Зелениот катастар на дрвјата во Скопје преброја 65.844 дрвја и 28.395 грмушки


Скопје, 15 јануари, 2019 - 15:15 (META) 

Скопје доби зелен катастар чија цел е подобрување на управувањето со јавното зеленило како и зајакнување на урбаната отпорност преку собирање на податоци за тоа со какво зеленило градот располага. Станува збор за проект кој Град Скопје во соработка со УНДП и граѓанскиот сектор, кој го претстави денеска градоначалникот на Скопје, Петре Шилегов.

Според скопскиот градоначалник, зелениот катастар треба да обезбеди прецизни и квалитетни податоци со помош на кои ќе може во иднина да се спречи непотребното сечење и уништување на дрвјата во градот за потребите на градежните активности, но и да се работи на зачувување и одржување на постојното зеленило.

Според Шилегов, изминатите 10 години како последица на градежната експанзија, а во центарот на Скопје и како последица на проектот Скопје 2014 зеленилото во градот честопати било жртвувано за сметка на новите градежни објекти кои задоволуваа нечии лични, политички и бизнис интереси.

„Несоодветен беше и третманот, голем број дрвја се самоуништија, се исушија“, истакна Шилегов.

Извршените истражувања и мерења за потребите на изработката на Зелениот катастар на град Скопје покажале дека во градов во моментов има вкупно 65.844 дрвја и 28.395 грмушки, дека Скопје располага со 174 видови дрвја и 77 различни видови грмушки.

Мапираното зеленило во Скопје е претставено преку ГИС апликација која преку интернет ќе биде достапна и за користење на граѓаните. Во неа секое мапирано дрво има своја лична карта, број и локација, односно може да се следи неговата состојба.

Скенирањето на градското зеленило, меѓу другото, покажа и во каква состојба се наоѓа вегетацијата, па така е констатирано дека има околу седум проценти оштетени или загрозени дрва меѓу кои доминираат тополите, врбите и јоргованот, додека пак во најдобра состојба се наоѓаат костенот, тујата, смрчата и платаните.

Од Паркови и зеленило најавија подигање на 40 нови зелени површини во градот за оваа 2019 година,к ако и садење на 7.000 нови садници и реализација на новиот дел на Градски парк.


Град Скопје: Коловозите се целосно чисти, се дорасчистуваат тротоарите


Скопје, 11 јануари, 2019 - 11:32 (META) 

Коловозите на булеварите и магистралните улици кои се во надлежност на Град Скопје се целосно расчистени, а на терен интензивно се работи на чистење на тротоарите и велосипедските патеки од наталожениот снег за да им се овозможи полесно движење на граѓаните, информираат од Град Скопје.

„Во текот на изминатава вечер повторно се поминати сите булевари и улици што се во надлежност на Градот Скопје, а дополнително со сол се поминати и т.н. „критични точки“, пришто беа фрлени 432 тони сол. Снегот го чистеа 60 вработени рачно и со механизација – мултикултиватори, трактори со специјални четки и ножеви за снег, трактори со плуг и патарки за расфрлање на сол. Екипите на ЈП „Паркови и зеленило“ со два камиона, четири машини и останата потребна механизација вршеа расчистување на патеките од снег во зелените површини, тротоарите и  парковите  за олеснето движење на граѓаните“, се вели во соопштението.

Градот Скопје им препорачува на возачите да возат внимателно и да се придржуваат на условите на коловозите, истите да не паркираат на улиците и булеварите, и да овозможат непрекинато движење на возилата на зимската служба.

„Потсетуваме дека во надлежност на Град Скопје се булеварите и одредени градски улици, а преостанатите улици се во надлежност на општините и тие се задолжени за нивно чистење и одржување.Апелираме до граѓаните, куќните совети и сопствениците на деловните објекти да се придржуваат до законската обврска за чистење на снегот од приодите до нивните објекти.JП „Комунала хигиена“ апелира општините да ја реализираат нивната обврска за чистење на улиците кои се во надлежност на општините и апелира за поголема ажурност во оваа област, со цел непрекинато собирање на комуналниот смет“, се додава во соопштението.


