат да работат денеска.

Комисијата за заразни болести при Институтот за јавно здравје на Македонија на седницата одржана на 27 декември, препорача да се изврши темелна дезинфекција на сите детски градинки и училишта, како и континуирано да се одржува зголемено ниво на хигиена и почесто да се проветруваат просториите.

Според податоците на Институтот за јавно здравје, во последната недела на декември биле заболени 4.195 лица од грип, а минатата година во истото време овој број изнесувал 109 лица, што значи бројот на заболени е 40 пати поголем.