Општина Аеродром: Ако се докаже дека воспитувачка тепала дете, ќе се спроведат санкции


Скопје, 7 февруари, 2018 - 17:06 (META) 

Општина Аеродром со соопштение порача дека доколку се докаже дека има вина кај воспитувачката осомничена дека во понеделникот неколкупати удрила 6-годишно дете по образ, против неа ќе се спроведат санкции.

Од општината велат дека се во комуникација со директорот на градинката, кој пак чека известување од полицијата за случајот.

Како што претходно соопшти МВР, 36-годишна жена, кога завчера попладнето дошла да го земе синот од градинка, забележала дека има оток на десниот образ и го прашала од што му е, на што детето рекло дека неговата воспитувачка неколку пати го удрила по образот. Мајката потоа го информирала директорот на градинката кој и кажал да пријави в полиција. Жената од градинката го однела детето на лекарски преглед, со кој е утврдено дека детето има оток, а вчера попладне го пријавила случајот в полиција.


Општина Центар: Обезбедени 12 прочистувачи на воздух за градинката „Кочо Рацин“


Скопје, 20 декември, 2017 - 18:10 (META) 

Општина Центар, на денешната вонредна седница, донесе одлука за прифаќање на донацијата на прочистувачи на воздух за градинката „Кочо Рацин“, шест за објектот „Бели Мугри“ и шест за објектот „Наум Наумовски – Борче“, информираат од таму.

– Оваа донација од Ротари клубот Скопје „Камен Мост“ е повеќе од добредојдена, бидејќи со ова значително ќе се подобри квалитетот на воздухот и ќе се намали ризикот од заболување на дишните патишта на децата – рече градоначалникот на Општина Центар, Саша Богдановиќ.

Советниците исто така едногласно донеле одлука за прифаќање на неповратна финансиска помош од Министерскиот совет на Бугaрија во износ 135.000 евра за подобрување на енергетската ефикасност на ООУ „Димитар Миладинов“ Скопје.

„Поради лошата состојба во која се наоѓа училиштето и фасадата која се одронува и е опасност за децата, градоначалникот Богдановиќ се обрати со барање до Министерскиот совет на Република Бугарија за доделување на неповртана помош. Договорот го потпишаа градоначалникот и амбасадорот на Бугарија во Македонија, Иван Петков“, се вели во соопштението на Општина Центар.


Две градинки во Карпош ќе добијат три јонизатори на воздухот


Скопје, 30 ноември, 2017 - 15:44 (META) 

Советниците од Општина Карпош на денешната седница на Советот, го поддржаа предлогот на градоначалникот Стефан Богоев, локалната самоуправа да им отстапи три јонизатори на воздухот на две градинки.

Клонот на градинката „Орце Николов“ во Карпош 2 ќе добие еден, а клонот на градинката „Мајски цвет“ во Тафталиџе 2 ќе добие два јонизатори за воздух.

Советниците на седницата го поддржаа и предлогот Општината да обезбеди финансиска и материјална помош за три семејства од населбата Злокуќани, чии домови вчера беа зафатени од пожар.

На две семејства Општината ќе им обезбеди парична помош, а за третото ќе обезбеди градежни материјали, бидејќи опожарен им бил само покривот на куќата.

На седницата бил констатиран престанок на советничкиот мандат на Душко Весковски, кој стана директор на ЈП „Водовод и канализација“, а Елена Антониевиќ е именувана за нова советничка.


Курц смета дека треба да се затворат градинките за деца муслимани во Виена


Виена, 22 јуни, 2017 - 12:08 (META) 

Министерот за надворешни работи и шеф на Народна партија на Австрија (ОВП), Себастијан Курц, смета дека треба да се затворат градинките за деца муслимани во Виена кои ги посетуваат 10.000 деца, пишуваат австриските медиуми.

Тој додал дека таквите градинки, јазично и културно се целосно одвоени од мнозинството во општеството.

Според него, клучот е во успешна интеграција и во знаење германски јазик. Тој се залага за воведување задолжителна посета на градинки во Австрија, за да се спречи децата кога ќе почнат на училиште да не знаат германски јазик.


Експлозија во градинка во Кина – седум загинати и 59 повредени


Пекинг, 15 јуни, 2017 - 15:01 (META) 

Седум лица загинаа во експлозија во градинка во Фенгксиан во источната кинеска провинција Џиангсу, јавуваат кинеските медиуми.

Полицијата сè уште нема официјално потврдено колку лице загинаа, но кинеските медиуми јавуваат дека освен седумте загинати, во експлозијата има и 59 повредени лица.

Кинеската држвна телевизија „Си-си-ти-ви“ јави дека две лица загинале при самата експлозија, додека другите починале во болница.

Агенцијата „Ксинхуа“ јави дека експлозијата се случила во време кога родителите доаѓаат да си ги земат децата од градинка. Засега не се знае што ја предизвикало експлозијата.


Овчи сипаници ги испразнија училиштата и градинките, регистрирани 3.025 случаи


Скопје, 4 мај, 2017 - 16:28 (META) 

Во училиштата и во градинките е забележан зголемен број на деца со овчи сипаници, па така во некои одделенија речиси половина од учениците отсуствуваат од настава поради појавата на овој вирус.

Информацијата дека во овој период е регистрирано релативно зголемување на бројот на лица заболени со овчи сипаници, за „Мета“ ја потврдија и од Институтот за јавно здравје.