Споредните улици и тротоарите останаа неисчистени од снегот


Скопје, 10 јануари, 2019 - 16:50 (META) 

Граѓаните негодуваат што на споредните улици во населбите низ општините не поминала никаква механизација, а и дека работници не го чистат снегот кој денеска цел ден паѓа во Скопје и во целата држава.

На главните сообраќајници во Скопје има остатоци од кашест снег, па движењето е отежнато, споредните улици воопшто не се исчистени, а многу снег има и на тротоарите. Но, освен локалните власти, граѓаните исто така се обврзани да ги исчистат влезовите пред куќите, зградите, пред дуќаните.

Во Извештајот за состојбата на патиштата до 13 часот на Центарот за управување со кризи се вели дека во Скопскиот регион не се проодни патните правци кон повисоките населени места на Скопска Црна Гора, односно селата Брест, Танушевци и Малино во општина Чучер Сандево, а тие села немаат и електрична енергија. Во општина Кисела Вода непрооден е патот од Теферич кон Сопиште.

Од друга страна пак, Град Скопје информираше дека денеска и вчера на сите улици во надлежност на градската управа биле фрлени 355 тони сол.

„Утрово сите булевари и улици кои се во надлежност на Градот Скопје се исчистени и истите се проодни“, тврдат од градот, појаснувајќи дека освен механизацијата за зимско чистење, се вршело и рачно чистење на тротоарите и улиците. За тоа се  ангажирани 80 работници од ЈП „Комунална хигиена“ и ЈП „Паркови и зеленило“. Паралелно со нив, екипи на ЈП „Водовод и канализација“ работат на терен на чистење на сливниците“, се вели во соопштението на Град Скопје.

Граѓани на социјалните мрежи се шегуваат, изразуваат незадоволство од сработеното ( на централно и на локално ниво ) и постираат слики и видеа од проблемите со снегот.


Град Скопје фрлил 355 тони сол на улиците


Скопје, 10 јануари, 2019 - 9:55 (META) 

Од Град Скопје известија дека денеска и вчера поради снегот на сите улици во надлежност на градската управа биле фрлени 355 тони сол.

„Утрово сите булевари и улици кои се во надлежност на Градот Скопје се исчистени и истите се проодни“, тврдат од градот, појаснувајќи дека освен механизацијата за зимско чистење, се вршело и рачно чистење на тротоарите и улиците. За тоа се  ангажирани 80 работници од ЈП „Комунална хигиена“ и ЈП „Паркови и зеленило“. Паралелно со нив, екипи на ЈП „Водовод и канализација“ работат на терен на чистење на сливниците.

Градот Скопје им препорачува на возачите да возат внимателно и да се придржуваат на условите на коловозите, истите да не паркираат на улиците и булеварите, и да овозможат непрекинато движење на возилата на зимската служба.

Истовремено, упатен е апел до граѓаните, куќните совети и сопствениците на деловните објекти да се придржуваат до законската обврска за чистење на снегот од приодите до нивните објекти.

JП „Комунална хигиена“ апелира општините да ја реализираат нивната обврска за чистење на улиците кои се во надлежност на општините, со цел непрекинато собирање на комуналниот смет.


Од 8.000 до 20.000 евра казни за четири загадувачи во Скопје по вонредните контроли


Скопје, 8 јануари, 2019 - 15:05 (META) 

Во месец декември инспекторите за животна средина на Град Скопје извршиле осум вонредни контроли во индустриски објекти кои се под ингеренции на градот при што биле утврдени пречекорувања на емисиите на штетни гасови кај четири од нив, стои во Информацијата што ја изготви градскиот Инспекторат за активностите на инспекциите поврзани со справувањето со аерозагадувањето.

Загадувачите, чии имиња Градскиот инспекторат не ги објавува додека не заврши целокупната управна постапка, ќе бидат санкционирани согласно Законот за заштита на животната средина и Законот за квалитет на амбиенталниот воздух каде казните се движат од 8.000 до 20.000 евра.

Вонредното мерење на загадувањето се врши во соработка на инспекторите со акредитираната лабораторија за животна средина.

Според првиот човек на Градскиот инспекторат, Мирослав Богдановски, кај сите четири случаи се работи за пречекорувања на емисии на јаглероден моноксид.

