Шилегов: Ќе го решавам проблемот со воздухот и ќе ги изградам тунелите под Кале!


Скопје, 27 април, 2018 - 15:47 (META) 

Со проекти во вредност од 300 до 350 милиони евра во текот на неговиот мандат, градоначалникот на Скопје Петре Шилегов очекува дека ќе ги реши во целост или барем во голем дел најголемите проблеми на градот, како што се загадениот воздух, преоптоварениот сообраќај, притоа плаќајќи, како што вели, разумни суми, за разлика од претходното раководство. Фасадата на Сити Галери чинела 2 милиони евра, а  новиот мост што треба да почне да се гради во септември и да ги спои Аеродром и Гази Баба би чинел 3-4 милиони евра, потенцира тој.

Во интервјуто за „Вистиномер“ направено во рамките на проектот „До отчетни општини преку активни граѓани“, спроведуван од Фондацијата „Метаморфозис“, а поддржан од американската непрофитна фондација NED (National Endowment for Democracy), скопскиот градоначалник вели дека ќе се зафати со решавање на проблемот со загадениот воздух во Скопје, колку и да чини тоа.

Една од неговите идеи за тоа е Град Скопје да ја преземе топловодната мрежа и топланите, а потоа напоредно да ја врши и гасификацијата до крајните потрошувачи, притоа работејќи по стратегија за тоа кој дел треба да добива централно греење, а кој дел гас.

Планира и концесии за помали топлани кои би работеле на гас, а би обезбедувале централно греење за помали области.

Делот на градската територија северно од Вардар, според Шилегов, е местото каде што треба да се насочи идниот развој на градот. Затоа во мај ќе биде распишан тендер за тунели по Кале, зацртани во Генералниот урбанистички план на Скопје од 1965 година, за кои вели дека ќе го поттикнат развојот на северната територија, заедно со продолжување на булеварите „Словенија“ и „Христијан Тодоровски – Карпош“, како и претворање на улицата „Босна и Херцеговина“ во булевар кој ќе се надоврзе на „Словенија“.

Јавниот превоз треба да се врши со еколошки автобуси – на струја или на гас, а тие би биле и поисплатливи од сегашните, објаснува скопскиот градоначалник.

Целото интервју на градоначалникот Шилегов може да го прочитате тука.


Град Скопје ќе субвенционира и велосипеди за лица со посебни потреби


Скопје, 12 април, 2018 - 12:28 (META) 

Град Скопје ќе издвои 10 милиони денари за субвенции за граѓаните за набавка на велосипеди, информираат од таму.

„9 милиони денари ќе бидат издвоени за субвенции за набавка на велосипеди, а 1 милион денари ќе бидат издвоени за субвенции за набавка на рачни велосипеди или рачни велосипеди со електрично помагало за лица со посебни потреби“, информираат од Град Скопје.

Со оваа одлука е предвидено максималниот износ за поединечна субвенција за купување велосипед по лице да биде 50 отсто од вредноста на велосипедот, но не повеќе од 3.000 денари, со вклучен персонален данок на доход.

„Новитет во јавниот повик за набавка на велосипеди за 2018 година, што е во фаза на подготовка, е тоа што оваа година Градот Скопје ќе субвенционира набавка на рачни велосипеди (велосипед на рачен погон), како и рачни велосипеди со електрични помагала за лица со посебни потреби. Градот Скопје ќе субвенционира 50 отсто од вредноста на рачниот велосипед и рачниот велосипед со електрично помагало за лица со посебни потреби, но не повеќе од 90.000 денари по лице, со вклучен персонален данок на доход“, велат од Град Скопје.


Шилегов ќе го догради мостот но без Панорамското тркало


Скопје, 10 април, 2018 - 11:47 (META) 

Мостот на Вардар на кој што требаше да стои Панорамското тркало нема да се урива туку ќе се догради без тркалото и ќе биде пешачки премин, вели скопскиот градоначалник Петре Шилегов за порталот „СДК“. Минатата недела Град Скопје и изведувачот ГП „Бетон“ постигнале договор мостот да се догради по пониска цена од онаа во првичниот договорот односно наместо 7 милиони евра, Градот да доплати 3,1 милиони евра.

