Со два дрона, камери и со повеќе инспектори, град Скопје ќе се бори против загадувачите


Скопје, 15 ноември, 2018 - 10:07 (META) 

За само пет дена, откако град Скопје упати апел до граѓаните да не ги пријавуваат загадувачите на воздухот во Скопје на социјалните мрежи туку на надлежните инспекции на дежурниот телефон 193, добиени се 42 пријави од граѓани, градската комунална инспекција интервенирала по сите поединечно, при што на 10 локации кои биле на јавни површини, бил изгаснат пожар. Останатите пријави главно се однесувале на палежи на смет во приватни поседи.

И покрај зголемувањето на обемот на работата на инспекциските служби на град Скопје за откривање и казнување на загадувачите во однос на минатата година, граѓаните не се задоволни од тоа како град Скопје се справува со случаите на палењето отворени огнови на кои се согорува разновиден отпад и со тоа се зголемува аерозагадувањето.

– Има евидентно зголемување на бројот на интервенции на градските инспектори за животна средина – 89 проценти во септември годинава во споредба со истиот месец лани и 107 отсто за месец октомври споредено со истиот месец во 2017, но свесни сме дека треба многу повеќе да се зголеми ефикасноста на инспекциите за граѓаните навистина да почувствуваат позитивни резултати – вели Мирослав Богдановски, директор на Инспекциската служба на град Скопје.

Според него, веќе се работи на неколку клучни подобрувања кои ќе значат повеќе откриени и решени случаи на терен и поголем ефект од сработеното. Годинава градската комунална инспекција се опреми со теренско возило, а за 2019 се најавува зголемување на бројката на ангажирани инспектори за животна средина, од сегашните 7 на ниво на град Скопје и 15 комунални редари, а во најскоро време ќе се вклучат во функција и дронови, чија функција ќе биде прецизно утврдување на локациите каде има незаконско палење на огнови.

– Засега се предвидени да функционираат два дрона, од кои секој со едно летање покрива површина од 200 хектари па така ќе можеме попрецизно да ги лоцираме загадувачите на терен – информира Богдановски и додава дека се разгледува можноста за поставување и на камери на повисоките објекти во градот со поголеми геолокациски можности, се со цел да се утврди каде точно се наоѓа загадувачот. Овие мерки значително ќе го зголемат обемот на реализирани интервенции на инспекцијата. Сличен систем веќе функционира во главниот град на Србија, Белград.

Кој е патот на една пријава од граѓанин за загадување?

– Откако граѓанинот ќе се јави и ќе ја каже точната локација од каде чади, диспечерот испраќа возило со комунален инспектор, комунален редар, а бидејќи најчесто се работи за палење огнови од стана на луѓе кои се во тешка социјална состојба со нив се и претставник на Црвениот Крст и на социјалните служби, потоа пожарникари, а во некои случаи се бара и асистенција од полиција – појаснува Богдановски. Засега се работи со по една патрола во смена, со вкупно три смени за 24 часа.

Според Богдановски, ефикасноста во интервенирањето по пријавите на граѓаните би се зголемила доколку би постоела поефикасна соработка со општинските инспекциски служби, кои сега функционираат независно од градската инспекција, како и со повисоки од досега предвидените казни за загадувачите за прекршоци од комуналната сфера.


Ѓорчев: Налепниците на возилата се директен удар врз средната класа и сиромашните


Скопје, 12 ноември, 2018 - 17:13 (META) 

Пратеникот и член на Извршниот комитет на ВМРО-ДПМНЕ, Влатко Ѓорчев, на прес-конференција денеска ги повика премиерот, заменик-министерот за животна средина и просторно планирање и скопскиот градоначалник Петре веднаш да се откажат од планот за воведување еколошки категории за возилата, нарекувајќи го тој чекор „стигматизирање на сиромашните“.

– ВМРО-ДПМНЕ ги повикува Зоран Заев, Јани Макрадули и Петре Шилегов веднаш, веднаш уште денес или уште утре да престанат со нивниот проект за стигматизирање на цели категории на граѓани, а кој што се однесува на налепниците на возилата поврзани со издувните гасови. Оваа нивна мерка е директно насочена против средната класа во Република Македонија и против сиромашните. Затоа што нивните возила нема да можат да бидат забележани со зелена налепница. Тие луѓе со месеци, и со месеци нема да можат да ги користат нивните возила, нема да можат слободно да се движат и ќе имаат реални конкретни, практични проблеми во нивното дневно функционирање. И тие и нивните семејства – рече Ѓорчев.