Богдановски, одговарајќи на прашањето на „Мета“, најави вакви вонредни, ненајавени контроли на индустриските капацитети на целата територија на Скопје и во наредниов период, при што, како што кажа, веќе се лоцирани поголем број потенцијални загадувачи од индустрискиот сектор во градот.

Освен тоа, инспекторите за животна средина на Град Скопје, во изминативе три месеца извршиле по 2 редовни контроли на сите 40 инсталации кои подлежат на Б–Интегрирана еколошка дозвола.

Според Богдановски, воведувањето на 24-часовните дежурства на инспекциите како и за време на викендите, помогнало попрецизно и пореално да се утврди можното загадување на амбиенталниот воздух согласно дејноста која ја вршат правните субјекти, како и во зависност од технолошкиот процес на производство. Исто така, на адресата на градските инспектори од почетокот на функционирањето на телефонот 193 во трисменски дежурства пристигнале вкупно 38 пријави на граѓани по кои инспекторите веднаш постапиле.

Во декември биле контролирани и градежните локации во централното градско подрачје во другите општини, како и на територијата на Општина Аеродром каде се сконцентрирани поголемиот број од градилишта.

При тоа се контролирани 51 градилиште и врачени се осум казни и записници за перење на гумите, миење на улиците пред градилиштата и покривање на камионите кои излегуваат од градилиштата со церади, стои во извештајот на Градскиот инспекторат. Според извештајот, во периодот октомври-февруари кога има зголемено загадување на воздухот на територијата на Град Скопје се врши секојдневна контрола на градилиштата.


Апел да не се палат огнови за божиќните празници за да се намали загадувањето


Скопје, 4 јануари, 2019 - 14:55 (META) 

За да се заштити животната средина и амбиенталниот воздух, од Град Скопје апелираат до граѓаните да се воздржат од палење огнови на отворено по повод прославата на божиќните празници.

„Апелот е усогласен со градоначалниците на сите скопски општини кои решија да се откажат од доделувањето дрва од општините за оваа намена, со цел да се спречи дополнително загадување на воздухот во град Скопје“, велат од градската администрација.


Невена Георгиевска од „О2“: Шилегов повеќе се фали одошто има резултати


Скопје, 27 декември, 2018 - 10:19 (META) 

Активистите на „О2 Иницијативата“ во 2018 година беа активен монитор на постапките на локалната и на централната власт поврзани со животната средина, аерозагадувањето, уништувањето на Водно. За тоа што е сработено и дали се квалитетни мерките против загадувањето зборувавме со Невена Георгиевска, претставник на „О2 Иницијативата“.

Бевме сведоци дека Владата калкулираше со алармирање на јавноста за надминат праг на аерозагадување со ПМ10 честички и покрај тоа што имаше обврска.

– Не алармираше, бидејќи се смени временската состојба бидејќи беа најавени временски промени, ветер, и кога задува, се спуштија вредностите. Податоците за ветерот исто така стојат кај другите параметри кои се добиваат од мерните станици, но тие не се прикажуваат, а токму ветерот и температурата се исто така фактори кои влијаат на количеството на штетни материи во воздухот .Сакаме тие податоци за последниве две години да ги споредиме со вредностите на аерозагадувањето и да видиме, дали она за што се фалат дека е помало загадување поради превземените мерки е всушност резултат на природни фактори.

Дали ги имаме вистинските мерки против загадување?

– Потребно е да се стави акцент на субвенционирање на еколошки решенија за загревање, а печките на пелети да се овозможат таму каде што нема можност граѓаните да се приклучат на топловодна мрежа или на гас. Вака, откако ќе купат печки или инвертори, тешко дека за две години ќе сакаат да инвестираат во инсталации за гас. Не се размислува долгорочно. Исто така, два-три дена бесплатен јавен превоз не можат да донесат никакви резултати ако не се врзани со забрана за користење на возила во централното градско подрачје.

Сè уште не знаеме кој точно загадува. Имаше финска студија поради која власта вели – граѓаните загадуваат. Дали можеби и мерките против загадувањето не се вистинските штом не ги знаеме вистинските причини?

– Финската студија на која се повикуваат е резултат на само една и тоа позадинска мерна станица, лоцирана среде зеленило во Карпош и таа треба да го мери квалитетот на воздухот подалеку од автомобили и индустрија. Тие податоци требало да се споредат со оние од некоја локација на која влијаат и тие фактори и верувам дека било планирано да се направат и други такви студии, но се прекинало и во недостаток на други податоци, се потпираме само на овие.