-Донесовме одлука да се догради пешачкиот мост. Наместо бараните 7 милиони евра ќе платиме 3,1 милиони евра. Уривањето онака како што е сегашната позиција на мостот заедно со заостанатите плаќања и обврските кон германските партнери кои требало да го градат тркалото би нè чинело 3 милиони евра. Успеавме за истата цена да договориме тој да се догради. Коритото на реката Вардар повторно ќе стане безбеден бидејќи нема да има фундаменти во него. Мислам дека оваа варијанта е добра за граѓаните – вели Шилегов.

Градоначалникот потенцира дека е направен нов проект според кој мостот нема барокни елементи и ќе биде поставена проѕирна ограда да се гледа Камен мост.

Мостот на кој што според проектот требаше да стои панорамско тркало почна да се гради во 2014 година. Град Скопје тогаш проектот го предаде на ЈСП „Скопје“, а пари покрај од буџетот на Градот се обезбедуваа и преку донации од Агенцијата за електронски комуникации. Според договорот со ГП „Бетон“ изградбата требаше да чини 18 милиони евра. Досега на изведувачот му се исплатени 10 милиони евра.


Град Скопје ја почна постапката за субвенции за печки на пелети


Скопје, 5 април, 2018 - 11:19 (META) 

Град Скопје денеска го објави јавниот повик за надоместување на дел од трошоците на граѓаните на подрачјето на град Скопје за набавка на печки на пелети.

Сите што ќе купат печки на пелети од денеска до 21 мај годинава може да конкурираат за субвенцијата во висина од 70 отсто од цената на печката. Сепак, износот на субвенцијата може да биде најмногу 30.000 денари со вклучен данок на доход по домаќинство.

Иако првично зададениот краен рок е 21 мај, доделувањето на субвенциите може да прекине и порано, ако се исцрпат предвидените средства.

Овој повик ќе се реализира по принципот „прв дојден, прв услужен“.


Град Скопје и Општина Чаир ќе ги отстрануваат дивите тезги на Бит-пазар


Скопје, 27 март, 2018 - 12:34 (META) 

До 5 април сите диви тезги на тротоарите околу Бит-пазар треба да бидат отстранети. Град Скопје и Општина Чаир им дадоа рок на дивите продавачи сами да ги тргнат картонски кутии, во спротивно тоа ќе го сторат надлежните институции.

Акцијата Град Скопје и Општина Чаир ја спроведуваат за да се ослободат тротоарите за пешаците кои сега се блокирани од сите страни од диви продавачи.

– Имаме разбирање за трговците кои работат на овие нелегално поставени тезги, вложуваат многу труд за да заработат за основните средства за живот. Затоа, во соработка со Скопски пазар обезбедивме на овие луѓе да им бидат понудени на користење тезги во рамките на пазарот под поволни услови. Овие лица треба да склучат договор најдоцна до 5 април. Сите оние што нема да го сторат тоа и ќе продолжат да продаваат на улица или на тротоар ќе бидат казнети во согласност со Законот од надлежните инспекциски органи. Овој чекор се презема со цел да се вратат купувачите во чаршијата и на пазарот и да се овозможи полесна пристапност до тезгите и дуќаните. Воведувањето ред на ова место значи и поголема безбедност и пофункционален град – рече Ваљон Салиху портпарол на Град Скопје.

Град Скопје и Општина Чаир по расчистување на просторот од дивите тезги, најавија дислокација на такси станицата, уредување на зелени површини, нови дрвореди и поставување на заштитни столпчиња на тротоарите од двете страни на булеварот.


Ќе се гради нов мост кој ќе ги поврзува Аеродром и Гази Баба


Скопје, 23 март, 2018 - 14:24 (META) 

Град Скопје за 24 месеци ќе изгради има нов мост во должина од 120 метри на булеварот „АСНОМ“, кај хотелот „Русија“ кој ќе ги поврзува општините Аеродром и Гази Баба.

– За проектот е предвидено пробивање и продолжување на нов булевар во должина од 2.107 метри, од хотелот „Русија“, преку Вардар и населбата Керамидница се до Скопски саем. Ќе има 5 вкрстувања, 6 коловозни ленти, велосипедски патеки во двете насоки, пешачки патеки и дрвореди. Новиот коридор во градот задолжително ќе биде проследен и со нови автобуски линии на јавниот градски превоз – рече на денешната прес-конференција скопскиот градоначалник Петре Шилегов.

Проектот е вреден од 7,5 до 8 милиони евра. Градбата на овој коридор со мост предвидено е да биде завршена во рок не подолг од 24 месеци од почетокот на градежните работи.