По прес-конференцијата реагираа од Градот Скопје, порачувајќи дека мерката е непопуларна, но здравјето на граѓаните е најбитно.

„Сигурни сме дека дел од решенијата нема да бидат популарни, но здравјето на граѓаните е од највисок приоритет и само со заеднички напори и жртва може да се постигнат резултати и подобрување на состојбата во оваа област. Конкретните измени во Законот за возила, кои се на иницијатива на Град Скопје, се далеку поефективни и поправични во однос на алтернативата која се спроведува во некои метрополи, а тоа е забрана за користење на возилата по принципот „пар-непар“, се вели во реакцијата, во која се посочува дека се спроведува план за подобрување на квалитетот на воздухот со 53 мерки.


Град Скопје: Не пријавувајте отворени огнови на „Фејсбук“, пријавете ги на 193


Скопје, 9 ноември, 2018 - 12:32 (META) 

Од Град Скопје апелираат до граѓаните сите забележани огнови на отворено да ги пријавуваат исклучиво на телефонскиот број 193, наместо на „Фејсбук“ или на другите социјални мрежи.

Од таму потенцираат дека горењето пластика, гуми, кабли, неквалитетни дрва и палењето на дивите депонии влијаат на загадувањето на воздухот и додаваат дека според статистиката греењето на дрва учествува со една третина во загадувањето на воздухот, а најотровните состојки се испуштаат од отворените огнови.

Портпаролот на Град Скопје, Ваљон Салиху вели дека за таа цел мешани тимови и оваа година ќе работат секој ден, 24 часа, за борба против огновите на отворено.

-Со пријавување на бројот 193 екипите ќе може да интервенираат навремено, а со тоа и да се спречи евентуална опасност по здравјето и имотот на нашите сограѓани. Дежурните екипи ќе ги процесираат сите пријави, огновите ќе бидат изгаснати, а доколку постои потреба од згрижување на лицата кои ги палат огновите ќе интервенираме во координација со Центарот за социјална работа на Град Скопје. Одговорноста за решавање на проблемот со огновите на отворено е заедничка за сите нас и затоа е неопходна активна соработка со граѓаните. Градот Скопје интензивно работи на елиминирање на причинителите на загадувањето на амбиентниот воздух во градот – рече Салиху.

Минатата зима, во рамки на оваа кампања биле регистрирани вкупно 438 јавувања на телефонскиот број 193, било интервенирано на 334 огнови на отворено, а во 114 случаи на терен излегле комунални инспектори.

Раководителот на Инспекторатот на Град Скопје, Мирослав Богдановски, рече дека градските инспектори вршат засилени контроли на терен по однос на загадувањето на животната средина и досега се пронајдени и казнети поголем број прекршители во Вардариште и во Ѓорче Петров.

-Во периодот септември/октомври годинава во споредба со истиот период лани имаме зголемување од околу 120 отсто во однос на изречените казни, а имаме изречено и голем број опомени за несовесните граѓани. Засилено се следи и состојбата во Лисиче, каде што граѓаните пријавуваат извори на загадување. Фатени се неколку малолетници кои гореле кабли и различни отпадни материјали. Ги контролираме и градилиштата по однос на прашината, дали се чисти тркалата на камионите, дали се покриени со церади и слично. Направени се контроли кај повеќе од 50 градилишта на подрачјето на Скопје – рече Богдановски.


Град Скопје по две години планира да го ажурира Катастарот на загадувачи


Град Скопје го направи првиот чекор во постапката за ажурирање на Интегриран катастар на загадувачи на животната средина на Град Скопје.

На Електронскиот систем за јавни набавки (ЕСЈН) е објавен оглас за прибирање понуди за ажурирање на овој катастар, а од Град Скопје процениле дека за тоа ќе бидат доволни 508.400 денари.

На заинтересираните им е оставен рок до 15 ноември, односно само десет дена од објавувањето на огласот, за да ги достават понудите. Предвидено е фирмата да го заврши ажурирањето за најмногу 12 месеци од потпишувањето на договорот. При изборот Град Скопје ќе се раководи од принципот 40% за цената и 60% за квалитетот, пишува во образложението на ЕСЈН.

Инаку, сегашниот катастар на загадувачи на животната средина на Град Скопје е од јули 2016 година, а бил изработен од „Технолаб“ – Скопје.