„Во 2017 година регистрирани се 3.025 случаи на мали сипаници или за 15 проценти повеќе споредено со истиот период од 2016 година. Зголемувањето на бројот на случаи е очекувано, бидејќи овчите сипаници се појавуваат сезонски, односно највисок број на случаи се јавува во периодот од април до јуни“, вели лекарот Владимир Микиќ од Институтот за јавно здравје.

Тој информираше дека ова заболување трае кратко, се карактеризира со осип по кожата, проследен со треска и со слабост и дека вирусот е многу заразен. Периодот на инкубација е помеѓу две и три недели.

Болеста може да биде сериозна кај повозрасните и кај лицата со намален имунитет.


Илијовски: Градинката што ја изгради Жерновски покажува знаци на неквалитет


Скопје, 21 февруари, 2017 - 14:36 (META) 

И кога првпат во својот мандат се осмели да изгради градинка, Андреј Жерновски ја изгради фушерски, изјави на денеска на прес-конференција Илија Илијовски од ВМРО-ДПМНЕ.

Илијовски вели дека градинката која чини 2 милиони евра уште веднаш почнала да покажува знаци на неквалитет.

– Плочникот во дворот веќе е целосно руиниран и уништен. Автомобили поминуваат и се паркираат врз него секој ден. Се полни со вода и при најмал дожд. Мрзливиот и алчен Жерновски, народните пари ги расфрла без мера. Неквалитетни боемски улици од 1,2 милиони евра, скапи тамбураши, скапи диџеи кои не настапуваат, неквалитетна реализација во градинка, огромна сума на пари за училиште кое не е изградено – вели Илијовски.

Според него, тоа е начинот на работа на, како што рече, мрзливиот и алчен Андреј Жерновски и додаде дека Општина Центар има најмалку капитални проекти од сите општини.


Депонија во центарот на Охрид, помеѓу училиште и детска градинка


Охрид, 21 февруари, 2017 - 11:49 (META) 

Освен што не направи ништо за образованието во Охрид, локалната самоуправа го става на ризик и здравјето на учениците, обвинија од СДСМ.

Од охридскиот разгранок на партијата побараа градоначалникот Никола Бакрачески и раководството на основното училиште „Григор Прличев“ итно да ја исчистат депонијата што се создава среде најголемото основно училиште и веднаш до централната детска градинка, во центарот на Охрид.

– Покрај депонијата, од која се шири смрдеа и претставува опасност од зарази, секојдневно поминуваат деца кои ризикуваат да добијат некаква болест или инфекција – предупредија од општинскиот разгранок на СДСМ во Охрид и приложија фотографии како доказ.


Паниката ги проретчи училиштата, МОН чека инструкции од кризниот комитет


Скопје, 13 септември, 2016 - 11:11 (META) 

Официјален став од Министерство за образование за затворање на училиштата нема, но и покрај тоа, голем дел од родителите самоиницијативно одлучуваат да не ги носат децата на училиште и во градинка.

Според информациите на „Мета“ од терен, во некои од одделенијата во училиштата во повеќе скопски општини на настава се присутни половина или една третина од децата.

Од Министерството за образование велат дека тие не можат да донесат одлука за затворање на училиштата, ниту да влијаат врз индивидуалната одлука на родителите, туку чекаат инструкции од Управувачкиот комитет за справување со кризи, како централно тело за справување со кризи.

Управувачкиот комитет за справување со кризи вчера попладне одржа нов состанок во врска со серијата земјотреси, а по негова препорака Институтот за земјотресно инженерство и сезмологија Скопје (ИЗИИС) ги посети училиштата и градинките во Скопско.

Во некои училишта, дел од просториите се забранети за користење.

Некои од општините веќе презеле одредени мерки, па така градоначалникот на општината Ѓорче Петров, Сокол Митровски, свикал состанок со директорите на деветолетките. Тие го известиле дека презеле соодветни мерки предвидени за вонредни ситуации.

– Во училиштата беа поставени знаци (насоки) за движење при евакуација на децата и на персоналот. Испратени се пишани известувања во секоја училница за однесување на децата и на наставниците за време на земјотрес и одржани се две показни вежби на кои учество зедоа сите ученици и наставници од училиштата. Освен во ООУ „Димитар Поп-Георгиев Беровски“, каде што има одредени оштетувања на вториот кат од училиштето изградено во 50-тите години од миниот век и каде што наскоро ќе се преземат мерки за санирање на штетите, во другите училишта нема никакви оштетувања што можат да го загрозат непреченото одржување на редовната настава. Истата ситуација е и со објектите на градинките – информираат од Општина Ѓорче Петров.


Жерновски: 100 деца од градинката „Кочо Рацин” на улица ако МТСП не ги продолжи договорите


Скопје, 23 јуни, 2016 - 13:24 (META) 

„Денеска упатив уште еден апел до Министерството за труд и социјална политика да ги продолжи договорите за 11 вработени за да не се случи близу 100 деца од новата градинка „Кочо Рацин“ да не можат да бидат згрижени“, напиша градоначалникот на Општина Центар, Андреј Жерновски, на својот профил на „Фејсбук“.

Тој додава дека на 11 вработени во новата градинка на 30 јуни им истекува договорот за вработување. Доколку не се продолжат договорите за нивно ангажирање, близу 100 деца ќе треба да останат на улица.

– Неколкупати пративме допис до Министерството, но немаме никаков одговор. Се надевам дека политиката нема да преовлада, туку разумот и грижата за децата – додава Жерновски во статусот.

Тој потсетува дека за згрижување на децата и за нормално функционирање на новата градинка „Кочо Рацин“, неопходно е да се продолжат договорите за ангажирање на шест негувателки, еден воспитувач, готвач, лекар и за двајца хигиеничари.