Кој сè загадува?

– Сите загадуваме. Толку е големо загадувањето што не можеме да исклучиме ништо. Затоа и се потребни драстични мерки кои нема да се однесуваат само на домаќинствата, треба исто така и драстично намалување на сообраќајот во деновите на загадување, запирање на одредени технолошки процеси во индустријата, запирање на градежните активности, па да се види тогаш какви се вредностите на аерозагадувањето. Потребно е државата да размисли за комплетно селење на некои гранки на индустријата од Скопје, како и урбанистички развој преку дисперзирани урбани центри подалеку од сегашното градско јадро.

Место такви мерки – да се запрат градилиштата додека е алармантно загадувањето, само препораки: не излегувајте од дома!

– Градежниците се жалат дека тоа ќе им донесе загуби, годинава ја прогласија за „црна година“ поради стопирани ДУП-ови, а всушност не се во загуба, само планираниот профит, кој очекувале да биде голем, сега е намален. Ние бараме и ревизија на ГУП-от на Град Скопје, бидејќи тој поаѓа од многу застарени податоци поради немањето попис и сега им служи на властите и на градежниот бизнис да ја стимулираат прекумерната урбанизација на секоја педа зеленило со тоа дека „ГУП-от така предвидува“. Општините живеат од придонесите од градежништвото и не сакаат да ги стопираат. А, кога сегашните локални власти дојдоа, прво што ветија е дека имаат менаџерски способности да најдат доволно пари за да не мора општините така да се финансираат.

Макрадули и Шилегов не пропуштаат можност да изјават дека граѓаните загадуваат во Скопје, а не индустријата, која има еколошки дозволи и е под контрола. Од друга страна, неформално, од повеќе извори во институциите дознаваме дека сè би било поинаку кога контролите на инспекциите за животна средина би се извршувале како што треба.

– Индустријата има А и Б интегрирани еколошки дозволи. Оние со А ги контролира државата, но за нив побаравме да се испита загадувањето не само на непосредниот извор на емисии туку и во околината на објектот, бидејќи често и таму има прашина која загадува. Додека оние со Б дозволи треба да бидат контролирани од општините, а самите општини признаваат дека немаат капацитет да обавуваат контроли, катастари на загадувачи повеќето немаат изготвено иако им е обврска. Летово имаше бројни пријави на граѓани за загадување кое доаѓа од кругот на некогашна Железарница, каде покрај „Макстил“ има многу други помали производни капацитети за кои не знаеме ни дали имаат воопшто дозволи, станицата покажуваше алармантни вредности и веднаш потоа престана да работи, но немаше никаков резултат од тие пријави, барем не се објавени никаде. При таква нетранспарентност и такво работење, ние сме со право недоверливи во работењето на општините во врска со контролата на индустриското загадување.

А што е тогаш улогата на Градот?

– Ингеренциите се поделени, но морам да кажам дека имаме добра соработка со сегашниот директор на градскиот инспекторат кој веднаш реагира на наши пријави и праќа екипи на терен. Сепак, тоа не е доволно, треба построги законски ограничувања на загадувањето и построги казни. За поздравување беше и акцијата со запленување на гуми за горење што ја спроведе општина Гази Баба, но, што е со дивите населби под Кале каде се гори токсичен отпад? Шест месеци властите се фалат дека ќе го решат проблемот, а тие луѓе сè уште се таму.

Шилегов кога дојде на функција навистина делуваше дека е заинтересиран да ги решава еколошките проблеми на градот, Негов предлог беше луѓето кои живеат на дивите депонии и го селектираат отпадот да бидат ставени во системот, каде дел од нив ќе бидат вработени, со решен социјален статус и така тие сиви зони ќе бидат под контрола на државата.

Како е О2 задоволна од исполнувањето на 39те барања за решавање на еколошки проблеми во Скопје од страна на Шилегов?