Катастарот ги опфаќа сите видови на загадување, односно покрај воздухот, и на водите и на почвата. Се состои од:  Софтверска база на податоци, која ги содржи податоците за емисиите во воздух, вода и почва од изворите на загадување, потоа Карта на загадувачи и Карта на загаденост.


Град Скопје ќе прави мобилна апликација за споделување превоз заради намалување на загадувањето


Скопје, 6 ноември, 2018 - 15:51 (META) 

Град Скопје планира апликација за мобилни телефони за оперативните системи Андроид и ИОС, со која скопјани ќе може да се организираат и да се договараат за заеднички превоз со автомобил, како една од мерките за намалување на загадувањето на воздухот.

Огласот за изработувач на апликациите е распишан во петокот, планирани се верзии на македонски и албански јазик, а според проценките, за тоа би се потрошиле вкупно 5.000 евра.

Според замислата, скопјани преку апликацијата би се договарале да се превезат до некое место со автомобил во кој има слободни места, за да се намали сообраќањето на автомобили, а со тоа и количеството испуштени гасови и загадувачки честички од ауспусите.

Во огласот се бара апликацијата да има можност за креирање на профил на корисникот или логирање преку Фејсбук, можност за внесување на рутата, деновите и времето кога ја вози или патува на рутата, можност за поврзување на корисникот во зависност од тоа дали е пријавен како возач или како патник со сите корисници кои ја возат или патуваат на таа рута.

Исто така, апликацијата треба да има ГПС лоцирање на корисникот и можност за прикажување на сите други рути на кои има регистрирано корисници и можност за бирање на рутата во било кое време, можност за избор на возач или патник во било кое време, овозможување комуникација за корисниците на групата, можност за откажување на рута како возач или место како патник, како и известување за затворени улици и булевари.


Град Скопје: Сериозно ги сфаќаме предизвиците со загадувањето


Скопје, 2 ноември, 2018 - 15:53 (META) 

Изминатиов период просечните вредности на загаденоста на воздухот не ги надминуваат граничните вредности, односно тоа се случува само во кратки временски интервали и на одредени локации, се вели во реакцијата на Градот Скопје на информациите кои изминативе два дена се објавуваа во јавноста, околу загадуваето на воздухот во Скопје.

Од градската администрација велат дека, сериозно ги сфаќаат предизвиците со загадувањето на воздухот и дека работат на системско решавање на проблемот преку спроведување активности дефинирани со Планот за подобрување на квалитетот на воздухот кој опфаќа 53 краткорочни, среднорочни и долгорочни мерки.

Како дел од преземените мерки, од Град Скопје ја спомнуваат постапката за набавка на 40 нови еколошки автобуси и велат дека нивните инспекциски служби се постојано на терен, контролирајќи ги лицата кои креираат и ги палат дивите депонии при што се изречени двојно повеќе казни во однос на истиот период лани.

„Од аспект на греењето, Градот Скопје го формира новото јавно претпријатие „Градски енергетски системи АД Скопје“ кое ќе врши енергетски дејности и ја реализира постапката за преземање на градската топлификациска мрежа, со што ќе стане директен фактор во одлуките во оваа област, која е голем причинител за загадувањето на воздухот, како и да се вклучи во процесот на гасификација на Скопје. Покрај ова, Градот и оваа година субвенционираше граѓани кои се греат на печки на дрво и други течни горива, да набават печки на пелети кои загадуваат далеку помалку“, велат од Градот.

Од таму апелираат до граѓаните да се вклучат во борбата против загаденоста на воздухот, преку помало користење на возилата, а за затоплување на домовите да не користат отпадни материјали, прегорено машинско масло, лакирани и обоени отпадоци од дрво, стиропор, ПЕТ амбалажа, гуми и каков било синтетички материјал.


Втор повик од Град Скопје за субвенции за печки за пелети


Скопје, 1 ноември, 2018 - 11:06 (META) 

Град Скопје денеска  го објави вториот јавен повик годинава за надоместување на дел од трошоците за набавка на печки на пелети за 2018 година, втора фаза.

Во оваа акција, чија цел е да се користат поквалитетни печки кои помалку ќе го загадуваат воздухот, на граѓаните ќе им се надоместуваат до 70 отсто од цената на печката на пелети, но до максимум 30.000 денари со вклучен персонален данок на доход по домаќинство.