На денешната прес-конференција присуствуваа и градоначалниците на Аеродром и на Гази Баба Златко Марин и Борис Георгиевски.


Град Скопје трајно ја воведе забраната за запирање возила за доставување на стока


Скопје, 19 март, 2018 - 14:40 (META) 

Советот на Град Скопје на денешната осма седница усвои, времената одлука за забрана за запирање на возилата за доставување стока во централното градско подрачје во периодот од 7.30 до 18 часот да стане трајна.

Лани во декември, Советот на Град Скопје ја донесе времената одлука за забрана на застанување на возилата при дотур на роба во централното градско подрачје во периодот од 7.30 до 18 часот која имаше важност до 31 март.

Оваа одлука беше донесена како една од мерките со цел намалување на загадувањето на амбиенталниот воздух во Скопје, а истата беше предвидена и со „Препораките на Интервентната акциска група за итните мерки против загадување на воздухот“ донесена на ден 15 декември 2017 година од Владата.


Шилегов: Споменикот на Ќосето не и е исплатен на леарницата, тој ќе биде доказ во судење


Скопје, 28 февруари, 2018 - 14:08 (META) 

Општина Сопиште може да посака и метро да имаат во Сопиште, рече градоначалникот Петре Шилегов откако Советот на Општината вчера донесе одлука со која бараат Градот да им го даде споменикот на Андон Јанев-Ќосето.

– Општината Сопиште може да си носи автономни одлуки какви што сака. Може да посакаат и метро да имаат во Сопиште. Градот Скопје има добиено допис од Рудници и железарници институти кои што ги лиеле петте спомениците на Здружението за духовно обединување на Сетинци, Попадинци и Крушоради од Лерин дека се неплатени. Од нас е побарано да им доставиме известување каде се наоѓаат спомениците поради нивните потреби во судската постапка која ја водат за долг на неплатени споменици. Што значи Град Скопје примил неплатена донација – рече Шилегов.

Град Скопје веднаш по отстранувањето на споменикот минатиот четврток испратил допис до Здружението на адресата која е оставена во Градот за кореспонденција во моментот кога биле донирани спомениците. Досега како што вели Шилегов немаат добиено никаков одговор од Здружението.

Споменикот на Ќосето беше тргнат од пред Врховниот суд во четвртокот рано наутро, бидејќи бил дивоградба.


Општина Сопиште го бара споменикот на Ќосето за да го постави на кружниот тек


Скопје, 27 февруари, 2018 - 13:59 (META) 

Општина Сопиште бара од Здружението за духовно обединување на Сетинци, Попадинци и Крушоради, да им го отстапат споменикот на Андон Јанев Ќосето, откако Град Скопје го отстрани пред Судска палата тврдејќи дека е дивоградба.

Ова одлука општината ја донела по денешната седница на Советот на која било одлучено доколку Здружението им го даде споменикот, тој да биде поставен на кружниот тек во селото.

„Доколку ова наше барање биде прифатено, споменикот би се поставил на кружниот тек во село Сопиште, кој беше изграден при изградба на регионалниот пат кој го поврзува Сопиште со Сончев Град и Градот Скопје, а кој простор се уште не е доуреден. Барањето го поднесуваме согласно донесена Одлука од страна на Советот на општина Сопиште на седница одржана на ден 27.02.2018 година. Се надеваме на позитивен одговор од Ваша Страна“, стои во барањето до Здружението.


Зимската служба на Град Скопје фрлила 288 тони сол


Скопје, 27 февруари, 2018 - 13:30 (META) 

Екипите на зимската служба на Град Скопје вчера од 17 часот до 7 часот утрово фрлиле 288 тони индустриска сол на сите булевари и улици што се во надлежност на Градот, информираат од таму.

Од градската администрација велат дека на терен се интервенира со механизацијата на јавното претпријатие „Улици и патишта“, односно со 16 возила на зимска служба и три грејдери.

Екипите на „Комунална хигиена“ и „Паркови и зеленило“ со луѓе и механизација работеле на расчистување на тротоарите и на јавните површини што се во надлежност на Градот Скопје.

Екипите на „Комунална хигиена“ интервенирале на повеќе локации со 125 работници и механизација составена од четири трактора со специјални четки за снег, еден трактор со специјални ножеви за снег, два мотокултиватора, како и две патарки за расфрлање сол.