– Премногу има фалење со сработеното, премалку резултати. ПР-от на градоначалникот е супер, но ние сме построги во оценките и фокусирани на резултатите. Има 19 барања кои се обележени дека се во тек на реализација и мислам дека активностите на градот се делумно резултат и на тоа што постојано ги подбуцнуваме. Некои од обврските од листата се лесни за исполнување и не бараат ресурси, само добра воља, какво што е барањето за вклучување на граѓаните во донесувањето на одлуките на градот кои се однесуваат на загадувањето или објавување на Катастарот на загадувачи, но не се реализираат. Или затрупувањето на троската на Железарница и нејзино пошумување. Има и многу ургентни како уредувањето на Вардариште кое не е почнато бидејќи го кочи донесувањето на ДУП во Гази Баба, како ни покривањето на депониите на линданот што би требало да биде во содејство со Министерство за животна средина општина Кисела Вода. Садењето на по неколку дрвца или хортикултурно уреден тревник не можат да компензираат за тоа што не се зачувува или подига зеленило во форма на паркови, како овие што ги вети Шилегов, покрај Вардар или крај Серава и Лепенец.

Има ли некаква надеж програмата на Владата да ги донесе најавените резултати, од 30 до 50 процентно намалување на загадувањето?

– Тоа би можело да се каже само доколку на секои 3-4 месеци се прави ретроспектива на сработеното за да се види дали мерките се добри и нивната реализација се одвива според планот. Ако нема механизам за контрола на програмата, а ние чекаме две години за нешто да се случи, тогаш, доколку потфрли овој план, кого ќе повикаме на одговорност? Влогот е голем – здравјето на нацијата!


Новогодишно пакетче ќе добие Шилегов утре од „Го сакам Водно“


Скопје, 26 декември, 2018 - 14:55 (META) 

Активистите на граѓанската иницијатива „Го сакам Водно“ соопштија дека подготвиле новогодишно „пакетче“ со барања до градоначалникот на Скопје Петре Шилегов, кои се однесуваат на парк-шума Водно и дека симболично ќе му ги предадат утре во 11 часот во просториите на Град Скопје, во присуство на медиумите.

„Незадоволни од бројните нерегуларности кои го следат функционирањето на нашата парк шума Водно, решивме да ги изнесеме сите нешта кои би можеле да придонесат во решавањето на проблемите. Ги срочивме овие точки во облик на наши барања до Град Скопје, како институција надлежна за парк шумата Водно и единствена која има инструменти за нивна реализација. Барањата се конкретни, бараат вложувања на време, пари и човечки ресурси но бенефитите од нив сметаме дека се конечни и далекусежни“, се вели во соопштението испратено до медиумите од страна на еколошките активисти од оваа иницијатива.

Од „Го сакам Водно“ се уште не ја откриваат содржината ниту бројот на барањата, но најавуваат дека тие се однесуваат на сите проекти кои се во тек на реализација на падините на Водно, како што се гасоводот, Сончев град, телекомуникациската кула, но и на ветеното донесување на законот за заштита на парк-шумата и дека ќе бидат и формално поднесени до градските власти преку архивата на градот.

„Се надеваме дека претпразничниот гест на предавање на барањата во Град Скопје, кои имаат за цел заштита и зачувување на Парк Шума Водно, ќе претставува вистински предизвик за градоначалникот во новата 2019-та“, велат од „Го сакам Водно“.


За Градот во ред се јавните манифестации на загаден воздух – оти биле однапред планирани


Скопје, 24 декември, 2018 - 17:07 (META) 

„Сите манифестации кои се одвиваат на отворено, а се организирани или поддржани од Град Скопје и скопскиот градоначалник се однапред планирани активности и не сме можеле да знаеме колкав степен на загадување ќе има тогаш кога тие ќе се одржат“, е одговорот на службата за информирање на Градот на прашањето зошто Шилегов и локалната самоуправа организираат манифестации на отворено во Скопје и во услови кога загадувањето на воздухот е енормно, како што се случува денес и изминатите два дена.

Надлежните од Градот сметаат дека не е проблем тоа што се организираат свечености и јавни настани на отворено во Скопје и во зимски услови кога има значително пречекорување на граничните вредности на аерозагадувањето бидејќи „такви настани се пракса и во други градови, а не само во Скопје“.

Во центарот се одржуваат манифестациите на „Винтерленд“ на Град Скопје.

Вчера градоначалникот Шилегов ја отвори и трката на Дедо Мразовците во центарот на градот.