Јавниот повик трае до 30 ноември или до исцрпување на предвидените суми, а ќе се реализира по принципот „прв дојден прв услужен“.

Право на учество имаат жители на Скопје кои ќе купат печка на пелети за затоплување од денеска до 30 ноември. Субвенција не ќе може да добијат домаќинствата кои се приклучени на градското централно греење, без оглед на тоа дали го користат, како и жителите кои сега градат куќа, а не живеат во неа.

Условите се, покрај тоа дека може да конкурираат само жители на Скопје, досега барателите да не добиле субвенција за печка на пелети од кој било извор во земјава, а во моментот да користат печка на дрва, јаглен, нафта или мазут. Покрај тоа треба да е платен и данокот за имот за 2017 година.

Заинтересираните треба да поднесат пополнето барање кое може да се земе од архивата на Град Скопје или од интернет страницата на Град Скопје.

Другите услови се наведени тука.


Град Скопје сè уште тактизира околу субвенционирањето на печки на пелети


Скопје, 18 октомври, 2018 - 11:51 (META) 

Грејната сезона веќе почна, а Градот Скопје сè уште не го објавил вториот повик за субвенционирањето на купувањето печки на пелети за заинтересираните граѓани. Огласот требаше да биде објавен пред почетокот на сезоната на греењето, како втор годинава, откако на Совет на Град Скопје не помина обидот на градоначалникот Петре Шилегов во ребалансот на градскиот буџет да го „протне“ скратувањето токму во делот на субвенционирање на печките на пелети, со оправдување дека вакви субвенции дава и Министерството за економија, но и некои скопски општини, како Аеродром и Гази Баба.

Субвенциите за печките за пелети се и една од мерките за намалување на загадувањето од листата мерки на еколошките здруженија на кои се обврзаа кандидатите за скопски градоначалник пред локалните избори минатата година.

-На исполнување на 39-те барањата на Коалицијата „О2“ се обврзаа сите кандидати за градоначалник. Дел од овие барања се вклучени во тековни проекти на Секторот за животна средина, кој работи солидно. Но, мојот впечаток е дека борбата против загадениот водух, еднакво како и „посветеноста“ на хуманиот третман на животните, не се ништо друго освен лажни предизборни ветувања на актуелната гарнитура во Град Скопје. Повикот за субвеционирање печки на пелети се уште не е објавен, преговорите со приватните превозници за префрлање на дел од автобусите на гас „се во тек“ и ние и оваа зима во јавниот превоз ќе имаме возила кои се под сите стандарди. Најголема посветеност гледам во исполнување на обврските кон коалициониот партнер ДУИ, но партискиот пазар не го редуцира ниту го елиминира загадувањето – вели Драгана Велковска, советник во Град Скопје од редовите на „Левица“.

Во јуни Шилегов беше критикуван од опозицијата во градскиот Совет поради тоа што, предложи со буџетскиот ребаланс да се скратат средства за субвенционирање на печките на пелети, како и за набавка на електрични автобуси. Субвенциите за печки на пелети, како еколошки поприфатлив енергенс од согорувањето на дрвата, беа за првпат воведени од страна на претходниот градоначалник на Скопје, Коце Трајановски.


Загадувањето тропа на врата, Шилегов ќе го решава со долгорочни мерки и обуки за оџачари


Скопје, 4 октомври, 2018 - 10:54 (META) 

Во пресрет на зимската сезона, во која со години загадувањето на воздухот во главниот град ги соборува европските па и светски рекорди, градските власти најавуваат дека ќе се справува со загаденоста преку систем на среднорочни и долгорочни мерки. Како една од клучните мерки се наведува основањето на АД Градски енергетски системи односно преземањето на топловодната мрежа за парно греењето од страна на градот, како и со отпочнувањето на процесот на гасификацијата во Скопје, субвенционирањето на набавка на печки на еко пелети, како и субвенционирањето на чистење на оџаците во домаќинствата и на обуки за идни оџачари.

– Како што најавив, обезбедивме средства за 40 еко автобуси на гас кои очекувам во Скопје да ги имаме веќе следната година. Продолжуваме да работиме на ефикасноста на функционирањето на јавниот превоз што ќе подразбира негово помасовно користење од страна на граѓаните за сметка на користењето на автомобилите – изјави за „Мета“ градоначалникот на Скопје, Петре Шилегов.

Во мерките за намалување на загадувањето Градот ги смета 5-те километри нови велосипедски патеки, субвенционирање на купување на велосипеди, а од вчера и на електрични тротинети. Од канцеларијата на градоначалникот на Град Скопје, Петре Шилегов информираат за подигање на нови и реконструкција на постојни зелени површини од околу 50.000 квадратни метри, а до крајот на годинава треба да бидат засадени вкупно 10 илјади дрва.

Градот признава дека иницијативата за налепници за возилата согласно степенот на загадување, кое беше и едно од барањата и на екологистите минатата сезона, не е реализирана поради тоа што заглавила во другите надлежни државни институции. Од Градот тврдат дека тие својот дел од обврските го завршиле, но дека е неизвесно кога овој систем воопшто ќе профункционира.

Од градската администрација информираат и за кол-центарот на кој преку бесплатната телефонска линија 193 граѓаните можат деноноќно да пријавуваат огнови кои што горат на отворено за потоа на терен да бидат испратени комбинирани тимови од инспекциските служби, полицијата и бригадата за противпожарна заштита, а од март до сега, колку што постои и функционира бесплатниот телефонски број (070 270 557) за пријавување на диви депонии, граѓаните пријавиле околу 300 такви локации.

Сепак, повеќето од потезите на Град Скопје и на градоначалникот Шилегов не соодветствуваат или само ги ублажуваат проблемите поврзани со загадувањето на воздухот во Скопје за чие што решавање граѓанските здруженија веќе подолго време преговараат со градските и централните власти. Пред локалните избори 2017, сите кандидати за градоначалници на град Скопје, меѓу кои и Шилегов, потпишаа Меморандум со граѓанската иницијатива О2 Коалиција со кој се обврзаа на исполнување на 39 барања поврзани со справување со загадувањето на воздухот.

На апликацијата „Мој воздух“ постои алатка за мониторирање на исполнување на тие ветувања наречена Политички бројач на која стои дека, за 344те дена од мандатот, градоначалникот на Скопје исполнил само едно од 39-те барања, а тоа е да не се прскаат улиците со калциум магнезиум ацетат поради слабиот ефект врз загадувањето, додека 9 барања имаат статус на делумно исполнети или во процес на исполнување.

Во неисполнетите барања спаѓаат воспоставувањето на пешачки дел во центарот на Скопје, заштитни зелени зони околу загадувачите, приоритет на воздухот во урбанистичките планови, строга заштита на парк-шумата Водно, покривање на депонијата кај ОХИС, итна ремедијација на „Годел“, на троската на Железарница, ефикасна еко-инспекција и повеќе други. Како барања кои се во процес на исполнување се наведени вонредните мерки за време на грејната сезона како и вклучувањето на граѓаните во процесот на донесување одлуки.

Утре еколошките здруженија ќе учествуваат на средба на интерресорската група за загадување на амбиенталниот воздух под претседателство на заменик-министерот за животна средина и просторно планирање, Јани Макрадули на која се очекува да ги повторат своите барања за поефикасно справување со проблемот на загаденоста на воздухот во Скопје.

disklejmer1-01


Град Скопје планира да потроши пет милиони евра помалку од буџетот за годинава


Скопје, 27 септември, 2018 - 11:26 (META) 

Буџетот на Град Скопје за 2018 година ќе биде намален вкупно за 346 милиони денари, информираат од Град Скопје.

На денешната седница Советот ќе одлучува за предлог за изменување на буџетот на Град Скопје за 2018 година со кој е предвидена рационализација на трошењето на буџетските средства.

„На денешната седница Советот ќе расправа и за дополнување на Одлуката за извршување на буџетот на Град Скопје за 2018 година, каде се воведува нов член со кој се предвидува во случај на смрт на пожарникар, кој ќе го загуби животот при вршењето или во врска со вршењето на работата, на неговото семејство му се доделува еднократен надоместок во висина на вкупниот износ од остварените плати во последните 12 месеци“, се вели во соопштението на Град Скопје.

Покрај ребалансот на буџетот на Град Скопје за 2018 година, на денешната седница Советот ќе расправа за Одлуката за давање согласност за изменување и дополнување на Инвестициона програма на ЈП „Комунална хигиена“ – Скопје за 2018 година. Со оваа одлука се предвидува набавка на две специјални возила за собирање и транспортирање комунален смет и странично подигнување канти со смет, со капацитет од 2.200 и 3.200 литри.