Според мерењата достапни на сајтот на Министерството за животна средина и просторно планирање во деновите на викендот биле забележани високи вредности на ПМ10 честички во воздухот – во саботата биле измерени просечни 176 микрограма на кубен метар, додека во неделата 162.

Министерството за животна средина денес објави дека е надминат законскиот праг за алармирање за аерозагадувањето што треба да ги активира вонредните мерки од два последователни дена загадување над дозволените вредности.

Претходно, на почеток на декември, кога исто така беа надминати граничните вредности повеќе од два дена последователно, не беше алармирана јавноста, затоа што, според заменик-министерот Јани Макрадули „минатиот пат беше јасно дека за кратко време ќе дува северен ветер и тоа е композит-одлука која зависи од два фактори, и од податоците на хидрометеоролошкиот завод и од мерните станици и затоа тогаш не се прогласи“. Затоа денес имаме надминат праг на информирање и за тоа е информирана јавноста и институциите коишто се задолжени за тоа“, изјави денес Макрадули.


Малку вистински мерки во буџетот на Скопје за 2019 за аерозагадувањето, смета опозицијата


Скопје, 23 декември, 2018 - 7:49 (META) 

Од 186-те милиони денари кои Град Скопје ги издвои во буџетот за мерки кои се однесуваат на заштита на животната средина, 97 милиони се за заштита на амбиенталниот воздух, 20 милиони денари за субвенционирање на граѓани за набавка на посовремени уреди за затоплување, субвенционирање на ЈСП за бесплатен превоз во денови на алармантно загадување на воздухот, но и за приватни компании кои учествуваат во јавниот превоз на патници за адаптирање на постојните автобуси со мотори на еколошки горива, како и 15 милиони за субвенции за набавка на печки на пелети, каде не постојат услови за приклучок на централно греење.

Во таа сума влегуваат и субвенции за набавка на велосипеди, тротинети и електрични возила, за што се предвидени вкупно 10 милиони денари и три милиони за субвенции за чистење на оџаци.

И во 2019 година Градот ќе издвои средства за репарација и поставување на аирпоинтер односно комплетна мерна станица за мерење на загадувањето на воздухот, во износ од 1,7 милиони денари иако и во претходниот буџет за 2018 година беа предвидени средства за негово поставување, но тој не беше ставен во функција. Аирпоинтерот беше поставен во 2011 година, но набргу потоа и тргнат од локацијата на улица Македонија со образложение дека не може да покажува реално колкаво е загадувањето бидејќи во негова непосредна близина има градилиште.

– Ниту еден од нашите предлози кои се однесуваат на секторот животна средина не е усвоен иако ќе помогнеа за подобрување на квалитетот на воздухот во градот, како на пример субвенции за хибридни скутери, пошумување на источниот дел на Водно кон Сончев град, дрворед покрај Вардар од Аеродром до Ѓорче Петров, зелени билборди од мов на 10 раскрсници, уредување на Вардариште или нови велосипедски патеки покрај Лепенец – вели Светлана Колариќ, советничка од ВМРО-ДПМНЕ во Град Скопје.

Повеќето планирани активности на секторот за животна средина за наредната година се однесуваат на изработка на разни студии, од кои дел се продолжување на веќе започнати од времето на претходниот градоначалник, додава Колариќ.

– Место да им се даде приоритет за обновливи извори на енергија – фотоволтаици како енергенс за уредите за загревање на домовите, училиштата што е предвидено и во Планот за чист воздух на Владата, со програмата се дава предност на греењето на нечисти енергенси, а нема субвенционирање на енергетската ефикасност на објектите или поставување на креативно зеленило (урбани градини, зелени фасади) за да се надомести изгубеното градско зеленило. Се уште нема ниту студија за оптимизација на јавниот превоз, но затоа и понатаму се форсира автоцентризмот и се планира проширување на улици за поголем број на возила. Без визионерска стратегија за Скопје како одржлив град, ниту добрите мерки од програмата како субвенционирањето на велосипеди, електрични возила или чистење на оџаците, нема да го дадат посакуваниот ефект – смета Драгана Велковска, екологист и советник на Левица во Советот на Град Скопје.

Според неа, мерките на Градот се поттикнати од интересите на коалициските и бизнис партнерите, а не од интересите на граѓаните.